ಸರಕಾರದಿಂದ ಸಕ್ಕಟ್ಟು ಜನ್ಮಶತಾಬ್ದಿ ಆಚರಣೆಯಾಗಲಿ: ಪ್ರೊ.ಎಸ್.ವಿ. ಉದಯಕುಮಾರ ಶೆಟ್ಟಿ

ಕುಂದಾಪುರ: ಯಕ್ಷಗಾನದ ಮೂಲ ಪರಂಪರೆಯನ್ನು ವಿಶ್ವದ ಮೂಲೆ ಮೂಲೆಗೆ ತಲುಪಿಸಿದ ಪರಂಪರೆಯ ಹಿರಿಯ ಕೊಂಡಿ ದಿ. ಸಕ್ಕಟ್ಟು ಲಕ್ಷ್ಮೀನಾರಾಯಣಯ್ಯ ಅವರ ಜನ್ಮಶತಾಬ್ದಿ ಕಾರ್ಯಕ್ರಮವನ್ನು ಸರಕಾರ ಆಚರಿಸಬೇಕು. ಪರಂಪರೆಯ ಹಿರಿಯ ಕೊಂಡಿಗಳನ್ನು ಕಡೆಗಣಿಸುವ ಕೆಲಸ ಹೆಚ್ಚುತ್ತಿದೆ ಎಂದು ಯಕ್ಷಗಾನ ವಿಮರ್ಶಕ ಪ್ರೊ. ಎಸ್.ವಿ. ಉದಯಕುಮಾರ ಶೆಟ್ಟಿ ಹೇಳಿದರು. 
    ಸೌಕೂರು ಶ್ರೀದುರ್ಗಾಪರಮೇಶ್ವರಿ ದೇವಳದ ಸಭಾಂಗಣದಲ್ಲಿ ಬಣ್ಣದ ಸಕ್ಕಟ್ಟು ಲಕ್ಷ್ಮೀನಾರಾಯಣಯ್ಯ ಪ್ರತಿಷ್ಠಾನ ಭಾನುವಾರ ಹಮ್ಮಿಕೊಂಡ ಬಣ್ಣದ ಸಕ್ಕಟ್ಟು ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದರು. 
    ಬಣ್ಣದ ವೇಷಗಾರಿಕೆಗೆ ಹೊಸ ಭಾಷ್ಯ ಬರೆದವರಲ್ಲಿ ಸಕ್ಕಟ್ಟು ಒಬ್ಬರು. ಅವರ ಘಟೋತ್ಕಚ ಪಾತ್ರ ಬೇರೊಬ್ಬರಿಂದ ನಿರೀಕ್ಷಿಸಲು ಸಾಧ್ಯವಿಲ್ಲ. ಡಾ. ಶಿವರಾಮ ಕಾರಂತರ ಯಕ್ಷಗಾನ ಬ್ಯಾಲೆ ಮೂಲಕ ವಿಶ್ವದ ಮೂಲೆ ಮೂಲೆ ಸುತ್ತಾಡಿದ ಮಹಾನ್ ಕಲಾವಿದರ ಸ್ಮರಣೆ ಸೌಕೂರಿನಂತಹ ಪುಟ್ಟ ಗ್ರಾಮದಲ್ಲಿ ನಡೆಯುತ್ತಿರುವುದು ಶ್ಲಾಘನೀಯ ಎಂದರು. 
     ಈ ಸಂದರ್ಭ ಪರಂಪರೆಯ ಹಿರಿಯ ಯಕ್ಷಗಾನ ಬಣ್ಣದ ವೇಷಧಾರಿ ಪೇತ್ರಿ ಮಾಧವ ನಾಯ್ಕ ಅವರಿಗೆ 4ನೇ ವರ್ಷದ ಬಣ್ಣದ ಸಕ್ಕಟ್ಟು ಲಕ್ಷ್ಮೀನಾರಾಯಣಯ್ಯ ಪ್ರಶಸ್ತಿ ಪ್ರದಾನ ಮಾಡಲಾಯಿತು. 
   ಹಿರಿಯ ಯಕ್ಷಗಾನ ಪ್ರಸಂಗಕರ್ತ ಕಂದಾವರ ರಘುರಾಮ ಶೆಟ್ಟಿ ಅಭಿನಂದನಾ ನುಡಿಗಳನ್ನಾಡಿ, ಶೀಘ್ರದಲ್ಲಿಯೇ ಬಣ್ಣದ ಸಕ್ಕಟ್ಟು ಲಕ್ಷ್ಮೀನಾರಾಯಣಯ್ಯ ಕುರಿತಾದ ಪುಸ್ತಕ ಹೊರತರಲಾಗು ವುದು ಎಂದರು. 
