ಪಾಳುಬಿದ್ದ ಕುಂದಾಪುರ ಸಿಪಿಐ, ಪಿಎಸ್‌ಐ ವಸತಿಗೃಹ

ಕುಂದಾಪುರ: ಇಲ್ಲಿನ ಮುಖ್ಯ ಠಾಣೆಯ ಪೊಲೀಸ್ ವೃತ್ತನಿರೀಕ್ಷಕರು ಹಾಗೂ ಸಬ್ ಇನ್ಸ್‌ಪೆಕ್ಟರ್‌ಗೆ ಬಹುಕಾಲದಿಂದಲೂ ವಾಸ್ತವ್ಯಕ್ಕಾಗಿ ಮೀಸಲಿದ್ದ ವಸತಿಗೃಹ ಪಾಳುಬಿದ್ದಿದ್ದು ವ್ಯವಸ್ಥೆಯನ್ನೇ ಅಣಕಿಸುವಂತಿದೆ. 

ಕುಂದಾಪುರ ಫೆರಿರೋಡ್‌ಗೆ ತಾಗಿಕೊಂಡೆ ಇರುವ ಎರಡು ಕಟ್ಟಡಗಳು ನಿರ್ವಹಣೆಯಿಲ್ಲದ ಕಾರಣ ಭೂತ ಬಂಗಲೆಯಂತೆ ಮಾರ್ಪಟ್ಟಿದೆ. ಕಟ್ಟಡದ ಸುತ್ತ ಗಿಡಗಂಟಿಗಳು ಬೆಳೆದು ನಿಂತಿವೆ. ಕ್ವಾರ್ಟರ್ಸ್‌ನ ಕಿಟಕಿ, ಬಾಗಿಲು, ಮೇಲ್ಮಾಡಿಗೆ ಗೆದ್ದಲು ಹಿಡಿದಿದೆ. ಹಾವು, ಚೇಳುಗಳ ಆಶ್ರಯತಾಣವಾಗಿ ಮಾರ್ಪಟ್ಟಿದೆ. ಪಿಎಸ್‌ಐ ಕ್ವಾರ್ಟರ್ಸ್ ಕಳೆದ 2 ವರ್ಷಗಳಿಂದೀಚೆಗೆ ನಿರುಪಯುಕ್ತವಾಗುತ್ತ ಸದ್ಯ ಕಾಲಿಡಲಾಗದ ಸ್ಥಿತಿಗೆ ತಲುಪಿದೆ. 

ವಿಪರ್ಯಾಸವೆಂದರೆ ಇಂತಹ ಪಾಳುಬಿದ್ದ ಕಟ್ಟಡದಲ್ಲಿಯೂ ಕೆಲವು ಸಿಬ್ಬಂದಿ ನೆಲೆಸಿರುವುದು. ಪಿಎಸ್‌ಐ ವಾಸ್ತವ್ಯಕ್ಕೆಂದು ಮೀಸಲಾದ ಎರಡು ವಸತಿಗೃಹಗಳ ಪೈಕಿ ಒಂದು ಸಂಪೂರ್ಣ ಹದಗೆಟ್ಟಿದ್ದು ಕಾಲಿಡಲಾಗದು. ಇದಕ್ಕೆ ತಾಗಿಕೊಂಡು ಇನ್ನೊಂದು ವಸತಿಗೃಹದಲ್ಲಿ ಈಗಷ್ಟೇ ಇಲಾಖೆಯ ಸೇವೆಗೆ ನಿಯುಕ್ತಿಗೊಂಡಿರುವ ಹೊಸ ಸಿಬ್ಬಂದಿ ಆಸರೆ ಪಡೆದುಕೊಂಡಿದ್ದಾರೆ. ಏನ್ ಮಾಡೋದು ಸರ್. ಡ್ಯೂಟಿ ಅವರ್ಸ್‌ ಬಿಟ್ಟು ರೆಸ್ಟ್‌ಗೆ ಬಂದ್ರೆ ಸೊಳ್ಳೆಯಿಂದ ಕಡಿಸಿಕೊಳ್ಳಬೇಕು. ಮಳೆ ಜೋರಾಗಿ ಬಂದ್ರೆ ಸೋರುತ್ತೆ. ಬಾಡಿಗೆ ಮನೆ ಮಾಡಿಕೊಳ್ಳುವಷ್ಟು ಶಕ್ತಿ ಇಲ್ಲ. ಹೇಗೊ ಅಜೆಸ್ಟ್ ಮಾಡ್ಕೊಂಡ್ ಇದ್ದೀವಿ ಅಂತಾ ಸಿಬ್ಬಂದಿ ಹೇಳುತ್ತಾರೆ. 

