ಕುಡಿವ ನೀರಿನ ದರ ಏರಿಕೆ ಹಿಂಪಡೆಯಲು ಆಗ್ರಹ

ಕುಂದಾಪುರ: ಕುಡಿಯುವ ನೀರಿನ ದರ ಏರಿಕೆ ಹಿಂಪಡೆಯುವುದರ ಮೂಲಕ ನಾಗರಿಕರಿಗೆ ಆಗುತ್ತಿರುವ ತೊಂದರೆ ತಪ್ಪಿಸಬೇಕು ಎಂದು ಪುರಸಭೆ ಸದಸ್ಯರು ಶುಕ್ರವಾರ ಜರುಗಿದ ಸಾಮಾನ್ಯ ಸಭೆಯಲ್ಲಿ ಪಕ್ಷಬೇಧ ಮರೆತು ಒತ್ತಾಯಿಸಿದರು. ಪುರಸಭೆ ನೂತನ ಅಧ್ಯಕ್ಷೆ ಕಲಾವತಿ ಅಧ್ಯಕ್ಷತೆ ವಹಿಸಿದ್ದರು. ಸದಸ್ಯ ಚಂದ್ರಶೇಖರ ಖಾರ್ವಿ, ಶ್ರೀಧರ ಶೇರೆಗಾರ್ ವಿಷಯ ಪ್ರಸ್ತಾಪಿಸಿ, 2011ರಲ್ಲಿ ಬಿಜೆಪಿ ಆಡಳಿತ ಅವಧಿಯಲ್ಲಿಯೇ ಕುಡಿಯುವ ನೀರಿನ ದರ ಏರಿಕೆಗೆ ಸರಕಾರದ ಸುತ್ತೋಲೆ ಬಂದಿದೆ. ಆ ಸಂದರ್ಭ ಏರಿಕೆ ಮಾಡದೆ ಪುರಸಭೆಯಲ್ಲಿ ಆಡಳಿತ ಇಲ್ಲದ ಕಾಲದಲ್ಲಿ ಅಧಿಕಾರಿಗಳು ಏಕಾಏಕಿ ದರ ಏರಿಕೆ ಮಾಡಿರುವುದು ಸರಿಯಲ್ಲ. ಜನರಿಗೆ ಭಾರಿ ಹೊರೆಯಾಗಿದೆ ಎಂದು ದೂರಿದರು. ಕೆಲವು ವಾರ್ಡ್‌ಗಳಲ್ಲಿ ಫಲಾನುಭವಿಗಳಿಗೆ ನೀರು ಸಂಪರ್ಕ ಸಹ ಕಡಿತ ಗೊಳಿಸಲಾಗಿದೆ ಎಂದರು. 

ಹಿರಿಯ ಸದಸ್ಯ ಮೋಹನದಾಸ ಶೆಣೈ ಮಾತನಾಡಿ, ಕುಡಿಯುವ ನೀರಿನ ದರ ಏರಿಕೆ ಕುರಿತು ವಿಶೇಷ ಸಭೆ ಕರೆದು ಚರ್ಚಿಸುವಂತೆ ಸಲಹೆ ನೀಡಿದರು. ಸದಸ್ಯೆ ಗುಣರತ್ನ, ಸತೀಶ್ ಶೆಟ್ಟಿ ಚರ್ಚೆ ಯಲ್ಲಿ ಪಾಲ್ಗೊಂಡರು. ಎಂಜಿನಿಯರ್ ರಾಘವೇಂದ್ರ ಪ್ರತಿಕ್ರಿಯಿಸಿ ದರ ಏರಿಕೆ ವೈಜ್ಞಾನಿಕ ರೀತಿಯಲ್ಲಿ ಮಾಡಲಾಗಿದೆ. ಈಗಾಗಲೆ ಸಂಗ್ರಹವಾಗುತ್ತಿರುವ ಬಿಲ್ ನಮ್ಮ ವೆಚ್ಚಕ್ಕೆ ಸರಿದೂಗುತ್ತಿಲ್ಲ. ಆದರೂ ಜನರಿಗೆ ನೀರು ನೀಡುತ್ತಿದ್ದೇವೆ. ಈ ಬಗ್ಗೆ ಆಡಳಿತ ಮಂಡಳಿಯ ಪರಿಣಾಮಕಾರಿ ಸಲಹೆ ಮಾರ್ಗದರ್ಶನ ನೀಡಬೇಕಾಗುತ್ತದೆ ಎಂದರು. 