  ಕೊಲ್ಲೂರು ಮೂಕಾಂಬಿಕಾ ಸ್ವತಂತ್ರ ಪದವಿ ಪೂರ್ವ ಕಾಲೇಜಿನ ಪ್ರಿನ್ಸಿಪಾಲ್ ಅರುಣ್ ಪ್ರಕಾಶ್ ಶೆಟ್ಟಿ, ಯಕ್ಷಗಾನ ಕಲಾಭಿಮಾನಿ, ನಿವೃತ್ತ ಶಿಕ್ಷಕ ಸದಾನಂದ ಪಾಟೀಲ್ ಶುಭ ಹಾರೈಸಿದರು. ಪ್ರಶಸ್ತಿ ಸ್ವೀಕರಿಸಿದ ಪೇತ್ರಿ ಮಾಧವ ನಾಯ್ಕ ಮಾತನಾಡಿ, ಸಕ್ಕಟ್ಟು ನನ್ನ ಗುರುಗಳು. ಅವರೊಬ್ಬ ದೈತ್ಯ ಪ್ರತಿಭೆ. ಆದರೆ ಯಾವತ್ತೂ ಗರ್ವದಿಂದ ಬೀಗಿದವರಲ್ಲ. ಅವರ ಹೆಸರಿನಲ್ಲಿ ಸ್ವೀಕರಿಸುತ್ತಿರುವ ಪ್ರಶಸ್ತಿ ಪೂರ್ವಜನ್ಮದ ಸುಕೃತ ಫಲ ಎಂದು ಬಣ್ಣಿಸಿದರು. 
    ವಿದ್ಯುತ್ ಗುತ್ತಿಗೆದಾರ ಕೆ.ಆರ್. ನಾಯ್ಕ ಅಧ್ಯಕ್ಷತೆ ವಹಿಸಿದ್ದರು. ಈ ಸಂದರ್ಭ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಪ್ರತಿಷ್ಠಾನದ ವತಿಯಿಂದ ವಿದ್ಯಾರ್ಥಿ ವೇತನ ವಿತರಿಸಲಾಯಿತು. ಸೌಕೂರು ದೇವಳದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಅಶೋಕಕುಮಾರ ಶೆಟ್ಟಿ, ಹಂಗಾರಕಟ್ಟೆ ಯಕ್ಷಗಾನ ಕಲಾ ಕೇಂದ್ರದ ಪ್ರಮುಖ ಐರೋಡಿ ವೈಕುಂಠ ಹೆಬ್ಬಾರ್, ಸಕ್ಕಟ್ಟು ಮನೆತನದ ಹಿರಿಯರಾದ ಸಕ್ಕಟ್ಟು ಶ್ರೀನಿವಾಸಯ್ಯ, ಸಕ್ಕಟ್ಟು ಮಂಜುನಾಥಯ್ಯ, ಸೌಕೂರು ದೇವಳದ ವ್ಯವಸ್ಥಾಪನಾ ಸಮಿತಿ ಸದಸ್ಯ ಬಾಲಕೃಷ್ಣ ಶೆಟ್ಟಿ, ಹಿರಿಯ ಯಕ್ಷಗಾನ ಕಲಾವಿದರಾದ ಜಾಂಬೂರು ಶ್ಯಾನುಭೋಗ್, ಜಗನ್ನಾಥ ಶೆಟ್ಟಿ ಉಪಸ್ಥಿತರಿದ್ದರು. 

ಸಕ್ಕಟ್ಟು ರಾಜಶೇಖರ ಸ್ವಾಗತಿಸಿದರು. ರಾಮಕಷ್ಣ ಪಾಠಾಳಿ ಸನ್ಮಾನಪತ್ರ ವಾಚಿಸಿದರು. ಸುಪ್ರೀತಾ ಕಾರ್ಯಕ್ರಮ ನಿರ್ವಹಿಸಿದರು. ಬಳಿಕ ಸುಳ್ಯ ಯಕ್ಷಶ್ರೀ ಕಲಾ ವೇದಿಕೆ ವತಿಯಿಂದ ಕಂಸವಧೆ ಮತ್ತು ನರಕಾಸುರ ಮೋಕ್ಷ ಯಕ್ಷಗಾನ ಪ್ರದರ್ಶನ ಜರುಗಿತು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com