ಜಾತಿ, ಧರ್ಮದ ಹೆಸರಿನಲ್ಲಿ ಅಮಾಯಕರಿಗೆ ತೊಂದರೆಯಾದರೆ ಹೋರಾಟ: ದೇವೇಗೌಡ

ಬೈಂದೂರು: ಕಳೆದ ನಾಲ್ಕೂವರೆ ತಿಂಗಳುಗಳಿಂದ ನಾನು ಸೂಕ್ಷ್ಮವಾಗಿ ಅವಲೋಕಿಸುತ್ತಿದ್ದೇನೆ. ಕಾನೂನು ಮತ್ತು ಸುವ್ಯವಸ್ಥೆ ಜಾರಿ ವಿಷಯ ದಲ್ಲಿ ನನಗೆ ಸಮಾಧಾನ ಮೂಡಿಲ್ಲ. ನಾನು ದಣಿದಿಲ್ಲ. ಜಾತಿ, ಧರ್ಮ ದ ಹೆಸರಿನಲ್ಲಿ ಅಮಾಯಕರಿಗೆ ತೊಂದರೆ ಆದರೆ ದೇವೇ ಗೌಡ ಸುಮ್ಮನಿರಲ್ಲ. ಹೋರಾಟ ನಡೆಸುವೆ ಎಂದು ಮಾಜಿ ಪ್ರಧಾನಿ, ಜೆಡಿಎಸ್ ವರಿಷ್ಠ ದೇವೇಗೌಡ ಗುಡುಗಿದ್ದಾರೆ. ಬುಧವಾರ ಅಪರಾಹ್ನ ಖಾಸಗಿ ಭೇಟಿ ನಿಮಿತ್ತ ಜೆಡಿಎಸ್ ಯುವ ಮುಖಂಡ ಉಪ್ಪುಂದ ರಂಜಿತ್ ಕುಮಾರ್ ಶೆಟ್ಟಿ ಅವರ ನಿವಾಸಕ್ಕೆ ಭೇಟಿ ನೀಡಿದ್ದ ಅವರು ಸುದ್ದಿಗಾರರೊಂದಿಗೆ ಮಾತನಾಡಿದರು. 

ದೇವೇ ಗೌಡ ನಿಷ್ಕ್ರಿಯ ಅಂತಾ ಯಾರೂ ಭಾವಿಸಬೇಕಾಗಿಲ್ಲ. ಸಾಮಾನ್ಯ ನಿಷ್ಠಾವಂತ ಕಾರ್ಯಕರ್ತನನ್ನು ನಂಬಿ ರಾಜಕಾರಣ ಮಾಡಿಕೊಂಡು ಬಂದವನು. ಜನಸಾಮಾನ್ಯರಿಗೆ ಕಾನೂನು ಮತ್ತು ವ್ಯವಸ್ಥೆಯಿಂದ ಅನುಕೂಲ ಆಗಬೇಕು. ಅದರಿಂದ ತೊಂದರೆ ಆದಲ್ಲಿ ಹೋರಾಟಕ್ಕೆ ಧುಮುಕುವೆ ಎಂದು ಅವರು ಸ್ಪಷ್ಟಪಡಿಸಿದರು. 

ತೀರ್ಮಾನ ಆಗಿಲ್ಲ: ಶಿವಮೊಗ್ಗ ಲೋಕಸಭೆ ಕ್ಷೇತ್ರದ ಅಭ್ಯರ್ಥಿಯನ್ನಾಗಿ ಮಾಜಿ ಮುಖ್ಯಮಂತ್ರಿ ದಿ. ಬಂಗಾರಪ್ಪ ಅವರ ಪತ್ನಿ ಶಕುಂತಳಾ ಬಂಗಾರಪ್ಪ ಅವರನ್ನು ಕಣಕ್ಕಿಳಿಸುವ ತೀರ್ಮಾನದ ಬಗ್ಗೆ ಕೇಳಲಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಅವರು, ನೋ ನೋ...ಇಟ್ ಈಸ್ ಮಿಸ್ಟೇಕ್. ಈ ಕುರಿತು ಯಾವುದೇ ತೀರ್ಮಾನ ಆಗಿಲ್ಲ. ಮಧು ಬಂಗಾರಪ್ಪ ನಮ್ಮ ಪಕ್ಷದ ಅಭಿಮನ್ಯು ಇದ್ದ ಹಾಗೆ. ಅವರಲ್ಲಿ ಹೋರಾಟದ ಕೆಚ್ಚಿದೆ. ಅವರು ನಮ್ಮ ಬಹು ದೊಡ್ಡ ಆಸ್ತಿ. ಈ ತನಕ ಅವರೊಂದಿಗೆ ಈ ಕುರಿತು ಚರ್ಚಿಸಿಲ್ಲ. ಮುಂದೆ ನೋಡೋಣ ಎಂದು ಅವರು ತಿಳಿಸಿದರು. 