ಇದಕ್ಕೆ ಅಭಿಮುಖವಾಗಿ ಸರ್ಕಲ್ ಇನ್ಸ್‌ಪೆಕ್ಟರ್ ನಿವಾಸ ಸಂಪೂರ್ಣ ನಿರುಪಯುಕ್ತವಾಗಿ ಬಿಟ್ಟಿದೆ. ಸುವ್ಯವಸ್ಥಿತ ಕಟ್ಟಡ ನಿರ್ವಹಣೆ ಇಲ್ಲದ ಕಾರಣ ನೆಲಕ್ಕೊರಗುವ ಸನ್ನಾಹದಲ್ಲಿದೆ. ವಾಹನದ ಶೆಡ್ ಬೀಳುವ ಸ್ಥಿತಿಯಲ್ಲಿದೆ. ಸರಕಾರಿ ಸೊತ್ತು ಇಷ್ಟೊಂದು ಪ್ರಮಾಣದಲ್ಲಿ ಹದಗೆಟ್ಟುಹೋಗಿದ್ದರೂ ಹೇಳುವವರು ಕೇಳುವವರು ಇಲ್ಲವಾಗಿರುವುದು ನಾಗರಿಕ ವಲಯದಲ್ಲಿ ಹಲವು ಪ್ರಶ್ನೆಗಳಿಗೆ ಎಡೆಮಾಡಿಕೊಟ್ಟಿದೆ. 

ಬಾಡಿಗೆ ಮನೆಯೇ ಗತಿ: ಈ ಹಿಂದೆ ಮ್ಯಾಜಿಸ್ಟ್ರೇಟ್ ಅವರ ವಾಸ್ತವ್ಯಕ್ಕೆ ಮೀಸಲಿದ್ದ ಈ ವಸತಿಗೃಹ ಲೋಕೋಪಯೋಗಿ ಇಲಾಖೆಯ ನಿರ್ವಹಣೆಯಲ್ಲಿತ್ತು. ಬಳಿಕ ಪೊಲೀಸ್ ಸರ್ಕಲ್ ಇನ್ಸ್‌ಪೆಕ್ಟರ್ ವಸತಿಗೆ ನಿಲುಕಿದ ಬಳಿಕ ನಿರ್ವಹಣೆ ಜವಾಬ್ದಾರಿಯನ್ನು ಪೊಲೀಸ್ ಹೌಸಿಂಗ್ ಕಾರ್ಪೊರೇಶನ್‌ಗೆ ಹೋಗಿತ್ತು. ಅಲ್ಲಿಂದೀಚೆಗೆ ಈ ಬ್ರಿಟಿಷ್ ಕಾಲದ ಕಟ್ಟಡಗಳು ದುಸ್ಥಿತಿಗೆ ತಲುಪಿವೆ. ರಾತ್ರಿ ಹಗಲೆನ್ನದೆ ಕರ್ತವ್ಯದಲ್ಲಿ ನಿರತರಾಗುವ ಪೊಲೀಸ್ ಅಧಿಕಾರಿಗಳು ಅನಿವಾರ್ಯವಾಗಿ ಬಾಡಿಗೆ ಮನೆಯಲ್ಲಿ ನೆಲೆಸುವ ಸ್ಥಿತಿ ನಿರ್ಮಾಣ ಆಗಿದೆ. 

