ಕೊಲ್ಲೂರಿಗೆ ಭೇಟಿ ನೀಡಿದ ಮಹಾರಾಷ್ಟ್ರ ರಾಜ್ಯಪಾಲ ಶಂಕರನ್

ಕೊಲ್ಲೂರು: ಜನರಲ್ಲಿನ ವೌಢ್ಯ ನಿವಾರಣೆಗೆ ಮಹಾರಾಷ್ಟ್ರ ಸರಕಾರದ ಮಾದರಿಯಂತೆ ಕರ್ನಾಟಕ ಸಹಿತ ಇತರ ರಾಜ್ಯಗಳೂ ಕಾನೂನಿನ ಚೌಕಟ್ಟಿನಲ್ಲಿ ವಿಧೇಯಕ ಜಾರಿಗೆ ತರಬೇಕು ಎಂದು ಮಹಾರಾಷ್ಟ್ರ ರಾಜ್ಯಪಾಲ ಕೆ. ಶಂಕರನ್ ಅಭಿಪ್ರಾಯಪಟ್ಟರು. 

  ಕೊಲ್ಲೂರು ಶ್ರೀ ಮೂಕಾಂಬಿಕೆ ದೇವಸ್ಥಾನಕ್ಕೆ ಭೇಟಿ ನೀಡಿ ದೇವರ ದರ್ಶನ ಪಡೆದ ಅವರು ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿ, ದೇಶದಲ್ಲಿ ಇಂದು ವೌಢ್ಯತೆ ತಾಂಡವಾಡುತ್ತಿದೆ. ಮುಗ್ಧ ಜನರ ಅಸಹಾಯಕತೆಯನ್ನು ಬಳಸಿಕೊಂಡು ಕೆಲವು ಪಟ್ಟಭದ್ರರು ವಂಚಿಸುತ್ತಿದ್ದಾರೆ. ಪುಣೆಯ ವಿಚಾರವಾದಿ ದಾಭೋಲ್ಕರ್ ಹತ್ಯೆ ಬಳಿಕ ಈ ವಿದ್ಯಮಾನವನ್ನು ಗಂಭೀರವಾಗಿ ಪರಿಗಣಿಸಿ ಮಹಾರಾಷ್ಟ್ರ ಸರಕಾರ ನೂತನ ವಿಧೇಯಕ ಜಾರಿಗೆ ತಂದು ರಾಷ್ಟ್ರಪತಿ ಅಂಕಿತಕ್ಕೆ ಕಳುಹಿಸಲಾಗಿದೆ ಎಂದರು. 

ಕಾನೂನಿನ ಚೌಕಟ್ಟಿನಲ್ಲಿ ವಿಧೇಯಕ ಜಾರಿಗೆ ತಂದಾಗ ಜನರ ಲ್ಲಿ ಮೂಢನಂಬಿಕೆಗಳಿಂದಾಗುವ ಶೋಷಣೆ ತಪ್ಪಿಸಲು ಸಾಧ್ಯವಾಗುತ್ತದೆ ಎಂದರು ಕೆ. ಶಂಕರನ್. 

ದೇಶದಲ್ಲಿ ಅತ್ಯಾಚಾರ, ಮಹಿಳಾ ದೌರ್ಜನ್ಯ ಪ್ರಕರಣಗಳು ಹೆಚ್ಚುತ್ತಿರುವ ಬಗ್ಗೆ ಆತಂಕ ವ್ಯಕ್ತಪಡಿಸಿದ ಅವರು, ಇದನ್ನು ಕಾನೂನು ಮೂಲಕ ತಡೆಯುವುದು ಕಷ್ಟ. ಜನರಲ್ಲಿ ಈ ಬಗ್ಗೆ ಜಾಗೃತಿ ಮೂಡಬೇಕಾಗಿದೆ. ಪಾಲಕರು ಸನ್ಮಾರ್ಗದಲ್ಲಿ ನಡೆದು, ಮಕ್ಕಳಿಗೆ ಎಳವೆಯಲ್ಲಿಯೇ ಉತ್ತಮ ಶಿಕ್ಷಣ, ಸಂಸ್ಕಾರ ನೀಡಬೇಕು. ಯುವಕರು ಎಂತಹ ಕಠಿಣ ಪರಿಸ್ಥಿತಿಯಲ್ಲೂ ಬುದ್ಧಿ ಸ್ಥಿಮಿತತೆ ಕಳೆದುಕೊಳ್ಳಬಾರದು ಎಂದರು. 

ಕುಂದಾಪುರ ಸಹಾಯಕ ಕಮಿಷನರ್ ಯೋಗೇಶ್ವರ, ಡಿವೈಎಸ್‌ಪಿ ಯಶೋದಾ ಒಂಟಿಗೋಡಿ, ಬೈಂದೂರು ವೃತ್ತನಿರೀಕ್ಷಕ ಅರುಣ ನಾಯಕ್, ಬೈಂದೂರು ತಹಸೀಲ್ದಾರ್ ತಿಪ್ಪೇಸ್ವಾಮಿ, ಕೊಲ್ಲೂರು ಎಸ್‌ಐ ದೇವೇಂದ್ರ, ದೇವಳದ ವ್ಯವಸ್ಥಾಪನಾ ಸಮಿತಿ ಸದಸ್ಯರಾದ ಡಾ. ಅತುಲ್ ಕುಮಾರ್, ಜಯಾನಂದ ಹೋಬಳಿದಾರ್, ಸಹಾಯಕ ಕಾರ್ಯನಿರ್ವಾಹಣಾಧಿಕಾರಿ ಕೃಷ್ಣಮೂರ್ತಿ, ದೇವಳದ ಮಾಜಿ ಧರ್ಮದರ್ಶಿ ಮೋಹನ್‌ಚಂದ್ರ ನಂಬಿಯಾರ್, ಅಶೋಕ ಕೊಡವೂರು, ಎಐಸಿಸಿ ಸದಸ್ಯ ಪಿ.ವಿ. ಮೋಹನ್ ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com