ಮಳೆಗಾಲದಲ್ಲೂ ಕುಡಿಯುವ ನೀರಿಗೆ ಬರ

ಕುಂದಾಪುರ: ತಾಲೂಕಿನ ಕರ್ಕುಂಜೆ, ಹಟ್ಟಿಯಂಗಡಿ, ಹೆಮ್ಮಾಡಿ ಹಾಗೂ ತಲ್ಲೂರು ಗ್ರಾ.ಪಂ. ವ್ಯಾಪ್ತಿಯಲ್ಲಿ ಕುಡಿಯುವ ನೀರಿನ ಬವಣೆ ಮೇರೆ ಮೀರಿದೆ. 
      ಕಳೆದ ಕೆಲವು ದಿನಗಳಿಂದ ಒಂದಿಷ್ಟು ಮಳೆ ಬಂದರೂ ಪಂಚಾಯಿತಿ ವ್ಯಾಪ್ತಿಯ ಅರಣ್ಯ ತಪ್ಪಲಿನಲ್ಲಿರುವ ನಿವಾಸಿಗಳು ಮಾತ್ರ ಕುಡಿಯುವ ನೀರಿಗಾಗಿ ಪರದಾಡುತ್ತಿರುವುದು ಮುಂದುವರಿದಿದೆ. 
      ಪ್ರತಿ ಬೇಸಿಗೆಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ಇರುತ್ತದೆ. ಇದೀಗ ಮಳೆ ಸುರಿದಿರುವುದು ನಮ್ಮ ಭಾಗ್ಯ. ಕುಡಿಯುವ ನೀರಿನ ಬರ ಪರಿಹರಿಸಲೋಸುಗ ಬಹುಗ್ರಾಮ ನೀರು ಸರಬರಾಜು ಯೋಜನೆ ಜಾರಿಗೊಳಿಸುವಂತೆ ಮಾಡಿಕೊಂಡ ಮನವಿಗೆ ಸಂಬಂಧಿತರು ಈ ತನಕ ಸ್ಪಂದಿಸಿಲ್ಲ. ಬದಲಾಗಿ ಅಗತ್ಯವಿಲ್ಲದ ಕಡೆ ಈ ಯೋಜನೆ ಹೋಗಿದೆ ಎಂದು ಈ ಭಾಗದ ಗ್ರಾಮಸ್ಥರು ಆಕ್ರೋಶ ಹೊರಗೆಡಹಿದ್ದಾರೆ. 
     ಕರ್ಕುಂಜೆ ಗ್ರಾ.ಪಂ. ವ್ಯಾಪ್ತಿಯ ಗುಲ್ವಾಡಿ, ಕರ್ಕುಂಜೆ, ನೇರಳಕಟ್ಟೆಯಲ್ಲಿ ಈ ಬಾರಿ ವ್ಯಾಪಕ ಪ್ರಮಾಣದಲ್ಲಿ ಕುಡಿಯುವ ನೀರಿಗೆ ಬರ ಎದುರಾಗಿತ್ತು. ಸ್ಥಳೀಯಾಡಳಿತ ಟ್ಯಾಂಕರ್ ಮೂಲಕ ನೀರು ಸರಬರಾಜು ಕೈಗೊಂಡಿದ್ದರೂ ಉಪಗ್ರಾಮದ ಎಲ್ಲ ಭಾಗದಲ್ಲಿ ತೆರಳುವಲ್ಲಿ ಸಫಲರಾಗದ ಹಿನ್ನೆಲೆಯಲ್ಲಿ ಜನರು ತೀವ್ರ ಸಂಕಷ್ಟಕ್ಕೀಡಾಗಿದ್ದರು. 
