ಸಿಆರ್‌ಝಡ್ ಸಾಧಕ ಬಾಧಕ ಚರ್ಚೆ

ಕುಂದಾಪುರ: 1991ರಲ್ಲಿ ಸಿಆರ್‌ಝಡ್ ಕಾಯಿದೆ ಜಾರಿಗೆ ಬಂದಿದ್ದು, ಅದರಲ್ಲಿ ಮೂಲ ನಿವಾಸಿಗಳಿಗೆ ಅನ್ಯಾಯವಾರಬಾರದು ಎಂದು ಸ್ಪಷ್ಟವಾಗಿ ಹೇಳಲಾಗಿದ್ದರೂ ಇಂದು ನದಿ ಹಾಗೂ ಸಮುದ್ರ ತೀರದಲ್ಲಿ ನೆಲೆಸಿರುವ ಮೂಲ ನಿವಾಸಿಗಳ ಬದುಕು ಅಡಕತ್ತರಿಗೆ ಸಿಲುಕಿದೆ. ಕಾನೂನು, ಕಾಯಿದೆ ಹೆಸರಿನಲ್ಲಿ ಹಿಂಸಿಸಲಾಗತ್ತಿದೆ. ಸಂಸದರು, ಶಾಸಕರು ಹಾಗೂ ಜನಪ್ರತಿನಿಧಿಗಳು ಸರಕಾರದ ಮೇಲೆ ಒತ್ತಡ ಹೇರಿ ಸಮಸ್ಯೆ ಪರಿಹಾರಕ್ಕೆ ಮುಂದಾಗಬೇಕಾಗಿದೆ ಎಂದು ಜಿ.ಪಂ. ಮಾಜಿ ಸದಸ್ಯ ಮದನ್‌ಕುಮಾರ್ ಹೇಳಿದರು. 
     ಇಲ್ಲಿನ ತಾಲೂಕು ಪಂಚಾಯಿತಿ ಸಭಾಂಗಣದಲ್ಲಿ ಕುಂದಾಪುರ ತಾಲೂಕು ಪಂಚಾಯಿತಿರಾಜ್ ಒಕ್ಕೂಟ ಹಾಗೂ ಕುಂದಾಪುರ ಉಳಿಸಿ ಹೋರಾಟ ಸಮಿತಿ ಆಶ್ರಯದಲ್ಲಿ ಗುರುವಾರ ಜರುಗಿದ ಸಿಆರ್‌ಝಡ್ ಕಾಯಿದೆ ಕುರಿತ ಸಭೆಯಲ್ಲಿ ಮಾತನಾಡಿದರು. 
     ಸಿಆರ್‌ಝಡ್ ವಲಯ ಹೆಸರಿನಲ್ಲಿ ಬಡವರು ಸರಕಾರಿ ಸವಲತ್ತು ಪಡೆಯಲು ವಿಫಲವಾಗಿದ್ದಾರೆ. ಕಾಯಿದೆ, ಕಾನೂನು ಮುಂದಿಟ್ಟು ಕೊಂಡು ಅಧಿಕಾರಿಗಳು ಬಡವರೊಂದಿಗೆ ಚೆಲ್ಲಾಟ ಆಡುತ್ತಿರುವುದು ಖಂಡನೀಯ ಎಂದರು. 
       ಪಂಚಾಯಿತಿರಾಜ್ ಹಿರಿಯ ವಿಶ್ಲೇಷಕ ಎಸ್. ಜನಾರ್ದನ ಮಾತನಾಡಿ, ಸಿಆರ್‌ಝಡ್ ಕಾಯಿದೆ ಅರಿವು ಮೂಡಿಸುವ ಕೆಲಸ ಸಾಕಷ್ಟು ನಡೆದಿದೆ. ಈ ತನಕ 30ಕ್ಕೂ ಮಿಕ್ಕಿ ಸಭೆಗಳನ್ನು ನಡೆಸಲಾಗಿದೆ. ಕಾಯಿದೆಗೆ ಸಾಕಷ್ಟು ತಿದ್ದುಪಡಿಯಾಗಿದ್ದರೂ ಸಮಸ್ಯೆ ಆಮೂಲಾಗ್ರ ಪರಿಹಾರವಾಗಿಲ್ಲ. ಪಂಚಾಯಿತಿ ಮಟ್ಟದಲ್ಲಿ ಜನರಿಗೆ ತಿಳಿವಳಿಕೆ ನೀಡುವುದು ಮತ್ತು ಅವರಲ್ಲಿನ ಭಯ ಹೋಗಲಾಡಿಸುವ ಕೆಲಸ ಆಗಬೇಕಾಗಿದೆ. ಸಿಆರ್‌ಝಡ್ ಅಧಿಕಾರಿಗಳು ಈ ನಿಟ್ಟಿನಲ್ಲಿ ಪ್ರಾಮಾಣಿಕ ಪ್ರಯತ್ನ ನಡೆಸುತ್ತಿದ್ದಾರೆ ಎಂದು ಹೇಳಿದರು. 
