ರಾ.ಹೆ. ಅಸಮರ್ಪಕ ದುರಸ್ತಿ: ಶಿರೂರಿನಲ್ಲಿ ಸಾರ್ವಜನಿಕರ ಪ್ರತಿಭಟನೆ

ಶಿರೂರು: ಶಿರೂರಿನಿಂದ ಕುಂದಾಪುರದವರೆಗೆ ಗುರುವಾರದಿಂದ ಪ್ರಾರಂಭಗೊಂಡ ರಾ.ಹೆ. ದುರಸ್ತಿ ಕಾಮಗಾರಿ ಸಮರ್ಪಕವಾಗಿಲ್ಲ ಎಂದು ಆಗ್ರಹಿಸಿ ಶಿರೂರಿನಲ್ಲಿ ಸಾರ್ವಜನಿಕರು ದುರಸ್ತಿ ಕಾಮಗಾರಿ ನಡೆಸದಂತೆ ತಡೆದು ಪ್ರತಿಭಟನೆ ನಡೆಸಿದರು. 

ಕಳೆದು ಹಲವು ತಿಂಗಳಿನಿಂದ ಕುಂದಾಪುರದಿಂದ ಶಿರೂರಿನ ತನಕ ರಾಷ್ಟ್ರೀಯ ಹೆದ್ದಾರಿ ಸಂಪೂರ್ಣ ಹದಗೆಟ್ಟಿದ್ದು ಇದರಿಂದಾಗಿ ವಾಹನ ಸಂಚರಿಸುವುದೇ ಅಸಾಧ್ಯವಾಗಿದೆ. ಅಲ್ಲದೇ ಇದರ ಧೂಳಿನಿಂದ ಇಲ್ಲಿನ ಜನರ ಆರೋಗ್ಯ ಹದಗೆಟ್ಟಿದ್ದು ಹಲವಾರು ಜನರು ಅನಾರೋಗ್ಯದಿಂದ ಬಳಲುತ್ತಿದ್ದಾರೆ. ಕಳೆದ ತಿಂಗಳು ಕೊಡೇರಿ ಬಂದರಿಗೆ ಭೇಟಿ ನೀಡಿದ ಜಿಲ್ಲಾ ಉಸ್ತುವಾರಿ ಸಚಿವರು ನ.15ರೊಳಗೆ ರಾ.ಹೆ. ದುರಸ್ತಿ ಕಾರ್ಯ ಮಾಡಲಾಗುವುದು ಎಂದು ಭರವಸೆ ನೀಡಿದರು. ಆದರೆ ದುರಸ್ತಿ ಕಾರ್ಯ ವಿಳಂಬವಾದ ಕಾರಣ ಇಲ್ಲಿನ ನಾಗರಿಕರು ಸಭೆ ಸೇರಿ ನ. 21ರೊಳಗೆ ದುರಸ್ತಿಗೊಳಿಸುವಂತೆ ಗಡುವು ನೀಡಿ, ಇಲ್ಲದಿದ್ದರೆ ಬೃಹತ್ ಪ್ರತಿಭಟನೆ ನಡೆಸುವ ಎಚ್ಚರಿಕೆ ನೀಡಿದರು. ಈ ಹಿನ್ನೆಲೆಯಲ್ಲಿ ಇಲಾಖೆ ಗುರುವಾರ ದುರಸ್ತಿ ಕಾರ್ಯಕ್ಕೆ ಚಾಲನೆ ನೀಡಿತ್ತು. 

ಕಳೆಪೆ ಕಾಮಗಾರಿ: ಶಿರೂರು ಸಂಕದಗುಂಡಿ ಬಳಿ ಪ್ರಾರಂಭಗೊಂಡ ಹೆದ್ದಾರಿ ದುರಸ್ತಿ ಕಾರ್ಯ ಸಂಪೂರ್ಣ ಕಳಪೆ ಮಟ್ಟದಾಗಿದ್ದು ಕೇವಲ ಜಲ್ಲಿ ಮತ್ತು ಕ್ರಶರ್ ಪುಡಿಗಳನ್ನು ಹಾಕಿ ಗುಂಡಿ ಮುಚ್ಚುವ ಕಾರ್ಯ ನಡೆದಿತ್ತು. ಇದರಿಂದಾಗಿ ಹೆದ್ದಾರಿ ಸಂಚಾರ ಇನ್ನಷ್ಟು ಬಿಗಡಾಯಿಸಿದ ಹಿನ್ನೆಲೆಯಲ್ಲಿ ಎಚ್ಚೆತ್ತುಗೊಂಡ ಸಾರ್ವಜನಿಕರು ಕಾಮಗಾರಿ ನಡೆಸದಂತೆ ತಡೆದು, ಶಿರೂರಿನಿಂದ ಬೆಂದೂರಿನ ವರೆಗೆ ರಸ್ತೆಗೆ ಸಂಪೂರ್ಣವಾಗಿ ಮರುಡಾಂಬರೀಕರಣ ಮಾಡಬೇಕೆಂದು ಪಟ್ಟು ಹಿಡಿದು ಶುಕ್ರವಾರ ಪ್ರತಿಭಟನೆ ನಡೆಸಿದರು. 