     ಹಟ್ಟಿಯಂಗಡಿ, ಕೆಂಚನೂರು, ಕನ್ಯಾನ, ತಲ್ಲೂರು, ಉಪ್ಪಿನಕುದ್ರು, ಹೆಮ್ಮಾಡಿ, ಕಟ್‌ಬೆಲ್ತೂರು, ದೇವಲ್ಕುಂದದಲ್ಲಿ ಇದೇ ಪರಿಸ್ಥಿತಿ ಎದುರಾಗಿತ್ತು. ನಾಲ್ಕು ಗ್ರಾ.ಪಂ.ಗಳ 10 ಗ್ರಾಮಗಳಲ್ಲಿ ಬಹಳ ಕಾಲದಿಂದ ನೀರಿನ ಸಮಸ್ಯೆ ಎದುರಿಸುತ್ತಿದ್ದು ಸದ್ಯ ಇದು ತಾರಕಕ್ಕೇರಿದೆ. 4 ಗ್ರಾ. ಪಂ.ಗಳಲ್ಲಿ 11 ತೆರೆದ ಬಾವಿ, 140 ಕೊಳವೆ ಬಾವಿ ಇವೆ. 140 ಕೊಳವೆ ಬಾವಿಗಳ ಪೈಕಿ 125 ಕೊಳವೆ ಬಾವಿ ಸರಿ ಇದೆ. ಉಳಿದವು ಕೆಟ್ಟು ಹೋಗಿವೆ. ಇದರಿಂದಾಗಿ ನೀರಿನ ಬಹಳ ಅಗತ್ಯ ಹೊಂದಿರುವ ಜನರು ದಿಕ್ಕೆಟ್ಟುಹೋಗುವಂತಾಗಿದೆ. 21 ನೀರು ಸರಬರಾಜು ಮಾಡುವ ಟ್ಯಾಂಕಿಗಳಿದ್ದರೂ ಊಟಕ್ಕಿಲ್ಲದ ಉಪ್ಪಿನಕಾಯಿ ಆಗಿವೆ. 

ವೇದನೆಯ ಸಂಗತಿ 
ಈ 10 ಗ್ರಾಮಗಳಲ್ಲಿ ನದಿ ಹಾದು ಹೋಗುತ್ತಿದ್ದರೂ ಒಂದು ಕೊಡಪಾನ ಕುಡಿಯುವ ನೀರಿಗೂ ಬರ ಇರುವುದು ವೇದನೆಯ ಸಂಗತಿ ಎಂದು ಈ ಭಾಗದ ಸಾಮಾಜಿಕ ಕಾರ್ಯಕರ್ತ ಕೆಂಚನೂರು ಸೋಮಶೇಖರ ಶೆಟ್ಟಿ ಹೇಳಿದ್ದಾರೆ. 
     ಗುಲ್ವಾಡಿ, ಹೆಮ್ಮಾಡಿಯಲ್ಲಿ ಉಪ್ಪು ನೀರಿನ ತಡೆಗೋಡೆ ಇದ್ದರೂ ಪ್ರಯೋಜನವಿಲ್ಲದ್ದಂತಾಗಿದೆ. ಈ ಉಪ್ಪು ನೀರಿನ ತಡೆಗೋಡೆ ನೀರನ್ನು ಬಹುಗ್ರಾಮ ನೀರು ಸರಬರಾಜು ಯೋಜನೆಯಲ್ಲಿ ಸೇರಿಸಿಕೊಂಡರೆ ಜನರಿಗೆ ಬೇಕಾದಷ್ಟು ಕುಡಿಯುವ ನೀರು ಕೊಡಬಹುದೆಂಬ ಪ್ರಸ್ತಾವನೆಯನ್ನು ಜಿ.ಪಂ.ಗೂ ಈ ಹಿಂದೆಯೇ ಸಲ್ಲಿಸಿದ್ದರೂ ಸ್ಪಂದಿಸದಿರುವುದು ನೋವಿನ ಸಂಗತಿ. 
