ಕೋಡಿ ಕೃಷಿಕರ ನೀಗದ ಬವಣೆ

ಕುಂದಾಪುರ: ಕೃಷಿ ಭೂಮಿಗೆ ಉಪ್ಪು ನೀರು ಒಳ ನುಗ್ಗುವುದನ್ನು ತಡೆಗಟ್ಟಲೋಸುಗ ಪುರಸಭೆ ವ್ಯಾಪ್ತಿಯ ಕೋಡಿ ಗ್ರಾಮದಲ್ಲಿ ಕೈಗೊಂಡ ಎರಡು ಮಹತ್ವದ ಕಾಮಗಾರಿಗಳು ಕೃಷಿಕರ ಬದುಕನ್ನೇ ಮೂರಾಬಟ್ಟೆಯನ್ನಾಗಿಸಿರುವ ಸಂಗತಿ ಬೆಳಕಿಗೆ ಬಂದಿದೆ. 
   
 ಕೋಡಿ ಚಕ್ರಮ್ಮ ದೇವಸ್ಥಾನ ವಠಾರದಿಂದ ಕೋಡಿ ಸೋನ್ಸ್ ಶಾಲೆ ಪ್ರದೇಶದವರೆಗಿನ ನದಿ ಪಾತ್ರದ ಕೃಷಿಕರು ಇದೀಗ ಸಂಕಷ್ಟದಲ್ಲಿದ್ದಾರೆ. ಕೃಷಿ ಭೂಮಿ ನೀರು ನದಿಗೆ ಸೇರಲೆಂದು ಕಟ್ಟಲಾದ ಕಾಂಕ್ರೀಟ್ ತೋಡು ಹಾಗೂ ಉಪ್ಪು ನೀರು ಕೃಷಿ ಭೂಮಿಗೆ ನುಗ್ಗದಂತೆ ನಿರ್ಮಿಸಲಾದ ನದಿ ದಂಡೆಗೆ ನಿರ್ಮಿಸಲಾದ ತಡೆಗೋಡೆಗಳು ಯಾತನೆ ಸೃಷ್ಟಿಸಿವೆ. 

      ಪುರಸಭೆ ನಿಧಿಯಿಂದ ಸುಮಾರು 7 ಲಕ್ಷ ರೂ. ವೆಚ್ಚದಲ್ಲಿ ಕೃಷಿ ಭೂಮಿ ಮತ್ತು ಮನೆ ವಠಾರದ ನೀರು ನದಿ ಸೇರಲೆಂದು ಕೋಡಿ ಸೋನ್ಸ್ ಶಾಲೆ ಹತ್ತಿರದ ಬಯಲಿನ ನಡುವೆ ನಿರ್ಮಿಸಲಾದ ಕಾಂಕ್ರೀಟ್ ತೋಡಿನಲ್ಲಿ ಮಳೆ ನೀರು ವ್ಯಾಪಕವಾಗಿ ಸಂಗ್ರಹವಾಗಿದೆ. ತೋಡಿನ ನೀರು ನದಿಗೆ ಹರಿಯುವ ಬದಲು ಹಿಮ್ಮುಖವಾಗಿ ಪುನರಪಿ ಕೃಷಿ ಭೂಮಿಗೆ ನುಗ್ಗುತ್ತಿದೆ. ನೀರು ನದಿಗೆ ಹೋಗಲೆಂದು ನದಿ ದಂಡೆಗೆ ಅಳವಡಿಸಿದ ಹಲಗೆ ತೆರವು ಕಾರ್ಯ ನಡೆಯದೆ ಇರುವುದರಿಂದ ಸುಮಾರು 100 ಎಕರೆ ಕೃಷಿ ಭೂಮಿ ಈಗ ನಿರುಪಯುಕ್ತವಾಗುವ ಹಾದಿ ಹಿಡಿದಿದೆ. ಸರಿಸುಮಾರು 80 ಎಕರೆ ಕೃಷಿ ಭೂಮಿ ಕೃಷಿಯೇ ಮಾಡದಂತಹ ಸ್ಥಿತಿಗೆ ಬಂದು ತಲುಪಿದೆ. 

