ಜಡ್ಕಲ್-ಮುದೂರು ರಸ್ತೆಯ ಮುಗಿಯದ ಗೋಳು

ಕುಂದಾಪುರ: ಕಳೆದೊಂದು ವರ್ಷದಿಂದ ತಾಲೂಕಿನ ಜಡ್ಕಲ್-ಮುದೂರು ರಸ್ತೆ ಅಭಿವೃದ್ಧಿ ಕಾಮಗಾರಿ ರಾಜ್ಯದಲ್ಲಿ ಸಂಚಲನ ಉಂಟು ಮಾಡುತ್ತಲೇ ಇದೆ. ಎಲ್ಲ ಗೊಂದಲಕ್ಕೆ ತೆರೆ ಬಿದ್ದು ರಸ್ತೆ ಅಭಿವೃದ್ಧಿ ಕಾಮಗಾರಿ ಅರ್ಧಕ್ಕೆ ಬರುವಷ್ಟರಲ್ಲಿ ಹೊಸದೊಂದು ಇಕ್ಕಟ್ಟಿಗೆ ಸಿಲುಕಿದೆ. 

ಹುಲಿಪಾರೆಯಿಂದ ಮೆಕ್ಕೆ ವರೆಗಿನ 900 ಮೀ. ಉದ್ದಕ್ಕೆ ಬಂಡಿ(ಎತ್ತಿನಗಾಡಿ) ರಸ್ತೆಯನ್ನಾಗಿ ಮಾಡಬೇಕು. ನಿಯಮ ಮೀರಿದರೆ ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ ಎಂಬ ಅರಣ್ಯ ಇಲಾಖೆಯ ಸುತ್ತೋಲೆ ಜಡ್ಕಲ್-ಮುದೂರು ರಸ್ತೆ ಅಭಿವೃದ್ಧಿ ಕಾಮಗಾರಿ ಮೇಲೆ ಕರಿಛಾಯೆ ಮೂಡಿಸಿದೆ. ಅರಣ್ಯ ಇಲಾಖೆಯ ನಿರ್ದೇಶನಕ್ಕೆ ಬೆಚ್ಚಿ ಬಿದ್ದ ಲೋಕೋಪಯೋಗಿ ಇಲಾಖೆ ರಸ್ತೆ ಅಭಿವೃದ್ಧಿ ಕಾಮಗಾರಿ ಸ್ಥಗಿತಗೊಳಿಸಿದೆ. ಇದರಿಂದಾಗಿ ನಕ್ಸಲ್ ಸಕ್ರಿಯ ಜಡ್ಕಲ್ ಮತ್ತು ಮುದೂರು ಗ್ರಾಮಸ್ಥರು ಬಸವಳಿದಿದ್ದಾರೆ. 

ರಸ್ತೆ ಅಭಿವೃದ್ಧಿಗಾಗಿ ಸಂಘರ್ಷ: ಜಡ್ಕಲ್-ಮುದೂರು ನಡುವಿನ ಮುಖ್ಯ ರಸ್ತೆ ದಶಕಗಳಿಂದ ಅಭಿವೃದ್ಧಿ ಕಾಣದೆ ನೆನೆಗುದಿಗೆ ಬಿದ್ದಿತ್ತು. 3 ವರ್ಷ ಹಿಂದೆ ಕೇಂದ್ರದ ವಿಶೇಷ ನಿಧಿಯಿಂದ ರಸ್ತೆ ಅಭಿವೃದ್ಧಿಗೆ 2 ಕೋಟಿ ರೂ. ಅನುದಾನ ಹರಿದುಬಂದಿತ್ತು. ಆದರೆ ರಸ್ತೆ ಅಭಿವೃದ್ಧಿ ಕಾರ್ಯಕ್ಕೆ ಚಾಲನೆ ನೀಡಿರಲಿಲ್ಲ. ಹದಗೆಟ್ಟ ರಸ್ತೆಯಿಂದ ನೆಮ್ಮದಿ ಕಳೆದುಕೊಂಡಿದ್ದ ಮಂದಿ ರಸ್ತೆ ಅಭಿವೃದ್ಧಿಗೆ ಮುಂದಾಗದ ಇಲಾಖೆಯ ಕ್ರಮ ಖಂಡಿಸಿ 2012ರ ಜು.7ರಂದು ಜಡ್ಕಲ್ ಗ್ರಾಮದ ಹುಲಿಪಾರೆಯಿಂದ ಮೆಕ್ಕೆ ವರೆಗಿನ ರಸ್ತೆ ಇಕ್ಕೆಲಗಳ ಅರಣ್ಯ ಇಲಾಖೆಗೆ ಸೇರಿದ ಮರ ಕಡಿದು ರಸ್ತೆಗೆ ಉರುಳಿಸಿದ್ದರು. 

