ಹೊಸತೊಪ್ಲು, ಸಿದ್ಧಾಪುರ, ಹೆಬ್ರಿಗೆ ಕೇಂದ್ರ ತಂಡ ಭೇಟಿ

ಕುಂದಾಪುರ: ಕೇಂದ್ರ ಗೃಹ ಇಲಾಖೆಯ ಜಂಟಿ ನಿರ್ದೇಶಕ ಆರ್.ಕೆ.ಶ್ರೀವಾಸ್ತವ್ ನೇತೃತ್ವದ ಅಧಿಕಾರಿಗಳ ತಂಡ ಸೋಮವಾರ ಕುಂದಾಪುರ ಸಮೀಪದ ಹೊಸತೊಪ್ಲುವಿಗೆ ಭೇಟಿ ನೀಡಿದೆ. ಹಂಗಳೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ನೇರಂಬಳ್ಳಿ ಸಮೀಪದ ಹೊಸತೊಪ್ಲುವಿನಲ್ಲಿ ಪದೇ ಪದೇ ನೆರೆ ಹಾವಳಿಯಿಂದ ಉಂಟಾಗುತ್ತಿರುವ ತೊಂದರೆಯ ಕುರಿತು ಪತ್ರಿಕೆಗಳಲ್ಲಿ ವರದಿ ಪ್ರಕಟವಾಗಿತ್ತು. 

ಉಡುಪಿ ಜಿಲ್ಲಾಡಳಿತದ ಸಲಹೆಯ ಮೇರೆಗೆ ಪ್ರದೇಶಕ್ಕೆ ಭೇಟಿ ನೀಡಿದ ತಂಡ ಸ್ಥಳ ಪರಿಶೀಲನೆ ನಡೆಸಿತು. ಹೊಸತೊಪ್ಲುವಿನ ಸಂಪರ್ಕ ಸೇತುವೆ ಅಭದ್ರತೆ, ರಿವಿಟ್‌ಮೆಂಟ್ ಕುಸಿತಗೊಂಡಿರುವುದರ ಬಗೆಗಿನ ಮಾಹಿತಿ ಪಡೆದುಕೊಂಡ ತಂಡ ಇದೇ ಸಂದರ್ಭದಲ್ಲಿ ಪ್ರದೇಶದಲ್ಲಿನ ದಲಿತ ಕಾಲೋನಿಯ ಜನರ ಸಂಕಷ್ಟ ಆಲಿಸಿತು. ಉಡುಪಿ ಜಿಲ್ಲಾಧಿಕಾರಿ ಡಾ.ಎಂ.ಟಿ. ರೇಜು, ಅಪರ ಜಿಲ್ಲಾಧಿಕಾರಿ ಕುಮಾರ್, ಉಡುಪಿ ಜಿ.ಪಂ.ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಎಸ್.ಎ.ಪ್ರಭಾಕರ ಶರ್ಮ, ಸಹಾಯಕ ಕಮಿಷನರ್ ಯೋಗೀಶ್ವರ, ತಹಸೀಲ್ದಾರ ಗಾಯತ್ರಿ ಎನ್.ನಾಯಕ, ಕಂದಾಯ ಇಲಾಖಾಧಿಕಾರಿ ಆನಂದ ದಾಮ್ಲೆ, ಪಿಡಬ್ಲ್ಯೂಡಿ ಎಂಜಿನಿಯರ್ ಚಂದ್ರಶೇಖರ್ ಇದ್ದರು. ಇದಕ್ಕೂ ಮೊದಲು ಅವರು ತಾಲೂಕಿನ ಆರ್ಡಿ ಸುಂಟರಗಾಳಿ ಪೀಡಿತ ಪ್ರದೇಶಕ್ಕೆ ತಂಡ ಭೇಟಿ ನೀಡಿತ್ತು. 

ಸಿದ್ಧಾಪುರ, ಹೆಬ್ರಿಗೆ ಭೇಟಿ: ಅತಿವೃಷ್ಟಿ ಮತ್ತು ಭಾರಿ ಸುಂಟರಗಾಳಿಯಿಂದ ತತ್ತರಗೊಂಡ ಉಡುಪಿ ಜಿಲ್ಲೆಯ ಆರ್ಡಿ ಪ್ರದೇಶಕ್ಕೆ ಡಾ. ಶ್ರೀವಾತ್ಸವ ನೇತೃತ್ವದ ಐವರು ಸದಸ್ಯರ ಕೇಂದ್ರ ಪರಿಹಾರ ಸಮೀಕ್ಷಾ ತಂಡ ಸೋಮವಾರ ಭೇಟಿ ನೀಡಿತು. ಉಡುಪಿಯಿಂದ ಶಿವಪುರ, ಹೆಬ್ರಿ ಮಾರ್ಗವಾಗಿ ಆರ್ಡಿ ತಲುಪಿದ ತಂಡ ಅಲ್ಲಿಯ ಪರಿಸರದ ಕೊಂಜಾಡಿಯ ಪರಿಶಿಷ್ಟ ಕಾಲೊನಿ ಹಾಗೂ ಕುಂದಾಪುರ ತಾಪಂ ಅಧ್ಯಕ್ಷರ ನಿವಾಸಕ್ಕೆ ಭೇಟಿ ನೀಡಿ, ಹಾನಿಯ ಸಮೀಕ್ಷೆ ನಡೆಸಿತು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com