45 ಕಸುಬು ನಿರತರಿಗೆ ಆಮ್ ಆದ್ಮಿ ಬಿಮಾ ಯೋಜನೆ ಜಾರಿ

ಉಡುಪಿ : ಮೀನುಗಾರರು, ಬೀಡಿ ಕಾರ್ಮಿಕರು ಮತ್ತು ಹೈನುಗಾರರ ಸಹಿತ 45 ಕಸುಬು ನಿರತರು ಮತ್ತು ಕುಶಲಕರ್ಮಿಗಳು ನಯಾ ಪೈಸೆ ಪ್ರೀಮಿಯಂ ನೀಡದೆ ಇನ್ನು ಮುಂದೆ ವಿಮಾ ಸೌಲಭ್ಯ ಹೊಂದಬಹುದು. 
          ಕೇಂದ್ರ ಕಾರ್ಮಿಕ ಇಲಾಖೆಯಡಿ ಇದ್ದ ಆಮ್ ಆದ್ಮಿ ಬಿಮಾ ಯೋಜನೆಯನ್ನು ಕಂದಾಯ ಇಲಾಖೆ ವ್ಯಾಪ್ತಿಯಲ್ಲೂ ಜಾರಿಗೆ ತರಲಾಗಿದ್ದು, ಬಡತನ ರೇಖೆಗಿಂತ ಕೆಳಗಿರುವವರು, ಅಂಚಿನಲ್ಲಿರುವವರು ಅರ್ಹರಾಗಿದ್ದಾರೆ. ವಿಮೆ ಹೊಂದಿದವರ ನೈಸರ್ಗಿಕ ಮರಣವಾದರೆ 30 ಸಾವಿರ ರೂ., ಅಪಘಾತದಿಂದ ಮೃತಪಟ್ಟರೆ 75 ಸಾವಿರ ರೂ., ಭಾಗಶಃ ವಿಕಲಚೇತನಕ್ಕೆ ಒಳಗಾದರೆ 37,500 ರೂ., ಸಂಪೂರ್ಣ ವಿಕಲಚೇತನವಾದರೆ 75 ಸಾವಿರ ರೂ. ಪರಿಹಾರ ದೊರೆಯಲಿದೆ. 
    ಕುಟುಂಬದಲ್ಲಿರುವ ಇಬ್ಬರು ಮಕ್ಕಳಿಗೆ 9ರಿಂದ 12ನೇ ತರಗತಿ ತನಕ ಮಾಸಿಕ 100 ರೂ. ವಿದ್ಯಾರ್ಥಿ ವೇತನ ದೊರೆಯಲಿದೆ(ಅನ್ಯ ವಿದ್ಯಾರ್ಥಿ ವೇತನ ಹೊರತಾಗಿ). ಗ್ರಾಮ ಕರಣಿಕರ ಕಚೇರಿ, ನಾಡ ಕಚೇರಿ, ತಾಲೂಕು, ಕಚೇರಿ, ಅಟಲ್‌ಜೀ ಜನಸ್ನೇಹಿ ಕೇಂದ್ರಗಳಲ್ಲಿ ಅರ್ಜಿಗಳನ್ನು ಪಡೆಯಬಹುದು. 

ದಾಖಲೆ ಏನೇನು ನೀಡಬೇಕು?: ವಯಸ್ಸಿನ ದೃಢೀಕರಣ ಪತ್ರ(ಜನನ ಪ್ರಮಾಣ ಪತ್ರ/ಚುನಾವಣೆ ಗುರುತಿನ ಚೀಟಿ), ಬಿಪಿಎಲ್ ಪಡಿತರ ಚೀಟಿ ಪ್ರತಿ, ಉದ್ಯೋಗದ ಕುರಿತು ಸ್ವಯಂಘೋಷಿತ ಪ್ರಮಾಣ ಪತ್ರ, ಇಬ್ಬರು ನಾಮನಿರ್ದೇಶಿತರ ವಿವರ(ಹೆಸರು, ಸಂಬಂಧ, ವಿಳಾಸ, ಬ್ಯಾಂಕ್ ಖಾತೆ ವಿವರ ಮತ್ತು ಸಹಿ ನಮೂನೆ) 

9ರಿಂದ 12ನೇ ತರಗತಿ ತನಕ ಓದುತ್ತಿರುವ ಅರ್ಜಿದಾರರ ಕುಟುಂಬಕ್ಕೆ ಸೇರಿದ ಗರಿಷ್ಠ ಎರಡು ಮಕ್ಕಳ ವಿವರ, ಮಕ್ಕಳ ಜನನ ಪ್ರಮಾಣ ಪತ್ರ, ಶಾಲೆಯ ಮುಖ್ಯಸ್ಥರಿಂದ ಶಾಲೆ ಪ್ರಮಾಣ ಪತ್ರ/ಅಂಕ ಪಟ್ಟಿ. 

* 45 ನಾನಾ ಕುಲ ಕಸುಬಿನ ಬಡತನ ರೇಖೆಗಿಂತ ಕೆಳಗಿರುವ, ಅಂಚಿನಲ್ಲಿರುವ ಜನತೆ ಯಾವುದೇ ಹಣ ಪಾವತಿಸದೆ ವಿಮಾ ಸೌಲಭ್ಯ, ಅವಘಡಗಳಾದರೆ ನಿಗದಿತ ಪರಿಹಾರ ಪಡೆಯುವ ಅವಕಾಶವಿದೆ. 
-ಗುರುಪ್ರಸಾದ್, ಗ್ರೇಡ್ 2 ತಹಸೀಲ್ದಾರ್, ಉಡುಪಿ ತಾಲೂಕು ಕಚೇರಿ. 

* ಅಟಲ್‌ಜೀ ಜನಸ್ನೇಹಿ ಕೇಂದ್ರದ ಉಪ ತಹಸೀಲ್ದಾರರು ಯೋಜನೆಯಡಿ ಮಂಜೂರಾತಿ ಅಧಿಕಾರಿಗಳಾಗಿದ್ದು, ಅರ್ಜಿದಾರರ ನೈಜತೆ ಬಗ್ಗೆ ಸ್ಥಳ ತನಿಖೆ ಅಗತ್ಯವಿಲ್ಲ. ಸರಕಾರವೇ ವಿಮೆಗೆ ಸಂಬಂಧಿಸಿದ ಪ್ರೀಮಿಯಂ ಪಾವತಿಸಲಿದ್ದು, ಯೋಜನೆ ಬಗ್ಗೆ ಸಾರ್ವಜನಿಕರಿಗೆ ಮಾಹಿತಿ ನೀಡಲು ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. 
-ಎಸ್. ಕಾತ್ಯಾಯಿನಿ ದೇವಿ, ಪೀಠಾಧಿಕಾರಿ, ಸಾಮಾಜಿಕ ಭದ್ರತ ಮತ್ತು ಪಿಂಚಣಿ ವಿಭಾಗ, ರಾಜ್ಯ ಕಂದಾಯ ಇಲಾಖೆ.

*Republished with courtesy
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com