ಇದರಿಂದ ಜಡ್ಕಲ್ ಮತ್ತು ಮುದೂರಿನ ಸಂಪರ್ಕ ಮೊಟಕುಗೊಂಡಿತ್ತು. ಮುದೂರಿನ 5 ಸಾವಿರಕ್ಕೂ ಹೆಚ್ಚು ಮಂದಿ ದಿಗ್ಬಂಧನಕ್ಕೊಳಗಾಗಿದ್ದರು. ಶಾಲೆ-ಕಾಲೇಜು ವಿದ್ಯಾರ್ಥಿಗಳು, ದೈನಂದಿನ ದುಡಿಮೆಗೆ ಹೋಗುವವರು ಕಂಗೆಟ್ಟಿದ್ದರು. ಉರುಳಿಸಿದ ಮರ ವಿದ್ಯುತ್ ಕಂಬದ ಮೇಲೆ ಉರುಳಿದ್ದರಿಂದ 90ಕ್ಕೂ ಮಿಕ್ಕಿ ವಿದ್ಯುತ್ ಕಂಬಗಳು ಧರಾಶಾಯಿಯಾಗಿದ್ದವು. ಈ ಘಟನೆ ಜಿಲ್ಲಾಡಳಿತ ಮತ್ತು ನಾಗರಿಕರ ನಡುವೆ ಸಂಘರ್ಷಕ್ಕೆಡೆ ಮಾಡಿಕೊಟ್ಟಿತ್ತು. 

ಅರಣ್ಯ ಇಲಾಖೆಗೆ ಸೇರಿದ ಮರವನ್ನು ಕಾನೂನು ಬಾಹಿರವಾಗಿ ಕಡಿದವರು ಶರಣಾಗತರಾಗದ ಹೊರತು ಮರ ತೆರವು ಸಾಧ್ಯವಿಲ್ಲ ಎಂದು ಜಿಲ್ಲಾಡಳಿತ ಸ್ಪಷ್ಟಪಡಿಸಿತ್ತು. ನಾಗರಿಕರು ಇದಕ್ಕೆ ಸೊಪ್ಪು ಹಾಕಲಿಲ್ಲ. ಜಿಲ್ಲಾಡಳಿತವೂ ತಲೆಬಾಗಲಿಲ್ಲ. ದಿಗ್ಬಂಧನದಿಂದ ಹತಾಶರಾದ ನಾಗರಿಕರು ಬಳಿಕ ನ್ಯಾಯಾಲಯಕ್ಕೆ ಶರಣಾದರು. 55 ಮಂದಿ ವಿರುದ್ಧ ಪ್ರಕರಣ ದಾಖಲಾಯಿತು. ವಿವಾದ ತಣ್ಣಗಾದ ಬಳಿಕ ಅರಣ್ಯ ಇಲಾಖೆ, ಮೆಸ್ಕಾಂ, ಪೊಲೀಸ್ ಇಲಾಖೆ ಹಾಗೂ ಜಿಲ್ಲಾಡಳಿತ ಜಂಟಿಯಾಗಿ ಮರ ತೆರವು ಕಾರ್ಯ ನಡೆಸಿ ಜನರ ನೆರವಿಗೆ ನಿಂತರು. 

ರಸ್ತೆ ಅಭಿವೃದ್ಧಿಗೆ ಚಾಲನೆ: ಜಡ್ಕಲ್ ಗ್ರಾಪಂ, ಬೈಂದೂರು ಹಾಲಿ ಶಾಸಕ ಕೆ. ಗೋಪಾಲ ಪೂಜಾರಿ ರಸ್ತೆ ಅಭಿವೃದ್ಧಿಗೆ ಕ್ರಮ ತೆಗೆದುಕೊಳ್ಳಬೇಕು ಎಂದು ಜಿಲ್ಲಾಧಿಕಾರಿ ಡಾ. ಎಂ.ಟಿ. ರೇಜು ಅವರಿಗೆ ಮನವಿ ಸಲ್ಲಿಸಿದ ಬಳಿಕ ಕಳೆದ ಬೇಸಿಗೆಯಲ್ಲಿ ರಸ್ತೆ ಅಭಿವೃದ್ಧಿ ಕಾರ್ಯಕ್ಕೆ ಚಾಲನೆ ನೀಡಲಾಯಿತು. ಜಡ್ಕಲ್‌ನಿಂದ ಮುದೂರು, ಮುದೂರು ಮೈದಾನದಿಂದ ಸಿದ್ಧಾಪುರಕ್ಕೆ ಸಂಪರ್ಕ ಕಲ್ಪಿಸುವ ಅಭಿವೃದ್ಧಿ ಕಾಮಗಾರಿ ವೇಗವಾಗಿ ನಡೆದಿತ್ತು. 

