ಇನ್ನು ಪಂ.ಕಚೇರಿಗಳಲ್ಲಿ ನಿರಂತರ ರಾಷ್ಟ್ರ ಧ್ವಜ ಹಾರಾಟ

ಕುಂದಾಪುರ: ರಾಜ್ಯ ಸರಕಾರದ ಹೊಸ ಆದೇಶದಂತೆ ಈ ಬಾರಿಯ ಸ್ವಾತಂತ್ರ್ಯೋತ್ಸವ ದಿನಾಚರಣೆ ಬಳಿಕ ಜಿ.ಪಂ., ತಾ.ಪಂ. ಹಾಗೂ ಗ್ರಾ.ಪಂ.ಕಚೇರಿಗಳಲ್ಲಿ ನಿರಂತರ ರಾಷ್ಟ್ರ ಧ್ವಜ ಹಾರಾಡಲಿದೆ. ಸರಕಾರಿ ಆದೇಶದಂತೆ ತಾಲೂಕಿನ ಪ್ರತಿ ಗ್ರಾಮ ಪಂಚಾಯಿತಿ ಪಿಡಿಓ ಮತ್ತು ಅಧಿಕಾರಿಗಳಿಗೆ ಒಂದು ಸುತ್ತಿನ ತರಬೇತಿ ನೀಡಲಾಗಿದೆ. ಪ್ರತಿ ಗ್ರಾಮ ಪಂಚಾಯಿತಿಗೂ 3 ರಾಷ್ಟ್ರಧ್ವಜ ಖರೀದಿಸುವಿಕೆಗೆ ಅನುಮತಿ ನೀಡಲಾಗಿದೆ. ಧ್ವಜಕಟ್ಟೆ ಇಲ್ಲದ ಗ್ರಾಮ ಪಂಚಾಯಿತಿಗಳಿಗೆ 13ನೇ ಹಣಕಾಸು ಯೋಜನೆಯಡಿ ಧ್ವಜಕಟ್ಟೆ ನಿರ್ಮಿಸಲು ಅನುದಾನ ನೀಡುವ ಭರವಸೆಯೂ ದೊರೆತಿದೆ. ಅನುದಾನ ಬಳಕೆ ಮಾಡಿಕೊಂಡು ಧ್ವಜಕಟ್ಟೆ ನಿರ್ಮಿಸಿ ರಾಷ್ಟ್ರಧ್ವಜ ಹಾರಿಸಲು ಸೂಚಿಸಲಾಗಿದೆ. 

ರಾಷ್ಟ್ರಧ್ವಜದ ಹಾರಾಟದಲ್ಲಿ ಕೆಲವೊಮ್ಮೆ ತಪ್ಪುಗಳಾಗುತ್ತಿವೆ. ಧ್ವಜದ ಗಾಂಭೀರ್ಯ ಕಾಪಾಡುವುದು ಅತಿ ಮುಖ್ಯವಾಗಿರುವುದರಿಂದ ತಾಲೂಕು ಆಡಳಿತ ಈಗಾಗಲೆ ಸಮರ್ಪಕ ನಿರ್ದೇಶನ ನೀಡಿದೆ. 

