ನಂಬಿಕೆಗಳ ಮೇಲೆ ಪ್ರಹಾರ ಬೇಡ: ತೊಗಾಡಿಯಾ

ಉಡುಪಿ: ರಾಜ್ಯದಲ್ಲಿ ಮೂಢನಂಬಿಕೆ ವಿರೋಧಿ ಕಾನೂನನ್ನು ಜಾರಿಗೆ ತರುವ ಪ್ರಯತ್ನಗಳು ನಡೆಯುತ್ತಿವೆ. ಭಾರತದಲ್ಲಿ ಜನರು ನಂಬಿಕೆಯ ಮೇಲೆಯೇ ಬದುಕುತ್ತಿದ್ದಾರೆ. ಹೀಗಿರುವಾಗ ಮೂಢನಂಬಿಕೆ ಎಂಬ ಅಸ್ತ್ರವನ್ನು ಪ್ರಯೋಗಿಸುವುದು ಸರಿಯಲ್ಲ ಎಂದು ವಿಹಿಂಪ ಮುಖಂಡ ಪ್ರವೀಣ್ ಬಾಯ್ ತೊಗಾಡಿಯಾ ಹೇಳಿದರು. ಅವರು ಬುಧವಾರ ಜಿಲ್ಲಾ ವಿಶ್ವಹಿಂದೂ ಪರಿಷತ್ ಪುರಭವನದಲ್ಲಿ ಆಯೋಜಿಸಿದ್ದ 'ಧರ್ಮ ರಕ್ಷಾ ನಿಧಿ' ಕಾರ್ಯಕ್ರಮದಲ್ಲಿ ಮಾತನಾಡಿದರು. 

ದೇಶದಲ್ಲಿ ಹಿಂದೂಗಳ ಅಭಿವೃದ್ಧಿ ಹಾಗೂ ರಕ್ಷಣೆಗೆ ಕೇಂದ್ರ ಸರಕಾರ ವಿಫಲವಾಗಿದೆ. ಹಿಂದೂ ವಿರೋಧಿ ನೀತಿ ಅನುಸರಿಸುತ್ತಿದೆ. ಹಿಂದೂಗಳ ಆತ್ಮಗೌರವದ ರಕ್ಷಣೆಗಾಗಿ ವಿಶ್ವ ಹಿಂದೂ ಪರಿಷತ್ ಪಣ ತೊಟ್ಟಿದ್ದು, ದೇಶದಲ್ಲಿ ಹಿಂದೂ ರಾಜಕೀಯ ಬೆಳೆಯಬೇಕು ಎಂದರು. 

ಮುಂಬೈ ಉದ್ಯಮಿ ಪೊಲ್ಯ ಉಮೇಶ್ ಶೆಟ್ಟಿ ಅಧ್ಯಕ್ಷತೆ ವಹಿಸಿದ್ದರು. ವೇದಿಕೆಯಲ್ಲಿ ವಿಹಿಂಪ ಪ್ರಾಂತ್ಯ ಕಾರ್ಯಾಧ್ಯಕ್ಷ ಎಂ.ಬಿ. ಪುರಾಣಿಕ್, ಪ್ರಾಂತ್ಯ ಕಾರ್ಯದರ್ಶಿ ಟಿ.ಎ.ಪಿ. ಶೆಣೆ, ಕ್ಷೇತ್ರೀಯ ಸಂಘಟನಾ ಪ್ರಮುಖ್ ಗೋಪಾಲ ಉಪಸ್ಥಿತರಿದ್ದರು. ವಿಹಿಂಪ ಜಿಲ್ಲಾಧ್ಯಕ್ಷ ಬೈಕಾಡಿ ಸುಪ್ರಸಾದ್ ಶೆಟ್ಟಿ ಸ್ವಾಗತಿಸಿ ಉಪಾಧ್ಯಕ್ಷ ನಾರಾಯಣ ಮಾನ್ಯ ಕಾರ್ಯಕ್ರಮ ನಿರೂಪಿಸಿದರು. ಬಜರಂಗದಳ ಜಿಲ್ಲಾ ಸಂಚಾಲಕ ಸುನಿಲ್ ಕೆ.ಆರ್. ವಂದಿಸಿದರು. 

