ಮತ್ತೆ ಗರಿಗೆದರಿತು ತಾಲೂಕು ಹೋರಾಟದ ಕೂಗು

ಕುಂದಾಪುರ: ರಾಜ್ಯದ ನೂತನ ಸರಕಾರ ಹಿಂದಿನ ಬಿಜೆಪಿ ಸರಕಾರದ 43 ಹೊಸ ತಾಲೂಕು ರಚನೆ ಪ್ರಸ್ತಾವ ತಡೆ ಹಿಡಿದು ಪುನರ್ ಪರಿಶೀಲನೆಯ ನಿರ್ಧಾರ ತೆಗೆದುಕೊಂಡ ಬೆನ್ನಲ್ಲೇ ತಾಲೂಕು ಹೋರಾಟ ಮತ್ತೆ ಗರಿಗೆದರಿದೆ. ಹಿಂದಿನ ಬಿಜೆಪಿ ಸರಕಾರ ಉಡುಪಿ ಜಿಲ್ಲೆಯ ಬೈಂದೂರು ತಾಲೂಕು ರಚಿಸಿ ಬಜೆಟ್‌ನಲ್ಲಿ ಅನುದಾನ ತೆಗೆದಿರಿಸಿತ್ತು. ಸಹಜವಾಗಿ ಬೈಂದೂರಿನಲ್ಲಿ ಸಂಭ್ರಮ ಮನೆ ಮಾಡಿತ್ತು. ಕಳೆದ 3 ದಶಕಗಳಿಂದ ಬೈಂದೂರು ತಾಲೂಕು ರಚನೆ ಹೋರಾಟಕ್ಕೆ ಸರಕಾರ ಅಧಿಕೃತ ಮನ್ನಣೆ ನೀಡಿದ ಸಂಭ್ರಮ ಕೆಲವೇ ದಿನಗಳಲ್ಲಿ ಮಂಕಾಯಿತು. ರಾಜ್ಯದಲ್ಲಿ ಹೊಸದಾಗಿ ಅಸ್ತಿತ್ವಕ್ಕೆ ಬಂದ ಕಾಂಗ್ರೆಸ್ ಸರಕಾರ ಬಿಜೆಪಿ ಸರಕಾರ ಘೋಷಿಸಿರುವ ತಾಲೂಕುಗಳ ಪುನರ್ ಪರಿಶೀಲನೆ ನಿರ್ಧಾರ ತೆಗೆದುಕೊಂಡಿದ್ದರಿಂದ ಬೈಂದೂರಿನ ನಾಗರಿಕರು ಆಚ್ಚರಿಗೊಳಗಾಗಿದ್ದಾರೆ. 
     ಬೈಂದೂರು ತಾಲೂಕು ರಚನೆ ಘೋಷಣೆಯಾದ ಬೆನ್ನಲ್ಲೇ ಸಾಕಷ್ಟು ಪರ ವಿರೋಧ ನಿಲುವುಗಳು ವ್ಯಕ್ತವಾಗಿದ್ದವು. ಅತ್ಯಂತ ವಿಸ್ತಾರವಾಗಿರುವ ಈ ಕ್ಷೇತ್ರ ತಾಲೂಕಾಗುವುದು ಸ್ವಾಗತಾರ್ಹ ಆದರೂ ಬೈಂದೂರು ತಾಲೂಕು ಕೇಂದ್ರ ಆಗಕೂಡದು ಎಂದು ವಂಡ್ಸೆ ಹೋಬಳಿಯ 11 ಗ್ರಾ.ಪಂ. ವಿರೋಧ ವ್ಯಕ್ತಪಡಿಸಿದ್ದವು. ಇನ್ನೊಂದೆಡೆ ಬೈಂದೂರು ಕ್ಷೇತ್ರಕ್ಕೆ ಒಂದಿಷ್ಟು ಚಾಚಿಕೊಂಡಿರುವ ಶಂಕರನಾರಾಯಣ ಹೋಬಳಿಯವರು ಪ್ರತ್ಯೇಕ ತಾಲೂಕು ರಚನೆ ಬೇಡಿಕೆ ಮುಂದಿಟ್ಟುಕೊಂಡು ಹೋರಾಟಕ್ಕಿಳಿದಿದ್ದರು. 
    ಕೆಲ ದಿನಗಳಿಂದ ತಣ್ಣಗಾಗಿದ್ದ ಕುಂದಾಪುರ ತಾಲೂಕಿನ ಬೈಂದೂರು ಮತ್ತು ಶಂಕರನಾರಾಯ ಣದಲ್ಲಿ ಮತ್ತೆ ಹೋರಾಟದ ಕೂಗು ಮೊಳಗಿದೆ. ಎರಡು ಕಡೆಗಳಲ್ಲಿ ಹೋರಾಟ ಸಮಿತಿ ಸಭೆ ನಡೆಯುತ್ತಿದೆ. ಮಗದೊಮ್ಮೆ ಸಂಘಟಿತ ಹೋರಾಟಕ್ಕೆ ಧುಮುಕಲು ಸಿದ್ಧತೆ ನಡೆಸಲಾಗುತ್ತಿದೆ. ಶಂಕರನಾರಾಯಣ ತಾಲೂಕು ಹೋರಾಟ ಸಮಿತಿ ಪುನರಪಿ ಸಂಘಟಿತವಾಗಿ ದೊಡ್ಡ ಮಟ್ಟದ ಹೋರಾಟಕ್ಕೆ ತಯಾರಿ ನಡೆಸಿದೆ. 