      ಮಾಜಿ ಮಂಡಲ ಪ್ರದಾನ ಗಂಗೊಳ್ಳಿ ಸದಾನಂದ ಶೆಣೈ ಮಾತನಾಡಿ, ಕೇರಳ, ಗೋವಾದಲ್ಲಿ ಸಿಆರ್‌ಝಡ್ ಕಾಯಿದೆಯಲ್ಲಿ ಸಡಿಲಿಕೆ ಮಾಡಲಾಗಿದೆ. ಕರ್ನಾಟಕದಲ್ಲಿ ಯಾಕೆ ಮಾಡಲಾಗದು. ಈ ಬಗ್ಗೆ ಜನಪ್ರತಿನಿಧಿಗಳು, ಸಂಬಂಧಿಸಿದ ಅಧಿಕಾರಿಗಳು ಗಮನಹರಿಸಬೇಕು ಎಂದರು. ಆನಗಳ್ಳಿ ಗ್ರಾ.ಪಂ. ಅಧ್ಯಕ್ಷ ಸುರೇಶ ನಾಯ್ಕ ಮಾತನಾಡಿ, ಸಿಆರ್‌ಝಡ್ ಕಾಯಿದೆ ಅಸ್ಪಷ್ಟತೆ ಸೂಚಿಸುತ್ತಿದೆ. ಉಳ್ಳವರಿಗೆ ಒಂದು ನ್ಯಾಯ, ಇಲ್ಲದವರಿಗೆ ಒಂದು ನ್ಯಾಯ ಎಂಬಂತಿದೆ ಎಂದರು. 
      ಸಿಆರ್‌ಝಡ್ ಅಧಿಕಾರಿ ಅಶೋಕ ಭಟ್ ಮಾತನಾಡಿ, ಪರಿಸರ ಸಂರಕ್ಷಣೆಯ ಉದ್ದೇಶದಿಂದ ಕಾಯಿದೆ ಜಾರಿಯಲ್ಲಿದೆ. ಸಮುದ್ರ ತೀರದಿಂದ 500 ಮೀ., ನದಿ ತೀರದಿಂದ 100 ಮೀ. ವ್ಯಾಪ್ತಿ ಸಿಆರ್‌ಝಡ್‌ಗೆ ಒಳಪಡುತ್ತದೆ. ಇದರಲ್ಲಿ 5 ವಲಯಗಳಿವೆ. ಈ ವಲಯದಲ್ಲಿ ಏನು ನಡೆಯಬೇಕು, ಏನು ನಡೆಯಬಾರದು ಎಂಬ ಬಗ್ಗೆ ಸ್ಪಷ್ಟ ಅಧಿಸೂಚನೆಗಳಿವೆ. ಅದರ ಕಾರ್ಯವ್ಯಾಪ್ತಿಯಲ್ಲಿ ನಾವು ಕೆಲಸ ಮಾಡಬೇಕು. ಆದಷ್ಟು ಜನರಿಗೆ ಹಿತವಾಗುವ ನಿಟ್ಟಿನಲ್ಲಿ ಕೆಲಸ ಕಾರ್ಯ ನಡೆಸಿಕೊಂಡು ಬಂದಿದ್ದೇವೆ ಎಂದು ವಿವರಿಸಿದರು. 
        ಜಿ.ಪಂ. ಆರೋಗ್ಯ ಮತ್ತು ಶಿಕ್ಷಣ ಸ್ಥಾಯೀ ಸಮಿತಿ ಅಧ್ಯಕ್ಷ ಗಣಪತಿ ಟಿ. ಶ್ರೇಯಾನ್, ಜಿ.ಪಂ. ಸದಸ್ಯ ಅನಂತ ಮೊವ್ವಾಡಿ, ಹೇರೂರು ಗ್ರಾ.ಪಂ. ಅಧ್ಯಕ್ಷ ನಾವುಂದ ಅಶೋಕ ಶೆಟ್ಟಿ, ಆನಗಳ್ಳಿ ಗ್ರಾ.ಪಂ. ಮಾಜಿ ಅಧ್ಯಕ್ಷ ಗಂಗಾಧರ ಹೆಗ್ಡೆ, ಸುಧಾಕರ ಜೆಟ್ಟಿ, ಕುಂದಾಪುರ ಉಳಿಸಿ ಹೋರಾಟ ಸಮಿತಿ ಸಂಚಾಲಕ ಕೆಂಚನೂರು ಸೋಮಶೇಖರ ಶೆಟ್ಟಿ ಅನಿಸಿಕೆ ವ್ಯಕ್ತಪಡಿಸಿದರು. 
      ಸಿಆರ್‌ಝಡ್ ಅಧಿಕಾರಿ ಗಣೇಶ್ ಕಾನೂನು ಮತ್ತು ಕಾಯಿದೆ ಬಗ್ಗೆ ಪ್ರಾತ್ಯಕ್ಷಿಕೆ ಸಹಿತ ವಿವರಣೆ ನೀಡಿದರು. ತಾ.ಪಂ. ಕಾರ್ಯನಿರ್ವ ಹಣಾಧಿಕಾರಿ ಗೋಪಾಲ ಶೆಟ್ಟಿ, ತಾಲೂಕು ಪಂಚಾಯಿತಿರಾಜ್ ಒಕ್ಕೂಟ ಅಧ್ಯಕ್ಷ ಅಡಿಕೆಕೊಡ್ಲು ಉದಯಕುಮಾರ ಶೆಟ್ಟಿ ಉಪಸ್ಥಿತರಿದ್ದರು. ಗ್ರಾ.ಪಂ. ಸದಸ್ಯ ರಾಘವೇಂದ್ರ ಪೈ ಕಾರ್ಯಕ್ರಮ ನಿರ್ವಹಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com