ಶಬ್ದ ಮಾಲಿನ್ಯದಲ್ಲಿ ಉಡುಪಿ ಜಿಲ್ಲೆ ರಾಜ್ಯದಲ್ಲಿ ಪ್ರಥಮ: ಡಾ.ಎನ್.ಎ.ಮಧ್ಯಸ್ಥ

ಉಡುಪಿ: ಶಬ್ದ ಮಾಲಿನ್ಯದಲ್ಲಿ ಉಡುಪಿ ಜಿಲ್ಲೆ ರಾಜ್ಯದಲ್ಲಿಯೇ ಮೊದಲ ಸ್ಥಾನದಲ್ಲಿದೆ. ವಾಹನಗಳ ಹಾರ್ನ್ ಸೇರಿದಂತೆ 10 ವಿಧದ ಶಬ್ದ ಮಾಲಿನ್ಯಗಳು ನಡೆಯುತ್ತವೆ. ಶಬ್ದ ಮಾಲಿನ್ಯದ ಜತೆಗೆ ದೃಶ್ಯ ಮಾಲಿನ್ಯ ನಡೆಯುತ್ತಿದೆ. ನೋಡುಗನ ವ್ಯಕ್ತಿತ್ವದ ಮೇಲೆಯೇ ಪ್ರಭಾವ ಬೀರುವ ದೃಶ್ಯ ಒಂದು ತರಹದ ಮಾಲಿನ್ಯವಾದರೆ, ಕಣ್ಣಿನ ರೆಟಿನಾ ಮೇಲೆ ಪರಿಣಾಮ ಬೀರುವ ಮಾಲಿನ್ಯ ಇನ್ನೊಂದು. ಇದರಲ್ಲಿ ಮೊದಲ ಮಾಲಿನ್ಯ ಜಾಸ್ತಿ ಇದೆ. ರಸ್ತೆ ಬದಿಯಲ್ಲಿ ನಾನಾ ತರಹದ ಹೋಲ್ಡಿಂಗ್, ಚಿತ್ರಗಳಿವು ಎಂದು ರಾಜ್ಯ ಅರಣ್ಯ ಜೀವ ಸಂಕುಲ ಸಂಸ್ಥೆ ಸದಸ್ಯ ಡಾ.ಎನ್.ಎ.ಮಧ್ಯಸ್ಥ ಹೇಳಿದರು. 

ಜಿಲ್ಲಾಡಳಿತ ವತಿಯಿಂದ ರಜತಾದ್ರಿಯಲ್ಲಿ ನಡೆಯುತ್ತಿರುವ ಉಡುಪಿ 36 ಡಿಗ್ರಿ ಕಾರ್ಯಕ್ರಮದಲ್ಲಿ ಶನಿವಾರ ಪರಿಸರ ಕಾರ್ಯಾಗಾರದ ಸಮನ್ವಯಕಾರರಾಗಿ ಅವರು ಮಾತನಾಡಿದರು. 

ಮನುಷ್ಯ ಇಲ್ಲದೆ ಪರಿಸರ ಉಳಿಯಬಲ್ಲದು. ಆದರೆ ಪರಿಸರ ಇಲ್ಲದೆ ಮನುಷ್ಯ ಬದುಕಲಾರ. ಸಮುದ್ರಕ್ಕೆ ಕಲ್ಲು ಹಾಕುವುದು ಕೂಡ ಮಾಲಿನ್ಯವೇ. ಆಮೆಗಳು ಮೊಟ್ಟೆ ಇಡಲು ಇದು ಅಡ್ಡಿ. ದೂರದ ಊರಿಂದ ಬರುವ ಹಕ್ಕಿಗಳು ಬರುವುದನ್ನು ನಿಲ್ಲಿಸುವ ಸಾಧ್ಯತೆ ಇರುತ್ತವೆ. ಕೀಟನಾಶಕ, ಇಂಧನ ವ್ಯಯ, ಮರ ನಾಶ ಎಲ್ಲವೂ ಉಡುಪಿ ಜಿಲ್ಲೆಯಲ್ಲಿ ಹೆಚ್ಚು ಎಂದರು. 