ಬೀದಿಗೆ ಬಿದ್ದ ಪೊಲೀಸರು 

ಕುಂದಾಪುರ ಮುಖ್ಯ ಠಾಣೆಯ ಪೊಲೀಸ್ ಸಿಬ್ಬಂದಿಗಳಿಗಾಗಿ ಪೊಲೀಸ್ ಲೈನ್‌ನಲ್ಲಿ 38 ವಸತಿಗೃಹ, ಸಿಪಿಐ ಮತ್ತು ಪಿಎಸ್‌ಐಗಾಗಿ 3 ವಸತಿಗೃಹವಿದ್ದರೂ ಯಾವುದೂ ವಾಸಕ್ಕೆ ಅನುಕೂಲ ಆಗದಿರುವುದರಿಂದ ಜನರ ರಕ್ಷಣೆ ಮಾಡಬೇಕಾದ ಪೊಲೀಸರೆ ಬೀದಿಗೆ ಬಿದ್ದಿದ್ದಾರೆ. ಇಷ್ಟಾಗಿಯೂ ಪೊಲೀಸರ ಗೋಳು ಕೇಳುವವರಿಲ್ಲ. 

* ಸರ್ಕಲ್ ಇನ್ಸ್‌ಪೆಕ್ಟರ್ ಮತ್ತು ಸಬ್ ಇನ್ಸ್‌ಪೆಕ್ಟರ್ ವಸತಿಗೃಹ ಅಭಿವೃದ್ಧಿಗಾಗಿ ಸರಕಾರ ಮತ್ತು ಇಲಾಖೆ ಹಿರಿಯ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದೇವೆ. ಪೊಲೀಸ್ ಹೌಸಿಂಗ್ ಕಾರ್ಪೊರೇಶನ್‌ನ ಅಧಿಕಾರಿಗಳು ಸಮೀಕ್ಷೆ ನಡೆಸಿ ವರದಿ ಒಪ್ಪಿಸಿದ್ದಾರೆ. ಕಟ್ಟಡ ಅಭಿವೃದ್ಧಿಯ ಭರವಸೆ ಸಿಕ್ಕಿದೆ. ಅದಕ್ಕಾಗಿ ಕಾಯುತ್ತಿದ್ದೇವೆ. - ಯಶೋದಾ ಎಸ್. ಒಂಟಗೋಡಿ ಕುಂದಾಪುರ ಡಿವೈಎಸ್ಪಿ 

* ಫೆರಿರೋಡ್‌ನಲ್ಲಿ ಸರಕಾರಿ ವಸತಿಗೃಹಗಳು ಉಪಯೋಗಕ್ಕಿಲ್ಲದೆ ಪಾಳು ಬಿದ್ದಿವೆ. ಜನನಿಬಿಡ ನಗರ ವ್ಯಾಪ್ತಿಯಲ್ಲಿ ಕಟ್ಟಡದ ದುಸ್ಥಿತಿ ವ್ಯವಸ್ಥೆಯನ್ನು ಅಣಕಿಸುವಂತಿದೆ. ವಸತಿಗೃಹ ಇರುವೆಡೆ ಸಾಕಷ್ಟು ಸರಕಾರಿ ಜಾಗ ಇರುವುದರಿಂದ ಅಗ್ನಿಶಾಮಕ ಠಾಣೆಯ ಔಟ್‌ಪೋಸ್ಟ್ ತೆರೆಯಲು ಸರಕಾರ ಅವಕಾಶ ಮಾಡಿಕೊಡಬೇಕು. ಅಗ್ನಿಶಾಮಕ ಠಾಣೆ ನಗರ ಹೊರವಲಯದ ಕೋಣಿ ಗ್ರಾಮದಲ್ಲಿರುವುದರಿಂದ ತುರ್ತು ಸಂದರ್ಭ ಸಾಧ್ಯವಾಗುತ್ತಿಲ್ಲ. ಈ ನಿವೇಶನದಲ್ಲಿ ಬಾವಿ, ನೀರಿನ ಟ್ಯಾಂಕಿ ವ್ಯವಸ್ಥೆ ಇರುವುದರಿಂದ ಪೊಲೀಸ್ ಕಟ್ಟಡದ ಜತೆಗೆ ಅಗ್ನಿಶಾಮಕ ಠಾಣೆಗೂ ಅವಕಾಶ ಮಾಡಿಕೊಟ್ಟಲ್ಲಿ ನಾಗರಿಕರಿಗೆ ಅನುಕೂಲ ಆಗಲಿದೆ. -ವಿನಯ ಪಾಯಸ್ ಸ್ಥಳೀಯ ನಾಗರಿಕ ಫೆರಿರೋಡ್

ವರದಿ ಕೃಪೆ:ಜಾನ್ ಡಿಸೋಜ, ವಿಕ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com