ಕಡಲಿಗಿಳಿದ ಮೀನುಗಾರರು

ಗಂಗೊಳ್ಳಿಯಲ್ಲಿ ಸೋಮವಾರ ಈ ವರ್ಷದ ಮೀನುಗಾರಿಕೆ ಋತುವಿಗೆ ಚಾಲನೆ ದೊರೆತಿದೆ. ಬಿರುಗಾಳಿ ಪ್ರಕೋಪ, ಬಂದರಿನ ಮೂಲ ಸಮಸ್ಯೆ ಅಡಗಿಸಿಕೊಂಡು ಗಂಗೊಳ್ಳಿ ಮೀನುಗಾರರು ಕಡಲಿಗಿಳಿದಿದ್ದಾರೆ. ಟ್ರಾಲ್ ಬೋಟ್‌ಗಳು ಸಮುದ್ರರಾಜನಿಗೆ ನಮಿಸಿ ಅಧಿಕೃತವಾಗಿ ಮೀನುಗಾರಿಕೆಗೆ ತೆರಳಿದ್ದರೆ ಪರ್ಸಿನ್ ಬೋಟ್‌ಗಳು ಆ. 14ರಿಂದ ಕಡಲಿಗಿಳಿಯಲು ತೀರ್ಮಾನಿಸಿವೆ. 

ಜು. 26ರಂದು ರಾತ್ರಿ ಅಪ್ಪಳಿಸಿದ ಬಿರುಗಾಳಿ ಗಂಗೊಳ್ಳಿ ಕಿರುಬಂದರಿನ ಪ್ರಾಂಗಣ ಸೇರಿದಂತೆ ಇತರೆ ಆಸ್ತಿಯನ್ನು ನಾಶ ಮಾಡಿತ್ತು. ಮೀನುಗಾರ ರ ಕಚೇರಿ, ಹೋಟೆಲ್, ಗೂಡಂಗಡಿ ನೆಲಸಮಗೊಂಡಿತ್ತು. 10 ಲಕ್ಷಕ್ಕೂ ಹೆಚ್ಚು ಆಸ್ತಿಪಾಸ್ತಿ ಹಾನಿಗೊಂಡಿತ್ತು. ಸುಂಟರ ಗಾಳಿಯ ಪ್ರಕೋಪಕ್ಕೊಳ ಗಾದ ಗಂಗೊಳ್ಳಿ ಕಿರುಬಂದರಿನ ದುರಸ್ತಿ ಕಾರ್ಯ ಇನ್ನೂ ಆರಂಭಗೊಂ ಡಿಲ್ಲ. ಇನ್ನೊಂದೆಡೆ ಬಂದರಿನಲ್ಲಿ ತುಂಬಿರುವ ಹೂಳು, ಬ್ರೇಕ್‌ವಾಟರ್‌ನ ಅಧ್ವಾನ, ಹಳೆ ಬಂದರು ಜೆಟ್ಟಿ ನಿರ್ಮಾಣ ಅಪೂರ್ಣ ಮೀನುಗಾರರ ಜೀವವನ್ನು ಬಹು ಸಮಯದಿಂದ ಹಿಂಡುತ್ತಿದೆ. ಈ ಎಲ್ಲದರ ನಡುವೆ ಯೂ ಗಂಗೊಳ್ಳಿ ಕಿರುಬಂದರಿನಲ್ಲಿ ಮೀನುಗಾರರು ದುಡಿಮೆಗೆ ಶುರು ಹಚ್ಚಿಕೊಂಡಿದ್ದಾರೆ. 

ಬಗೆಹರಿಯದ ಸಮಸ್ಯೆ: ಗಂಗೊಳ್ಳಿ ಕಿರುಬಂದರು ಜಿಲ್ಲೆಯ ಮೀನುಗಾರಿ ಕೆ ವಲಯ. ಕೋಡಿ-ಕನ್ಯಾನದಿಂದ ಶಿರೂರು ಗಡಿವರೆಗಿನ ಸುಮಾರು 35 ಸಾವಿರಕ್ಕೂ ಹೆಚ್ಚು ಮೀನುಗಾರರು ಬಂದರನ್ನು ನೆಚ್ಚಿ ಕೊಂಡಿದ್ದಾರೆ. ಸುಮಾರು 350ಕ್ಕೂ ಹೆಚ್ಚು ದೋಣಿಗಳು ಇಲ್ಲಿ ಕಾರ್ಯಾಚರಿಸುತ್ತಿದೆ. ಕೇಂದ್ರ ಹಾಗೂ ರಾಜ್ಯ ಸರಕಾರದ ಜಂಟಿ ಅನುದಾನದೊಂದಿಗೆ ಗಂಗೊಳ್ಳಿ ಕಿರುಬಂದರು ಅಭಿವೃದ್ಧಿಗೊಂಡಿದ್ದರೂ ಸಮಸ್ಯೆಗಳು ಮೀನುಗಾರರ ಬದುಕಿಗೆ ಪ್ರಹಾರ ನೀಡಿದೆ. 