 ನದಿದಂಡೆ ನಿರ್ಮಾಣ ಸೃಷ್ಟಿಸಿದ ಗೋಳು: ಕಾಂಕ್ರೀಟ್ ತೋಡಿನ ಅವಸ್ಥೆ ಈ ರೀತಿಯಾದರೆ ಸಣ್ಣ ನೀರಾವರಿ ಇಲಾಖೆಯಿಂದ ಕುಂದಾಪುರ ಶಾಸಕ ಹಾಲಾಡಿ ಶ್ರೀನಿವಾಸ ಶೆಟ್ಟಿ ಅವರ ವಿಶೇಷ ಪ್ರಯತ್ನದ ಫಲವಾಗಿ ಸುಮಾರು 90 ಲಕ್ಷ ರೂ. ವೆಚ್ಚದಲ್ಲಿ ಕೋಡಿ ಚಕ್ರಮ್ಮ ದೇವಸ್ಥಾನದಿಂದ ಮೊದಲ್ಗೊಂಡು ಕೋಡಿ ಸೋನ್ಸ್ ಶಾಲೆವರೆಗಿನ ನದಿಪಾತ್ರದಲ್ಲಿ ನಿರ್ಮಿಸಲಾದ ನದಿ ದಂಡೆ(ತಡೆಗೋಡೆ) ಕೃಷಿಕರ ಗೋಳು ಇಮ್ಮಡಿಗೊಳಿಸಿದೆ. 

      ಕಳೆದ ವರ್ಷ ಕಾಮಗಾರಿ ನಡೆಸಲೋಸುಗ ಕೃಷಿ ಭೂಮಿಯ ನಡುವೆ ತಾತ್ಕಾಲಿಕ ಮಣ್ಣಿನ ರಸ್ತೆ ನಿರ್ಮಿಸಲಾಗಿದ್ದು ಅದನ್ನು ತೆರವುಗೊಳಿಸದ ಹಿನ್ನೆಲೆಯಲ್ಲಿ ಹಲವು ರೈತರು ಈ ಬಾರಿ ಭತ್ತದ ಕೃಷಿ ಕೈಬಿಟ್ಟಿದ್ದಾರೆ. ಕೋಡಿ ಸೋನ್ಸ್ ಶಾಲೆ ಎದುರಿನ ಸುಮಾರು 60 ಎಕರೆ ಕೃಷಿ ಭೂಮಿಯಲ್ಲಿ ಈ ಬಾರಿ ಭತ್ತದ ಕೃಷಿ ನಡೆಸಲಾಗಿಲ್ಲ. ಕಾಮಗಾರಿಗೆಂದು ಬಂದ ಕಲ್ಲುಗಳು, ಮರಮಟ್ಟುಗಳು ಗದ್ದೆಯಲ್ಲಿ ಬಿದ್ದುಕೊಂಡಿವೆ. 

       ಇನ್ನೊಂದೆಡೆ ಗದ್ದೆಯ ನೀರು ನದಿಗೆ ಸೇರಲೆಂದು ಹುಗಿಯಲಾದ ಪೈಪ್‌ಗಳಿಂದ ನೀರು ನದಿಗೆ ಸೇರುತ್ತಿಲ್ಲ. ನಿರ್ದಿಷ್ಟವಾಗಿ ಸೋನ್ಸ್ ಶಾಲೆ ಎದುರುಗಡೆ ಕಟ್ಟಲಾದ ಸುಮಾರು 180 ಮೀ. ಉದ್ದದ ನದಿ ದಂಡೆಯ ಶಿಲೆಕಲ್ಲುಗಳು ನದಿಗೆ ಕುಸಿದಿದೆ. ಹತ್ತಾರು ವರ್ಷಗಳಿಂದ ಉಪ್ಪು ನೀರಿನ ಹಾವಳಿಯಿಂದ ತತ್ತರಿಸಿದ ಇಲ್ಲಿನ ಕೃಷಿಕರು ಇದೀಗ ಸಮಸ್ಯೆ ಪರಿಹಾರಕ್ಕೆಂದು ರೂಪಿಸಲಾದ ಯೋಜನೆಗಳಿಗೆ ಅವರ ಪಾಲಿಗೆ ಮುಳುವಾಗಿರುವುದರಿಂದ ಹೈರಾಣಾಗಿಬಿಟ್ಟಿದ್ದಾರೆ. 

ಅಸಮರ್ಪಕ ಕಾಮಗಾರಿ: ಇಲ್ಲಿ ನಡೆದಿರುವ ನದಿ ದಂಡೆ ರಚನೆ ಕಾರ್ಯ ಅಸಮರ್ಪಕವಾಗಿದೆ. ಸರಕಾರಿ ಹಣ ದುರುಪಯೋಗವಾಗಿದೆ. ನದಿದಂಡೆ ಕಾಮಗಾರಿ ಏಕಪ್ರಕಾರವಾಗಿ ನಡೆದಿಲ್ಲ. ಕೆಲವೆಡೆ ಎತ್ತರ, ಇನ್ನು ಕೆಲವೆಡೆ ಎತ್ತರ ಕಡಿಮೆ ಮಾಡಿ ನಿರ್ಮಿಸಲಾಗಿದೆ. ಶಿಲೆಕಲ್ಲುಗಳನ್ನು ನದಿ ದಂಡೆಗೆ ಸುರಿಯಲಾಗಿದೆಯೇ ಹೊರತು ಸರಿಯಾಗಿ ಜೋಡಣೆ ನಡೆದಿಲ್ಲ. ಕಾಮಗಾರಿ ನಡೆದು ಕೆಲವೇ ತಿಂಗಳು ಕಳೆದಿದ್ದರೂ ಕಲ್ಲುಗಳು ನದಿಗೆ ಜಾರಿವೆ. ಇನ್ನೆರಡು ವರ್ಷಗಳಲ್ಲಿ ನದಿ ದಂಡೆ ಕಲ್ಲುಗಳು ನದಿಗೆ ಪಾಲಾಗುವುದು ನಿಶ್ಚಿತ. 

