ಕುಂದಾಪುರದಲ್ಲಿ 2,658 ಮಂದಿಗೆ ಸವಲತ್ತು ವಿತರಣೆ

ಉಡುಪಿ: ಜಿಲ್ಲಾಡಳಿತ ಮತ್ತು ಜಿಲ್ಲಾ ಪಂಚಾಯಿತಿಯ ಜಂಟಿ ಅಶ್ರಯದಲ್ಲಿ 8,616 ಫಲಾನುಭವಿಗಳಿಗೆ 15 ಇಲಾಖೆಗಳಿಗೆ ಸಂಬಂಧಪಟ್ಟಂತೆ ಒಟ್ಟು 11.98 ಕೋಟಿ ರೂ. ಮೊತ್ತದ ಸವಲತ್ತುಗಳನ್ನು ಬುಧವಾರ ಪುರಭವನದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಚಿವ ವಿನಯ ಕುಮಾರ್ ಸೊರಕೆ ವಿತರಿಸಿದರು. 

ಈ ಸಂದರ್ಭ ಮಾತನಾಡಿದ ಅವರು, ಉಡುಪಿಯಲ್ಲಿ 8,616, ಕುಂದಾಪುರದಲ್ಲಿ 2,658 ಹಾಗೂ ಕಾರ್ಕಳದಲ್ಲಿ 1,600 ಫಲಾನುಭವಿಗಳು ಸೇರಿದಂತೆ ಜಿಲ್ಲೆಯಲ್ಲಿ ಒಟ್ಟು 12,000ಕ್ಕೂ ಅಧಿಕ ಮಂದಿಗೆ ರಾಜ್ಯ ಸರಕಾರ ಏಕ ಕಾಲಕ್ಕೆ ನಾನಾ ಇಲಾಖೆಗಳ ಯೋಜನೆಯಡಿ ಸವಲತ್ತುಗಳನ್ನು ವಿತರಿಸುತ್ತಿದೆ. ಈ ಮೂಲಕ ಜನಪ್ರತಿನಿಧಿಗಳು, ಅಧಿಕಾರಿಗಳು ಹಾಗೂ ಜನರು ಪರಸ್ಪರ ಸೇತುಗಳಾಗಿ ಜಿಲ್ಲೆಯ ಅಭಿವೃದ್ಧಿಯಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದರು. 

ಬ್ರಹ್ಮಾವರ ಸಕ್ಕರೆ ಕಾರ್ಖಾನೆಗೆ 12 ಕೋಟಿ ರೂ.: ಬ್ರಹ್ಮಾವರ ಸಕ್ಕರೆ ಕಾರ್ಖಾನೆ ರೈತರಿಗೆ ನೀಡ ಬೇಕಾದ ಹಣ, ಕಾರ್ಮಿಕರ ಬಾಕಿಯಿರಿಸಿದ ಸಂಬಳ, ಸಹಕಾರಿ ಇಲಾಖೆಗಳಿಗೆ ನೀಡಬೇಕಾದ ಬಾಕಿಯನ್ನು ಚುಕ್ತಾ ಮಾಡಲು 12 ಕೋಟಿ ರೂ. ಸರಕಾರ ಬಿಡುಗಡೆಗೊಳಿಸಿದೆ. ಶೀಘ್ರದಲ್ಲಿ ಈ ಭಾಗದ ರೈತರ ಮಹಾಸಭೆ ಕರೆದು ಸಕ್ಕರೆ ಕಾರ್ಖಾನೆ ಪುನಶ್ಚೇತನದ ಬಗ್ಗೆ ಚರ್ಚಿಸಲಾಗುವುದು ಎಂದರು. 