      ತಲ್ಲೂರು-ಸಿದ್ಧಾಪುರ ರಸ್ತೆಯ ಬಲಬದಿಯಲ್ಲಿ ವಾರಾಹಿ ನದಿ ಹರಿಯುತ್ತಲಿದ್ದು ಗುಲ್ವಾಡಿ-ಬಸ್ರೂರು ಗ್ರಾಮದ ನಡುವೆ ಉಪ್ಪು ನೀರಿನ ತಡೆಗೋಡೆ ರಚಿಸಲಾಗಿದೆ. ಅಲ್ಲಿ ಬಹಳ ಸಿಹಿ ನೀರು ಲಭ್ಯವಿದೆ. ಇದನ್ನು ಕರ್ಕುಂಜೆ ಗ್ರಾಮದ ಕೌಂಜೂರು ಎಂಬಲ್ಲಿ ಪಂಪ್‌ನ್ನು ಅಳವಡಿಸಿ ನೀರು ಮೇಲಕ್ಕೆತ್ತಿ ಸೌಕೂರು ದೇವಸ್ಥಾನದ ಬಳಿ ನೀರು ಶುದ್ಧೀಕರಣ ಘಟಕ ನಿರ್ಮಿಸಿದರೆ ಅಲ್ಲಿಂದ ಪಂಚಾಯಿತಿ ಪೈಪ್‌ಲೈನ್ ಮೂಲಕ ಜೋಡಣೆಗೊಳಿಸಿ ಪ್ರತಿ ಗ್ರಾ.ಪಂ.ಗೂ ಸುಲಭವಾಗಿ ಕುಡಿಯುವ ನೀರು ಸರಬರಾಜು ಮಾಡಬಹುದಾಗಿದೆ. ಇದರಿಂದ ಖರ್ಚು ಕಡಿಮೆ, ಜನರಿಗೂ ಅನುಕೂಲ. ಉಡುಪಿ ಜಿಲ್ಲಾಡಳಿತ ಗಮನಹರಿಸಬೇಕು ಎಂದು ಅವರು ಆಗ್ರಹಿಸಿದ್ದಾರೆ. 

 ಯೋಜನೆ ಜಾರಿಯಾಗಲಿ 
     ತಲ್ಲೂರು ಪಿಂಗಾಣಿಗುಡ್ಡೆ ಕುಡಿಯುವ ನೀರಿನ ಸಮಸ್ಯೆಗೆ ಉದಾಹರಣೆ. ಪರಿಶಿಷ್ಟ ಪಂಗಡ, ಪರಿಶಿಷ್ಟ ಜಾತಿ ನಿವಾಸಿಗಳು ಅತ್ಯಧಿಕ ಸಂಖ್ಯೆಯಲ್ಲಿ ನೆಲೆಸಿದ್ದರೂ ಕುಡಿಯುವ ನೀರಿಲ್ಲದೆ ಕಂಗೆಡುವಂತಾಗಿದೆ. 4 ಗ್ರಾ.ಪಂ.ಗಳಲ್ಲಿ ಅತ್ಯಧಿಕ ಸಂಖ್ಯೆಗಳಲ್ಲಿ ಎಸ್ಸಿಎಸ್ಟಿ ಕಾಲೊನಿಯಿದ್ದು ಕುಡಿಯುವ ನೀರಿನ ಸಮಸ್ಯೆ ಪರಿಹರಿಸುವ ನಿಟ್ಟಿನಲ್ಲಿ ಸರಕಾರ ಬಹುಗ್ರಾಮ ಸರಬರಾಜು ಯೋಜನೆಗೆ ಚಾಲನೆ ನೀಡಬೇಕು. 
 -ಉದಯಕುಮಾರ ತಲ್ಲೂರು, ಕರ್ನಾಟಕ ದಲಿತ ಸಂಘರ್ಷ ಸಮಿತಿ(ಭೀಮವಾದ) ರಾಜ್ಯ ಸಂಘಟನಾ ಸಂಚಾಲಕ.


ವರದಿ: ಜಾನ್ ಡಿಸೋಜ ಕುಂದಾಪುರ 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com