ಕರಾವಳಿ ಸಮಸ್ಯೆಗಳ ಬಗ್ಗೆ ಕರ್ನಾಟಕ ವಿವಿಯ ಸಮುದ್ರ ಜೀವಶಾಸ್ತ್ರ ವಿಭಾಗದ ವಿ.ಎನ್.ನಾಯಕ್ ಮಾತನಾಡಿ, ಮೀನುಗಾರಿಕೆಯಲ್ಲಿ ಸುವ್ಯವಸ್ಥೆ ಬದಲು ಸಮಸ್ಯೆಗಳೇ ಜಾಸ್ತಿಯಾಗಿವೆ. ಯಾಂತ್ರಿಕ ಬೋಟ್‌ಗಳು ಬಂದ ಬಳಿಕ ಸಾಂಪ್ರದಾಯಿಕ ಮೀನುಗಾರಿಕೆ ಕಡಿಮೆಯಾಗಿದೆ. ಮೀನು ಹುಡುಕಿಕೊಂಡು ಆಳಕ್ಕೆ ಹೋಗತೊಡಗಿದ್ದೇವೆ. ಮತ್ಸ್ಯ ಸಂಪತ್ತು ಕುಸಿಯತೊಡಗಿದೆ. ಅದರ ಜತೆಗೆ ಪ್ಲಾಸ್ಟಿಕ್ ಸಮುದ್ರ ಸೇರಿ ಮೀನಿಗೆ ಹಾನಿ ಮಾಡುತ್ತಿವೆ. ಮರಳ ದಿಬ್ಬ, ಕಡಲ ತೀರ ನೆಲಸಮ ಮಾಡಿ ಕಟ್ಟಡ ಕಟ್ಟಿದರೆ ಪ್ರವಾಸೋದ್ಯಮವಾಗದು. ಸ್ಥಳೀಯರಿಗೆ, ಸ್ಥಳೀಯ ಪರಿಸರಕ್ಕೆ, ಸ್ಥಳೀಯ ಜೀವ ವೈವಿಧ್ಯಗಳಿಗೆ ಹಾನಿ ಮಾಡುವ ಯಾವುದೇ ಉದ್ಯಮ ಅಭಿವೃದ್ಧಿ ಸಂಕೇತವಲ್ಲ ಎಂದರು. 

ಕಾಂಡ್ಲಾ ಕಾಡು ಬಗ್ಗೆ ಕಾರವಾರದ ಸಸ್ಯಶಾಸ್ತ್ರ ಅಧ್ಯಾಪಕ ಜಯಕರ ಭಂಡಾರಿ ಮಾತನಾಡಿ, 1999ರ ಚಂಡಮಾರುತ ಮತ್ತು 2004ರ ಸುನಾಮಿ ಬಳಿಕ ಕಾಂಡ್ಲಾಗಳ ಮಹತ್ವ ಬಗ್ಗೆ ಅಧ್ಯಯನಗಳಾದವು. ಈ ಎರಡು ಪ್ರಕೃತಿ ವಿಕೋಪ ನಡೆದಾಗ ಕಾಂಡ್ಲಗಳಿದ್ದ ಪ್ರದೇಶದಲ್ಲಿ ಅತಿ ಕಡಿಮೆ ಹಾನಿಯಾದರೆ, ಕಾಂಡ್ಲಗಳಿಲ್ಲದ ಕಡೆ ಅಪಾರ ಜೀವ, ಆಸ್ತಿ ಹಾನಿಯಾಯಿತು. ಕಾಂಡ್ಲಾದಿಂದ ಸಮುದ್ರ ಕೊರೆತ ಕಡಿಮೆಯಾಗುತ್ತದೆ, ಮಣ್ಣು ರಕ್ಷಣೆ, ಆಮೆ, ಏಡಿ, ಸಿಗಡಿಗಳಿಗೆ ವಂಶಾಭಿವೃದ್ಧಿಗೆ ಸಹಕಾರ, ಪ್ರಾಣಿ ಪಕ್ಷಿಗಳಿಗೆ ಮಾತ್ರವಲ್ಲ, ಮೀನುಗಳಿಗೆ ಕೂಡ ಆಹಾರ ಒದಗಿಸುತ್ತದೆ. ಇಂಗಾಲ ಹೀರಿಕೊಳ್ಳುತ್ತದೆ ಎಂದು ವಿವರಿಸಿದರು. 

ಪಶ್ಚಿಮ ಘಟ್ಟ ಘೋಷಣೆ ಮತ್ತು ಅರಣ್ಯ ಭೂದೃಶ್ಯ ಬಗ್ಗೆ ಶಿವಾನಂದ ಕಳವೆ ಮಾತನಾಡಿ, ಅರಣ್ಯ ಬೆಳೆಸುವ ಕ್ರಿಯೆ ಅರಣ್ಯದಿಂದಲೇ ಕಲಿಯಬೇಕು. ಗಾಳಿ, ಅಕೇಶಿಯಾ, ಸಾಗುವಾನಿಯ ನೆಡುತೋಪು ನಿರ್ಮಿಸುವುದು ಅರಣ್ಯ ಬೆಳೆಸಿದಂತಾಗುವುದಿಲ್ಲ. ವೈವಿಧ್ಯಮಯವಾಗಿ ಎಲ್ಲ ಜಾತಿಯ ಮರ ಬೆಳೆಸಬೇಕು. ಇದು ಅರಣ್ಯಕ್ಕೆ ಮಾತ್ರವಲ್ಲ, ಕೃಷಿಗೆ ಕೂಡ ಅನ್ವಯ. ಕೇವಲ ರಬ್ಬರ್, ಕೇವಲ ಅಡಕೆ ಸರಿಯಲ್ಲ, ಅಲ್ಲೂ ನಾನಾ ಬೆಳೆ ಬೆಳೆಯಲು ಸಾಧ್ಯವಾಗಬೇಕು. ಕೃಷಿಕರಿಗೆ ಮರ ಬೆಳೆಸಲು ಪ್ರೋತ್ಸಾಹ ನೀಡಬೇಕು ಮತ್ತು ಆ ಮರಗಳನ್ನು ಉಪಯೋಗಿಸಿಕೊಳ್ಳುವ ಹಕ್ಕು ಕೂಡ ನೀಡಬೇಕು ಎಂದು ಹೇಳಿದರು. 

