ಬಸವ ವಸತಿ ಯೋಜನೆಯಡಿ ಮಂಜೂರಾದ 2,309 ಮನೆ ರದ್ದು

ಕುಂದಾಪುರ: ತಾಲೂಕಿನಲ್ಲಿ ಅರ್ಹ ಬಡವರಿಗೆ ಬಸವ ವಸತಿ ಯೋಜನೆಯಡಿ ಮಂಜೂರಾದ 2,309 ಮನೆಗಳು ರದ್ದುಗೊಂಡಿರುವುದು ಬೆಳಕಿಗೆ ಬಂದಿದೆ. ಇಲ್ಲಿನ ಸಾಮಾಜಿಕ ಕಾರ್ಯಕರ್ತ ಶರಶ್ಚಂದ್ರ ಹೆಗ್ಡೆ ಮೂಡ್ಲಕಟ್ಟೆ ಮಾಹಿತಿ ಹಕ್ಕು ಕಾಯಿದೆಯಡಿ ಪಡೆದ ಮಾಹಿತಿಯಲ್ಲಿ ಈ ಅಂಶ ಬಹಿರಂಗಗೊಂಡಿದೆ. 

2010-11ನೇ ಸಾಲಿನ ಬಸವ ವಸತಿ ಯೋಜನೆಯಡಿ 3ನೇ ಸಾಲಿನಲ್ಲಿ ಕುಂದಾಪುರ ಕ್ಷೇತ್ರಕ್ಕೆ 2 ಸಾವಿರ ಮನೆಗಳು ಹಾಗೂ ಬೈಂದೂರು ಕ್ಷೇತ್ರಕ್ಕೆ 2 ಸಾವಿರ ಮನೆಗಳು ಮಂಜೂರುಗೊಂಡಿದ್ದವು. ಫಲಾನುಭವಿಗಳ ಪಟ್ಟಿಯನ್ನು ವಸತಿ ಜಾಗೃತಿ ಸಮಿತಿ ಅನುಮೋದಿಸಿತ್ತು. ಅದನ್ನು ರಾಜೀವ್ ಗಾಂಧಿ ಗ್ರಾಮೀಣ ವಸತಿ ನಿಗಮಕ್ಕೆ ಕಳುಹಿಸಲಾಗಿತ್ತು. ಆದರೆ ಪಂಚಾಯಿತಿ ಪಿಡಿಓಗಳ ನಿರ್ಲಕ್ಷ್ಯದ ಫಲವಾಗಿ ಕಾಮಗಾರಿ ಶುರು ಹಚ್ಚಿಕೊಂಡು ಮನೆ ಸೇರಿದಂತೆ ಮಂಜೂರು ಪಡೆದುಕೊಂಡಿರುವ ಮನೆಗಳ ವಿವರ ಸರಿಯಾಗಿ ನಮೂದಿಸದ ಕಾರಣ ತಾಲೂಕಿನಲ್ಲಿ ಒಟ್ಟು 2,309 ಮನೆಗಳು ರದ್ದುಗೊಂಡಿವೆ. ಯಾರದ್ದೊ ತಪ್ಪಿಗೆ ಯಾರಿಗೋ ಬರೆ ಎಂಬಂತೆ ಯೋಜನೆಯಡಿ ಬಡವರು ಪಡೆಯಬಹುದಾದ 75 ಸಾವಿರ ರೂ. ಸಹಾಯಧನದಿಂದ ವಂಚಿತರಾಗುವ ಪರಿಸ್ಥಿತಿ ಎದುರಾಗಿದೆ ಎಂಬುದು ಆರ್‌ಟಿಐ ಕಾಯಿದೆ ದೃಢಪಟ್ಟಿದೆ. 

