ಉಡುಪಿ ನಗರಸಭಾಧ್ಯಕ್ಷರಾಗಿ ಯುವರಾಜ ಉಪಾಧ್ಯಕ್ಷೆಯಾಗಿ ಅಮೃತಾ ಕೃಷ್ಣಮೂರ್ತಿ

ಉಡುಪಿ: ನಗರಸಭೆಯ 7ನೇ ಅಧ್ಯಕ್ಷರಾಗಿ ಅಧಿಕಾರಿ ಸ್ವೀಕರಿಸಿರುವ ಕಾಂಗ್ರೆಸಿನ ಯುವರಾಜ ಪಿ. ಅವರು ತಮ್ಮ ಸೇವಾವಧಿಯಲ್ಲಿ ಕುಡಿಯುವ ನೀರು, ರಸ್ತೆ, ಕಸ ವಿಲೇವಾರಿ ಮುಂತಾದ ಮೂಲ ಸೌಕರ್ಯಗಳಿಗೆ ಮೊದಲ ಆದ್ಯತೆ ನೀಡುವುದಾಗಿ ಪ್ರಕಟಿಸಿದ್ದಾರೆ. 

ಉಡುಪಿ ನಗರಸಭೆ ಅಧ್ಯಕ್ಷರಾಗಿ ಅವಿರೋಧ ಆಯ್ಕೆಗೊಂಡು ನಗರಸಭೆಯ ಸತ್ಯಮೂರ್ತಿ ಸಭಾಂಗಣದ ಹಾಜಿ ಅಬ್ದುಲ್ಲಾ ಪೀಠದಲ್ಲಿ ನಗರಸಭೆ ಸದಸ್ಯರು ಹಾಗೂ ಅಧಿಕಾರಿಗಳನ್ನುದ್ದೇಶಿಸಿ ಗುರುವಾರ ಮಾತನಾಡಿದರು. 

45 ವರ್ಷಗಳ ಬಳಿಕ ಕಾಂಗ್ರೆಸ್ ನಗರಸಭೆಯಲ್ಲಿ ಅಧಿಕಾರ ಪಡೆದು ಇತಿಹಾಸ ಸೃಷ್ಟಿಸಿರುವುದರ ಬಗ್ಗೆ ಸಂತೋಷ ವ್ಯಕ್ತ ಪಡಿಸಿದ ಅವರು, ಚುನಾವಣೆ ಭರವಸೆಗಳಿಗೆ ಚ್ಯುತಿ ಬಾರದಂತೆ ನೀರು, ರಸ್ತೆ, ಶುಚಿತ್ವ ಮೊದಲಾದ ಮೂಲ ಸೌಕರ್ಯಗಳಿಗೆ ಪ್ರಥಮ ಆದ್ಯತೆ ನೀಡುವುದಾಗಿ ಪ್ರಕಟಿಸಿದರು. 

ಅಧಿಕಾರ ತನಗೆ ಹೊಸದಾಗಿರುವುದು ಹಾಗೂ ನಗರಸಭೆ ಸದಸ್ಯನಾಗಿ ಮೊದಲ ಬಾರಿ ಆಯ್ಕೆಗೊಂಡಿರುವುದರ ಬಗ್ಗೆ ಉಲ್ಲೇಖಿಸಿದ ಅವರು, ತನ್ನ ಅನನುಭವಿತನ ಸಮಸ್ಯೆಯಾಗದು. ಆಡಳಿತದಲ್ಲಿ ಶಾಸಕರು, ಸಚಿವರು ಸೇರಿದಂತೆ ಪಕ್ಷದ ಹಿರಿಯರ ಸಲಹೆ, ಮಾರ್ಗದರ್ಶನವನ್ನು ಪಡೆದುಕೊಂಡು ಭ್ರಷ್ಟಾಚಾರ ರಹಿತ ಆಡಳಿತ ನೀಡಲು ಶ್ರಮಿಸುವುದಾಗಿ ತಿಳಿಸಿದರು. ಉಪಾಧ್ಯಕ್ಷೆ ಅಮೃತಾ ಕೃಷ್ಣಮೂರ್ತಿ ಅವರು ತನ್ನ ಆಯ್ಕೆಯ ಬಗ್ಗೆ ಸದಸ್ಯರಿಗೆ ಕೃತಜ್ಞತೆ ಸಲ್ಲಿಸಿ ಅಧ್ಯಕ್ಷ ಯುವರಾಜ್ ಅವರ ಸಂಕಲ್ಪಕ್ಕೆ ತನ್ನ ಸಹಮತದ ಧ್ವನಿಗೂಡಿಸಿದರು. 

ಕುಡ್ಸೆಂಪ್ 2ನೇ ಹಂತಕ್ಕೆ 90 ಕೋಟಿ ರೂ.: ನೂತನ ಅಧ್ಯಕ್ಷ, ಉಪಾಧ್ಯಕ್ಷರನ್ನು ಅಭಿನಂದಿಸಿ ಮಾತನಾಡಿದ ಶಾಸಕ ಪ್ರಮೋದ್ ಮಧ್ವರಾಜ್, ಉಡುಪಿ ನಗರಸಭೆಗೆ ಕುಡ್ಸೆಂಪ್‌ನ (ಒಳಚರಂಡಿ, ಕುಡಿಯುವ ನೀರು) 2ನೇ ಹಂತದ ಯೋಜನೆಗಾಗಿ 90 ಕೋಟಿ ರೂ. ನೀಡಲು ರಾಜ್ಯ ಸಂಪುಟ ಸಭೆ ತೀರ್ಮಾನಿಸಿದೆ. ಮುಂದಿನ 5ವರ್ಷಗಳ ಅವಧಿಯಲ್ಲಿ ಸಮರ್ಪಕವಾಗಿ ಬಳಸಿಕೊಂಡು ಮಾದರಿ ನಗರಸಭೆಯನ್ನಾಗಿಸಲು ಪ್ರಯತ್ನಿಸಲಾಗುವುದು. ಪ್ರತಿಪಕ್ಷ ಬಿಜೆಪಿಯ ಸಕಾರಾತ್ಮಕ ಟೀಕೆಗಳನ್ನು ಗಮನದಲ್ಲಿಟ್ಟುಕೊಂಡು ಪಕ್ಷ ಬೇಧ ಮರೆತು ಎಲ್ಲ ನಗರಸಭೆಯ ಎಲ್ಲ 35 ವಾರ್ಡ್‌ಗಳಲ್ಲೂ ಅಭಿವೃದ್ಧಿ ಕಾರ್ಯಗಳನ್ನು ಹಮ್ಮಿಕೊಳ್ಳಲಾಗುವುದು. ಯಾವುದೇ ಕಾರಣಕ್ಕೂ ದ್ವೇಷ ರಾಜಕೀಯ ಮಾಡದಿರಲು ಕಾಂಗ್ರೆಸ್ ಸಂಕಲ್ಪಿಸಿದೆ ಎಂದ ಅವರು, ಅಧ್ಯಕ್ಷರು ಹಾಗೂ ಉಪಾಧ್ಯಕ್ಷರ ಅವಿರೋಧ ಆಯ್ಕೆಗೆ ಅವಕಾಶ ಮಾಡಿದ ಬಿಜೆಪಿಯನ್ನು ಅಭಿನಂದಿಸಿದರು. ಈ ಸಂದರ್ಭ ಪೌರಾಯುಕ್ತ ಶ್ರೀಕಾಂತ್ ರಾವ್ ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com