ಜೆಹಾದಿ ಅಂದ್ರೆ ಅಮಾಯಕರ ಕಗ್ಗೊಲೆಯಲ್ಲ: ಡಾ.ಸಯ್ಯದ್ ಝಮಿರುಲ್ಲಾ ಶರೀಫ್

ಕುಂದಾಪುರ: ಜೆಹಾದಿ ಅಂದ್ರೆ ಅಮಾಯಕರ ಕಗ್ಗೊಲೆ ನಡೆಸುವುದಲ್ಲ. ಅಮಾಯಕರ ರಕ್ಷಣೆ, ದುಷ್ಟಶಕ್ತಿಯನ್ನು ಹಿಮ್ಮೆಟ್ಟಿಸುವುದು ಜೆಹಾದಿ. ಇದು ಪ್ರತಿಯೊಂದು ಧರ್ಮದಲ್ಲಿ ಅಡಕವಾಗಿದೆ. ಶಾಂತಿಗಾಗಿ ಬಂದಿರುವ ಧರ್ಮ ಇಸ್ಲಾಂ. ಮಾನವೀಯ ಮಿಡಿತಕ್ಕಾಗಿ ತುಡಿಯಬೇಕಾದ ಮನುಷ್ಯರು ಇಂದು ದುಷ್ಟಶಕ್ತಿಗಳ ಅಟ್ಟಹಾಸದಿಂದ ನಲುಗಿದ್ದಾರೆ. ಜಗತ್ತು ಅಶಾಂತಿ ಮಡುವಿನತ್ತ ಸಾಗುತ್ತಿದೆ. ಈ ನಡುವೆಯೂ ಮಂಗಳೂರು ಶಾಂತಿಪ್ರಕಾಶನ ಅತ್ಯಂತ ಔಚಿತ್ಯಪೂರ್ಣ ಕೆಲಸ ಮಾಡುತ್ತಿದೆ ಎಂದು ಭಟ್ಕಳದ ಸಾಹಿತಿ, ನಿವತ್ತ ಪ್ರಾಂಶುಪಾಲ ಡಾ.ಸಯ್ಯದ್ ಝಮಿರುಲ್ಲಾ ಶರೀಫ್ ಹೇಳಿದರು. 

ಇಲ್ಲಿನ ರೋಟರಿ ಕಲಾಮಂದಿರದಲ್ಲಿ ಮಂಗಳೂರಿನ ಶಾಂತಿ ಪ್ರಕಾಶನದ ಬೆಳ್ಳಿಹಬ್ಬ ಮಹೋತ್ಸವ ನಿಮಿತ್ತ ಹಮ್ಮಿಕೊಂಡ ಶಾಂತಿಗಾಗಿ ಸಾಹಿತ್ಯ ವಿಚಾರಗೋಷ್ಠಿಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು. ಖ್ಯಾತ ಸಾಹಿತಿ ಡಾ.ಪಾರ್ವತಿ ಜಿ.ಐತಾಳ್ ಮಾತನಾಡಿ ಎಲ್ಲಾ ಧರ್ಮಗಳು, ಪ್ರವಾಸಿಗಳು, ಸಂತರು ಹೇಳಿರುವುದು ಮಾನವೀಯ ವೌಲ್ಯಗಳನ್ನೇ. ಧರ್ಮವನ್ನು ಸರಿಯಾಗಿ ಅರ್ಥಮಾಡಿಕೊಳ್ಳದೆ ಇರುವವರಿಂದ ಆಗುವ ಅನಾಹುತ ಎದುರಿಸುವ ಶಕ್ತಿ ಸಾತ್ವಿಕರಲ್ಲಿ ಮೂಡಿಬರಬೇಕಾಗಿದೆ ಎಂದರು. 

ಕುಂದಪ್ರಭ ಟ್ರಸ್ಟ್ ಅಧ್ಯಕ್ಷ ಯು.ಎಸ್.ಶೆಣೆ ಮಾತನಾಡಿದರು. ಮಂಗಳೂರು ಸನ್ಮಾರ್ಗ ವಾರಪತ್ರಿಕೆ ಸಂಪಾದಕ ಜನಾಬ್ ಎ.ಕೆ.ಕುಕ್ಕಿಲ ಅಧ್ಯಕ್ಷತೆ ವಹಿಸಿದ್ದರು. ರೋಟರಿ ಶತಾಬ್ದಿ ಗವರ್ನರ್ ಎ.ಎಸ್.ಎನ್.ಹೆಬ್ಬಾರ್, ಉಡುಪಿ ಜಿಲ್ಲಾ ಕರ್ನಾಟಕ ಕೋಮು ಸೌಹಾರ್ದ ವೇದಿಕೆ ಉಪಾಧ್ಯಕ್ಷ ಕೆ.ಫಣಿರಾಜ್ ಆಶಯ ನುಡಿಗಳನ್ನಾಡಿದರು. ನಿವತ್ತ ಪ್ರಾಂಶುಪಾಲ ಎಸ್.ಜನಾರ್ದನ, ಉಪನ್ಯಾಸಕ ಭಾಸ್ಕರ ಶೆಟ್ಟಿ, ಸಾಹಿತಿಗಳಾದ ಕೋನಳ್ಳಿ ರಾಜೀವ ನಾಯ್ಕ, ವೆ.ಎಸ್.ಹರಗಿ, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಉಪಾಧ್ಯಕ್ಷ ವಿನಯ ಪಾಯಸ್, ಉಡುಪಿ ಜಿಲ್ಲಾ ಮುಸ್ಲಿಂ ಒಕ್ಕೂಟ ಅಧ್ಯಕ್ಷ ಜನಾಬ್ ಅಬ್ದುಲ್ ಮುನಾಫ್ ಕಂಡ್ಲೂರು ಉಪಸ್ಥಿತರಿದ್ದರು. ವೌಲನಾ ಫಜಲ್ ಕಂಡ್ಲೂರು ಕುರಾನ್ ಪಠಿಸಿದರು. ಮಹಮದ್ ಇದ್ರೀಸ್ ಸ್ವಾಗತಿಸಿ, ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಯಾಸೀನ್ ಕೋಡಿಬೆಂಗ್ರೆ ಕಾರ್ಯಕ್ರಮ ನಿರ್ವಹಿಸಿದರು. ಜಿ.ಎಂ.ಶರೀಫ್ ಹೂಡೆ ವಂದಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com