ಅಸಮಾಧಾನ ಉಹಾಪೋಹ: ಜೆಡಿಎಸ್ ರಾಜ್ಯಾಧ್ಯಕ್ಷ ಕೃಷ್ಣಪ್ಪ ಆಯ್ಕೆ ಕುರಿತು ಪಕ್ಷದೊಳಗೆ ಅಸಮಾಧಾನ ಇದೆ ಅನ್ನುವುದು ಕೇವಲ ಊಹಾಪೋಹ. ಸುದೀರ್ಘ ಕಾಂಗ್ರೆಸ್ ಪಕ್ಷಕ್ಕಾಗಿ ಅವರು ತ್ಯಾಗ ಮಾಡಿದವರು. ಅವರಿಗೆ ಕಳೆದ ಚುನಾವಣೆಯಲ್ಲಿ ಟಿಕೆಟ್ ನೀಡಲಿಲ್ಲ. ಅಹಿಂದ ವರ್ಗಕ್ಕೆ ಸೇರಿದ ನಾಯಕನನ್ನು ಸಂತೈಸಿದೆ. ಪಕ್ಷಕ್ಕೆ ಬಂದರು. ಅಹಿಂದ ನಾಯಕನಿಗೆ ರಾಜ್ಯಾಧ್ಯಕ್ಷ ಪಟ್ಟ ನೀಡಿದ್ದೇನೆ. ಅದು ಎಲ್ಲರ ಒಮ್ಮತದ ನಿರ್ಧಾರ. ತಾನು ಅಹಿಂದ ನಾಯಕ ಅನ್ನುವವನು ಅಹಿಂದಕ್ಕಾಗಿ ಏನು ಮಾಡಿದ ಅಂತಾ ಎಲ್ಲರಿಗೂ ಗೊತ್ತಿದೆ. ದೇವೇ ಗೌಡನಿಗೆ ಸರ್ಟಿಫಿಕೆಟ್ ಬೇಕಾಗಿಲ್ಲ ಎಂದು ಅವರು ಒಮ್ಮೆಲೆ ಕೆಂಡವಾದರು. 

ದೇಶ ರಾಜಕೀಯ ಆಸಕ್ತಿ ಇಲ್ಲ: ರಾಷ್ಟ್ರೀಯ ಪಕ್ಷಗಳು ವಿಶ್ವಾಸ ಕಳೆದುಕೊಂಡಿವೆ. ದೇಶದ ಕೇರಳ, ರಾಜಸ್ತಾನ, ಕರ್ನಾಟಕದಲ್ಲಿ ಜೆಡಿಎಸ್ ಅಸ್ತಿತ್ವದಲ್ಲಿದೆ. ಸದ್ಯ ರಾಷ್ಟ್ರರಾಜಕಾರಣದಲ್ಲಿ ನಾನು ಆಸಕ್ತಿ ಹೊಂದಿಲ್ಲ. ರಾಜಸ್ತಾನದಲ್ಲಿ ಸಮಾಜವಾದಿ, ಜೆಡಿಎಸ್, ಎಡಪಕ್ಷ ಜಂಟಿಯಾಗಿ ಮುಂದಿನ ಚುನಾವಣೆ ಎದುರಿಸಲಿದೆ. ಇದಕ್ಕಾಗಿ ಈಗಲೆ ಬರುವಂತೆ ಆಹ್ವಾನ ನೀಡಿವೆ. ಚುನಾವಣೆ ಸಂದರ್ಭದಲ್ಲಿ ಬರುವೆ ಎಂಬ ಭರವಸೆ ಅವರಿಗೆ ನೀಡಿರುವೆ. ಪ್ರಸ್ತುತ ನನ್ನ ಮುಂದಿರುವ ಗುರಿ ರಾಜ್ಯದಲ್ಲಿ ಜೆಡಿಎಸ್ ಬಲಪಡಿಸುವುದು. ಇದು ಅಪ್ಪ ಮಕ್ಕಳ ಪಕ್ಷವಲ್ಲ. ಜಾತ್ಯತೀತ ನಿಲುವಿನ ಎಲ್ಲರನ್ನು ಸಮಾನ ದೃಷ್ಟಿಯಿಂದ ಪ್ರೀತಿಸುವ ಪಕ್ಷ. ಮುಂದಿನ ಕೆಲವು ದಿನಗಳಲ್ಲಿ ಇಡಿ ರಾಜ್ಯಾದ್ಯಂತ ಪ್ರವಾಸ ನಡೆಸುವೆ. ರಾಜ್ಯಕ್ಕೆ ಜೆಡಿಎಸ್ ಅನಿವಾರ್ಯ ಎಂದು ಅವರು ಸ್ಪಷ್ಟಪಡಿಸಿದರು. 

