ಗಂಡನ ಅಪಹರಣ: ಪತ್ನಿ ದೂರು

ಬೈಂದೂರು: ಮೊದಲ ಪತ್ನಿ ಮತ್ತು ಆಕೆಯ ಮಗ, ಗಂಡನನ್ನು ಅಪಹರಿಸಿರುವುದಾಗಿ ಬೈಂದೂರಿನ ಜಹೀದಾ ಗುರುವಾರ ಬೈಂದೂರು ಪೊಲೀಸರಿಗೆ ದೂರು ನೀಡಿದ್ದಾರೆ. ಪತಿ ಖಲೀಲ್ ನೂರ್ ಮಹಮದ್ 16 ವರ್ಷದ ಹಿಂದೆ ಬೆಂಗಳೂರಿನ ಶಹೀದಾ ಪರ್ವಿನ್ ಅವರೊಂದಿಗೆ ವಿವಾಹವಾಗಿದ್ದು ಗಂಡು ಮಗು ಜನಿಸಿತ್ತು. 6 ವರ್ಷದ ಹಿಂದೆ ಪರಸ್ಪರ ದೂರವಾಗಿದ್ದರು. ಡಿ.11ರಂದು ವಿಚ್ಚೇದಿತ ಪತ್ನಿ ಮತ್ತು ಮಗ ಬೈಂದೂರು ಪಡುವರಿ ಎಚ್‌ಎಂಎಂಎಸ್ ಶಾಲೆ ಬಳಿ ನಿಂತಿದ್ದ ಗಂಡನನ್ನು ಅವರ ಮೊದಲ ಪತ್ನಿ ಮತ್ತು ಮಗ ಇತರೆ ನಾಲ್ವರು ನೀಲಿ ಬಣ್ಣದ ಮಾರುತಿ ಸ್ವಿಪ್ಟ್ ಕಾರಿನಲ್ಲಿ ಅಪಹರಿಸಿದ್ದಾರೆ ಎಂದು ಖಲೀಲ್ ಅವರ ಎರಡನೆ ಪತ್ನಿ ಜಹೀದಾ ದೂರಿನಲ್ಲಿ ತಿಳಿಸಿದ್ದಾರೆ. ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ರಿಕ್ಷಾಕ್ಕೆ ಲಾರಿ ಹಿಂದಿನಿಂದ ಡಿಕ್ಕಿ

ಕುಂದಾಪುರ: ಇಲ್ಲಿನ ಹೇರಿಕುದ್ರು ಸೇತುವೆ ಬಳಿ ಲಾರಿ ಹಿಂದಿನಿಂದ ಗುದ್ದಿದ ಪರಿಣಾಮ ಕುಂದಾಪುರದಿಂದ ಉಪ್ಪುಂದಕ್ಕೆ ತೆರಳುತ್ತಿದ್ದ ಆಟೋ ರಿಕ್ಷಾ ಸೇತುವೆ ಬಳಿಯ ಪ್ರಪಾತಕ್ಕೆ ಬಿದ್ದ ಘಟನೆ ವರದಿಯಾಗ. ಆಟೋದಲ್ಲಿ ಪಯಣಿಸುತ್ತಿದ್ದ ತಂದೆ ಮಗ ಅಪಾಯದಿಂದ ಪಾರಾಗಿದ್ದಾರೆ.
     ಮಧ್ಯಾಹ್ನ 2:30ರ ಸುಮಾರಿಗೆ ಕುಂದಾಪುರದಿಂದ ಉಪ್ಪುಂದದ ಕಡೆಗೆ ಸಾಗುತ್ತಿದ್ದ ರಿಕ್ಷಾ ಎದುರು ಓವರ್‌ಟೇಕ್ ಮಾಡುತ್ತಿದ್ದ ಬಸ್‌ಗೆ ಸೈಡ್ ನೀಡುತ್ತಿರುವಾಗ ಹಿಂದಿನಿಂದ ಬಂದ ಲಾರಿಯು ರಿಕ್ಷಾಕ್ಕೆ ಢಿಕ್ಕಿ ಹೊಡೆದ ರಭಸಕ್ಕೆ ರಿಕ್ಷಾ ಹೆರಿಕುದ್ರು ಸೇತುವೆ ಬಳಿಯ ಅಪಾಯಕಾರಿ ಪ್ರಪಾತಕ್ಕೆ ಬಿದ್ದಿದೆ.