ಧ್ವಜ ಸಂಹಿತೆ: ರಾಷ್ಟ್ರ ಧ್ವಜದಲ್ಲಿ ಮೂರು ಬಣ್ಣಗಳ ಸಮಾನವಾದ ಉದ್ದ ಮತ್ತು ಅಗಲ ಅಳತೆಯ ಮೂರು ವಿಭಾಗದ ಪಟ್ಟಿಗಳು ಇವೆ. ಮೇಲ್ಭಾಗ ದಲ್ಲಿ ಭಾರತೀಯ ಕೇಸರಿ ಬಣ್ಣ, ಕೆಳಭಾಗದಲ್ಲಿ ಹಸಿರು ಬಣ್ಣ, ಮಧ್ಯದಲ್ಲಿ ಬಿಳಿ ಬಣ್ಣ ಇರುತ್ತದೆ. ಮಧ್ಯೆ ಸಮಾನ ಅಳತೆಯ ಹೊಂದುವಂತೆ ಆಕಾಶ ನೀಲಿ ಬಣ್ಣದ 24 ಗೆರೆಗಳಿರುವ ಅಶೋಕ ಚಕ್ರವಿರುತ್ತದೆ. ಅಶೋಕಚಕ್ರ ಎರಡು ಕಡೆಗಳಿಂದ ನೋಡುವಾಗ ಸ್ಪಷ್ಟವಾಗಿ ಗೋಚರಿಸಬೇಕು. ಭಾರತೀಯ ರಾಷ್ಟ್ರಧ್ವಜದ ಬಟ್ಟೆಯನ್ನು ಚರಕದಿಂದಾಗಲಿ, ನೂಲಿನಿಂದಾಗಲಿ, ಉಣ್ಣೆ, ರೇಷ್ಮೆಯ ಅಥವಾ ಖಾದಿಬಟ್ಟೆಯಿಂದಲೇ ತಯಾರಿಸಿರಬೇಕು. ರಾಷ್ಟ್ರೀಯ ಧ್ವಜದ ಆಕಾರವು ಆಯತಾಕರವಾಗಿರುತ್ತದೆ. ಧ್ವಜದ ಉದ್ದ ಮತ್ತು ಅಗಲದ ವಿಸ್ತಾರ ಅನುಪಾತ 3:2 ಆಗಿರಬೇಕು. ಧ್ವಜದ ಪ್ರಯೋಗ ಯಾವುದೇ ಖಾಸಗಿ ಪ್ರಯೋಜನಕ್ಕಾಗಿ ಮಾಡಬಾರದು. ತಿಳಿದೋ, ತಿಳಿಯದೆಯೋ ಭೂಮಿ ಸ್ಪರ್ಶ ಮಾಡಕೂಡದು. ಅರ್ಧಕ್ಕೆ ಹಾರಿಸಬಾರದು, ಕೇಸರಿ ಬಣ್ಣ ಕೆಳಗೆ ಬರುವಂತೆ ಪ್ರದರ್ಶಿಸಬಾರದು. ಪರದೆಯನ್ನಾಗಿ ಉಪಯೋಗಿಸಬಾರದು. 

