ಇನಿದನಿ ಸಂಗೀತ ಸಂಜೆಗೆ ತಲೆದೂಗಿದ ಕೇಳುಗ

ಕುಂದಾಪುರ: ಹರಿನಾಮವೇ ಚೆಂದ...ಅದನಂಬಿಕೊ ಕಂದ ಎನ್ನುವ ಹಾಡು ಮೊಳಗುತ್ತಿರುವಂತೆ ಶ್ರೋತೃ ವರ್ಗ ಭಕ್ತಿಭಾವದಲ್ಲಿ ತೇಲಿತು. ಮಧುಮಾಸ ಸಂಭ್ರಮ ಎಂಬ ಹಾಡು ಕೇಳುತ್ತಿರುವಂತೆ ಭಾವಲೋಕದಲ್ಲಿ ತೇಲಿತು...ಇದು ಭಾನುವಾರ ಸಂಜೆ ಕುಂದಾಪುರದ ಜೂನಿಯರ್ ಕಾಲೇಜು ಮೈದಾನದಲ್ಲಿ ಕಂಡುಬಂದ ನೋಟ. 

ಇಲ್ಲಿನ ಕಲಾಕ್ಷೇತ್ರ ಸಂಸ್ಥೆ 70-80 ದಶಕದ ಸುಮಧುರ ಕನ್ನಡ ಗೀತೆಗಳ ಗಾಯನಕ್ಕಾಗಿ ಪ್ರತಿ ವರ್ಷ ಆಯೋಜಿಸಿಕೊಂಡು ಬಂದಿರುವ ಇನಿದನಿ ಸಂಗೀತ ಸಂಜೆಗೆ ಈ ಬಾರಿ ನಾಲ್ಕರ ಸಂಭ್ರಮ. ಕಲಾಕ್ಷೇತ್ರದ ಕಲಾ ಹೃದಯಿ ಪ್ರಕಾಶ ಯಡಿಯಾಳರ ಸ್ಮರಣಾರ್ಥ ನಡೆದ ಈ ಕಾರ್ಯಕ್ರಮ ಸಂಗೀತ ಪ್ರೇಕ್ಷಕರನ್ನು ರಂಜಿಸಿತು. 

ಇಂದಿನ ಕನ್ನಡ ಸಿನಿಮಾಗಳ ಹಾಡು ಕೇಳಿ ಸುಸ್ತು ಹೊಡೆದಿದ್ದ ಸಂಗೀತ ಪ್ರೇಕ್ಷಕರು ಹಳೆಯ ಮಧುರ ಗೀತೆಗಳನ್ನು ಆಲಿಸುತ್ತಾ ಸಂಭ್ರಮಿಸಿದರು. ಎಳೆಯ ಮಕ್ಕಳಿಂದ ಹಿಡಿದು ವಯೋವೃದ್ಧರು ಪಾಲ್ಗೊಂಡಿದ್ದರು. ಮೂರು ಸಾವಿರಕ್ಕೂ ಅಧಿಕ ಮಂದಿ ನೆರೆದ ಈ ಸಂಗೀತ ಸಂಜೆ ಕಾರ್ಯಕ್ರಮದಲ್ಲಿ ಖ್ಯಾತ ಗಾಯಕರ ಮನಮೋಹಕ ಕಂಠಸಿರಿಯಿಂದ ಹೊರಹೊಮ್ಮಿದ ಹಾಡು ಆಲಿಸಿ ಸಂತೋಷದಿಂದ ತೇಲಿದರು. 

ಅಂಧ ಗಾಯಕ ಶಿವಮೊಗ್ಗ ವೇಣುಗೋಪಾಲ್, ಖ್ಯಾತ ಗಾಯಕ ರಮೇಶ್ಚಂದ್ರ, ಖ್ಯಾತ ಗಾಯಕಿ ಕೆ.ಎಸ್. ಸುರೇಖಾ, ಸಂಗೀತಾ ಬಾಲಚಂದ್ರ, ನಯನಾ ರಾಜಗೋಪಾಲ್, ಅಶೋಕ ಸಾರಂಗ, ರವೀಂದ್ರ ಸಂಗೀತ ಸಂಜೆ ನಡೆಸಿಕೊಟ್ಟರು. ಎಂದಿಗೂ ಅಚ್ಚಳಿಯದ ಭಾವ ಲಹರಿಯನ್ನು ಸಂಗೀತ ಪ್ರೇಮಿಗಳ ಹೃದಯಲ್ಲಿ ಮುದ್ರಿಸಿದರು. 

ರಮೇಶ್ಚಂದ್ರ ಧ್ವನಿಯಲ್ಲಿ ಹೊರಹೊಮ್ಮಿದ ಯಾರೇ ನೀನು ಚೆಲುವೆ ಹಾಡಿಗೆ ಶೋತೃವರ್ಗ ತಲೆದೂಗಿದರೆ, ಸಂಗೀತಾ ಬಾಲಚಂದ್ರ ಹಾಡಿದ ಹೂವು ಚೆಲುವೆಲ್ಲಾ ತಂದೆಂದಿತು ಎಂಬ ಹಾಡು ಇಡಿ ಸಂಗೀತ ಸಂಜೆ ಕಾರ್ಯಕ್ರಮದ ಮುಕುಟಿಮಣಿ ಎಂಬಂತೆ ಭಾಸವಾಯಿತು. 

ಹಿನ್ನೆಲೆಯಲ್ಲಿ ಯುವ ತಬಲಾ ವಾದಕ ರಾಜೇಶ್ ಭಾಗವತ್ ಅವರ ನುಡಿಸುವಿಕೆಯಂತೂ ಅದ್ಭುತ. ಗಿಟಾರ್‌ನಲ್ಲಿ ರಾಜ್‌ಗೋಪಾಲ್, ಟೋನಿ, ಕೀಬೋರ್ಡ್‌ನಲ್ಲಿ ದೀಪಕ್ ಶಿವಮೊಗ್ಗ, ಶ್ರೀಜಿ, ಡ್ರಮ್‌ನಲ್ಲಿ ಕ್ಲಾಯ್ಡಾ, ಕಾಂಗೊದಲ್ಲಿ ಸುರೇಶ್ ಶೆಟ್ಟಿ, ತಬಲಾದಲ್ಲಿ ಭಾಸ್ಕರ ಕುಂಬ್ಳೆ, ಕೊಳಲಿನಲ್ಲಿ ಜಯ ಸಹಕರಿಸಿದರು. ಆಧುನಿಕ ತಂತ್ರಜ್ಞಾನ ರಹಿತ ಸಂಗೀತೋಪಕರಣಗಳನ್ನು ನಾಲ್ಕು ದಶಕದ ಹಿಂದಿನ ಹಾಡಿಗೆ ಅದೇ ದಾಟಿಯಲ್ಲಿ ಶ್ರುತಿ ನೀಡಿದ ಈ ಕಲಾವಿದರು ಬೆರಗು ಮೂಡಿಸಿದರು. ಕಲಾಕ್ಷೇತ್ರ ಸಂಸ್ಥೆಯ ಬಿ. ಕಿಶೋರ್ ಕುಮಾರ್ ಮತ್ತು ಗೆಳೆಯರು ಕಾರ್ಯಕ್ರಮ ಆಯೋಜಿಸಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com