ಶಾಲಾ ವಾಹನ ಮಗುಚಿ ಮೂವರು ಗಂಬೀರ

ಬೈಂದೂರು: ಇಲ್ಲಿನ ಎಚ್.ಎಂ.ಎಂ.ಎಸ್ ಶಾಲಾ ವಾಹನ  ಬೆಳಿಗ್ಗೆ 8.30ರ ಹೊತ್ತಿಗೆ  ಮಕ್ಕಳನ್ನುಶಾಲೆಗೆ ಕರೆದೊಯ್ಯತ್ತಿದ್ದ ವೇಳೆ ಒತ್ತಿನೆಣೆ ತಿರುವಿನಲ್ಲಿ ಮಗುಚಿ ಬಿದ್ದು 3 ಮಕ್ಕಳು ಗಂಭೀರ ಹಾಗೂ 25ಕ್ಕೂ ಹೆಚ್ಚು ಮಕ್ಕಳು ಗಾಯಗೊಂಡಿರುವ ಘಟನೆ ನಡೆದಿದೆ.
     ಗಂಭೀರ ಗಾಯಗೊಂಡಿದ್ದ ಮಕ್ಕಳಾದ ವಿದಾತ್, ಶಾರುಖ್, ಅಫಾನ್ ಇವರನ್ನು ಮಣಿಪಾಲ ಕೆ.ಎಮ್.ಸಿ ಆಸ್ಪತ್ರೆಗೆ  ದಾಖಲಿಸಲಾಗಿದೆ. ಸಣ್ಣಪುಟ್ಟ ಗಾಯಾಳುಗಳನ್ನು ಕುಂದಾಪುರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ  ಬೈಂದೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.


ಉದ್ಯಮಿ ಅಶೋಕ್ ಶೇಟ್ ನಿಧನ

ಕುಂದಾಪುರ: ಇಲ್ಲಿನ ಪ್ರಸಿದ್ಧ ಉದ್ಯಮಿ ಶೇಟ್ ಜ್ಯೂವೆಲರ್ಸ್ ಹಾಗೂ ಶೇಟ್ ಟವರ್ಸ್ ನ ಮಾಲಕ ಅಶೋಕ್ ಶೇಟ್  ರಾತ್ರಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ.  
    ಮಗಳ ಮದುವೆಯ ಆಮಂತ್ರಣ ಪತ್ರಿಕೆಗಳನ್ನು ನೀಡಲು ಮಂಗಳೂರಿಗೆ ಹೋಗಿದ್ದಾಗ ಅಸ್ವಸ್ಥರಾದ ಅಶೋಕ್ ಶೇಟ್ ಕುಂದಾಪುರಕ್ಕೆ ಮರಳಿದ ಬಳಿಕವೂ  ಅವರ ಆರೋಗ್ಯದಲ್ಲಿ ತೀವ್ರ ಏರುಪೇರು ಉಂಟಾಗಿತ್ತು. 
    ಅಶೋಕ್ ಶೇಟ್  ಸಂಘ ಸಂಸ್ಥೆಗಳಲ್ಲಿ ಸಕ್ರಿಯರಾಗಿ ದುಡಿದಿದ್ದರು.

ಬಾಲಕಿಗೆ ಲೈಂಗಿಕ ಕಿರುಕುಳ: ಆರೋಪಿಗೆ ನ್ಯಾಯಾಂಗ ಬಂಧನ

ಕುಂದಾಪುರ: ಕೊಲ್ಲೂರು ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ 2ನೇ ತರಗತಿ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಬಂಧಿಸಲ್ಪಟ್ಟ ದೈಹಿಕ ಶಿಕ್ಷಣ ಶಿಕ್ಷಕ ಶಾಂತಪ್ಪ ಅವರಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಬುಧವಾರ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು ಡಿ. 17ರ ತನಕ ನ್ಯಾಯಾಂಗ ಬಂಧನ ವಿಧಿಸಿ ನ್ಯಾಯಾಲಯ ಆದೇಶಿಸಿದೆ.

ಗಂಗೊಳ್ಳಿಯಲ್ಲಿ ಬೃಹತ್ ಪ್ರತಿಭಟನೆ, ಬಂದ್, ಜನಜೀವನ ಅಸ್ತವ್ಯಸ್ಥ

ಗಂಗೊಳ್ಳಿ: ಇಲ್ಲಿಯ ಗುಡ್ಡೆಕೇರಿಯ ಇಬ್ಬರು ಅಯ್ಯಪ್ಪ ವ್ರತಧಾರಿಗಳು ಸೇರಿದಂತೆ ಮೂವರ ಬಂಧನ ಖಂಡಿಸಿ ಗಂಗೊಳ್ಳಿ ನಾಗರಿಕರು ಗುರುವಾರ ಬೆಳಗ್ಗೆ ಬೀದಿಗಿಳಿದು ಬಹತ್ ಪ್ರತಿಭಟನೆ ನಡೆಸಿದರು. ಪ್ರತಿಭಟನೆ ಬಿಸಿ ಹಲವೆಡೆ ಹಬ್ಬಿದ್ದು ಗಂಗೊಳ್ಳಿ, ತ್ರಾಸಿ, ಮುಳ್ಳಿಕಟ್ಟೆ, ನಾಯಕವಾಡಿ, ಗುಜ್ಜಾಡಿ ಸೇರಿದಂತೆ ಸುತ್ತಮುತ್ತಲ ಪ್ರದೇಶಗಳಲ್ಲಿ ನಾಗರಿಕರು ಸ್ವಯಂಪ್ರೇರಿತ ಬಂದ್ ನಡೆಸಿದರು.