ಕಾಂಗ್ರೆಸ್, ಬಿಜೆಪಿ ಡೆಮೊಕ್ರಸಿಗೆ ಮಾರಕ: ಕಾಂಗ್ರೆಸ್, ಬಿಜೆಪಿ ಪ್ರಜಾ ಸತ್ತಾತ್ಮಕ ವ್ಯವಸ್ಥೆಗೆ ವಿರುದ್ಧವಾಗಿ ನಡೆದುಕೊಂಡಿವೆ. ದೇಶವನ್ನು ಸುದೀರ್ಘವಾಗಿ ಆಳಿರುವ ಕಾಂಗ್ರೆಸ್‌ಗೆ ಈಗ ಬಡವರ ಹಸಿವಿನ ಅರ್ಥವಾಗಿರಬೇಕು. ಅದಕ್ಕಾಗಿ ಆಹಾರ ಮಸೂದೆ ಜಾರಿಗೆ ಮುಂದಾ ಗಿದೆ. ಬೀದಿಬದಿಯ ಬಡ ವ್ಯಾಪಾರಿಗಳ ಸಂರಕ್ಷಣೆಯ ಅರಿವು ಈಗ ಮೂಡಿದೆ. ಈ ದೇವೆಗೌಡ ಪ್ರಧಾನಿಯಾಗಿದ್ದಾಗ ಇಡಿ ದೇಶದಲ್ಲಿ 36 ಕೋಟಿ ಬಡವರಿಗೆ ಕಡಿಮೆ ದರದಲ್ಲಿ ಆಹಾರಧಾನ್ಯ ನೀಡಿದ್ದು ದೇಶವಾಸಿಗಳು ಮರೆತಿಲ್ಲ ಎಂದು ತಿಳಿಸಿದ ಅವರು ಅಂಬೇಡ್ಕರ್, ಮಹಾತ್ಮಗಾಂಧಿಯರಂತಹ ಮಹನೀಯರು ಹಾಕಿಕೊಟ್ಟ ಪ್ರಜಾ ಸತ್ತಾತ್ಮಕ ವ್ಯವಸ್ಥೆಗೆ ಬಿಜೆಪಿ, ಕಾಂಗ್ರೆಸ್ ಮಾರಕ ಎಂದು ಆಕ್ರೋಶ ಹೊರಗೆಡಹಿದರು. ಕಾಂಗ್ರೆಸ್, ಬಿಜೆಪಿಗೆ ಪರ್ಯಾಯವಾಗಿ ಒಂದು ಶಕ್ತಿ ಬೇಕೆಂಬ ಕನಸು ನನ್ನದು. ಆದರೆ ವಯಸ್ಸು ಕೇಳುತ್ತಿಲ್ಲ. ಜನರೇಶನ್ ಗ್ಯಾಪ್‌ನ ಪ್ರಶ್ನೆ ಪ್ರಸ್ತುತವೂ ಅಲ್ಲ. ಯುವಜನರು ಬುದ್ಧಿವಂತರಾಗಿದ್ದಾರೆ. ಯುವಸಮುದಾಯ ಜೆಡಿಎಸ್‌ನತ್ತ ವಾಲುತ್ತಿದ್ದಾರೆ. ಅವರೊಂದಿಗೆ ಯುವಕನಾಗಿ ರಣಾಂಗಣಕ್ಕೆ ಧುಮುಕುವೆ ಎಂದು ಗೌಡರು ಸ್ಪಷ್ಟಪಡಿಸಿದರು. 