ಜಡ್ಕಲ್‌ನಿಂದ ಹುಲಿಪಾರೆ ತನಕ 5 ಕಿ.ಮೀ. ಸುಂದರ ರಸ್ತೆ ಈಗ ತಲೆಯೆತ್ತಿ ನಿಂತಿದೆ. ಕೆಲಸ ಇನ್ನೇನೂ ಮುಂದುವರಿಯುತ್ತದೆ ಎನ್ನುವಾಗಲೆ ಅರಣ್ಯ ಇಲಾಖೆ ಹೊರಡಿಸಿದ ಸುತ್ತೋಲೆಯಿಂದಾಗಿ ಕೆಲಸ ನಿರ್ವಹಿಸುತ್ತಿದ್ದ ಪಿಡಬ್ಲ್ಯೂಡಿ ಇಲಾಖೆ ಬೆದರಿದೆ. ಸದ್ಯ ಕೆಲಸ ಸ್ಥಗಿತಗೊಂಡಿದೆ. 

ಹದಗೆಟ್ಟ ರಸ್ತೆಯಲ್ಲಿನ ಗೋಳು: ಹುಲಿಪಾರೆಯಿಂದ ಮೆಕ್ಕೆವರೆಗಿನ ಹಾದಿ ತೀವ್ರ ರೀತಿಯಲ್ಲಿ ಹದಗೆಟ್ಟಿದೆ. ಕೊಡಚಾದ್ರಿ ತಪ್ಪಲಿನ ಮುದೂರು ಗ್ರಾಮಸ್ಥರಿಗೆ ಇದೊಂದು ಪ್ರಮುಖ ಸಂಪರ್ಕ ಕೊಂಡಿ. ಅಭಯಾರಣ್ಯದ ನಡುವೆ ಹಾದುಹೋಗುವ ರಸ್ತೆ ಅಭಿವೃದ್ಧಿ ಆಗುತ್ತಿರುವುದನ್ನು ಕಂಡು ಜನರು ಸಂತೋಷಪಟ್ಟಿದ್ದರು. ರಬ್ಬರ್, ಅಡಕೆ, ಲಾವಂಚ ಇತ್ಯಾದಿ ಕೃಷಿಯನ್ನೇ ನಂಬಿಕೊಂಡಿರುವ ಮತ್ತು ಕೃಷಿ ಕೂಲಿ ನೆಚ್ಚಿಕೊಂಡಿರುವ ಇಲ್ಲಿಯ ನಿವಾಸಿಗಳು ರಸ್ತೆ ಅಭಿವೃದ್ಧಿ ಕಾರ್ಯ ಅರ್ಧಕ್ಕೆ ಮೊಟಕುಗೊಂಡಿರುವ ಬಗ್ಗೆ ಹತಾಶರಾಗಿದ್ದಾರೆ. ............... ಏನಿದು ಸುತ್ತೋಲೆ ಜಡ್ಕಲ್-ಮುದೂರು ನಡುವಿನ ಹುಲಿಪಾರೆಯಿಂದ ಮೆಕ್ಕೆವರೆಗಿನ 900 ಮೀ. ಉದ್ದದ ಪ್ರದೇಶ ವನ್ಯಜೀವಿ ವಲಯಕ್ಕೆ ಸೇರುತ್ತದೆ. ಹಳೆ ದಾಖಲೆಯ ಪ್ರಕಾರ ಇದು ಬಂಡಿ(ಎತ್ತಿನಗಾಡಿ) ಹಾದಿ. ಇಲ್ಲಿ ರಸ್ತೆ ಅಭಿವೃದ್ಧಿ ಮಾಡುವಂತಿದ್ದರೆ ಬೆಳಗ್ಗೆ 8ರಿಂದ ಸಂಜೆ 5 ಗಂಟೆಯೊಳಗೆ ಮುಗಿಸಬೇಕು. ಡಾಮರೀಕರಣದ ಸಂದರ್ಭ ಸದ್ದು, ಬೆಂಕಿ ಮಾಡುವಂತಿಲ್ಲ. ವನ್ಯಜೀವಿಗಳಿಗೆ ಕೆಲಸದಿಂದ ಯಾವುದೇ ತೊಂದರೆಯಾಗಕೂಡದು. ಕೇವಲ 6 ಅಡಿ ಅಗಲದ ರಸ್ತೆ ಮಾಡಬೇಕು. ನಿಯಮ ಮೀರಿದರೆ ಕಾನೂನು ಎದುರಿಸಬೇಕಾಗುತ್ತದೆ ಎಂಬ ಅರಣ್ಯ ಇಲಾಖೆಯ ಸುತ್ತೋಲೆ ಮತ್ತೆ ಜಡ್ಕಲ್-ಮುದೂರು ಮಹತ್ವಾಕಾಂಕ್ಷೆಯ ರಸ್ತೆ ಅಭಿವೃದ್ಧಿಗೆ ತೊಡಕಾಗಿದೆ. 