ಸೂಕ್ತ ಕ್ರಮ ಜರುಗಿಸಬೇಕು: ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಕಡು ಬಡವರು ಸಂಕಷ್ಟದ ಸ್ಥಿತಿಯಲ್ಲಿದ್ದಾರೆ. ಅರೆಬರೆ ಕಾಮಗಾರಿಯಾಗಿರುವ ಮನೆಗಳು ಮಳೆಯಿಂದಾಗಿ ಬೀಳುವ ಸ್ಥಿತಿಯಲ್ಲಿವೆ. ಬಡವರ ಗೋಳಿಗೆ ಕಾರಣವಾಗಿರುವ ಈ ಪ್ರಕರಣದ ಬಗ್ಗೆ ಸಮಗ್ರ ತನಿಖೆಯಾಗಬೇಕು ಎಂದು ಶರಶ್ಚಂದ್ರ ಹೆಗ್ಡೆ ಆಗ್ರಹಿಸಿ ಸರಕಾರಕ್ಕೆ ಮನವಿ ಸಲ್ಲಿಸಿದ್ದಾರೆ. 

ರಾಜೀವ್ ಗಾಂಧಿ ಗ್ರಾಮೀಣ ವಸತಿ ನಿಗಮದ ವ್ಯವಸ್ಥಾಪನಾ ನಿರ್ದೇಶಕರಿಗೆ ಮಾಜಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಅವರ ಶಿಫಾರಸಿನ ಮೇರೆಗೆ ಈಗಾಗಲೆ ಫಲಾನುಭವಿಗಳ ಪರಿಸ್ಕೃತ ಪಟ್ಟಿ ಕಳುಹಿಸಲಾಗಿದೆ. ಕೆಲವೊಂದು ಫಲಾನುಭವಿಗಳು ಪ್ರಗತಿಯಲ್ಲಿರುವ ಮನೆಯ ಛಾವಣಿಯನ್ನು ಸ್ವಸಹಾಯ ಸಂಘದಲ್ಲಿ ಸಾಲ ಮತ್ತು ಇತರೆ ಮೂಲದಲ್ಲಿ ಸಾಲವನ್ನು ಪಡೆದು ಮುಗಿಸಿದ್ದಾರೆ. ಈ ಹಣವನ್ನು ಯೋಜನೆಯ ಹಣದಲ್ಲಿ ಮರುಪಾವತಿ ಮಾಡಬಹುದೆಂಬ ಭರವಸೆ ನೀಡಿದ್ದಾರೆ. ಆದರೆ ನಿಗಮದ ಧೋರಣೆಯಿಂದ ಬಡ ಫಲಾನುಭವಿಗಳು ಸಂಕಷ್ಟಕ್ಕೆ ತುತ್ತಾಗಿದ್ದಾರೆ. 

ಸಂಸದ ಕೆ.ಜಯಪ್ರಕಾಶ್ ಹೆಗ್ಡೆ, ಬೈಂದೂರು ಶಾಸಕ ಕೆ. ಗೋಪಾಲ ಪೂಜಾರಿ ನಿಗಮದ ವ್ಯವಸ್ಥಾಪಕರಿಗೆ ಮನವರಿಕೆ ಮಾಡಿದ್ದರೂ ಯಾವುದೇ ಪ್ರಯೋಜನ ಆಗಿಲ್ಲ. ನಿಗಮದಲ್ಲಿ ಕಳೆದ ಮೂರು ವರ್ಷಗಳಿಂದ ವಸತಿ ವಿಷಯದಲ್ಲಿ ಬಹಳಷ್ಟು ಕಾನೂನು ಬಾಹಿರ ಚಟುವಟಿಕೆಯೂ ನಡೆದಿದ್ದು, ಸರಕಾರ ಮಧ್ಯ ಪ್ರವೇಶಿಸಿ ಬಡ ಫಲಾನುಭವಿಗಳಿಗೆ ಯೋಜನೆಯ ಪ್ರಯೋಜನ ಸಿಗುವಂತೆ ಮಾಡಬೇಕು ಎಂದು ಅವರು ಮನವಿಯಲ್ಲಿ ಒತ್ತಾಯಿಸಿದ್ದಾರೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com