ಕುದುರೆಮುಖ ರಾಷ್ಟ್ರೀಯ ಅರಣ್ಯದೊಳಗಿನ ನಿವಾಸಿಗಳ ಬಗ್ಗೆ ರಾಜಗೋಪಾಲ ಶೆಟ್ಟಿ ಮಾತನಾಡಿ, ಸಂತ್ರಸ್ತರಿಗೆ ಎಲ್ಲದಕ್ಕೂ ಒಂದೇ ಪರಿಹಾರವಲ್ಲ. ಪ್ರತಿ ಕುಟುಂಬದ ಸಮಸ್ಯೆ ಬೇರೆ ಬೇರೆ. ಪ್ರತಿ ಕುಟುಂಬದ ಸಮಸ್ಯೆ ಆಲಿಸಿ ಪರಿಹಾರ ನೀಡಬೇಕು. ಪುನರ್ವಸತಿ ಕಲ್ಪಿಸಬೇಕು. ಅವರ ಆಸ್ತಿ ಎಷ್ಟಿದೆ ಎಂಬ ದೃಷ್ಟಿಕೋನದಿಂದ ಪರಿಹಾರ ಒದಗಿಸುವ ಬದಲು ಮಾನವೀಯ ದೃಷ್ಟಿಕೋನದ ಮೂಲಕ ಪ್ರತಿಯೊಬ್ಬರಿಗೂ ಪರಿಹಾರ ನೀಡುವಂತಾಗಬೇಕು ಎಂದರು. ಮಂಜುನಾಥಯ್ಯ ನಿರೂಪಿಸಿದರು. 

ಡೀಮ್ಡ್ ಫಾರೆಸ್ಟ್ 
ಅರಣ್ಯದಲ್ಲಿ ನೋಟಿಫೈಡ್ ಡೀಮ್ಡ್ ಎಂದು ಎರಡು ವಿಧಗಳಿವೆ. ಅಭಯಾರಣ್ಯ, ರಕ್ಷಿತಾರಣ್ಯ ನೋಟಿಫೈಡ್ ಆದರೆ, ಕೃಷಿ ಭೂಮಿ ಜತೆಜತೆಗೆ ಇರುವ ಇತರ ಕಾಡು ಡೀಮ್ಡ್ ಫಾರೆಸ್ಟ್‌ಗೆ ಬರುತ್ತವೆ. ಕುಮ್ಕಿ, ಕಾನ, ಬಾನೆ, ಪೈಸಾರಿ, ಕಾಫಿ ಸಾಗುಮಲೈ, ನಾಗಬನ, ಬೆಟ್ಟ, ಪಂಚಾಯಿತಿ ಕಾಡು ಕೂಡ ಇದರ ಅಡಿಗೆ ಬರುತ್ತವೆ ಎಂದು ಕೆಸಿಡಿಸಿ ಜನರಲ್ ಮ್ಯಾನೇಜರ್ ಮಂಜುನಾಥ ಶೆಟ್ಟಿ ಹೇಳಿದರು.
ಪರಿಗಣಿತ ಅರಣ್ಯ ಮತ್ತು ಕುಮ್ಕಿ ಬಗ್ಗೆ ಅವರು ಮಾತನಾಡಿದರು. ಜಿಲ್ಲೆಯಲ್ಲಿ 99,349 ಹೆಕ್ಟೇರ್ ನೋಟಿಫೈಡ್ ಅರಣ್ಯ, 7386 ಹೆಕ್ಟೇರ್ ಗೇರುಬೀಜದ ಗುಡ್ಡೆ, ಇದೆ. 25,847 ಹೆಕ್ಟೆರ್ ಕುಮ್ಕಿ ಇದೆ. ಕೃಷಿ ಭೂಮಿಗೆ ಹೊಂದಿಕೊಂಡ 100 ಮೀ. ಜಾಗ ಮಾತ್ರ ಕುಮ್ಕಿ, ಉಳಿದವು ಕುಮ್ಕಿಯಲ್ಲ. ಕುಮ್ಮಿ ಅಂದರೆ ಕುಮ್ಮಕ್ಕು ಎಂದು ಅರ್ಥ. ಕೃಷಿಗೆ ಕುಮ್ಮಕ್ಕು ಅಂದರೆ ಪ್ರಯೋಜನ ನೀಡಲು ಇದು ಇದೆ ಎಂದು ಹೇಳಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com