ಸಾಮೂಹಿಕ ಅತ್ಯಾಚಾರ: ಪ್ರಮುಖ ಆರೋಪಿಯ ರೇಖಾಚಿತ್ರ ಬಿಡುಗಡೆ

ಉಡುಪಿ: ಮಣಿಪಾಲದ ವೈದ್ಯಕೀಯ ವಿದ್ಯಾರ್ಥಿನಿ ಸಾಮೂಹಿಕ ಅತ್ಯಾಚಾರ ಪ್ರಕರಣದ ಮೂವರಲ್ಲಿ ಪ್ರಮುಖ ಶಂಕಿತ ಆರೋಪಿಯ ರೇಖಾಚಿತ್ರವನ್ನು ಪಶ್ಚಿಮ ವಲಯ ಪೊಲೀಸ್ ಮಹಾನಿರ್ದೇಶಕ ಪ್ರತಾಪ್ ರೆಡ್ಡಿ ಸೋಮವಾರ ಬಿಡುಗಡೆ ಮಾಡಿದರು. 
      ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕರ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನೊಂದ ವಿದ್ಯಾರ್ಥಿನಿ ವೈದ್ಯರ ಮೂಲಕ ನೀಡಿದ ಹೇಳಿಕೆ ಪ್ರಕಾರ ನುರಿತ ಪೊಲೀಸರು ಆರೋಪಿಯ ಗುರುತು ಚಹರೆ ಸಿದ್ಧಪಡಿಸಿದ್ದಾರೆ ಎಂದರು. 
      ಗುರುತು-ಚಹರೆ ಹೋಲುವವರ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಿದ್ದಲ್ಲಿ ಸದಾನಂದ ತಿಪ್ಪಣ್ಣನವರ್, ಪೊಲೀಸ್ ನಿರೀಕ್ಷಕರು, ಮಣಿಪಾಲ ಪೊಲೀಸ್ ಠಾಣೆ (9480805448), ಉಡುಪಿ ವಿಶೇಷ ಸೆಲ್ (9742512100, 0820-2521257) ಸಂಪರ್ಕಿಸಬಹುದು. ಮಾಹಿತಿದಾರರ ಗೋಪ್ಯತೆ ಕಾಪಾಡಲಾಗುವುದು ಎಂದರು. 
     ರೇಖಾ ಚಿತ್ರವನ್ನು ಹೋಲುವ ಆರೋಪಿಯು ವಿದ್ಯಾರ್ಥಿನಿ ಜತೆ ಅತಿ ಕ್ರೂರವಾಗಿ ವರ್ತಿಸಿದ್ದು, ಕ್ಷೇತ್ರ ಮಟ್ಟದ ತನಿಖಾ ತಂಡಕ್ಕೆ ಚಿತ್ರ-ಮಾಹಿತಿ ನೀಡಲಾಗಿದೆ. 10 ಸಾವಿರಕ್ಕೂ ಅಧಿಕ ಅಟೋಗಳನ್ನು ಪಟ್ಟಿ ಮಾಡಿ ಸಂಶಯಿತ ಅಟೋಗಳ ಕಿರು ಪಟ್ಟಿ ತಯಾರಿಸಲಾಗಿದೆ. 
        ಮಣಿಪಾಲ ಪರಿಸರದ ಖಾಸಗಿ ಸಿಸಿಟಿವಿಗಳಲ್ಲಿರುವ ಮಾಹಿತಿಯನ್ನೂ ಕಲೆ ಹಾಕಲಾಗುತ್ತಿದೆ. ಅಡ್ಡ ಪರಿಶೀಲನೆ ನಡೆಸಿ, ಖಾತರಿಪಡಿಸಿಕೊಳ್ಳಲಾಗುತ್ತಿದೆ. ಪರಿಣತ ವೈದ್ಯರ ಮೂಲಕ ವಿದ್ಯಾರ್ಥಿನಿಯಿಂದ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಪೊಲೀಸರಿಗೆ ನೇರ ಸಂಪರ್ಕವಿಲ್ಲ. 
 