ಬೃಹತ್ ಸಂಖ್ಯೆಯಲ್ಲಿ ಹರಿದುಬಂದ ಪ್ರತಿಭಟನಾಕಾರರು ಗಂಗೊಳ್ಳಿ ಬಂದರು ಪ್ರದೇಶದಿಂದ ಸರಿಸುಮಾರು 7ಕಿಲೋ ಮೀಟರ್ ದೂರದಲ್ಲಿರುವ ತ್ರಾಸಿ ಸಮೀಪ ಗಂಗೊಳ್ಳಿ ಪೊಲೀಸ್ ಠಾಣೆ ತನಕ ಕಾಲ್ನಡಿಗೆಯಲ್ಲಿ ಸಾಗಿ ಠಾಣೆಗೆ ಮುತ್ತಿಗೆ ಹಾಕಿದರು. ಠಾಣೆಯ ಹೊರಭಾಗದಲ್ಲಿ ಬ್ಯಾರಿಕೇಡ್ ಉರುಳಿಸಿ ನುಗ್ಗಿದರು. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ರಾಜೇಂದ್ರ ಪ್ರಸಾದ್ ಉದ್ರಿಕ್ತ ನಾಗರಿಕರನ್ನು ಸಮಾಧಾನಪಡಿಸಲು ಮುಂದಾದರು ಫಲ ನೀಡಲಿಲ್ಲ. 10 ಸಾವಿರಕ್ಕೂ ಅಧಿಕ ಮಂದಿ ನಾಗರಿಕರು ಠಾಣೆ ಎದುರು ಪೊಲೀಸರ ವಿರುದ್ಧ ಧಿಕ್ಕಾರ ಕೂಗಿದರು. ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದರು.

