ಮರವಂತೆಯಲ್ಲಿ ವಿನೂತನ ನಾಡದೋಣಿ ಮೀನುಗಾರಿಕೆ ಬಂದರು ಕಾಮಗಾರಿಗೆ ಚಾಲನೆ

ಕುಂದಾಪುರ: ಕರಾವಳಿ ಜಿಲ್ಲೆಯಲ್ಲಿಯೇ ಮೊದಲ ಬಾರಿಗೆ ಸಾಕಾರಗೊಳ್ಳಲಿರುವ ಮರವಂತೆ ನಾಡ ದೋಣಿ ಮೀನುಗಾರಿಕೆ ಬಂದರು ಕಾಮಗಾರಿಗೆ ಚಾಲನೆ ದೊರೆತಿದೆ. ಕೇರಳ ಮಾದರಿಯ ವಿನೂತನ ನಾಡದೋಣಿ ಮೀನುಗಾರಿಕೆ ಬಂದರು ರಾಜ್ಯದಲ್ಲಿಯೇ ಮೊದಲ ಪ್ರಯೋಗ ಎಂದು ಪರಿಗಣಿಸಲಾಗಿದೆ. ಕೋಡಿ ಕನ್ಯಾನದಿಂದ ಮೊದಲ್ಗೊಂಡು ಶಿರೂರುವರೆಗೆ ಕಾರ್ಯಾಚರಿಸುತ್ತಿರುವ ನಾಡ ದೋಣಿಗಳಿಗೆ ಈ ಬಂದರು ಪ್ರಮುಖ ತಂಗುದಾಣವಾಗಿ ಮೂಡಿಬರಲಿದೆ. 

54 ಕೋಟಿ ರೂ. ವೆಚ್ಚದಲ್ಲಿ ಬಂದರು ನಿರ್ಮಾಣಗೊಳ್ಳಲಿದೆ. ಮರವಂತೆಯ ಕಡಲ ತೀರದಲ್ಲಿ ದಕ್ಷಿಣಕ್ಕೆ ಉತ್ತರಕ್ಕೆ 260ಮೀಟರ್ ಹಾಗೂ ದಕ್ಷಿಣಕ್ಕೆ 690 ಮೀಟರ್ ಉದ್ದದಲ್ಲಿ ಬ್ರೇಕ್ ವಾಟರ್ ಮಾದರಿಯಲ್ಲಿ ಬಂದರು ನಿರ್ಮಾಣ ಕಾರ್ಯ ನಡೆಯಲಿದ್ದು, ಇದರ ನಡುವೆ ನಾಡ ದೋಣಿಗಳು ಲಂಗರು ಹೂಡಲಿವೆ. ತಮಿಳುನಾಡಿನ ಮೆ.ಎನ್.ಎಸ್.ಕೆ. ಬಿಲ್ಡರ್ಸ್‌ ಸಂಸ್ಥೆ ಕಾಮಗಾರಿ ನಿರ್ವಹಿಸುತ್ತಿದೆ. ಈಗಾಗಲೇ ಉತ್ತರ ದಿಕ್ಕಿನ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದ್ದು, 40 ಮೀಟರ್ ಉದ್ದದಷ್ಟು ಕೆಲಸ ಪೂರ್ಣಗೊಂಡಿದೆ. 