ಬಲದ ಹೆಸರಿನಲ್ಲಿ ಜಟಾಪಟಿ: ಮೊದಲ ಸಭೆಯಲ್ಲಿ ಆಡಳಿತ ಪಕ್ಷದವರು, ಪ್ರತಿಪಕ್ಷದವರು ಎಲ್ಲಿ ಪವಡಿಸಬೇಕೆಂಬ ವಿಚಾರದಲ್ಲಿ ಬಹಳಷ್ಟು ಗದ್ದಲ ನಡೆಯಿತು. ಸದಸ್ಯ ರಾಜೇಶ್ ಕಾವೇರಿ ವಿಷಯ ಪ್ರಸ್ತಾಪಿಸಿ ನಮ್ಮ ಸಂಖ್ಯೆ 12. ನಾವೇ ಆಡಳಿತ ಪಕ್ಷ. ನಾವು ಅಧ್ಯಕ್ಷರ ಬಲಬದಿಗೆ ಕೂರುವುದು ಸೂಕ್ತ ಎಂದು ಸಲಹೆ ನೀಡಿದರು. ಇದಕ್ಕೆ ಕಾಂಗ್ರೆಸ್ ಸದಸ್ಯರು ವಿರೋಧ ವ್ಯಕ್ತಪಡಿಸಿದರು. ಇಲ್ಲಿ ನಾವು ಎಲ್ಲಿ ಕುಳಿತುಕೊಳ್ಳಬೇಕೆಂದು ಬಂದಿದ್ದಲ್ಲ. ನೀವು ಆಡಳಿತ ಪಕ್ಷವಾಗುವುದಾದರೂ ಹೇಗೆ? ಎಂದು ಶ್ರೀಧರ ಶೇರೆಗಾರ್ ಪ್ರಶ್ನಿಸಿದಾಗ ಸಭೆ ಗದ್ದಲದ ಗೂಡಾಯಿತು. 

ಕಾಂಗ್ರೆಸ್ ಸದಸ್ಯೆ ರವಿಕಲಾ ಗಣೇಶ್ ಬಿಜೆಪಿ ಸದಸ್ಯರನ್ನು ತರಾಟೆಗೆ ತೆಗೆದುಕೊಂಡರು. ಮಧ್ಯೆ ಪ್ರವೇಶಿಸಿದ ಪುರಸಭೆ ಅಧ್ಯಕ್ಷೆ ಕಲಾವತಿ ಮತ್ತು ಉಪಾಧ್ಯಕ್ಷ ನಾಗರಾಜ ಕಾಮಧೇನು ಸದಸ್ಯರನ್ನು ಸಮಾಧಾನಪಡಿಸಿ ಇದು ಸಭೆಗೆ ಭೂಷಣವಲ್ಲ ಎಂದರು. 

ಹಿರಿಯ ಸದಸ್ಯೆ ಗುಣರತ್ನ ಮಾತನಾಡಿ, ಸಂಖ್ಯೆ ನಮ್ಮದು 2. ಆದರೆ ಅಧ್ಯಕ್ಷರು ನಮ್ಮವರು. ಇಲ್ಲಿ ಸಂಖ್ಯೆ ಮುಖ್ಯವಲ್ಲ. 23 ವಾರ್ಡ್‌ಗಳ ಅಭಿವೃದ್ಧಿಗಾಗಿ ನಾವೆಲ್ಲರೂ ಒಂದಾಗಿ ಕೆಲಸ ಮಾಡಬೇಕು ಎಂದು ಸಲಹೆ ನೀಡಿದಾಗ ಸಭೆ ತಣ್ಣಗಾಯಿತು. 

ನೀರು ಉಳಿಸಿ: ಪುರಸಭೆ ವ್ಯಾಪ್ತಿಯ ಚಿಕ್ಕನ್‌ಸಾಲ್ ರಸ್ತೆಯ ಮೊಗವೀರ ಭವನ, ಎಪಿಎಂಸಿ ಯಾರ್ಡ್ ಅಲ್ಲದೆ ಸಟ್ವಾಡಿ ಸಮೀಪ ಕುಡಿಯುವ ನೀರು ಪ್ರತಿದಿನ ವ್ಯಾಪಕ ರೀತಿಯಲ್ಲಿ ಸೋರಿಹೋಗುತ್ತಿದೆ. ಜನರಿಗೆ ಕುಡಿಯಲು ಬೇಕಾಗುವ ನೀರು ಸಾವಿರಾರು ಲೀಟರ್ ಸೋರಿ ಹೋಗುತ್ತಿರುವುದನ್ನು ತಡೆಗಟ್ಟಬೇಕು ಎಂದು ಸದಸ್ಯ ಶ್ರೀಧರ ಶೇರೆಗಾರ್ ಆಗ್ರಹಿಸಿದರು. 

ಸೊಳ್ಳೆ ನಿಯಂತ್ರಿಸಿ: ಪುರಸಭೆ ವ್ಯಾಪ್ತಿಯಲ್ಲಿ ಸೊಳ್ಳೆಗಳ ಕಾಟ ವಿಪರೀತವಾಗಿದೆ. ಇದು ಡೆಂಗೆ, ಮಲೇರಿಯಾದಂತಹ ರೋಗಗಳಿಗೆ ಎಡೆಮಾಡಿಕೊಡುತ್ತಿದೆ. ಸೊಳ್ಳೆ ನಿಯಂತ್ರಣ ಕಾರ್ಯದಲ್ಲಿ ಅಧಿಕಾರಿಗಳು ಯಾವುದೇ ಕ್ರಮ ತೆಗೆದುಕೊಂಡಿಲ್ಲ ಎಂದು ಸದಸ್ಯ ರವಿರಾಜ ಖಾರ್ವಿ ದೂರಿದರು. ಪುರಸಭೆ ಉಪಾಧ್ಯಕ್ಷ ನಾಗರಾಜ ಕಾಮಧೇನು, ಮುಖ್ಯಾಧಿಕಾರಿ ಸದಾನಂದ ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com