ಗಂಗೊಳ್ಳಿ ಕಿರುಬಂದರಿನಲ್ಲಿ ತುಂಬಿರುವ ವ್ಯಾಪಕ ಹೂಳಿನಿಂದಾಗಿ 405 ಮೀ. ಉದ್ದದ ಬಂದರಿನ ಜೆಟ್ಟಿಯಲ್ಲಿ ಅರ್ಧಭಾಗ ನಿಷ್ಪ್ರಯೋಜಕ ಆಗಿ ಬಿಟ್ಟಿದೆ. ದೋಣಿ ನಿಲ್ಲಿಸಲಾಗದ ಅವಸ್ಥೆ ಸೃಷ್ಟಿಯಾಗಿದೆ. ಬಂದರು ಹೂಳು ತಡೆಗಟ್ಟಲೆಂದು 6 ಕೋಟಿ ರೂ. ವೆಚ್ಚದಲ್ಲಿ ಕೈಗೊಂಡ ಬ್ರೇಕ್ ವಾಟರ್ ಸಮಸ್ಯೆ ಬಿಗಡಾಯಿಸಿದೆ. 60 ಮೀ. ಉದ್ದಕ್ಕೆ ಬಂದರಿಗೆ ಅಡ್ಡಲಾಗಿ ಕಟ್ಟ ಲಾದ ಬ್ರೇಕ್ ವಾಟರ್‌ನ ಕಲ್ಲುಗಳು ಕುಸಿದು ಸಮುದ್ರದಲ್ಲಿ ತೇಲಿ ಹೋಗಿ ದ್ದು, ಬಂದರಿನ ಹೂಳಿನ ಪ್ರಮಾಣ ಹೆಚ್ಚಳಕ್ಕೆ ಕಾರಣವಾಗಿದೆ. 

ಪ್ರಸ್ತುತ ನಡೆದಿರುವ ಬ್ರೇಕ್‌ವಾಟರ್ ನಿರ್ಮಾಣ ಕೈಬಿಟ್ಟು ವೈಜ್ಞಾನಿಕ ನೆಲೆಯಲ್ಲಿ ಬ್ರೇಕ್‌ವಾಟರ್ ನಿರ್ಮಾಣ ಆಗಬೇಕೆಂಬ ಮೀನುಗಾರರ ಕೂಗಿಗೆ ಸರಕಾರ ಸ್ಪಂದಿಸುತ್ತಿಲ್ಲ. ಬ್ರೇಕ್‌ವಾಟರ್, ಹೂಳಿನ ಸಮಸ್ಯೆ ನಡುವೆಯೂ ಬಂದರು ಇಲಾಖೆ ಬಂದರಿನ ಹಳೆ ಜೆಟ್ಟಿ ದುರಸ್ತಿಗೆ ಮುಂದಾಯಿತು. ಸುಮಾರು 3 ಕೋಟಿ ರೂ. ವೆಚ್ಚದಲ್ಲಿ ಹಮ್ಮಿ ಕೊಂಡಿರುವ ಹಳೆ ಜೆಟ್ಟಿ ನಿರ್ಮಾಣ ಕಾರ್ಯ ಇನ್ನೂ ಪೂರ್ಣಗೊಂಡಿಲ್ಲ. ಬಂದರಿಗೆ ಅಭಿಮುಖವಾಗಿ ಕೋಡಿಯಲ್ಲಿ ಜೆಟ್ಟಿ ನಿರ್ಮಿಸುವ ಯೋಜನೆ ಇನ್ನೂ ಕೈಗೂಡಿಲ್ಲ. 