17 ಮಂದಿ ವಿಚಾರಣೆ: ಪ್ರಕರಣಕ್ಕೆ ಸಂಬಂಧಿಸಿ ಇಲ್ಲಿ ತನಕ 17 ಮಂದಿಯ ವಿಚಾರಣೆ ನಡೆಸಲಾಗಿದೆ. ಪಶ್ಚಿಮ ವಲಯದಿಂದ ಹೆಚ್ಚುವರಿ ಸಿಬ್ಬಂದಿ, ಅಧಿಕಾರಿಗಳನ್ನು ತನಿಖಾ ತಂಡಕ್ಕೆ ಜೋಡಿಸಿದ್ದು 200 ಕ್ಕೂ ಮಂದಿ 11-12 ತಂಡಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. 
    ಆರೋಪಿಗಳು ಬಳಸಿದ ಅಟೋ ರಿಕ್ಷಾ ದೃಶ್ಯ ಮಾಹಿತಿ ಸಿಸಿಟಿವಿಯಲ್ಲಿ ದಾಖಲಾಗಿದೆ. ಆದರೆ ಆಟೋ ರಿಕ್ಷಾಕ್ಕೆ ನಂಬರ್ ಇತ್ತೇ, ಇಲ್ಲವೇ ಎನ್ನುವ ಪರಿಶೀಲನೆ ಮಾಡಲಾಗುತ್ತಿದೆ. ಆರೋಪಿಗಳು ವಿದ್ಯಾರ್ಥಿನಿ ಜತೆ ಹಿಂದಿಯಲ್ಲಿ ಹಾಗೂ ತಮ್ಮಳಗೆ ಕನ್ನಡ-ತುಳುವಿನಲ್ಲಿ ಮಾತನಾಡುತ್ತಿದ್ದರು. 
       ಮಣಿಪಾಲ ಆಸ್ಪತ್ರೆಯ ವಾರ್ಡ್‌ನಲ್ಲಿರುವ ನೊಂದ ವಿದ್ಯಾರ್ಥಿನಿ ಮಣಿಪಾಲದ ಎಮ್‌ಕಾಪ್ಸ್ ಕಟ್ಟಡದ ಬಳಿಯಿಂದ ಅಪಹರಣಕ್ಕೊಳಗಾದ ಹಾಗೂ ಸಾಮೂಹಿಕ ಅತ್ಯಾಚಾರ ನಡೆದ ಸ್ಥಳದ ಮಧ್ಯೆ ಅಟೋದಿಂದ ಹಾರಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದರಿಂದ ಕಾಲಿಗೆ ಗಾಯವಾಗಿದೆ. ಆದರೆ ಆರೋಪಿಗಳು ಮತ್ತೆ ಆಕೆಯನ್ನು ಎಳೆದೊಯ್ದು ರಿಕ್ಷಾಕ್ಕೆ ಹಾಕಿ ಕರೆದೊಯ್ದಿದ್ದಾರೆ. ಆರೋಪಿಗಳಿಬ್ಬರೂ ದಾರಿ ಮಧ್ಯೆ ತಪ್ಪಿಸಿಕೊಂಡಿದ್ದಾರೆ. ಆರೋಪಿ ಚಾಲಕ ಫ್ಲ್ಯಾಟ್ ಸಮೀಪ ತಂದು ಬಿಟ್ಟಿದ್ದಾನೆ ಎಂದು ವಿದ್ಯಾರ್ಥಿನಿ ಹೇಳಿದ್ದಾಳೆ. ಆದರೆ ಘಟನೆ ಚಿತ್ರಣ ಇನ್ನೂ ಸ್ಪಷ್ಟವಾಗಿ ದೊರೆತಿಲ್ಲ. 
 ನಾಗರಿಕರು, ಸಂಘ ಸಂಸ್ಥೆಗಳು, ವಿದ್ಯಾರ್ಥಿಗಳ ಆಕ್ರೋಶ ಏನೇ ಇದ್ದರೂ ಪೊಲೀಸ್ ತನಿಖೆ, ಕಾನೂನು ಸುವ್ಯವಸ್ಥೆಗೆ ತೊಂದರೆ ಕೊಡಬೇಡಿ ಎಂದು ಪಶ್ಚಿಮ ವಲಯ ಪೊಲೀಸ್ ಮಹಾನಿರ್ದೇಶಕ ಪ್ರತಾಪ್ ರೆಡ್ಡಿ ಪ್ರತಿಭಟನಾಕಾರರಿಗೆ ಮನವಿ ಮಾಡಿದರು. ಸುದ್ದಿಗೋಷ್ಠಿಯಲ್ಲಿ ಅಭಿಷೇಕ್ ಗೋಯಲ್, ಡಾ. ಎಂ.ಬಿ. ಬೋರಲಿಂಗಯ್ಯ ಉಪಸ್ಥಿತರಿದ್ದರು. 

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com