ರಾಗಿ ಮುದ್ದೆ ಊಟ: ಖಾಸಗಿ ಭೇಟಿ ನಿಮಿತ್ತ ಜೆಡಿಎಸ್ ಯುವ ಮುಖಂಡ ರಂಜಿತ್ ಕುಮಾರ್ ಶೆಟ್ಟಿ ಅವರ ನಿವಾಸಕ್ಕೆ ದೇವೇಗೌಡರು ಬುಧವಾರ ಅಪರಾಹ್ನ 3.30 ಗಂಟೆಗೆ ತಲುಪಿದ್ದರು. ಸುರಿಯುವ ಮಳೆಯಲ್ಲಿ ಆಗಮಿಸಿದ ದೇವೇ ಗೌಡರು ನೇರವಾಗಿ ಮನೆಯಂಗಳ ಪ್ರವೇಶಿಸಿ ನಿಧಾನ ನಡೆದುಕೊಂಡು ಬಂದರು. ಕಾರ್ಯಕರ್ತರು, ಮುಖಂಡರು ಆದರದಿಂದ ಬರಮಾಡಿಕೊಂಡರು. ಬೆಳಗ್ಗಿನಿಂದ ಸುತ್ತಾಡಿ ದಣಿದಿದ್ದ ಗೌಡರು ನೇರವಾಗಿ ಮುಖ, ಕೈಕಾಲು ತೊಳೆದುಕೊಂಡು ಮನೆಯವರ ಸುಖ ದುಃಖ ವಿಚಾರಿಸಿ ಊಟಕ್ಕೆ ಕುಳಿತರು. ಅವರಿಗೆ ಪ್ರಿಯವಾದ ರಾಗಿಮುದ್ದೆ, ಬೆಳ್ತಿಗೆ ಅಕ್ಕಿ ಅನ್ನ, ಸಾಂಬಾರು ಸಿದ್ಧಪಡಿಸಲಾಗಿತ್ತು. ಮುಖಂಡರು, ಮನೆಯವ ರೊಂದಿಗೆ ಭೋಜನ ಸ್ವೀಕರಿಸಿದ ಗೌಡರು ಕರಾವಳಿಯ ಸಾಂಬಾರು ಚೆನ್ನಾಗಿರುತ್ತೆ ಅಂತಾ ಇನ್ನೊಂದು ಕಪ್ ಸಾಂಬಾರು ತರಿಸಿ ಸೇವಿಸಿ ದರು. ಸದಾ ಮುಖ ಗಂಟಿಕ್ಕಿಕೊಂಡಂತೆ ತೋರುವ ಗೌಡರು ಬಹಳ ಗೆಲುವಾಗಿದ್ದರು. ಕಾರ್ಯಕರ್ತರನ್ನು ತಬ್ಬಿಕೊಂಡು ಪರಸ್ಪರ ವಿಚಾರ ವಿನಿಮಯ ಮಾಡಿಕೊಂಡರು. 

ಆಶೀರ್ವಾದ ಪಡೆದ ಗೌಡರು: ಇದೇ ಸಂದರ್ಭ ದೇವೇಗೌಡರು ಮನೆಯ ಹಿರಿಯ ಯಜಮಾನ್ತಿ ಕೊರಗಮ್ಮ ಶೆಟ್ಟಿಯವರ ಆಶೀರ್ವಾ ದ ಪಡೆದರು. ನಿಮ್ಮ ಆಶೀರ್ವಾದ ಈ ಗೌಡನಿಗೆ ಬಲ ನೀಡುತ್ತೆ ಎಂದು ಮುಗುಳ್ನಕ್ಕರು. ಜೆಡಿಎಸ್ ರಾಜ್ಯಾಧ್ಯಕ್ಷ ಎ. ಕೃಷ್ಣಪ್ಪ, ಹಿರಿಯ ಮುಖಂಡ ಡೇವಿಡ್ ಸೀಮೋನ್, ಶಿವಮೊಗ್ಗ ಜಿಲ್ಲಾಧ್ಯಕ್ಷ ಶ್ರೀಕಾಂತ್, ಉಡುಪಿ ಜಿಲ್ಲಾದ್ಯಕ್ಷ ಬೆಳಪು ದೇವಿಪ್ರಸಾದ್ ಶೆಟ್ಟಿ, ಬೈಂದೂರು ಬ್ಲಾಕ್ ಅಧ್ಯಕ್ಷ ಶ್ರೀಕಾಂತ್ ಅಡಿಗ, ಜೆಡಿಎಸ್ ಮುಖಂಡರಾದ ಸಬ್ಲಾಡಿ ಮಂಜಯ್ಯ ಶೆಟ್ಟಿ, ಮನ್ಸೂರ್ ಇಬ್ರಾಹಿಂ, ರಮೇಶ್ ಟಿ.ಟಿ. ರಸ್ತೆ, ಮನೋಹರ ಪೂಜಾರಿ, ರಾಜು ದೇವಾಡಿಗ, ಸುರೈಯಾಭಾನು, ಗಿರಿಜಾ ಗಾಣಿಗ, ಜಯಶೀಲ ಶೆಟ್ಟಿ, ಮನೆಯ ಯಜಮಾನ ರಂಜಿತ್ ಕುಮಾರ ಶೆಟ್ಟಿ, ಪತ್ನಿ ಸುಶ್ರುತಾ, ಅವರ ತಾಯಿ ನಾಗರತ್ನ ಶೆಟ್ಟಿ ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com