ಬಹಳ ಮುಖ್ಯವಾಗಿ ಕಾಮಗಾರಿ ನಿರ್ವಹಿಸುವವರ ನಿರ್ಲಕ್ಷ್ಯದಿಂದಾಗಿ ಇಲ್ಲಿನ 20 ಕೃಷಿಕ ಕುಟುಂಬಗಳು ಭತ್ತದ ಕೃಷಿ ಮಾಡದಂತಾಗಿದೆ. ಕಾಮಗಾರಿಗೋಸ್ಕರ ತರಲಾದ ಮರಮಟ್ಟು, ಕಲ್ಲುಗಳು, ಪೈಪ್‌ಗಳು, ಸಿಮೆಂಟ್ ಗದ್ದೆಯಲ್ಲಿ ಉಳಿದುಬಿಟ್ಟಿದೆ. ಜತೆಗೆ ತಾತ್ಕಾಲಿಕ ಮಣ್ಣಿನ ರಸ್ತೆ ತೆರವುಗೊಳಿಸಿಲ್ಲ. ಗದ್ದೆಯ ನೀರು ನದಿದಂಡೆಗೆ ಅಳವಡಿಸಿದ ಪೈಪ್‌ನಲ್ಲಿ ಹೊರಹೋಗುತ್ತಿಲ್ಲ. ಇದರಿಂದ ಗದ್ದೆಯಲ್ಲಿ ಕೃಷಿ ಮಾಡಲಾಗುತ್ತಿಲ್ಲ. ಒಂದೆರಡು ರೈತ ಕುಟುಂಬಗಳು ಭತ್ತದ ನಾಟಿ ಮಾಡಿದ್ದರೂ ಭತ್ತದ ಸಸಿಗಳು ಸಂಪೂರ್ಣ ಕೊಳೆತು ಹೋಗಿದೆ. 

ಪುರಸಭೆ ತಕ್ಷಣ ಗಮನಹರಿಸಿ ಸಮಸ್ಯೆಗೆ ಸ್ಪಂದಿಸಬೇಕು ಎಂದು ಸ್ಥಳೀಯ ಕೃಷಿಕ ಸುಬ್ರಹ್ಮಣ್ಯ ಶೇರೆಗಾರ್ ಆಗ್ರಹಿಸಿದ್ದಾರೆ. 

* ಹತ್ತಾರು ವರ್ಷಗಳಿಂದ ಈ ಭಾಗದ ಕೃಷಿಕರು, ನಿವಾಸಿಗಳು ಎದುರಿಸುತ್ತಿರುವ ತೊಂದರೆ ಪರಿಹಾರಕ್ಕೆ ಕಾಂಕ್ರೀಟ್ ನೀರಿನ ತೋಡು ರಚನೆ ಮತ್ತು ತಡೆಗೋಡೆ ನಿರ್ಮಾಣ ಕಾರ್ಯ ನಡೆಸಲಾಗಿದೆ. ತಡೆಗೋಡೆ ನಿರ್ಮಾಣ ಕಾರ್ಯ ಪೂರ್ಣಗೊಂಡಿಲ್ಲ. ಎರಡು ಭಾಗದಲ್ಲಿ ಮಾತ್ರ ಕಾಮಗಾರಿ ನಡೆಸಲಾಗಿದ್ದು ಇನ್ನೂ ಒಂದು ಭಾಗ ಬಾಕಿಯಿದೆ. ಪ್ರಸ್ತುತ ಇಲ್ಲಿ ಎದುರಾಗಿರುವ ತೊಂದರೆಯ ಬಗ್ಗೆ ಪುರಸಭೆಯ ಗಮನಕ್ಕೆ ತರಲಾಗಿದೆ -ನಾಗರಾಜ್ ಕಾಂಚನ್ , ಸ್ಥಳೀಯ ಮುಖಂಡ, ಪುರಸಭೆ ಮಾಜಿ ಸದಸ್ಯ.
ವರದಿ: ಜಾನ್ ಡಿಸೋಜ, ವಿಕ 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com