ಯುವಶಕ್ತಿಯ ಸದ್ಬಳಕೆ ದೇಶದ ಆಸ್ತಿ: ಪತ್ರಕರ್ತ ಲಕ್ಷ್ಮಣ್ ಹೂಗಾರ್

ಕುಂದಾಪುರ: ಯುವಶಕ್ತಿ ವಜ್ರ, ಬಂಗಾರದಂತೆ. ಇದು ಒಡೆಯುವುದಿಲ್ಲ, ಕೆಡುವುದೂ ಇಲ್ಲ. ಯುವಶಕ್ತಿಯ ಸದ್ಬಳಕೆ ದೇಶದ ಆಸ್ತಿ. ಪ್ರಸ್ತುತ ಯುವಶಕ್ತಿಯನ್ನು ದಮನಿಸುವ ಶಕ್ತಿಗಳು ಹೆಚ್ಚಾಗುತ್ತಿವೆ. ಈ ಬಗ್ಗೆ ಎಚ್ಚರದ ಹೆಜ್ಜೆ ಇಡಬೇಕಾದುದು ಯುವಶಕ್ತಿಯ ಆದ್ಯ ಕರ್ತವ್ಯ ಎಂದು ಪತ್ರಕರ್ತ ಲಕ್ಷ್ಮಣ್ ಹೂಗಾರ್ ಹೇಳಿದರು. 
  ಇಲ್ಲಿನ ವ್ಯಾಸರಾಜ ಕಲಾ ಮಂದಿರದಲ್ಲಿ ಭಾರತ ವಿದ್ಯಾರ್ಥಿ ಫೆಡರೇಶನ್ ಕುಂದಾಪುರ ತಾಲೂಕು ಸಮಿತಿ ಹಮ್ಮಿಕೊಂಡ ಅಂತರ್ ಕಾಲೇಜು ಸಾಂಸ್ಕೃತಿಕ ಸ್ಪರ್ಧೆ ಬೆರಗು-2013 ಉದ್ಘಾಟಿಸಿ ಮಾತನಾಡಿದರು. 
     ದೇಶಕ್ಕೆ ಬಲಿಷ್ಠ ಸಾಂಸ್ಕೃತಿಕ ಹಿನ್ನೆಲೆ ಇದೆ. ನಮ್ಮತನ ಬಿಡದೆ ಉಳಿಸಿ ಬೆಳೆಸಬೇಕಾದುದು ನಮ್ಮ ಗುರಿಯಾಗಿರಬೇಕು. ಇಂತಹ ಕಾರ್ಯಕ್ರಮಗಳನ್ನು ಎಲ್ಲ ರೀತಿಯ ಸಂಘಟನೆಗಳು ಎಲ್ಲೆಡೆಯೂ ನಡೆಸಬೇಕು. ಸಮಾಜದಲ್ಲಿ ಜಾತೀಯತೆ ತೊಲಗಿಸಿ ಭಾವೈಕ್ಯತೆ ಮೂಡಿಸುವಲ್ಲಿ ಎಸ್‌ಎಫ್‌ಐ ನಿರಂತರ ಶ್ರಮಿಸುತ್ತಿದೆ. ಜಾತಿ ಜಾತಿಗಳ ನಡುವೆ ವಿಷ ಬೀಜ ಬಿತ್ತುವ ಬದಲು ಸಂತಸದಾಯಕ, ನೆಮ್ಮದಿಯ ಬೀಜ ಬಿತ್ತುವುದು ಇಂದಿನ ಅಗತ್ಯತೆಯಾಗಿದೆ ಎಂದು ಪ್ರತಿಪಾದಿಸಿದರು. 
       ಯುವ ಮನಸ್ಸುಗಳು ಶ್ರೀಮಂತಿಕೆಯನ್ನು ದೂಷಿಸಿ ಬಡತನ ಅಪ್ಪಿಕೊಳ್ಳಬೇಕು. ತನ್ಮೂಲಕ ಸಮಾಜದ ಐಕ್ಯತೆಗೆ ಶ್ರಮಿಸಬೇಕು. ಸರ್ವಾಧಿಕಾರಿ ಧೋರಣೆಗಳ ವಿರುದ್ಧ ಬಂಡೇಳುವ ಛಾತಿ ವಿದ್ಯಾರ್ಥಿ ಜೀವನದಲ್ಲಿಯೇ ಅಳವಡಿಸಿಕೊಳ್ಳಬೇಕು ಎಂದು ಅವರು ಕಿವಿಮಾತು ಹೇಳಿದರು. 
   ಬೆರಗು-2013 ಸಿದ್ಧತಾ ಸಮಿತಿ ಗೌರವಾಧ್ಯಕ್ಷ ಬಿ.ಎಂ. ನಾಸಿರ್ ಅಧ್ಯಕ್ಷತೆ ವಹಿಸಿದ್ದರು. ಎಸ್‌ಎಫ್‌ಐ ಕರ್ನಾಟಕ ರಾಜ್ಯ ಸಮಿತಿ ಅಧ್ಯಕ್ಷ ಅನಂತ ನಾಯಕ್, ಡಿವೈಎಫ್‌ಐ ಕುಂದಾಪುರ ತಾಲೂಕು ಸಮಿತಿ ಮುಖಂಡ ರಾಜೇಶ್ ವಡೇರಹೋಬಳಿ, ಡಿವೈಎಫ್‌ಐ ಹಿರಿಯ ಮುಖಂಡ ಸುರೇಶ್ ಕಲ್ಲಾಗರ, ಎಸ್‌ಎಫ್‌ಐ ರಾಜ್ಯ ಸಮಿತಿ ಉಪಾಧ್ಯಕ್ಷ ಜಗದೀಶ್ ಸೂರ್ಯ, ಎಸ್‌ಎಫ್‌ಐ ಕುಂದಾಪುರ ಸಮಿತಿ ಅಧ್ಯಕ್ಷ ಗಣೇಶ್ ದಾಸ್ ಉಪಸ್ಥಿತರಿದ್ದರು. 
    ಕಾರ್ಯದರ್ಶಿ ಶ್ರೀಕಾಂತ್ ಹೆಮ್ಮಾಡಿ ಸ್ವಾಗತಿಸಿದರು. ಆಫ್ರೀನಾ ಕಾರ್ಯಕ್ರಮ ನಿರ್ವಹಿಸಿದರು. ಹರ್ಷ ವಂದಿಸಿದರು. ಬಳಿಕ ವೈವಿಧ್ಯಮಯ ಸಾಂಸ್ಕೃತಿಕ ಸ್ಪರ್ಧೆ ನಡೆದವು.



ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com