ಮರವಂತೆಯಲ್ಲಿ ಕಡಲತೀರ ಸ್ವಚ್ಛತಾ ದಿನ ಆಚರಣೆ

ಕುಂದಾಪುರ: ಓಷನ್ ಕನ್ಸರ್ವೆನ್ಸಿ ವಾಷಿಂಗ್ಟನ್, ಇಂಡಿಯನ್ ಮೆರಿಟೈಮ್ ಫೌಂಡೇಶನ್, ಎಫ್‌ಎಸ್‌ಎಲ್ ಇಂಡಿಯ, ಬಸ್ರೂರು ಶಾರದಾ ಕಾಲೇಜಿನ ಎನ್‌ಎಸ್‌ಎಸ್ ಘಟಕ, ಮರವಂತೆ ಮತ್ತು ನಾವುಂದ ಗ್ರಾಪಂ ಆಶ್ರಯದಲ್ಲಿ ಶನಿವಾರ ಅಂತಾರಾಷ್ಟ್ರೀಯ ಕಡಲತೀರ ಸ್ವಚ್ಛತಾ ದಿನಾಚರಣೆ ನಡೆಯಿತು. 

ಮರವಂತೆ ಮಾರಸ್ವಾಮಿ ಕಡಲತೀರದಲ್ಲಿ ಗ್ರಾಪಂ ಅಧ್ಯಕ್ಷೆ ಕೆ.ಎ. ಸುಗುಣಾ ಸ್ವಯಂಸೇವಕರಿಗೆ ಕೈಗೆ ಗ್ಲೌಸ್ ಮತ್ತು ಚೀಲಗಳನ್ನು ನೀಡುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು. 

ಈ ಸಂದರ್ಭ ಮಾತನಾಡಿದ ಮರವಂತೆ ಗ್ರಾಪಂ ನಿಕಟಪೂರ್ವ ಅಧ್ಯಕ್ಷ ಎಸ್. ಜನಾರ್ದನ ಪರಿಸರ ಸ್ವಚ್ಛತೆಯ ಅಗತ್ಯ ವಿವರಿಸಿದರು. ಅಂತಾರಾಷ್ಟ್ರೀಯ ಕಡಲತೀರ ಸ್ವಚ್ಛತಾ ದಿನಾಚರಣೆಯಂದು ಸಚ್ಛತಾ ಕಾರ್ಯ ಕೈಗೊಳ್ಳುವ ಮೂಲಕ ಸಾರ್ವಜನಿಕರಿಗೆ ಪರಿಸರ ನೈರ್ಮಲ್ಯದ ಸಂದೇಶ ನೀಡಿದಂತಾಗಿದೆ ಎಂದರು. 

ಬಳಿಕ ನಡೆದ ಕಡಲತೀರ ಸ್ವಚ್ಛತಾ ಕಾರ್ಯದಲ್ಲಿ ಮರವಂತೆ, ನಾವುಂದ ಗ್ರಾಪಂ ಸದಸ್ಯರು, ಅಭಿವೃದ್ಧಿ ಅಧಿಕಾರಿಗಳಾದ ಹರೀಶ್ ಕುಮಾರ ಶೆಟ್ಟಿ, ರಾಜೇಶ್, ಭಾರತ್ ನಿರ್ಮಾಣ್ ಸ್ವಯಂಸೇವಕರು, ಎಫ್‌ಎಸ್‌ಎಲ್ ಸಂಸ್ಥೆಯ ಮಂಜುನಾಥ, ಸ್ಟ್ಯಾನಿ ರೆಬೆಲ್ಲೋ, ಶಾಲಿನಿ, ವಿದೇಶೀ ಸ್ವಯಂಸೇವಕರಾದ ಸಫಿಯಾ, ಮ್ಯಾಕ್ಸ್, ಝೇವಿಯರ್, ಜಾನ್, ಬಸ್ರೂರು ಶಾರದಾ ಕಾಲೇಜಿನ ಎನ್‌ಎಸ್‌ಎಸ್ ಘಟಕದ ವಿದ್ಯಾರ್ಥಿಗಳು, ಉಪನ್ಯಾಸಕ ರಾಘವೇಂದ್ರ ಶೆಟ್ಟಿ, ಮರವಂತೆ ಪಂಚಾಯಿತಿ ಸಿಬ್ಬಂದಿ ಶೇಖರ ಮರವಂತೆ, ಪ್ರಭಾಕರ ಪಾಲ್ಗೊಂಡರು. 