ಅಳಿವೆ ದುಃಸ್ವಪ್ನ: ಗಂಗೊಳ್ಳಿ ಮೀನುಗಾರರ ಪಾಲಿಗೆ ಗಂಗೊಳ್ಳಿ ಅಳಿವೆ ದುಃಸ್ವಪ್ನವಾಗಿ ಕಾಡುತ್ತಿದೆ. ಜೀವ ಕೈಯಲ್ಲಿ ಹಿಡಿದು ಅಳಿವೆ ದಾಟುವ ಅವಸ್ಥೆ ನಿರ್ಮಾಣ ಆಗಿದೆ. ಕಡಲಬ್ಬರ, ಕಡಲ್ಕೊರೆತ ದೆಸೆಯಿಂದಾಗಿ ಅಳಿವೆಯಲ್ಲಿ ವ್ಯಾಪಕ ಹೂಳು ತುಂಬಿದ್ದು, ಪರ್ಸಿನ್ ಬೋಟುಗಳು ಬಂದರು ಪ್ರವೇಶಿಸಬೇಕಾದರೆ ಒದ್ದಾಡಬೇಕಾಗಿದೆ. ಗಂಗೊಳ್ಳಿ ಕಿರುಬಂದರು, ಅಳಿವೆ ಹೂಳೆತ್ತುವ 2 ಕೋಟಿ ರೂ. ಯೋಜನೆ ನೆನೆಗುದಿಗೆ ಬಿದ್ದಿರುವುದು ಮೀನುಗಾರರ ಪಾಲಿಗೆ ಸಂಕಷ್ಟ ತಂದೊಡ್ಡಿದೆ. 

ಬಿರುಗಾಳಿಗೆ ಚೇತರಿಸದ ಬಂದರು: ಜು.26ರಂದು ರಾತ್ರಿ ಅಪ್ಪಳಿಸಿದ ಬಿರುಗಾಳಿಯಿಂದಾಗಿ ಹಾನಿಗೊಂಡ ಗಂಗೊಳ್ಳಿ ಬಂದರು ಪ್ರದೇಶ ಇನ್ನೂ ಸಹಜ ಸ್ಥಿತಿಗೆ ತಲುಪಿಲ್ಲ. ಲಕ್ಷಾಂತರ ರೂ. ಸೊತ್ತು ಹಾನಿಗೊಂಡಿದ್ದು, ಈ ತನಕ ದುರಸ್ತಿ ಕಾರ್ಯ ನಡೆಯದೆ ಇರುವುದು ಮೀನುಗಾರರ ಸಂಕಷ್ಟವನ್ನು ಹೆಚ್ಚಿಸಿದೆ. 

*ತಾಲೂಕಿನ ಜೀವನಾಡಿಯಾಗಿರುವ ಗಂಗೊಳ್ಳಿ ಕಿರು ಬಂದರಿನ ಬಗ್ಗೆ ಸರಕಾರ ಗಮನ ಹರಿಸಬೇಕು. ಮೀನುಗಾರರು ಸಮಸ್ಯೆಗಳಿಲ್ಲದೆ ಕೆಲಸ ಮಾಡುವ ವಾತಾವರಣ ಸೃಷ್ಟಿಯಾಗಬೇಕಾಗಿದೆ. ಅಭಿವೃದ್ಧಿ ಕೆಲಸ ಕಾರ್ಯಗಳು ನಿಗದಿತ ಸಮಯದಲ್ಲಿ ನಡೆಯದೆ ಇರುವುದರಿಂದ ಬಂದರು ಮೂಲೆಗುಂಪಾಗುತ್ತಿದೆ. ಪ್ರಸ್ತುತ ಬಂದರಿನಲ್ಲಿ ದೋಣಿ ನಿಲುಗಡೆ ಅಸಾಧ್ಯವಾಗಿರುವ ಸ್ಥಿತಿ ಎದುರಾಗಿದೆ. ಮೀನುಗಾರಿಕೆ ಮತ್ತು ಬಂದರು ಇಲಾಖೆ ಗಮನಹರಿಸಬೇಕು. -ಕೃಷ್ಣ ಕೋಟ್ಯಾನ್, ಮೀನುಗಾರ ಮುಖಂಡ ಗಂಗೊಳ್ಳಿ 

ವರದಿ ಕೃಪೆ: ಜಾನ್ ಡಿಸೋಜ, ವಿಕ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com