*ಮಾರ್ಗದರ್ಶನ ನೀಡಲಾಗಿದೆ ಸರಕಾರದ ಆದೇಶದಂತೆ ಆ. 15ರ ನಂತರ ಪ್ರತಿಯೊಂದು ಗ್ರಾಮ ಪಂಚಾಯಿತಿ, ತಾಲೂಕು ಪಂಚಾಯಿತಿ, ಜಿಲ್ಲಾ ಪಂಚಾಯಿತಿಗಳಲ್ಲಿ ರಾಷ್ಟ್ರಧ್ವಜ ಪ್ರತಿದಿನ ಹಾರಿಸಬೇಕೆಂಬ ನೆಲೆಯಡಿ ಈಗಾಗಲೆ ಸಂಬಂಧಿತ ಅಧಿಕಾರಿಗಳಿಗೆ ತರಬೇತಿ ನೀಡಲಾಗಿದೆ. ಭಾರತೀಯ ರಾಷ್ಟ್ರಧ್ವಜ ಸಂಹಿತೆಯ ಕುರಿತು ಮಾಹಿತಿ ನೀಡಲಾಗಿದೆ. ಅದರಂತೆ ರಾಷ್ಟ್ರಧ್ವಜಕ್ಕೆ ಕುಂದುಂಟಾಗದಂತೆ ಹಾರಿಸುವಿಕೆಯ ಬಗ್ಗೆ ವಿಶೇಷ ನಿರ್ದೇಶನ ನೀಡಲಾಗಿದೆ.
 - ಗೋಪಾಲ ಶೆಟ್ಟಿ ತಾ.ಪಂ. ಕಾರ್ಯನಿರ್ವಹಣಾಧಿಕಾರಿ 
* ರಾಷ್ಟ್ರಧ್ವಜ ರಾಷ್ಟ್ರದ ಸ್ವಾತಂತ್ರ್ಯದ ಸಂಕೇತ. ಇದು ಜಾಗತ ರಾಷ್ಟ್ರದ ದಿವ್ಯಜ್ಯೋತಿ. ಏಕತೆ ಸಾರುವ ಸಾಧನ. ಭಾರತೀಯ ರಾಷ್ಟ್ರಧ್ವಜದ ಮಹತ್ತಿಕೆ ಬಗ್ಗೆ ಭಾರತ ಸೇವಾದಳ ಸಂಸ್ಥಾಪಕ ಡಾ.ನಾ.ಸು.ಹರ್ಡಿಕರ್ ಪುಸ್ತಕ ರೂಪದಲ್ಲಿ ತಿಳಿಸಿದ್ದಾರೆ. ಭಾರತ ಸೇವಾದಳ ಬಹಳ ವರ್ಷಗಳಿಂದ ರಾಷ್ಟ್ರಧ್ವಜದ ಕುರಿತು ತಿಳುವಳಿಕೆ ನೀಡುವ ಕೆಲಸ ಮಾಡಿಕೊಂಡು ಬಂದಿದೆ. ಸರಕಾರಿ ಆಡಳಿತ ವ್ಯವಸ್ಥೆಯ ಭಾಗದಲ್ಲಿ ರಾಷ್ಟ್ರಧ್ವಜ ಹಾರಿಸುವಿಕೆ ಕಡ್ಡಾಯಗೊಳಿಸಿರುವುದರಿಂದ ಸೂಕ್ತ ಮಾರ್ಗದರ್ಶನದಡಿ ರಾಷ್ಟ್ರದ ಗೌರವಕ್ಕೆ ಚ್ಯುತಿಬಾರದಂತೆ ರಾಷ್ಟ್ರಧ್ವಜ ಹಾರಿಸಬೇಕು. ವ್ಯಕ್ತಿಗಿಂತ ರಾಷ್ಟ್ರಧ್ವಜ ಹಿರಿದು ಎಂಬ ಭಾವನೆ ಇರಬೇಕು. ಭಾರತ ಸೇವಾದಳ ಶಾಲಾ ವಿದ್ಯಾರ್ಥಿಗಳಿಗೆ, ಸ್ವಯಂಸೇವಾ ಸಂಸ್ಥೆಗಳಿಗೆ ರಾಷ್ಟ್ರಧ್ವಜದ ಅರ್ಥ ಮತ್ತು ಹಿರಿತನದ ಬಗ್ಗೆ ತಿಳಿಹೇಳುವ ಕೆಲಸ ಮಾಡಿಕೊಂಡು ಬರುತ್ತಿದೆ. ಹೆಚ್ಚಿನ ಮಾಹಿತಿಗಾಗಿ ನುರಿತ ತರಬೇತುದಾರ, ಭಾರತ ಸೇವಾದಳ ಜಿಲ್ಲಾ ಸಂಘಟಕ ಮಹೇಶ್ ಪತ್ತಾರ್(9449953906) ಅವರನ್ನು ಸಂಪರ್ಕಿಸಬಹುದು.
 - ಗಣೇಶ್ ಶೆಟ್ಟಿ ಮೊಳಹಳ್ಳಿ ಭಾರತ ಸೇವಾದಳ ಕುಂದಾಪುರ ತಾಲೂಕು ಅಧ್ಯಕ್ಷ.

ವರದಿ ಕೃಪೆ: ಜಾನ್‌ಡಿಸೋಜ, ವಿಕ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com