ಉಡುಪಿ, ಕುಂದಾಪುರಕ್ಕೆ ಕುಡಿಯುವ ನೀರು ಹಾಗೂ ಈ ಭಾಗದ ರೈತಾಪಿ ಜನರಿಗೆ ಸಹಕಾರಿಯಾಗಬಲ್ಲ ವಾರಾಹಿ ಯೋಜನೆಯನ್ನು ತೀವ್ರಗತಿಯಲ್ಲಿ ಪೂರ್ಣಗೊಳಿಸಲು ನೀರಾವರಿ, ಅರಣ್ಯ ಸಚಿವರ ಸಭೆಯನ್ನು ಕರೆದು ಚರ್ಚಿಸಲಾಗುವುದು ಎಂದರು. 

9್ಡ11 ರದ್ಧತಿಗೆ ಕ್ರಮ: ಕನ್ವರ್ಶನ್‌ಗೊಂಡ ಭೂಮಿ ಮಾರಾಟಕ್ಕೆ ಸಂಬಂಧಪಟ್ಟಂತೆ ನಮೂನೆ 9್ಡ11ನ್ನು ರದ್ದು ಮಾಡುವ ಬಗ್ಗೆ ಹಾಗೂ ಸಿಂಗಲ್ ಲೇಔಟ್ ಸಮಸ್ಯೆ ಬಗ್ಗೆ ಕಂದಾಯ, ಅರಣ್ಯ ಸಚಿವರೊಡನೆ ಸೆ.19ರಂದು ಬೆಂಗಳೂರಿನಲ್ಲಿ ಸಭೆ ನಡೆಸಲಾಗುವುದು ಎಂದರು. ಅಡಕೆ ಕೊಳೆರೋಗದಿಂದ ಕೃಷಿ ನಾಶಗೊಂಡ ರೈತರಿಗೆ 7 ಕೋಟಿ ರೂ.ಪರಿಹಾರ ನೀಡಲಾಗುವುದು. ಇದರಲ್ಲಿ ಈಗಾಗಲೇ 3.5ಕೋಟಿ ರೂ. ಬಿಡುಗಡೆ ಮಾಡಲಾಗಿದೆ ಎಂದು ತಿಳಿಸಿದರು. 

ಸಂಸದ ಜಯಪ್ರಕಾಶ್ ಹೆಗ್ಡೆ ಮಾತನಾಡಿ ಅಡಕೆ, ತೆಂಗು ಬೆಳೆಗಳಿಗೆ ಕೊಳೆ, ಹಳದಿ ರೋಗಗಳಿಂದಾದ ನಷ್ಟದ ಕುರಿತಂತೆ ಕೇಂದ್ರ ಕೃಷಿ ಹಾಗೂ ವಿತ್ತ ಸಚಿವರ ಗಮನಸೆಳೆಯಲಾಗಿದೆ. ಆಧಾರ್ ಕಾರ್ಡ್ ಸಮಸ್ಯೆ ಬಗ್ಗೆ ಮುಖ್ಯಸ್ಥ ನಂದನ್ ನೀಲೆಕಣಿ ಅವರೊಂದಿಗೆ ಮಾತುಕತೆ ನಡೆಸಲಾಗಿದ್ದು ಜಿಲ್ಲೆಯಲ್ಲಿ ಹೆಚ್ಚುವರಿ ಕೇಂದ್ರಗಳನ್ನು ತೆರೆಯುವ ಆಶ್ವಾಸನೆ ದೊರೆತಿದೆ ಎಂದರು. ಜಿಲ್ಲಾ ಪಂಚಾಯಿತಿ ಅಧ್ಯಕ್ಷ ಉಪೇಂದ್ರ ನಾಯಕ್, ಶಾಸಕ ಪ್ರಮೋದ್ ಮಧ್ವರಾಜ್ ಮಾತನಾಡಿದರು. 

