ಬಾರ್ಕೂರು ಚರ್ಚ್ ಶತಮಾನೋತ್ತರ ಸುವರ್ಣ ಮಹೋತ್ಸವ ಬಲಿಪೂಜೆ

ಬಾರ್ಕೂರು : ಕ್ರೈಸ್ತ ವಿಶ್ವಾಸಿಗಳಲ್ಲಿ ಸೇವಾ ಮನೋಭಾವದ ಕನಸು ಹೆಚ್ಚಿಸಬೇಕು ಎಂದು ಬಳ್ಳಾರಿ ಧರ್ಮ ಪ್ರಾಂತ್ಯದ ಧರ್ಮಾಧ್ಯಕ್ಷ ವಂ. ಡಾ. ಹೆನ್ರಿ ಡಿಸೋಜ ಕರೆ ನೀಡಿದರು. ಅವರು ಸೋಮವಾರ ಬಾರ್ಕೂರು ಸಂತ ಪೀಟರ್ ಚರ್ಚ್‌ನ ಶತಮಾನೋತ್ತರ ಸುವರ್ಣ ಮಹೋತ್ಸವದ ಬಲಿಪೂಜೆ ಸಂದೇಶ ನೀಡಿದರು. 

ಕ್ರೈಸ್ತ ಸಮುದಾಯದ ಸೇವೆಯನ್ನು ಎಲ್ಲ ಸಮುದಾಯದವರು ಕೊಂಡಾಡುತ್ತಿದ್ದಾರೆ. ಪವಿತ್ರ ಧರ್ಮ ಸಭೆಯ ವಿಶ್ವಾಸಿಗಳಾದ ನಾವು ಒಗ್ಟಟ್ಟಿನ ಮಂತ್ರದೊಂದಿಗೆ ಮುಂದಿರುವ ಹುದ್ದೆ, ಸ್ಥಾನಮಾನಗಳ ಗೋಡೆಗಳನ್ನು ತೊಡೆದು ಸಮಾಜದಲ್ಲಿ ಸೇವೆಯ ಮುಖಾಂತರ ಪರಿವರ್ತನೆ ತರಲು ಪ್ರಯತ್ನಿಸಬೇಕು. 

ಭಗವಂತನಿಗೆ ವಿಧೇಯರಾಗಿ ದೇವರು ಕರುಣಿಸಿದ ವರಗಳಿಗೆ ಧನ್ಯತಾ ಭಾವನೆಯೊಂದಿಗೆ ನಾವು ಪ್ರತಿನಿತ್ಯ ಭಗವಂತನನ್ನು ಹುಡುಕುವ ವ್ಯಕ್ತಿಗಳಾಗಿ ಸ್ವಾರ್ಥ ಮನೋಭಾವವನ್ನು ತೊಡೆದು ಹಾಕಬೇಕು. ಮನಸ್ಸಿನಲ್ಲಿ ಕನಸು, ಕಣ್ಣುಗಳಲ್ಲಿ ದಯೆ, ಮುಖದಲ್ಲಿ ಸದಾ ಕಳೆ, ಮಾತಿನಲ್ಲಿ ಸತ್ಯ, ಹೃದಯದಲ್ಲಿ ಪ್ರೀತಿಯನ್ನು ಹೊಂದಿದಾಗ ಜೀವನ ಸಾರ್ಥಕ್ಯ ಸಾಧ್ಯ ಎಂದರು. 

ಬಲಿಪೂಜೆಯ ಅಧ್ಯಕ್ಷತೆಯನ್ನು ಉಡುಪಿಕ್ರೈಸ್ತ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಅತಿ ವಂ. ಡಾ. ಜೆರಾಲ್ಡ್ ಐಸಾಕ್ ಲೋಬೊ ವಹಿಸಿದ್ದರು. ಪವಿತ್ರ ಬಲಿಪೂಜೆಯ ಬಳಿಕ ಶತಮಾನೋತ್ತರ ಸುವರ್ಣ ಮಹೋತ್ಸವದ ನೆನಪಿಗಾಗಿ ನಿರ್ಮಿಸಲಾಗುವ ಧರ್ಮಗುರುಗಳ ನೂತನ ನಿವಾಸಕ್ಕೆ ಧರ್ಮಾಧ್ಯಕ್ಷರು ಶಿಲಾನ್ಯಾಸ ನೆರವೇರಿಸಿದರು. 

ಉಡುಪಿ ಧರ್ಮಪ್ರಾಂತ್ಯದ ವಿಕಾರ್ ಜನರಲ್ ವಂ. ಡಾ. ಬ್ಯಾಪ್ಟಿಸ್ಟ್ ಮಿನೇಜಸ್, ಧರ್ಮಪ್ರಾಂತ್ಯದ ಕುಲಪತಿ ಹಾಗೂ ಬಾರ್ಕೂರು ಚರ್ಚ್‌ನ ಧರ್ಮಗುರು ವಂ. ವಲೇರಿಯನ್ ಮೆಂಡೊನ್ಸಾ, ಧರ್ಮಪ್ರಾಂತ್ಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ವಂ. ಡೆನಿಸ್ ಡೇಸಾ, ಕಲ್ಯಾಣಪುರ ವಲಯ ಪ್ರಧಾನ ಧರ್ಮಗುರು ವಂ. ಸ್ಟ್ಯಾನಿ ಬಿ. ಲೋಬೊ, ಕುಂದಾಪುರ ಹಾಗೂ ಉಡುಪಿ ವಲಯಗಳ ಪ್ರಧಾನ ಧರ್ಮಗುರುಗಳಾದ ವಂ. ಅನಿಲ್ ಡಿಸೋಜ, ವಂ. ಫ್ರೆಡ್ ಮಸ್ಕರೇನಸ್, ಚರ್ಚ್ ಪಾಲನಾ ಮಂಡಳಿ ಉಪಾಧ್ಯಕ್ಷ ಎವ್ಜಿನ್ ಕ್ವಾಡ್ರಸ್, ಕಾರ್ಯದರ್ಶಿ ಐರಿನ್ ಪಾಯ್ಸ, ಜೆರಾಲ್ಡ್ ಗೊನ್ಸಾಲ್ವಿಸ್, ನೊರಿನ್ ಲೋಬೊ, ಡಾಲಿ ಡಿಲೀಮಾ, ಹೆರಾಲ್ಡ್ ಡಿಸೋಜ ಉಪಸ್ಥಿತರಿದ್ದರು.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com