ರಾಜ್ಯದಲ್ಲಿಯೇ ಪ್ರಥಮ: ಕರಾವಳಿ ಅಷ್ಟೇ ಅಲ್ಲ ರಾಜ್ಯದಲ್ಲಿಯೇ ಈ ಮಾದರಿಯ ಬಂದರು ನಿರ್ಮಾಣ ಪ್ರಥಮ ಎಂದು ಬಂದರು ಇಲಾಖೆ ಎಂಜಿನಿ ಯರ್ ಕ್ಸೇವಿಯರ್ ಡಯಾಸ್ ತಿಳಿಸಿದ್ದಾರೆ. ಆರಂಭಿಕ ಯೋಜನಾ ಮೊತ್ತ 45 ಕೋಟಿ ರೂ. ಆಗಿದ್ದು ಒಟ್ಟು 54 ಕೋಟಿ ತಗಲುವ ಸಾಧ್ಯತೆ ಇದೆ. ತಮಿಳುನಾಡಿನ ಕಂಪನಿ ಕಾಮಗಾರಿಯ ಗುತ್ತಿಗೆ ವಹಿಸಿಕೊಂಡಿದ್ದು, 2016ರ ಮಾರ್ಚ್ ಅಂತ್ಯದೊಳಗೆ ಕಾಮಗಾರಿ ಪೂರ್ಣಗೊಳಿಸುವ ಇರಾದೆ ಇಟ್ಟುಕೊಳ್ಳಲಾಗಿದೆ. ನಾಡದೋಣಿ ಬಂದರು ನಿರ್ಮಾಣದಿಂದ ಕಿರು ಬಂದರುಗಳಲ್ಲಿನ ಒತ್ತಡ ಕಡಿಮೆಯಾಗಲಿದೆ. ಮೀನುಗಾರಿಕೆಗೂ ಅನುಕೂಲವಾಗಲಿದೆ ಎಂದು ಅವರು ಹೇಳಿದ್ದಾರೆ. 

ರಾಘವೇಶ್ವರ ಶ್ರೀಗಳ ಹುಟ್ಟುಹಬ್ಬದ ಕೊಡುಗೆ: ಮೂರು ವರ್ಷಗಳ ಹಿಂದೆ ಹೊಸನಗರ ರಾಮಚಂದ್ರಾಪುರ ಮಠಾಧೀಶ ಶ್ರೀ ರಾಘವೇಶ್ವರ ಭಾರತಿ ತೀರ್ಥ ಸ್ವಾಮೀಜಿ ಮರವಂತೆ ಶ್ರೀ ರಾಮ ಮಂದಿರಕ್ಕೆ ಭೇಟಿ ನೀಡಿದ್ದರು. ರಾಮ ಮಂದಿರದಲ್ಲಿ ತಮ್ಮ ಹುಟ್ಟುಹಬ್ಬ ಆಚರಿಸಿಕೊಳ್ಳುವ ಸಂದರ್ಭ ಎದುರಾದಾಗ ಸಂಸದ ಬಿ.ವೈ. ರಾಘವೇಂದ್ರ ಆಗಮಿಸಿದ್ದರು. ಈ ಭಾಗದ ಮೀನುಗಾರರ ಬಹು ಸಮಯದ ಬೇಡಿಕೆಯಾಗಿರುವ ನಾಡದೋಣಿ ಬಂದರನ್ನು ನನ್ನ ಹುಟ್ಟು ಹಬ್ಬದ ಕೊಡುಗೆಯಾಗಿ ನೀಡಬೇಕು ಎಂದು ಸಂಸದರಲ್ಲಿ ಶ್ರೀಗಳು ಅರಿಕೆ ಮಾಡಿ ಕೊಂಡಿದ್ದರು. ಮೀನುಗಾರರ ಮನವಿ, ಸ್ವಾಮೀಜಿಗಳ ಅರಿಕೆಗೆ ಸ್ಪಂದಿಸಿದ ಸಂಸದ ಬಿ.ವೈ. ರಾಘವೇಂದ್ರ ಅಂದಿನ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರ ಮುಖೇನ ಮರವಂತೆಯಲ್ಲಿ ನಾಡ ದೋಣಿ ಬಂದರು ನಿರ್ಮಾಣಕ್ಕೆ ಪ್ರಯತ್ನ ನಡೆಸಿದ್ದರು. ಅದರ ಫಲವಾಗಿ ಮರವಂತೆಯಲ್ಲಿ ಬಂದರು ನಿರ್ಮಾಣ ಕಾರ್ಯ ಆರಂಭಗೊಂಡಿದ್ದು, ಮರವಂತೆ ಮೀನುಗಾರರಲ್ಲಿ ಹರ್ಷ ಮೂಡಿಸಿದೆ. 

