ನಾನು ದೇವಾಡಿಗನೆನಿಸಿಕೊಳ್ಳಲು ಹೆಮ್ಮೆ ಪಡುತ್ತೇನೆ: ಮೊಯ್ಲಿ

ಉಡುಪಿ: ನಾನು ದೇವಾಡಿಗ ಎನಿಸಿಕೊಳ್ಳಲು ಹೆಮ್ಮೆ ಪಡುತ್ತೇನೆ. ಸಮಾಜದಲ್ಲಿ ಇಷ್ಟೊಂದು ಮೇಲ್ಮಟಕ್ಕೇರಲು ತನ್ನಲ್ಲಿ ಸತ್ಯ, ನಿಷ್ಠೆ, ಹೋರಾಟದ ಮನೋಭಾವವನ್ನು ಬೆಳೆಸಿದ್ದು ದೇವಾಡಿಗ ಸಮಾಜ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಎಂ. ವೀರಪ್ಪ ಮೊಯ್ಲಿ ಹೇಳಿದರು. 
     ಒಂದು ಧರ್ಮ ಮತ್ತೊಂದಕ್ಕೆ ವಿರೋಧವಲ್ಲ. ಎಲ್ಲ ಧರ್ಮಗಳ ಗುರಿ ವಿಶ್ವ ಶಾಂತಿಯೇ ಆಗಬೇಕು. ಸಮಾಜದಲ್ಲಿ ಅಶಾಂತಿಗೆ ಕಾರಣ ವಾಗುವ ಜಾತಿ, ಜನಾಂಗ ದ್ವೇಷವನ್ನು ಕಿತ್ತೊಗೆಯಲು ಮೇಲ್ವರ್ಗಗಳು ಮುಂದಾಗಬೇಕು ಎಂದರು. ಅವರು  ಉಡುಪಿ ಚಿಟ್ಪಾಡಿ ಯ ದೇವಾಡಿಗರ ಸೇವಾ ಸಂಘದ ಅಮೃತ ಮಹೋತ್ಸವ ಉದ್ಘಾಟನೆ ಸಮಾರಂಭದಲ್ಲಿ ಸಾಧಕರನ್ನು ಸನ್ಮಾನಿಸಿ ಮಾತನಾಡಿದರು. 
    ಕಷ್ಟವನ್ನು ಎದುರಿಸುವ ದೃಢ ಸಂಕಲ್ಪ ಮಾಡಬೇಕು. ಯಶಸ್ಸಿಗೆ ಸುಲಭದ ದಾರಿಯ ಹುಡುಕಾಟಬೇಡ. ಮನಸ್ಸಿನ ಬಡತನವನ್ನು ತೊಲಗಿಸಿ ಸಾಧನೆಯತ್ತ ಮನ ಮಾಡಬೇಕು. ಮಾನಸಿಕ ಕ್ಷೋಭೆ ದೂರವಾದರೆ ಮಾತ್ರ ಸಮಾಜದಲ್ಲಿ ಶಾಂತಿ ನೆಲೆಸುತ್ತದೆ ಎಂದ ಅವರು ಎಂದರು. 
      ತನ್ನ ಬಾಲ್ಯದ ಕಷ್ಟದ ದಿನಗಳನ್ನು ನೆನಪಿಸಿಕೊಂಡ ಅವರು ತನ್ನ ತಂದೆತಾಯಿ ಅನಕ್ಷರಸ್ಥರಾಗಿದ್ದರು ಚಿಮಿಣಿ ದೀಪದ ಬೆಳಕಲ್ಲಿ ತನ್ನನ್ನು ಓದಲು ಪ್ರೇರೇಪಿಸಿದರು. ಇದು ತನಗೆ ರಾಮಾಯಣದಂತಹ ಮಹಾಕಾವ್ಯಗಳನ್ನು ಬರೆಯಲು ಪ್ರೇರಣೆ ನೀಡಿತು. ಇಂತಹ ಸಾಧನೆಗಳು ಸಮಾಜದ ಯುವ ಜನರಿಗೆ ಪ್ರೇರಣೆಯಾಗಬೇಕು. ಸಿಕ್ಕಿದ ಅವಕಾಶಗಳನ್ನು ಸದುಪಯೋಗಪಡಿಸಿಕೊಂಡು ಬೆಳೆಯಬೇಕು ಎಂದರು. 