ಶಂಕರನಾರಾಯಣ ತಾಲೂಕು ರಚನೆ ಬೇಡಿಕೆ: ಉಡುಪಿ ಜಿಲ್ಲೆಯ ಸಪ್ತಕ್ಷೇತ್ರಗಳಲ್ಲಿ ಶಂಕರನಾರಾಯಣ ಒಂದು. ಇಲ್ಲಿ 1909ರಲ್ಲಿ ಇಲ್ಲಿ ಭೂ ನೋಂದಣಿ ಕಚೇರಿ, ಉಪಖಜಾನೆ, ಜೂನಿಯರ್ ಮತ್ತು ಪದವಿ ಕಾಲೇಜು, ಪೊಲೀಸ್ ಠಾಣೆ, ವಲಯ ಅರಣ್ಯಾಕಾರಿಗಳ ಕಚೇರಿ, ದೂರವಾಣಿ ಉಪ ಮಂಡಲ, ಎಂಜಿನಿಯರ್ ಕಚೇರಿ, ಅಂಚೆ ಕಚೇರಿ, ಪಶು ಸಂಗೋಪನೆ ಇಲಾಖೆ, ಸಂತೆ ಮಾರುಕಟ್ಟೆ, ಸರಕಾರಿ ಆಸ್ಪತ್ರೆ ಸೇರಿದಂತೆ ಸರಕಾರಿ ಮಟ್ಟದ ಪ್ರಮುಖ ಸವಲತ್ತುಗಳು ಒದಗಿಬಂದಿವೆ. ನಕ್ಸಲ್ ಸಕ್ರಿಯ ಹಾಗೂ ತೀರಾ ಹಿಂದುಳಿದ ಗ್ರಾಮಗಳು ಶಂಕರನಾರಾಯಣ ವ್ಯಾಪ್ತಿಯಲ್ಲಿರುವುದರಿಂದ ಅಭಿವೃದ್ಧಿ ಹಿತದೃಷ್ಟಿಯಿಂದ ಶಂಕರನಾರಾಯಣ ತಾಲೂಕಾಗಬೇಕು ಎಂಬ ಆಗ್ರಹ ಸರಕಾರದ ಮುಂದಿದೆ. 

*ತಾಲೂಕು ರಚನೆ ಅಥವಾ ಜಿಲ್ಲಾ ರಚನೆ ಸವಾಲು. ಹಿಂದಿನ ಮೂರು ಆಯೋಗಗಳು ಬೈಂದೂರು ಮತ್ತು ಶಂಕರನಾರಾಯಣ ತಾಲೂಕು ಆಗುವುದು ಸೂಕ್ತ ಎಂದು ಶಿಫಾರಸು ಮಾಡಿವೆ. ಬಿಜೆಪಿ ಸರಕಾರ ರಾಜಕೀಯ ಉದ್ದೇಶದಿಂದ 43 ಹೊಸ ತಾಲೂಕು ರಚನೆ ಘೋಷಣೆ ಮಾಡಿದೆಯೇ ಹೊರತು ಸಾಧಕ-ಬಾಧಕಗಳ ವಿಮರ್ಶೆ ನಡೆಸಿಲ್ಲ. ಕೇವಲ 22 ಗ್ರಾಮಗಳುಳ್ಳ ಶೃಂಗೇರಿ ತಾಲೂಕು ರಚಿಸಬಹುದಾದಲ್ಲಿ ಶಂಕರನಾರಾಯಣ, ಬೈಂದೂರು ತಾಲೂಕು ರಚನೆ ಯಾಕೆ ಆಗಲ್ಲ. ಭೌಗೋಳಿಕ ಮತ್ತು ಸಾಮಾಜಿಕ ದೃಷ್ಟಿ ಮುಂದಿಟ್ಟುಕೊಂಡ ಹೊಸ ಸರಕಾರ ತಾಲೂಕು ರಚನೆಗೆ ಮುಂದಾಗಬೇಕು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಈ ಬಗ್ಗೆ ಮನವಿ ಸಲ್ಲಿಸಲಾಗಿದೆ. -ಕೆ. ಸದಾಶಿವ ಹೆಗ್ಡೆ, ನಿವೃತ್ತ ತಹಸೀಲ್ದಾರರು, ತಾಲೂಕು ರಚನೆ ಹೋರಾಟಗಾರರು 
*ಬೈಂದೂರು ತಾಲೂಕು ರಚನೆಗಾಗಿ ಮೂರು ದಶಕಗಳಿಂದ ಹೋರಾಟ ನಡೆಸಿಕೊಂಡು ಬಂದಿದ್ದೇವೆ. ಬೈಂದೂರಿನ ಸಮಸ್ತ ನಾಗರಿಕರು ಈ ಹೋರಾಟದಲ್ಲಿ ಭಾಗಿಯಾಗಿದ್ದಾರೆ. ರಾಜಕೀಯ ದುರುದ್ದೇಶದಿಂದ ಈಗಾಗಲೆ ಘೋಷಣೆಯಾಗಿರುವ ತಾಲೂಕು ರಚನೆ ಪ್ರಸ್ತಾವ ಕೈ ಬಿಡಕೂಡದು. ಬೈಂದೂರಿನ ಅಭಿವೃದ್ಧಿಗೆ ತಾಲೂಕು ರಚನೆಯಾಗಲೇಬೇಕು. -ಉಪ್ಪುಂದ ಚಂದ್ರಶೇಖರ ಹೊಳ್ಳ, ಬೈಂದೂರು ತಾಲೂಕು ರಚನಾ ಹೋರಾಟ ಸಮಿತಿ
ವಿಶೇಷ ವರದಿ: ಜಾನ್ ಡಿಸೋಜ ಕುಂದಾಪುರ 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com