ಮಾಜಿ ಉಪಾಧ್ಯಕ್ಷ ಪ್ರಭಾಕರ ಪೂಜಾರಿ, ಶೇಖರ್ ಗಾಂಧಿ ನಗರ, ಸುಧಾಕರ ಸಹಕರಿಸಿದರು. ಸ್ಥಳಕ್ಕೆ ಭೇಟಿ ನೀಡಿದ ಜಿ.ಪಂ. ಮಾಜಿ ಅಧ್ಯಕ್ಷ ಎಸ್. ರಾಜು ಪೂಜಾರಿ, ಗ್ರಾಪಂ ಮಾಜಿ ಅಧ್ಯಕ್ಷ ಎಂ. ವಿನಾಯಕ ರಾವ್ ಸ್ವಯಂಸೇವಕರನ್ನು ಅಭಿನಂದಿಸಿದರು. 

ಪಡುಬಿದ್ರಿ ಬೀಚ್ ಸ್ವಚ್ಛತೆ: ಸ್ವಚ್ಛ ಗ್ರಾಮವನ್ನಾಗಿಸುವ ಉದ್ದೇಶದಿಂದ ಪಡುಬಿದ್ರಿ ಬೀಚ್‌ನಲ್ಲಿ ನಾನಾ ಸಂಘಟನೆಗಳ ಸಹಕಾರದೊಂದಿಗೆ ಸ್ವಚ್ಛತೆ ಕಾರ್ಯಕ್ರಮ ಹಮ್ಮಿಕೊಂಡಿದ್ದು, ಮುಂದಿನ ದಿನಗಳಲ್ಲಿ ಗ್ರಾಮದಾದ್ಯಂತ ಜನಜಾಗೃತಿಗೊಳಿಸುವ ನಿಟ್ಟಿನಲ್ಲಿ ಹಮ್ಮಿಕೊಳ್ಳಲಾಗುವುದು ಎಂದು ಪಡುಬಿದ್ರಿ ಗ್ರಾಪಂ ಅಧ್ಯಕ್ಷ ವಿಜಯ ಎಂ. ಅಮೀನ್ ಹೇಳಿದರು. ಪಡುಬಿದ್ರಿ ಗ್ರಾಪಂ, ಭಾರತ್ ನಿರ್ಮಾಣ್ ಸ್ವಯಂಸೇವಕರು, ಲಯನ್ಸ್ ಕ್ಲಬ್ ಮತ್ತು ಬೀಚ್ ಫ್ರೆಂಡ್ಸ್ ಆಶ್ರಯದಲ್ಲಿ ಶನಿವಾರ ಪಡುಬಿದ್ರಿ ಬೀಚ್ ಸ್ವಚ್ಛತಾ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು. 

ಗ್ರಾಪಂ ಉಪಾಧ್ಯಕ್ಷೆ ನೇತ್ರಾವತಿ ಶೆಟ್ಟಿ, ಪಿಡಿಓ ಮಮತಾ ಶೆಟ್ಟಿ, ಲಯನ್ಸ್ ಅಧ್ಯಕ್ಷ ಸುಧಾಕರ ಶೆಟ್ಟಿ, ಕಾರ್ಯದರ್ಶಿ ದಿನೇಶ್ ಶೆಟ್ಟಿ, ಬೀಚ್ ಫ್ರೆಂಡ್ಸ್ ಅಧ್ಯಕ್ಷ ದೇವದಾಸ್ ಕರ್ಕೇರ, ಬಿಎನ್‌ವಿ ಅಧ್ಯಕ್ಷೆ ದಮಯಂತಿ ಅಮೀನ್, ಲಯನೆಸ್ ಅಧ್ಯಕ್ಷೆ ರಶ್ಮಿ ಶೆಟ್ಟಿ, ರಾಜೇಶ್ ಪಡುಬಿದ್ರಿ, ಪ್ರಕಾಶ್ ಶೆಟ್ಟಿ, ಜೇಮ್ಸ್ ಅಂದ್ರಾದೆ, ವಿಶು ಕುಮಾರ್, ಪಿಎಸ್ ಆಚಾರ್, ಅಶೋಕ್ ಸಾಲ್ಯಾನ್, ರವಿ ಶೆಟ್ಟಿ, ಜ್ಯೋತಿ ಮೆನನ್ ಮತ್ತಿತರರು ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com