ಶಾದಿ ಭಾಗ್ಯ ಹೆಸರೇ ಅಸಮಂಜಸ: ದೇವೇಗೌಡ

ಕುಂದಾಪುರ: ಬಡ ಯುವತಿಯರ ಮದುವೆಗೆ ನೆರವಾಗುವ ಕಾರ್ಯಕ್ರಮಕ್ಕೆ ಶಾದಿ ಭಾಗ್ಯ ಅಂತ ಹೆಸರಿಡುವ ಔಚಿತ್ಯವಾದರೂ ಏನು? ನಾನು ಮುಖ್ಯಮಂತ್ರಿಯಾಗಿದ್ದಾಗ ತಾಳಿ ಭಾಗ್ಯ ಜಾರಿಗೆ ತಂದಿದ್ದೆ. ಅದೇ ಹೆಸರಿಡಬಹುದಿತ್ತು. ಅದು ಬಿಟ್ಟು ಉರ್ದು ಪದ ಬಳಸಿಕೊಂಡು ಶಾದಿ ಭಾಗ್ಯ ಅಂತ ಕರೆದು ಜಾತಿಗಳ ನಡುವೆ ಒಡಕು ಮೂಡಿಸುವ ಕೆಲಸ ಮಾಡಲಾಗಿದೆ. ಇಂತಹ ಹಿಕ್ಮತ್‌ಗಳು ಹೆಚ್ಚು ದಿನ ನಡೆಯೋದಿಲ್ಲ ಎಂದು ಹೇಳಿದರು ಜೆಡಿಎಸ್ ವರಿಷ್ಠ ಎಚ್.ಡಿ. ದೇವೇಗೌಡ.

ಕೊಲ್ಲೂರು ದೇವಳಕ್ಕೆ ಭೇಟಿ ನೀಡಿದ ವೇಳೆ ಸುದ್ದಿಗಾರರೊಂದಿಗೆ ಅವರು ಮಾತನಾಡಿದರು.

ಮೌಢ್ಯ ವಿಧೇಯಕ ಅನಗತ್ಯ: ಮೂಢನಂಬಿಕೆ ನಿಷೇಧ ಕಾಯಿದೆ ವಿಚಾರ ಅನಗತ್ಯ. ಈ ವಿಷಯದ ಕುರಿತು ಚರ್ಚಿಸುವುದು ಮೂರ್ಖತನ. ತಮಿಳುನಾಡಿನಲ್ಲಿ ಪೆರಿಯಾರ್ ರಾಮನ ಫೋಟೊ ಕಾಲಿನಿಂದ ತುಳಿದರು. ಹಾಗಂತ ತಮಿಳುನಾಡಿನ ಜನ ದೇಗುಲಗಳಿಗೆ ಹೋಗುವುದನ್ನು ನಿಲ್ಲಿಸಿಲ್ಲ. ಜನರ ಭಾವನೆ, ನಂಬಿಕೆಯ ಮೇಲೆ ಚೆಲ್ಲಾಟ ಆಡಬಾರದು. ಸೃಷ್ಟಿ ಮತ್ತು ಲಯದ ಪರಿಜ್ಞಾನವಿಲ್ಲದವರು ಮಾತ್ರ ನಂಬಿಕೆ ಮೇಲೆ ಪ್ರಹಾರ ನಡೆಸಲು ಸಾಧ್ಯ ಎಂದರು ದೇವೇಗೌಡ.

ರಾಜ್ಯದಲ್ಲಿ ಸ್ಥಿರ ಸರಕಾರವಿಲ್ಲ: ಕಾಂಗ್ರೆಸ್‌ಗೆ ಪೂರ್ಣ ಬಹುಮತವಿದ್ದರೂ ಸ್ಥಿರತೆ ಇನ್ನೂ ಕಂಡುಬಂದಿಲ್ಲ. 123 ಶಾಸಕರ ಪೂರ್ಣ ಬೆಂಬಲದ ಸರಕಾರ ಇರುವಾಗಲೂ ಸಮನ್ವಯ ಸಮಿತಿ ರಚಿಸಿರುವ ಹಿಂದಿನ ಉದ್ದೇಶ ಎಲ್ಲರಿಗೂ ಅರ್ಥವಾಗಿದೆ. ಇದು ಹೆಚ್ಚು ದಿನ ಬಾಳದು ಎಂದು ದೇವೇಗೌಡ ಹೇಳಿದರು.

