ಮೃಗಶಿರ ಚಿತ್ರದ ಶೂಟಿಂಗ್: ಕುಂದಾಪುರದಲ್ಲಿ ನಟ ಪ್ರಜ್ವಲ್ ದೇವರಾಜ್

ಕುಂದಾಪುರ: ಈ ತನಕ 18ಕ್ಕೂ ಮಿಕ್ಕಿ ಚಿತ್ರಗಳಲ್ಲಿ ಅಭಿನಯಿಸಿದ್ದೇನೆ. ಈವರೆಗಿನ ವೃತ್ತಿ ಬದುಕಿನಲ್ಲಿ ಮೃಗಶಿರ ನನ್ನ ಪಾಲಿಗೆ ವಿಭಿನ್ನ ಚಿತ್ರ ಎಂದು ನಟ ಪ್ರಜ್ವಲ್ ದೇವರಾಜ್ ಹೇಳಿದ್ದಾರೆ. 
      ಕೋಟೇಶ್ವರದಲ್ಲಿ ಚಿತ್ರದ ಶೂಟಿಂಗ್‌ನಲ್ಲಿ ಇತ್ತೀಚೆಗೆ ಪಾಲ್ಗೊಂಡ ಸಂದರ್ಭ ಅವರು ತಮ್ಮ ವೃತ್ತಿ ಬದುಕಿನ ಕುರಿತು ಅನಿಸಿಕೆ ಹಂಚಿಕೊಂಡರು. 
       ಏಕ ತೆರನಾದ ಪಾತ್ರ ನಿರ್ವಹಣೆ ಮಾಡಿಕೊಂಡಿರುವ ನನಗೆ 'ಮೆರವಣಿಗೆ' ಟ್ವಿಸ್ಟ್ ನೀಡಿತ್ತು. ತದನಂತರ 'ಮುರಳಿ ಮೀಟ್ಸ್ ಮೀರಾ' ಹೊಸ ಅನುಭವ ನೀಡಿತು. ಇದೀಗ ಮೃಗಶಿರ ವಿಭಿನ್ನವಾಗಿ ಮೂಡಿಬರಲಿದೆ. ಇದೊಂದು ವಿಭಿನ್ನ ಶೈಲಿಯ ಚಿತ್ರ. ಕಾಡಿನ ನಡುವೆ ನಡೆಯುವ ಕಥಾ ಹಂದರ. ರೌದ್ರತೆಯಲ್ಲಿಯೂ ಮಾಂದ್ರತೆ ಹೊಂದಿರುವ ಚಿತ್ರ. ಪ್ರಯೋಗಶೀಲತೆಗೆ ತೆರೆದುಕೊಳ್ಳುತ್ತಿರುವ ಕನ್ನಡ ಚಿತ್ರಗಳ ಪೈಕಿ ಇದು ಕಮರ್ಷಿಯಲ್ ಟಚಪ್ ಹೊಂದಿರುವ ದೊಡ್ಡ ಬಜೆಟ್‌ನ ಅಪರೂಪದ ಚಿತ್ರವಾಗುವುದು ನಿಶ್ಚಿತ ಎಂದರು. 
    ಕುಂದಾಪುರಕ್ಕೆ ತಂದೆಯೊಂದಿಗೆ ಚಿಕ್ಕಂದಿನಿಂದಲೂ ಬರುತ್ತಿದ್ದ್ದೆ. ಆದರೆ ನಟನಾಗಿ ಇದೇ ಮೊದಲ ಬಾರಿಗೆ ಕುಂದಾಪುರಕ್ಕೆ ಆಗಮಿಸಿದ್ದೇನೆ. ತೊಂಬಟ್ಟು ಹಳ್ಳಿಯ ಲೋಕೇಶನ್ ಪೆಂಟಾಸ್ಟಿಕ್ ಆಗಿದೆ. ಬೆಂಗಳೂರು ಸುತ್ತಮುತ್ತಲ ಪ್ರದೇಶಗಳಿಗೆ ಮೀಸಲಾಗಿದ್ದ ಚಿತ್ರೀಕರಣ ಚಿಂತನೆ ಈಗ ರಾಜ್ಯದ ಇತರ ವಲಯಗಳಿಗೂ ತೆರೆದುಕೊಳ್ಳುತ್ತಿದೆ. ಇದೊಂದು ಉತ್ತಮ ಬೆಳವಣಿಗೆ. ತೊಂಬಟ್ಟುವಿನಂತಹ ಪ್ರದೇಶ ಬಹಳ ಅಪರೂಪ ಎಂದರು. 

ವರ್ಗೀಕರಣದಲ್ಲಿ ವಿಶ್ವಾಸವಿಲ್ಲ: ಬಾಕ್ಸ್‌ಫೀಸ್ ಹೀರೊ ಅಥವಾ ಅದನ್ನು ಹೊರತುಪಡಿಸಿದ ಹೀರೋಗಳು ಎಂಬ ವರ್ಗೀಕರಣದಲ್ಲಿ ನನಗೆ ವಿಶ್ವಾಸವಿಲ್ಲ. ಏನಿದ್ದರೂ ಉತ್ತಮ ಕಲಾವಿದ, ಉತ್ತಮ ಚಿತ್ರ ನೀಡಬೇಕೆಂಬುದೇ ನನ್ನ ಆಶಯ. ನಾನು ಬಹುತೇಕ ಹೊಸ ನಿರ್ದೇಶಕರ ಕೈ ಕೆಳಗೆ ಕೆಲಸ ಮಾಡಿದವನು. ಬಹಳಷ್ಟು ಕ್ರಿಯಾಶೀಲತೆ ಅವರಲ್ಲಿದೆ. 
     ಕನ್ನಡ ಚಿತ್ರಗಳು ಲವ್, ಸೆಂಟಿಮೆಂಟ್, ಆ್ಯಕ್ಷನ್ ಸೂತ್ರಕ್ಕೆ ಜೋತು ಬಿದ್ದಿವೆ ಎಂಬ ಮಾತಿದೆ. ಸೀಮಿತ ಮಾರುಕಟ್ಟೆಯೊಳಗೆ ಇದು ಅನಿವಾರ್ಯ ಆಗಿ ಬಿಟ್ಟಿದೆ. ಉತ್ತಮ ಚಿತ್ರಕಥೆಗಳು ವಿರಳ ಆಗುತ್ತಿದೆ. ಇದು ಯಾಕೆ ಅನ್ನುವುದು ನನಗೂ ಗೊತ್ತಾಗುತ್ತಿಲ್ಲ. ಉತ್ತಮ ಕಥೆ ಹುಟ್ಟಿದರೆ ಚಿತ್ರಗಳನ್ನು ಜನ ಖಂಡಿತವಾಗಿಯೂ ಪ್ರೀತಿಸುತ್ತಾರೆ. ಇತ್ತೀಚೆಗೆ ಕನ್ನಡದಲ್ಲಿಯೂ ಈ ಬೆಳವಣಿಗೆ ಹುಟ್ಟುತ್ತಿದೆ ಎಂದು ಅವರು ತಿಳಿಸಿದರು. 
- ಜಾನ್ ಡಿಸೋಜ, ವಿಕ
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com