      ಕಾರ್ಯಕ್ರಮ ಉದ್ಘಾಟಿಸಿದ ಕೇಮಾರು ಸಾಂದೀಪನಿ ಸಾಧನಾಶ್ರಮದ ಶ್ರೀ ಈಶವಿಠಲದಾಸ ಸ್ವಾಮೀಜಿ ಮಾತನಾಡಿ, ಜಾತಿ ವ್ಯವಸ್ಥೆ, ವಿವಿಧ ಆಚರಣೆಗಳು ಬೇಕು. ಆದರೆ ಅವುಗಳೇ ಪ್ರಾಮುಖ್ಯವಾಗಬಾರದು. ಹೇಗೆ ನದಿಗಳು ಬೇರೆ ಬೇರೆಯಾಗಿ ಹುಟ್ಟಿ ಹರಿದರೂ ಸಮುದ್ರ ಸೇರಿದ ನಂತರ ಅವುಗಳ ನೀರನ್ನು ಗುರುತಿಸಲು ಸಾಧ್ಯವಿಲ್ಲವೋ ಹಾಗೆಯೇ ದೇಶ, ಧರ್ಮದ ವಿಚಾರ ಬಂದಾಗ ಈ ಜಾತಿ ವ್ಯವಸ್ಥೆಗಳು ಮರೆಮಾಚಿ ನಾವೆಲ್ಲ ಒಂದೇ ಎಂಬ ಭಾವನ ಬೆಳೆಯಬೇಕು ಎಂದರು. 
      ಕಾರ್ಯಕ್ರಮದಲ್ಲಿ ಹಿರಿಯ ಕ್ರಿಕೆಟಿಗ ವಾಸು ಶೇರಿಗಾರ್, ಸ್ಯಾಕ್ಸೋಫೋನ್ ವಾದಕ ಓಬು ಶೇರಿಗಾರ್ ಹಾಗೂ ರಂಗ ಕಲಾವಿದ ಗುಣಪಾಲ ಉಡುಪಿ ಅವರನ್ನು ಸನ್ಮಾನಿಸಲಾಯಿತು. ದೇವಾಡಿಗ ಸಮಾಜದ ಎಸ್ಸೆಸ್ಸೆಲ್ಸಿ ಹಾಗೂ ಪಿಯುಸಿ ಪರೀಕ್ಷೆಯಲ್ಲಿ ಅತಿ ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ ನಡೆಯಿತು. ಅಲ್ಲದೆ ದೇವಾಡಿಗರ ಸಂಘದ ವತಿಯಂದ ಕೇಂದ್ರ ಸಚಿವ ವೀರಪ್ಪ ಮೊಯ್ಲಿ ಅವರನ್ನು ಸನ್ಮಾನಿಸಲಾಯಿತು. 
      ರಾಜ್ಯ ನಗರಾಭಿವೃದ್ಧಿ ಸಚಿವ ವಿನಯ ಕುಮಾರ್ ಸೊರಕೆ, ಪತ್ರಕರ್ತೆ ವಿಜಯಲಕ್ಷ್ಮೀ ಶಿಬರೂರು ಮಾತನಾಡಿದರು. ಕಾರ್ಯಕ್ರಮದಲ್ಲಿ ಉಡುಪಿ ಶಾಸಕ ಪ್ರಮೋದ್ ಮಧ್ವರಾಜ್, ಮಾಜಿ ಶಾಸಕ ರಘುಪತಿ ಭಟ್, ಅಂಬಲಪಾಡಿ ದೇವಾಲಯದ ಧರ್ಮದರ್ಶಿ ಡಾ. ನಿ.ಬೀ. ವಿಜಯ ಬಲ್ಲಾಳ್, ಮುಂಬಾಯಿ ಉದ್ಯಮಿ ಸುಧಾಕರ ಕುಮಾರ್, ಸಂಘದ ಗೌರವಾಧ್ಯಕ್ಷ ಧರ್ಮಪಾಲ ಯು. ದೇವಾಡಿಗ, ಅಧ್ಯಕ್ಷ ಯು. ಗಣೇಶ್ ದೇವಾಡಿಗ, ಕೋಶಾಧಿಕಾರಿ ರತ್ನಾಕರ ಎಸ್. ಬೈಲೂರು, ಕಾರ್ಯದರ್ಶಿ ಶ್ರೀಧರ ದೇವಾಡಿಗ, ಉಪಾಧ್ಯಕ್ಷ ಗಣೇಶ್ ದೇವಾಡಿಗ ಕದ್ರಿ ಉಪಸ್ಥಿತರಿದ್ದರು. 
      ಕಾರ್ಯಕ್ರಮದ ಆರಂಭದಲ್ಲಿ ಅತಿಥಿಗಳನ್ನು ಚಿಟ್ಪಾಡಿಯ ಶಾರದಾಂಬ ದೇವಾಲಯದಿಂದ ಸಭಾಂಗಣದವರೆಗೆ ಭವ್ಯ ಮೆರವಣಿಗೆಯಲ್ಲಿ ಕರೆತರಲಾಯಿತು. ಅಮೃತ ಮಹೋತ್ಸವ ಸಮಿತಿಯ ಗೌರವಾಧ್ಯಕ್ಷ ಡಾ.ಬಿ.ಎಸ್. ಶೇರಿಗಾರ್ ಸ್ವಾಗತಿಸಿ, ಸದಸ್ಯ ರತ್ನಾಕರ ದೇವಾಡಿಗ ಅಂಬಲಪಾಡಿ ಕಾರ್ಯಕ್ರಮ ನಿರೂಪಿಸಿದರು.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com