ಕಾಂಗ್ರೆಸ್, ಬಿಜೆಪಿ ಅಸಹ್ಯ: ರಾಷ್ಟ್ರೀಯ ಪಕ್ಷಗಳಾದ ಕಾಂಗ್ರೆಸ್ ಮತ್ತು ಬಿಜೆಪಿ ನಡವಳಿಕೆ ಅಸಹ್ಯಕರ. 52 ವರ್ಷ ಅಸೆಂಬ್ಲಿ ಪ್ರತಿನಿಧಿಸಿದ್ದರೂ ನಾನು ಒಮ್ಮೆಯೂ ಅಸಂಸದೀಯ ಭಾಷೆ ಬಳಕೆ ಮಾಡಿದವನಲ್ಲ. ಇಂದು ಈ ಪಕ್ಷಗಳ ನಾಯಕರು ಬಳಸುತ್ತಿರುವ ಭಾಷೆ, ನಡವಳಿಕೆ ರಾಜಕೀಯ ವ್ಯವಸ್ಥೆಗೆ ಕಳಂಕ ತರುವಂತಹದ್ದು. ಇದನ್ನು ದೇಶವಾಸಿಗಳು ಅವಲೋಕಿಸುತ್ತಿದ್ದಾರೆ ಎಂದು ಹೇಳಿದರು.

ಜೆಡಿಎಸ್ ವಿರುದ್ಧ ಸಂಚು: ರಾಜ್ಯದಲ್ಲಿ ಜೆಡಿಎಸ್‌ನ್ನು ಮುಗಿಸಬೇಕೆಂಬ ಸಂಚು ನಡೆಸುತ್ತಿದೆ. ಇದು ದೇವೇಗೌಡ ಬದುಕಿರುವವರೆಗೂ ನಡೆಯದು. ನಾನು ದೇವರನ್ನು ನಂಬಿದವನು. ರಾಜ್ಯದ ಹಿತಕ್ಕಾಗಿ ಜೆಡಿಎಸ್ ಉಳಿಯಬೇಕು. ಈ ಪ್ರಾರ್ಥನೆಗೋಸ್ಕರ ಕೊಲ್ಲೂರಿಗೆ ಬಂದಿರುವೆ ಎಂದರು.

ತೃತೀಯ ರಂಗ ಬಲವರ್ಧನೆ: ರಾಷ್ಟ್ರೀಯ ಪಕ್ಷಗಳ ದುರಾಡಳಿತದಿಂದ ಬೇಸತ್ತ ನಾಗರಿಕರು ತೃತೀಯ ರಂಗದತ್ತ ಕಣ್ಣೋಟ ಹರಿಸಿದ್ದಾರೆ. 14 ಪ್ರಾದೇಶಿಕ ಪಕ್ಷಗಳು ಒಂದುಗೂಡಿ ತೃತೀಯ ರಂಗ ಬಲವರ್ಧನೆಗೊಳಿಸುವ ಒಂದು ಸುತ್ತಿನ ಮಾತುಕತೆ ನಡೆದಿದೆ. ಈ ಸಭೆಯಲ್ಲಿ ನಾನು ಭಾಗವಹಿಸಿದ್ದೆ. ಜನರು ಆಶೀರ್ವದಿಸಿದರೆ ಮುಂದೆ ನೋಡೋಣ. ಸದ್ಯಕ್ಕೆ ಜೆಡಿಎಸ್ ರಾಜ್ಯದಲ್ಲಿ ಬಲಿಷ್ಠವಾಗಿ ಸಂಘಟಿಸುವುದೇ ನನ್ನ ಗುರಿ ಎಂದು ಅವರು ಸ್ಪಷ್ಟಪಡಿಸಿದರು.

ಜೆಡಿಎಸ್ ಜಿಲ್ಲಾ ಮುಖಂಡರಾದ ಬೆಳಪು ದೇವಿಪ್ರಸಾದ್ ಶೆಟ್ಟಿ, ಗುಲಾಂ ಅಹಮದ್, ಸಬ್ಲಾಡಿ ಮಂಜಯ್ಯ ಶೆಟ್ಟಿ, ಶಾಲಿನಿ ಪಿ. ಶೆಟ್ಟಿ ಉಪಸ್ಥಿತರಿದ್ದರು.