ಅಂಗಡಿ ಬಂದ್: ರಾ.ಹೆ. ಧೂಳಿನಿಂದ ಕಂಗೆಟ್ಟ ಇಲ್ಲಿನ ಜನತೆ ಸಂಪೂರ್ಣ ಅಂಗಡಿ ಮುಂಗಟ್ಟುಗಳನ್ನು ಮುಚ್ಚಿ ಪ್ರತಿಭಟನೆಗೆ ಬೆಂಬಲ ಸೂಚಿಸಿದರು. ಬೆಳಗ್ಗೆನಿಂದಲೇ ಶಿರೂರು ಪರಿಸರದ ಎಲ್ಲಾ ಅಂಗಡಿಗಳನ್ನು ಮುಚ್ಚಿ, ಹೆದ್ದಾರಿ ಮರು ಡಾಮರೀಕರಣ ಮಾಡುವ ಬಗ್ಗೆ ಸ್ಪಷ್ಟನೆ ದೊರೆಯುವವರೆಗೆ ಅಂಗಡಿಗಳನ್ನು ತೆರೆಯುವುದಿಲ್ಲ ಎಂದು ಪಟ್ಟು ಹಿಡಿದರು. 

ರಾ.ಹೆ. ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಭೇಟಿ : ಶಿರೂರಿನ ಪ್ರತಿಭಟನಾ ಸ್ಥಳಕ್ಕೆ ರಾ.ಹೆ. ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಕೃಷ್ಣ ರಾವ್ ಭೇಟಿ ನೀಡಿ, ಪ್ರತಿಭಟನಾಕಾರರನ್ನು ಮನವೊಲಿಸುವ ಪ್ರಯತ್ನ ಮಾಡಿದರು. 

ಪ್ರತಿಭಟನಾಕಾರರೊಂದಿಗೆ ಮಾತನಾಡಿದ ಅವರು ಈಗಾಗಲೇ ಕುಂದಾಪುರ -ಗೋವಾ ಚತುಷ್ಪತ ಕಾಮಗಾರಿ ಟೆಂಡರ್ ಆಗಿದೆ. ಶಿರೂರಿನಿಂದ ಕುಂದಾಪುರದ ತನಕ ರಾಷ್ಟ್ರೀಯ ಹೆದ್ದಾರಿ ಸಂಪೂರ್ಣ ಡಾಮರೀಕರಣ ನಡೆಸಲು ಇಲಾಖೆ ಬಳಿ ಅನುದಾನದ ಕೊರತೆಯ ಹಿನ್ನೆಲೆಯಲ್ಲಿ, ಗುಂಡಿ ಮುಚ್ಚಲು ಕೇವಲ 84 ಲಕ್ಷ ಅನುದಾನ ಮಾತ್ರ ದೊರೆತಿದೆ. ಆ ಅನುದಾನದಲ್ಲಿ ತೇಪೆ ಹಾಕುವ ಕಾರ್ಯ ನಡೆಸಿ, ಬಳಿಕ ಅದನ್ನು ಪ್ರಾಕಾರದ ವ್ಯಾಪ್ತಿಗೆ ಹಸ್ತಾಂತರಿಸಲಾಗುವುದು ಎಂದರು. 

ಅವರ ಹೇಳಿಕೆಯಿಂದ ಆಕ್ರೋಶಗೊಂಡ ಸಾರ್ವಜನಿಕರು ಎಂಜಿನಿಯರ್‌ನ್ನು ತರಾಟೆಗೆ ತೆಗೆದುಕೊಂಡರು. ಕೇವಲ ತೇಪೆ ಹಾಕುವ ಕಾರ್ಯ ನಡೆಸುವುದಾದರೆ ಕಾಮಗಾರಿ ನಡೆಸಲು ಬಿಡುವುದಿಲ್ಲ, ಸಂಪೂರ್ಣ ಮರುಡಾಮರೀಕರಣ ನಡೆಸುವಂತೆ ಎಂದು ಪಟ್ಟು ಹಿಡಿದರು. ಬಳಿಕ ಮೇಲಧಿಕಾರಿಗಳನ್ನು ದೂರವಾಣಿಯ ಮೂಲಕ ಸಂಪರ್ಕಿಸಿದ ಸಹಾಯಕ ಎಂಜಿನಿಯರ್ ಭಾನುವಾರದಿಂದ ಶಿರೂರಿನಿಂದ ಬೈಂದೂರಿನ ತನಕ ಹೆದ್ದಾರಿಯಲ್ಲಿ ಗುಂಡಿ ಬಿದ್ದ ಭಾಗದಲ್ಲಿ ಮರುಡಾಮರೀಕರಣ ಮಾಡಲಾಗುವುದು ಆಶ್ವಾಸನೆ ನೀಡಿದರು. ಬಳಿಕ ಪ್ರತಿಭಟನಾಕಾರರು ಭಾನುವಾರದವರೆಗೆ ಗಡುವು ನೀಡಿದ್ದು ಅಲ್ಲಿಯ ತನಕ ಪ್ರತಿಭಟನೆ ಹಿಂತೆಗೆದುಕೊಂಡರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com