ಯಾವ್ಯಾವ ಇಲಾಖೆಯಡಿ ಎಷ್ಟೆಷ್ಟು ಸವಲತ್ತುಗಳು ? : ಕಂದಾಯ ಇಲಾಖೆಯಡಿ ಸಂಧ್ಯಾ ಸುರಕ್ಷಾ, ಮುಖ್ಯಮಂತ್ರಿ ಪರಿಹಾರ ನಿಧಿ ಯೋಜನೆ ಸೇರಿದಂತೆ ನಾನಾ ಯೋಜನೆಯಡಿ 451ಫಲಾನುಭವಿಗಳಿಗೆ 4.14ಲಕ್ಷ ರೂ., ಗ್ರಾಮೀಣಾಭಿವೃದ್ಧಿ ಹಾಗೂ ಪಂಚಾಯತ್‌ರಾಜ್ ಇಲಾಖೆಯಿಂದ 610 ಫಲಾನುಭವಿಗಳಿಗೆ 56.12ಲಕ್ಷ ರೂ., ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆವತಿಯಿಂದ ಭಾಗ್ಯಲಕ್ಷ್ಮೀ ಯೋಜನೆ, ಸ್ತ್ರೀ ಶಕ್ತಿ ಪ್ರೋತ್ಸಾಹ ಧನ ಯೋಜನೆಯಡಿ 496 ಫಲಾನುಭವಿಗಳಿಗೆ 1.5ಕೋಟಿ ರೂ., ಕೃಷಿ ಇಲಾಖೆಯಿಂದ 17ಫಲಾನುಭವಿಗಳಿಗೆ 8.60ಲಕ್ಷ ರೂ., ತೋಟಗಾರಿಕಾ ಇಲಾಖೆಯಿಂದ 201ಫಲಾನುಭವಿಗಳಿಗೆ 26.72 ಲಕ್ಷರೂ., ಶಿಕ್ಷಣ ಇಲಾಖೆಯಿಂದ ಅಡುಗೆ ಕೋಣೆ ನಿರ್ಮಾಣಕ್ಕೆ 260ಶಾಲೆಗಳಿಗೆ 6.99ಕೋಟಿ ರೂ., ಸಮಾಜ ಕಲ್ಯಾಣ ಇಲಾಖೆಯಿಂದ 300 ಮಂದಿ ವಿದ್ಯಾರ್ಥಿಗಳಿಗೆ ಸಮವಸ್ತ್ರಕ್ಕಾಗಿ 2.28ಲಕ್ಷ ರೂ., ಸಮಗ್ರ ಗಿರಿಜನ ಅಭಿವೃದ್ಧಿ ಯೋಜನಾ ಇಲಾಖೆಯಿಂದ 2,600 ಮಂದಿಗೆ ವಿದ್ಯಾರ್ಥಿ ವೇತನಕ್ಕಾಗಿ 1ಕೋಟಿ ರೂ., ಹಿಂದುಳಿದ ವರ್ಗಗಳ ಮತ್ತು ಅಲ್ಪಸಂಖ್ಯಾತರ ಅಭಿವೃದ್ಧಿ ನಿಗಮದ ಅರಿವು ಯೋಜನೆಯಡಿ 13 ಫಲಾನುಭವಿಗಳಿಗೆ 11.84ಲಕ್ಷ ರೂ., ಜಲಾನಯನ ಅಭಿವೃದ್ಧಿ ಇಲಾಖೆಯಿಂದ 50 ಫಲಾನುಭವಿಗಳಿಗೆ 2.14ಲಕ್ಷ ರೂ., ನಗರಸಭೆಯಿಂದ ಮನೆ ನಿರ್ಮಾಣ ಹಾಗೂ ಪ್ರಾಕೃತಿಕ ನಿಧಿ ಯೋಜನೆಯಡಿ 5 ಫಲಾನುಭವಿಗಳಿಗೆ 84,000ರೂ., ಮೀನುಗಾರಿಕಾ ಇಲಾಖೆಯಿಂದ 3,301 ಫಲಾನುಭವಿಗಳಿಗೆ 1.74ಕೋಟಿ ರೂ., ಅರಣ್ಯ ಇಲಾಖೆಯಡಿ 24ಫಲಾನುಭವಿಗಳಿಗೆ 2.14 ಲಕ್ಷ ರೂ. ಮೊತ್ತದ ಸವಲತ್ತುಗಳನ್ನು ವಿತರಿಸಲಾಯಿತು.


ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com