ಕಳೆದ ಕೆಲವು ವರ್ಷಗಳಿಂದ ಈ ಭಾಗದ ನಾಡ ದೋಣಿ ಮೀನುಗಾರರು, ಕರ್ನಾಟಕ ಹರಿಕಾಂತ ಮಹಾಜನ ಸಂಘ, ಶ್ರೀರಾಮ ಮಂದಿರ, ಶ್ರೀರಾಮ ಸೇವಾ ಸಂಘದ ಮೂಲಕ ನಾಡ ದೋಣಿ ಬಂದರು ನಿರ್ಮಾಣಕ್ಕಾಗಿ ಹೋರಾಟ ನಡೆಸಿದ್ದಾರೆ.

* ಕೋಡಿಯಿಂದ ಶಿರೂರುವರೆಗೆ ಕಾರ್ಯಾಚರಿಸುವ 1500ಕ್ಕೂ ಹೆಚ್ಚು ದೋಣಿಗಳಿಗೆ ಈ ಬಂದರು ವರದಾನ ಆಗಲಿದೆ. ಇದರಿಂದ ಕಿರು ಬಂದರುಗಳಲ್ಲಿ ಒತ್ತಡ ತಪ್ಪಲಿದೆ. ನಾಡ ದೋಣಿ ಮೀನುಗಾರರು ಉದರಕ್ಕಾಗಿ ಅಲ್ಲಲ್ಲಿ ರಾತ್ರಿ ಹಗಲು ನಿದ್ದೆಗೆಟ್ಟು ಸಂಚರಿಸುವುದು ತಪ್ಪುತ್ತದೆ. ಮರವಂತೆ ರಾಷ್ಟ್ರೀಯ ಹೆದ್ದಾರಿಗೆ ನಿಕಟವಾಗಿರುವುದರಿಂದ ಈ ಬಂದರು ಅತ್ಯಂತ ಅನುಕೂಲಕರವಾಗಲಿದೆ.
-ಎಂ.ಎಸ್. ಶೇಷ, ಮೀನುಗಾರ ಮುಖಂಡರು ಮರವಂತೆ 

* ಮರವಂತೆಯಲ್ಲಿ ನಾಡದೋಣಿ ಮೀನುಗಾರಿಕೆ ಬಂದರು ಆಗುವುದರಿಂದ ನಮಗೆ ಬಹಳ ಅನುಕೂಲ ಆಗಲಿದೆ. ಪ್ರಸ್ತುತ ಸೂಕ್ತ ನಿಲುಗಡೆ ಸ್ಥಳ ಇಲ್ಲದೆ ಇರುವುದರಿಂದ ಕಂಚುಗೋಡು, ಮಡಿ, ಗಂಗೊಳ್ಳಿ ಎಲ್ಲೆಂದರಲ್ಲಿ ದೋಣಿ ಸಾಗಿಸಬೇಕು. ಬಹಳ ತಾಪತ್ರಯ. ಇಲಾಖೆ ಶೀಘ್ರವಾಗಿ ಕಾಮಗಾರಿ ಮುಗಿಸಿ ಬಿಟ್ಟುಕೊಟ್ಟಲ್ಲಿ ನಾಡದೋಣಿ ಬಂದರು ನಮಗೆ ವರದಾನವಾಗಲಿದೆ.
 -ರಮೇಶ ಖಾರ್ವಿ, ಸ್ಥಳೀಯ ನಾಡ ದೋಣಿ ಮೀನುಗಾರ
ವರದಿ ಕೃಪೆ-ಜಾನ್‌ ಡಿಸೋಜ, ವಿಕ 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com