ಪ್ರತಿಭಟನಾಕಾರರ ಪರವಾಗಿ ಉಡುಪಿ ಜಿಲ್ಲಾ ಬಿಜೆಪಿ ಅಧ್ಯಕ್ಷ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಕುಂದಾಪುರ ಕ್ಷೇತ್ರ ಬಿಜೆಪಿ ಅಧ್ಯಕ್ಷ ರಾಜೇಶ ಕಾವೇರಿ, ಬೈಂದೂರು ಮಾಜಿ ಶಾಸಕ ಕೆ.ಲಕ್ಷ್ಮೀನಾರಾಯಣ, ಬೈಂದೂರು ಕ್ಷೇತ್ರ ಬಿಜೆಪಿ ಅಧ್ಯಕ್ಷ ಬಿ.ಎಂ.ಸುಕುಮಾರ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಸದಾನಂದ ಶೇರೆಗಾರ್, ಆರ್‌ಎಸ್‌ಎಸ್ ಪ್ರಮುಖರಾದ ಸುಬ್ರಹ್ಮಣ್ಯ ಹೊಳ್ಳ
ಶಂಭು ಶೆಟ್ಟಿ, ಹಿಂದೂ ಜಾಗರಣ ವೇದಿಕೆಯ ಸತ್ಯಜಿತ್ ಸುರತ್ಕಲ್, ಧನಂಜಯ್, ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ಶಂಕರ ಅಂಕದಕಟ್ಟೆ, ಬಜರಂಗದಳ ಮುಖಂಡ ಗಿರೀಶ್ ಕುಂದಾಪುರ, ಬಿಜೆಪಿ ಮುಖಂಡರಾದ ಪುಷ್ಪರಾಜ್ ಶೆಟ್ಟಿ, ಸದಾಶಿವ ಪಡುವರಿ, ಸುರೇಶ್ ಶೆಟ್ಟಿ ಮೊದಲಾದವರು ಎಸ್ಪಿ ರಾಜೇಂದ್ರ ಪ್ರಸಾದ್, ಎಡಿಶನಲ್ ಎಸ್ಪಿ ಸಂತೋಷ್‌ಕುಮಾರ್, ಸಹಾಯಕ ಕಮಿಷನರ್ ಚಾರುಲತಾ ಸೋಮಲ್, ತಹಸೀಲ್ದಾರ ಗಾಯತ್ರಿ ಎನ್.ನಾಯಕ್ ಅವರೊಂದಿಗೆ ಸಂಧಾನ ಮಾತುಕತೆ ನಡೆಸಿದರು. ವಶಕ್ಕೆ ತೆಗೆದುಕೊಂಡಿರುವ ಮೂವರ ಪೈಕಿ ಇಬ್ಬರನ್ನು ಈಗಾಗಲೆ ವಿಚಾರಣೆ ನಡೆಸಿ ಬಿಡುಗಡೆಗೊಳಿಸಲಾಗಿದೆ. ಒಬ್ಬ ಆರೋಪಿ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ನ್ಯಾಯಾಂಗಕ್ಕೆ ವಿಷಯ ಮನವರಿಕೆ ಮಾಡಿಸಿ ಬಿಡುಗಡೆಗೆ ಯತ್ನಿಸಲಾಗುವುದು ಪೊಲೀಸರು ಸಮ್ಮತಿ ಸೂಚಿಸಿದ ಬಳಿಕ ಪ್ರತಿಭಟನೆ ಹಿಂಪಡೆದುಕೊಳ್ಳಲಾಯಿತು. ಪ್ರತಿಭಟನಾಕಾರರು ಎರಡೂವರೆ ತಾಸು ಪ್ರತಿಭಟನೆ ನಡೆಸಿದರು. ಮಾತನಾಡಿದ ನಾಯಕರು ಪೊಲೀಸರ ಕಾರ್ಯವೈಖರಿ ಟೀಕಿಸಿದರು. ಮಹಿಳೆಯರು ಪೊಲೀಸರನ್ನು ತರಾಟೆಗೆ ತೆಗೆದುಕೊಂಡರು. ಠಾಣೆಯಿಂದ ನಿರ್ಗಮಿಸಿದ ಪ್ರತಿಭಟನಾಕಾರರು ಬಳಿಕ ಹೋರಾಟವನ್ನು ರಾಷ್ಟ್ರೀಯ ಹೆದ್ದಾರಿಗೆ ವಿಸ್ತರಿಸಿದರು. ತ್ರಾಸಿ, ಮುಳ್ಳಿಕಟ್ಟೆ ಜಂಕ್ಷನ್‌ನಲ್ಲಿ ಹೆದ್ದಾರಿ ತಡೆ ನಡೆಸಿದರು.
ಅಣ್ಣಾಮಲೈ ಕ್ಷಮೆ ಕೇಳಬೇಕು: ಅಯ್ಯಪ್ಪ ಮಾಲಾಧಾರಿ ಸೇರಿದಂತೆ ಮೂವರನ್ನು ಬಂಧಿಸಿ ಅವರ ಮೇಲೆ ಹಲ್ಲೆ ನಡೆಸಿರುವ ಎಎಸ್ಪಿ ಅಣ್ಣಾಮಲೈ ತಮ್ಮೆದುರಿಗೆ ತಂದು ನಿಲ್ಲಿಸಬೇಕು, ಅವರು ಬಂದು ಕ್ಷಮೆ ಕೇಳದ ಹೊರತು ಹೆದ್ದಾರಿ ತಡೆ ಮುಂದುವರಿಸುವೆವು ಎಂದು ಪ್ರತಿಭಟನಾಕಾರರು ಪಟ್ಟು ಹಿಡಿದಿದ್ದು ಗೊಂದಲಕ್ಕೆ ಕಾರಣವಾಯಿತು. ಹೆದ್ದಾರಿ ತಡೆಯ ಬಿಸಿ ಕುಂದಾಪುರದವರೆಗೂ ವಿಸ್ತರಿಸಿತು. ಬೈಂದೂರು-ಕುಂದಾಪುರ ನಡುವಿನ ಸಂಪರ್ಕ ಸಂಪೂರ್ಣ ಮೊಟಕುಗೊಂಡಿತು. ಅಂಬ್ಯುಲೆನ್ಸ್ ಸೇರಿದಂತೆ ತುರ್ತು ಕಾರ್ಯಕ್ಕೆ ಸಾಗುವವರು ಅಡಕತ್ತರಿಗೆ ಸಿಲುಕಿದರು. ಅನೇಕ ಮಹಿಳೆಯರು, ಮಕ್ಕಳು ಹೆದ್ದಾರಿಯಲ್ಲಿ ಕಾಲ ಕಳೆಯುವಂತಾಯಿತು. ಊಟ, ಉಪಹಾರಕ್ಕೆ ಅದ್ವಾನ ಪಡುವಂತಾಯಿತು. ಉರಿಬಿಸಿಲಿಗೆ ಹೆದ್ದಾರಿ ಪ್ರಯಾಣಿಕರು ಕಂಗಲಾಗುವಂತಾಯಿತು. ರಾಷ್ಟ್ರೀಯ ಹೆದ್ದಾರಿ ವಿವಿದೆಡೆ ಪ್ರತಿಭಟನಾಕಾರರು ವಾಹನ ತಡೆಗಟ್ಟಿ ಉಪದ್ರವ ನೀಡಿರುವುದು ಹೆದ್ದಾರಿ ಪ್ರಯಾಣಿಕರ ಆಕ್ರೋಶಕ್ಕೆ ಕಾರಣವಾಯಿತು. ಹೆದ್ದಾರಿ ತಡೆ ನಡೆಸುವವರಲ್ಲಿಗೆ ಹಿರಿಯ ಪೊಲೀಸ್ ಅಧಿಕಾರಿಗಳು ತೆರಳಿ ಮನವೊಲಿಸಿದ ಮೇಲೆ ನಾಗರಿಕರು ಹೆದ್ದಾರಿ ತಡೆಯಿಂದ ಹಿಂದೆ ಸರಿದರು. ಬಳಿಕ ಅಣ್ಣಪ್ಪಯ್ಯ ಸಭಾಭವನದಲ್ಲಿ ಗಂಗೊಳ್ಳಿಯ ವಿವಿಧ ಸಂಘಟನೆಯ ಮುಖಂಡರು, ಹಿಂದೂಪರ ಸಂಘಟನೆ ನೇತಾರರು ಹಾಗೂ ಪೊಲೀಸ್ ಅಧಿಕಾರಿಗಳ ನಡುವೆ ಮಾತುಕತೆ ನಡೆಯಿತು.