ಅರಣ್ಯ ಇಲಾಖೆಯ ಸುತ್ತೋಲೆಗೆ ಮನ್ನಣೆ ನೀಡಿ ಪಿಡಬ್ಲೂಡಿ ಕೆಲಸ ಸ್ಥಗಿತಗೊಳಿಸಿದೆ. ಕಾನೂನು ಸಡಿಲಿಕೆಯಾಗದ ಹೊರತು ಅಭಿವೃದ್ಧಿ ಸಾಧ್ಯವಿಲ್ಲ ಎಂದು ಪಿಡಬ್ಲೂಡಿ ಇಲಾಖೆ ಹೇಳುತ್ತಿದೆ. ಇದರಿಂದ ಸಂಕಷ್ಟಕ್ಕೆ ತುತ್ತಾಗಿರುವವರು ಮುದೂರು ಗ್ರಾಮಸ್ಥರು. .............. ಕಳೆದ ಕೆಲವು ದಶಕಗಳಿಂದ ಜಡ್ಕಲ್-ಮುದೂರು ಸಂಪರ್ಕ ರಸ್ತೆ ನನೆಗುದಿಗೆ ಬಿದ್ದಿತ್ತು. ಕೇಂದ್ರದ ವಿಶೇಷ ಅನುದಾನದಿಂದ 2 ಕೋಟಿ ರೂ. ಅನುದಾನ ಬಂದಿದ್ದು ರಸ್ತೆ ಅಭಿವೃದ್ಧಿ ಕಾರ್ಯಕ್ಕೆ ಚಾಲನೆ ದೊರೆತಿದೆ. ಕಾನೂನಿನ ಹೆಸರಿನಲ್ಲಿ ನಡೆಯುತ್ತಿರುವ ಕಾಮಗಾರಿ ಅರ್ಧಕ್ಕೆ ನಿಲ್ಲಕೂಡದು. ಇದರಿಂದ ಬಹಳಷ್ಟು ತೊಂದರೆ ಎದುರಿಸಬೇಕಾಗುತ್ತದೆ. ಪಂಚಾಯಿತಿ ಈಗಾಗಲೇ ಜಿಲ್ಲಾಡಳಿತದ ಗಮನಕ್ಕೆ ವಿಷಯ ತಂದಿದೆ. ಶಾಸಕರು, ಜಿಲ್ಲಾ ಉಸ್ತುವಾರಿ ಸಚಿವರು ಗಮನಹರಿಸಿ ಕಾನೂನು ತೊಡಕು ನಿವಾರಣೆಗೊಳಿಸಿ ರಸ್ತೆ ಅಭಿವೃದ್ಧಿಗೆ ಮತ್ತೆ ಚಾಲನೆ ಒದಗಿಸಬೇಕು. -ಗ್ರೇಸಿ ಜೋಸೆಫ್ ಜಡ್ಕಲ್ ಗ್ರಾ.ಪಂ. ಅಧ್ಯಕ್ಷೆ. 

ವರದಿ ಕೃಪೆ: ಜಾನ್ ಡಿಸೋಜ, ವಿಕ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com