ಹೆದ್ದಾರಿ ದುರವಸ್ಥೆಗೆ ಕೆಂಡ

ಕುಂದಾಪುರ-ಬೈಂದೂರು ನಡುವಿನ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಓಡಾಡುವುದೇ ದುಸ್ತರ. ದೇಶದ ಯಾವ ಮೂಲೆಯಲ್ಲಿಯೂ ಇಂತಹ ಸ್ಥಿತಿ ಇರಲಿಕ್ಕಿಲ್ಲ. ಇಟ್ಸ್ ಹೊರಿಬಲ್..ರಾಜ್ಯದಲ್ಲಿ ಸರಕಾರ ಇದೆಯೋ ಇಲ್ಲವೋ: ಇದು ಮಾಜಿ ಪ್ರಧಾನಿ ದೇವೇಗೌಡರ ಉದ್ಗಾರ. ಹೆದ್ದಾರಿಯಲ್ಲಿ ಸಂಚರಿಸುವ ಜನಸಾಮಾನ್ಯರ ಬಗ್ಗೆ ಕಾಳಜಿ ಇದ್ದಿದ್ದರೆ ಸರಕಾರ ತಕ್ಷಣ ಪರಿಹಾರ ಕಾರ್ಯ ಕೈಗೊಳ್ಳುತ್ತಿತ್ತು. ಬಾವಿ ಆಕೃತಿಯ ಹೊಂಡಗಳು ಎದೆ ನಡುಗಿಸುತ್ತಿವೆ. ಹೆದ್ದಾರಿ ಸಂಪೂರ್ಣ ಅಧೋಗತಿಗೆ ಸಾಗಿದೆ. ಜನಸಾಮಾನ್ಯರ ಬಗ್ಗೆ ಸಂಬಂಧಿತರಿಗೆ ಕನಿಷ್ಠ ಕಾಳಜಿ ಇದ್ದರೆ ಹೆದ್ದಾರಿ ದುರಸ್ತಿಗೆ ತಕ್ಷಣ ಕ್ರಮ ತೆಗೆದುಕೊಳ್ಳಬೇಕು ಎಂದು ಅವರು ಆಗ್ರಹಿಸಿದರು.

ಕೊಲ್ಲೂರಿನಲ್ಲಿ ದೇವೇಗೌಡ ನವ ಚಂಡಿಯಾಗ
ಕುಂದಾಪುರ: ಮಾಜಿ ಪ್ರಧಾನಿ, ಜೆಡಿಎಸ್ ವರಿಷ್ಠ ದೇವೇಗೌಡ ಮಂಗಳವಾರ ಬೆಳಗ್ಗೆ ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನದಲ್ಲಿ ಸಂಕಲ್ಪದಂತೆ ನವಚಂಡಿಯಾಗ ನೆರವೇರಿಸಿದರು.

ಸೋಮವಾರ ಸಂಜೆ ಕ್ಷೇತ್ರಕ್ಕೆ ಆಗಮಿಸಿದ್ದ ಅವರು ದೇವರ ದರ್ಶನ ಪಡೆದು ಮೂಕಾಂಬಿಕಾ ಪ್ಯಾಲೇಸ್‌ನಲ್ಲಿ ತಂಗಿದ್ದರು. ಮಂಗಳವಾರ ಬೆಳಗ್ಗೆ 6 ಗಂಟೆಗೆ ದೇವಳಕ್ಕೆ ಆಗಮಿಸಿ ಶ್ರೀದೇವರ ದರ್ಶನ ಪಡೆದು ನವಚಂಡಿಯಾಗದಲ್ಲಿ ಪಾಲ್ಗೊಂಡರು.

ಬೆಳಗ್ಗೆ 9.30ಕ್ಕೆ ಯಾಗಕ್ಕೆ ಪೂರ್ಣಾಹುತಿ ಸಲ್ಲಿಸಿ ಶ್ರೀದೇವಿ ಹಾಗೂ ಪರಿವಾರ ದೇವರ ದರ್ಶನ ಪಡೆದರು. ಅರ್ಚಕ ಗೋವಿಂದ ಅಡಿಗ ನವಚಂಡಿಯಾಗದ ಧಾರ್ಮಿಕ ವಿಧಿ ನೆರವೇರಿಸಿದರು.

ಜೆಡಿಎಸ್ ಉಡುಪಿ ಜಿಲ್ಲಾಧ್ಯಕ್ಷ ಬೆಳಪು ದೇವಿಪ್ರಸಾದ್ ಶೆಟ್ಟಿ, ಜೆಡಿಎಸ್ ಮುಖಂಡರಾದ ಗುಲಾಂ ಅಹಮದ್, ಸಬ್ಲಾಡಿ ಮಂಜಯ್ಯ ಶೆಟ್ಟಿ, ಶಾಲಿನಿ ಪಿ. ಶೆಟ್ಟಿ ಕೆಂಚನೂರು, ವೇದಾ ಹೆಗ್ಡೆ, ರೋಶನಿ, ಉಪ್ಪುಂದ ರಂಜಿತ್‌ಕುಮಾರ ಶೆಟ್ಟಿ, ಶ್ರೀಕಾಂತ ಅಡಿಗ ಕೊಲ್ಲೂರು, ಮನ್ಸೂರ್ ಇಬ್ರಾಹಿಂ ಮರವಂತೆ, ದೇವಳದ ಕಾರ್ಯನಿರ್ವಹಣಾಧಿಕಾರಿ ಎಲ್.ಎಸ್. ಮಾರುತಿ, ಸಹಾಯಕ ಕಾರ್ಯನಿರ್ವಹಣಾಧಿಕಾರಿ ಕೃಷ್ಣಮೂರ್ತಿ ಉಪಸ್ಥಿತರಿದ್ದರು.

ಬಳಿಕ ದೇವೆಗೌಡರು ಶೃಂಗೇರಿಗೆ ತೆರಳಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com