ಗಂಗೊಳ್ಳಿ ಸಂಪೂರ್ಣ ಬಂದ್: ಗಂಗೊಳ್ಳಿಯಲ್ಲಿ ಅಂಗಡಿಮುಂಗಟ್ಟುಗಳು ಎಲ್ಲವೂ ಮುಚ್ಚಲ್ಪಟ್ಟಿದ್ದವು. 1993ರ ಬಳಿಕ ದೊಡ್ಡ ಪ್ರಮಾಣದ ಪ್ರತಿಭಟನೆ ಹಿಂದೆಂದೂ ನಡೆದಿಲ್ಲ ಎಂದು ಗಂಗೊಳ್ಳಿಯ ಹಿರಿಯ ನಾಗರಿಕರು ಅಭಿಪ್ರಾಯಪಟ್ಟರು. ಪ್ರತಿಭಟನೆ ಮೆರವಣಿಗೆ ಸಾಗುತ್ತಿರುವಾಗಲೆ ಗಂಗೊಳ್ಳಿ ರಾಮಮಂದಿರ ಸಮೀಪದ ಖಾಜಾ ಸಾಹೇಬ್ ಎಂಬವರ ಮನೆಗೆ ಹಾಗೂ ತ್ರಾಸಿ ಜಂಕ್ಷನ್ ಸಮೀಪದ ಗ್ರ್ಯಾನೈಟ್ ಅಂಗಡಿಗೆ ಕಲ್ಲು ತೂರಾಟ ನಡೆಯಿತು. ಪೊಲೀಸರ ತತ್‌ಕ್ಷಣ ಮಧ್ಯಪ್ರವೇಶಿಸಿ ಪರಿಸ್ಥಿತಿ ತಿಳಿಗೊಳಿಸಿದರು.


ಗಂಗೊಳ್ಳಿಯಲ್ಲಿ ನಡೆದಿರುವ ವಿದ್ಯಮಾನಕ್ಕೆ ಸಂಬಂಧಿಸಿದಂತೆ ಬಂಧಿಸಲ್ಪಟ್ಟಿರುವ ಹಿಂದೂಪರ ಸಂಘಟನೆ ಕಾರ್ಯಕರ್ತರಾದ ಶ್ರೀಧರ ಮತ್ತು ವಾಸುದೇವ ದೇವಾಡಿಗ ಅವರನ್ನು ಗುರುವಾರ ಸಂಜೆ ವೇಳೆ ಬಿಡುಗಡೆಗೊಳಿಸಲಾಗಿದೆ. ಬುಧವಾರ ರಾತ್ರಿ ಪೊಲೀಸರು ವಶಕ್ಕೆ ತೆಗೆದುಕೊಂಡಿರುವ ಗುರುರಾಜ್ ಮತ್ತು ಅರುಣ್ ಅವರನ್ನು ಸಹ ಬಂಧಮುಕ್ತಗೊಳಿಸಲಾಗಿದೆ. ಕಳೆದ ಗುರುವಾರ ರಾತ್ರಿಯಿಂದ ಈ ತನಕ ಗಂಗೊಳ್ಳಿಯಲ್ಲಿ ನಡೆದಿರುವ ತ್ವೇಷಮಯ ವಾತಾವರಣ ಈಗಲೂ ಮುಂದುವರಿದಿದ್ದು, ಎಲ್ಲೆಡೆ ಬಿಗಿ ಪೊಲೀಸ್ ಪಹರೆ ಹಾಕಲಾಗಿದೆ. 

ಬೂದಿ ಮುಚ್ಚಿದ ಕೆಂಡದಂತಿರುವ ಗಂಗೊಳ್ಳಿಯಾದ್ಯಂತ ಜಿಲ್ಲೆಯ ವಿವಿಧ ಠಾಣೆಯ ಠಾಣಾಧಿಕಾರಿಗಳು, ಹೆಚ್ಚುವರಿ ಪೊಲೀಸರು ಠಿಕಾಣಿ ಹೂಡಿದ್ದಾರೆ. ಡಿಆರ್ ಪೊಲೀಸ್ ಪಡೆ, ವಿಶೇಷ ಪೊಲೀಸ್ ಪಡೆ, ಕ್ಷಿಪ್ರ ಕಾರ್ಯಾಚರಣೆ ಪಡೆಯ ಪೊಲೀಸರು ಭದ್ರತೆಗೆ ನಿಯೋಜನೆಗೊಂಡಿದ್ದಾರೆ. ಶಾಂತಿ, ಸುವ್ಯವಸ್ಥೆಗೆ ಒತ್ತು ನೀಡುವ ದೆಸೆಯಿಂದ ಎಲ್ಲಾ ರೀತಿಯ ಕ್ರಮ ತೆಗೆದುಕೊಂಡಿದ್ದು, ಸಹನೆ ಮೀರಿ ನಾಗರಿಕ ಶಾಂತಿಭಂಗಕ್ಕೆ ಧಕ್ಕೆಯುಂಟಾದಲ್ಲಿ ಸುಮ್ಮನೆ ಕೂರುವುದಿಲ್ಲ ಎಂದು ಎಸ್ಪಿ ರಾಜೇಂದ್ರ ಪ್ರಸಾದ್ ತಿಳಿಸಿದ್ದಾರೆ. 

ಠಾಣೆ ಎದುರು ಬಹತ್ ಪ್ರತಿಭಟನೆ: ಒಂದು ವಾರದ ಈಚೆ ಗಂಗೊಳ್ಳಿಯಲ್ಲಿ ನಡೆದಿರುವ ವಿದ್ಯಮಾನಕ್ಕೆ ಸಂಬಂಧಿಸಿದಂತೆ ಪೊಲೀಸರು ಬಂಧಿಸಿರುವ ನಿರಪರಾಧಿಗಳನ್ನು ತಕ್ಷಣ ಬಿಡುಗಡೆಗೊಳಿಸುವಂತೆ ಆಗ್ರಹಿಸಿ ಗಂಗೊಳ್ಳಿ ನಾಗರಿಕರು ಗಂಗೊಳ್ಳಿ ಠಾಣೆ ಎದುರು ಗುರುವಾರ ಬೆಳಗ್ಗೆ ಬಹತ್ ಪ್ರತಿಭಟನೆ ನಡೆಸಿದರು. ಗಂಗೊಳ್ಳಿ ಬಂದರಿನಿಂದ ತ್ರಾಸಿ ಸಮೀಪದ ಗಂಗೊಳ್ಳಿ ಪೊಲೀಸ್ ಠಾಣೆ ತನಕ ಕಾಲ್ನಡಿಗೆಯಲ್ಲಿ ಸಾಗಿಬಂದ 10 ಸಾವಿರಕ್ಕೂ ಅಧಿಕ ಮಂದಿ ನಾಗರಿಕರು ಬಂಧಿತ ಶ್ರೀಧರ ಯಾನೆ ಸಿದ್ಧು ಮತ್ತು ವಾಸುದೇವ ದೇವಾಡಿಗ ಅವರನ್ನು ತಕ್ಷಣ ಬಿಡುಗಡೆಗೊಳಿಸುವಂತೆ ಒತ್ತಾಯಿಸಿದರು. 

ಗಂಗೊಳ್ಳಿಯಲ್ಲಿ ನಡೆಯುತ್ತಿರುವ ಘಟನೆಗಳಿಗೆ ಸಂಬಂಧ ಇಲ್ಲದವರನ್ನು ಬಂಧಿಸಲಾಗಿರುವ ಕೊಲ್ಲೂರು ದೇವಳದ ಪಾರ್ಕಿಂಗ್ ನಿರ್ವಹಣೆ ಕೆಲಸ ಮಾಡಿಕೊಂಡಿರುವ ವಾಸುದೇವ ದೇವಾಡಿಗ, ಶ್ರೀಧರ ಬಿಡುಗಡೆ ಮಾಡಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು. ಪತ್ರಕರ್ತ ರಾಘವೇಂದ್ರ ಪೈಯವರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವುದು ,ಬುಧವಾರ ರಾತ್ರಿ ಅಯ್ಯಪ್ಪವ್ರತಧಾರಿಗಳಾದ ಗುರುರಾಜ್ ಮತ್ತು ಅರುಣ್ ಅವರಿಗೆ ಹಿಂಸೆ ನೀಡಿ ಚಪ್ಪರದಿಂದ ಎತ್ತಿಕೊಂಡು ಹೋಗಿರುವುದಕ್ಕೆ ಆಕ್ರೋಶ ವ್ಯಕ್ತಪಡಿಸಲಾಯಿತು. ಗಂಗೊಳ್ಳಿಗೆ ವಿಶೇಷ ಕರ್ತವ್ಯದ ಮೇಲೆ ನಿಯುಕ್ತಿಗೊಂಡಿರುವ ಎಎಸ್ಪಿ ಅಣ್ಣಾಮಲೈ, ಗಂಗೊಳ್ಳಿ ಠಾಣಾಧಿಕಾರಿ ಗೋವರ್ಧನ್ ಅಮಾಯಕರನ್ನು ಬಂಧಿಸುತ್ತಿದ್ದಾರೆ ಎಂದು ದೂರಿದರು. 

ಪ್ರತಿಭಟನೆಯಲ್ಲಿ ಮಾಜಿ ಶಾಸಕ ಕೆ.ಲಕ್ಷ್ಮೀನಾರಾಯಣ, ಉಡುಪಿ ಜಿಲ್ಲಾ ಬಿಜೆಪಿ ಅಧ್ಯಕ್ಷ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಬಿಜೆಪಿ ಮುಖಂಡರಾದ ಮಟ್ಟಾರು ರತ್ನಾಕರ ಹೆಗ್ಡೆ, ಬಿ.ಎಂ.ಸುಕುಮಾರ ಶೆಟ್ಟಿ, ರಾಜೇಶ್ ಕಾವೇರಿ, ಸದಾನಂದ ಶೇರೆಗಾರ್, ಸುರೇಶ್ ಶೆಟ್ಟಿ, ದೀಪಕ್ ಶೆಟ್ಟಿ, ಗುರುರಾಜ್ ಗಂಟಿಹೊಳೆ, ಪುಷ್ಪರಾಜ್ ಶೆಟ್ಟಿ, ಶಂಕರ ಅಂಕದಕಟ್ಟೆ, ಹಿಂದೂ ಪರ ಸಂಘಟನೆಗಳ ಮುಖಂಡರಾದ ಸುಬ್ರಹ್ಮಣ್ಯ ಹೊಳ್ಳ, ಗಿರೀಶ್ ಕುಂದಾಪುರ, ಧನಂಜಯ್ ಕುಂದಾಪುರ, ಅರವಿಂದ ಕೋಟೇಶ್ವರ, ಗೋವಿಂದ್ರಾಯ ಶೇರುಗಾರ್ ಗಂಗೊಳ್ಳಿ, ಸ್ಥಳೀಯ ಮುಖಂಡರಾದ ರಾಮಪ್ಪ ಖಾರ್ವಿ, ಗಂಗೊಳ್ಳಿ ಗ್ರಾ.ಪಂ.ಅಧ್ಯಕ್ಷೆ ರೇಷ್ಮಾ ಖಾರ್ವಿ ಮೊದಲಾದವರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು. 

ಬ್ಯಾರಿಕೇಡ್ ಧ್ವಂಸ: ಠಾಣೆ ಮುತ್ತಿಗೆ ಹಿನ್ನೆಲೆಯಲ್ಲಿ ಗಂಗೊಳ್ಳಿ ಪೊಲೀಸ್ ಠಾಣೆ ಎದುರು ಬಿಗಿ ಭದ್ರತೆ ಕೈಗೊಳ್ಳಲಾಗಿತ್ತು. ಎಸ್ಪಿ ರಾಜೇಂದ್ರಕುಮಾರ್, ಎಡಿಶನಲ್ ಎಸ್ಪಿ ಸಂತೋಷ್‌ಕುಮಾರ್, ಸಹಾಯಕ ಕಮಿಷನರ್ ಚಾರುಲತಾ ಸೋಮಲ್, ತಹಸೀಲ್ದಾರ ಗಾಯತ್ರಿ ಎನ್.ನಾಯಕ್ ಸೇರಿದಂತೆ ಅಧಿಕಾರಿಗಳು ನಾಗರಿಕರ ಮನವಿ ಸ್ವೀಕಾರಕ್ಕೆ ಸಿದ್ಧತೆ ಮಾಡಿಕೊಂಡಿದ್ದರು. ಆಕ್ರೋಶಿತ ನಾಗರಿಕರು ಅಧಿಕಾರಿಗಳು ಮನವಿ ಸ್ವೀಕರಿಸುವ ಮೊದಲೆ ಭದ್ರತೆಗೆಂದು ಅಳವಡಿಸಲಾಗಿದ್ದ ಬ್ಯಾರಿಕೇಡ್ ಮುರಿದು ಠಾಣೆ ಒಳಗಡೆ ನುಗ್ಗಲು ಯತ್ನಿಸಿದರು. ಪೊಲೀಸ್ ಪಡೆ ಬಿಗಿ ಕಾರ್ಯಾಚರಣೆ ಹಿನ್ನೆಲೆಯಲ್ಲಿ ಪ್ರಯತ್ನ ಕೈಗೂಡಲಿಲ್ಲ. ಠಾಣೆ ಹೊರಗಡೆ ಸಾವಿರಾರು ಮಂದಿಯನ್ನು ತಡೆಯಲಾಯಿತು. 

ಸ್ವಯಂ ಪ್ರೇರಿತ ಬಂದ್: ಬಂಧನ ಖಂಡಿಸಿ ಗಂಗೊಳ್ಳಿ ನಾಗರಿಕರು ಹಮ್ಮಿಕೊಂಡ ಬಹತ್ ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಗಂಗೊಳ್ಳಿಯಲ್ಲಿ ಸ್ವಯಂಪ್ರೇರಿತ ಬಂದ್ ನಡೆಯಿತು. ಬಂದ್‌ನ ಪ್ರಕೋಪ ತ್ರಾಸಿ, ಮುಳ್ಳಿಕಟ್ಟೆ ತನಕ ವಿಸ್ತರಿಸಿತ್ತು. ಸದಾ ಜಿನುಗುಡುವ ಗಂಗೊಳ್ಳಿ, ತ್ರಾಸಿ, ಮುಳ್ಳಿಕಟ್ಟೆ ಪ್ರದೇಶಗಳು ಬಿಕೊ ಎನ್ನುತ್ತಿದ್ದವು. ಗಂಗೊಳ್ಳಿ ಮೀನುಗಾರರು ಮೀನುಗಾರಿಕೆ ಸ್ಥಗಿತಗೊಳಿಸಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡರು. ಗಂಗೊಳ್ಳಿ ಕಿರುಬಂದರು ಪ್ರದೇಶ ಚಟುವಟಿಕೆ ರಹಿತವಾಗಿತ್ತು. ಅಂಗಡಿ ಮುಂಗಟ್ಟುಗಳು ಸಂಪೂರ್ಣವಾಗಿ ಮುಚ್ಚಲ್ಪಟ್ಟಿದ್ದವು. ದೋಣಿಗಳು ಬಂದರಿನಲ್ಲಿ ಲಂಗರು ಹೂಡಿದ್ದವು. 

ದಿನವಿಡಿ ನಡೆದ ಹೆದ್ದಾರಿ ತಡೆ: ಪೊಲೀಸ್ ಅಧಿಕಾರಿಗಳೊಂದಿಗಿನ ಸಂಧಾನ ಮಾತುಕತೆಯ ಬಳಿಕ ಠಾಣೆಯಿಂದ ನಿರ್ಗಮಿಸಿದ ಸಹಸ್ರಾರು ಪ್ರತಿಭಟನಾಕಾರರು ಬಂಧಿತರು ಮರಳಿ ಊರು ಸೇರುವ ತನಕ ಕದಲುವುದಿಲ್ಲ ಎಂದು ಪಟ್ಟು ಹಿಡಿದು ತ್ರಾಸಿ ಜಂಕ್ಷನ್, ಮುಳ್ಳಿಕಟ್ಟೆ ಜಂಕ್ಷನ್‌ನಲ್ಲಿ ದಿನವಿಡಿ ಹೆದ್ದಾರಿ ತಡೆ ನಡೆಸಿದರು. ಬೆಳಗ್ಗೆ 11.30ರಿಂದ ಆರಂಭಗೊಂಡ ಹೆದ್ದಾರಿ ತಡೆ ಅಪರಾಹ್ನ 2.30ಗಂಟೆ ತನಕ ನಡೆಯಿತು. ಬಳಿಕ ಮುಖಂಡರು, ಪೊಲೀಸರ ನಡುವೆ ಇನ್ನೊಂದು ಸುತ್ತಿನ ಮಾತುಕತೆ ನಡೆಯಿತು. ತಣ್ಣಗಾಗದ ಪ್ರತಿಭಟನಾಕಾರರು ಮತ್ತೆ ಹೆದ್ದಾರಿ ತಡೆ ನಡೆಸಿದರು. ಸಂಜೆ 5ಗಂಟೆ ತನಕ ಹೋರಾಟ ಮುಂದುವರಿಸಿದ ಬಳಿಕ ಪೊಲೀಸರು ಬಂಧಿತರನ್ನು ಬಿಡುಗಡೆಗೊಳಿಸುವ ಭರವಸೆ ನೀಡಿದರು. ಪೊಲೀಸರ ಭರವಸೆಯ ಮೇರೆಗೆ ಪ್ರತಿಭಟನೆ ಹಿಂಪಡೆದ ನಾಗರಿಕರು ಪಟಾಕಿ ಸಿಡಿಸಿ ಸಂಭ್ರಮಿಸಿದರು. 

 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com