ಶ್ರೀಧ್ವಯರ ಜತೆ ಚರ್ಚೆ: ತೊಗಾಡಿಯಾ ಅವರು ಪೇಜಾವರ ಮಠಕ್ಕೆ ಭೇಟಿ ನೀಡಿ, ಶ್ರೀ ವಿಶ್ವೇಶ ತೀರ್ಥ ಶ್ರೀಪಾದರು ಮತ್ತು ಪೇಜಾವರ ಕಿರಿಯ ಶ್ರಿ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದರನ್ನು ಭೇಟಿ ಮಾಡಿ ಮಾತುಕತೆ ನಡೆಸಿದರು. 

ವಿಹಿಂಪಗೆ 50: ವಿಶ್ವ ಹಿಂದೂ ಪರಿಷತ್‌ಗೆ ಮುಂದಿನ ಕೃಷ್ಣಾಷ್ಟಮಿಗೆ 50 ವರ್ಷ ತುಂಬಲಿದೆ. ಮುಂಬಯಿ ಚಿನ್ಮಯನಗರ ಸಾಂದೀಪನಿ ಆಶ್ರಮದಲ್ಲಿ ಸುವರ್ಣ ಮಹೋತ್ಸವ ನಡೆಯಲಿದೆ ಎಂದು ತೊಗಾಡಿಯಾ ಪೇಜಾವರ ಶ್ರೀಗಳನ್ನು ಮಹೋತ್ಸವಕ್ಕೆ ಆಹ್ವಾನಿಸಿದರು. ಚಾತುರ್ಮಾಸ ವ್ರತದಲ್ಲಿ ಮುಂಬಯಿಯಲ್ಲೇ ಇರುವುದರಿಂದ ಬರುವುದಾಗಿ ಪೇಜಾವರ ಶ್ರೀ ಭರವಸೆ ನೀಡಿದರು. 

ವಿಹಿಂಪಕ್ಕೆ 50 ವರ್ಷ: ಮುಂದಿನ ಜನ್ಮಾಷ್ಟಮಿಗೆ 50ನೇ ವರ್ಷ ಆಚರಿಸಲಿರುವ ವಿಶ್ವ ಹಿಂದು ಪರಿಷತ್, ತನ್ನ ಚಟುವಟಿಕೆಯನ್ನು ದೇಶದ ಮೂರು ಲಕ್ಷ ಪ್ರದೇಶಗಳಿಗೆ ವಿಸ್ತರಿಸಲಿದೆ. ಪ್ರಸಕ್ತ 60 ಸಾವಿರಕ್ಕೂ ಹೆಚ್ಚು ಮಂದಿಗೆ ಶಿಕ್ಷಣ, ಆರೋಗ್ಯ, ಸ್ವಯಂ ಉದ್ಯೋಗ ನೆರವು, ಸುರಕ್ಷೆ ನೀಡುತ್ತಿದ್ದು, ಇದನ್ನು ಇಡೀ ದೇಶಕ್ಕೆ ವಿಸ್ತರಿಸಲಾಗುವುದು ಎಂದು ಅವರು ತಿಳಿಸಿದರು. ದೇಶದ ರಾಜಕೀಯ ಬಗ್ಗೆ ಪೇಜಾವರ ಶ್ರೀ ಮತ್ತು ತೊಗಾಡಿಯಾ ಚರ್ಚಿಸಿದರು. ಆಮ್ ಆದ್ಮಿ ಪಾರ್ಟಿ ದಿಲ್ಲಿಯಿಂದ ಹೊರಗೆ ಪ್ರಭಾವ ಬೀರಲಾರದು ಎಂದು ತೊಗಾಡಿಯ ಹೇಳಿದರು. 

ಬೆನ್‌ಹಿನ್ ಮೌಢ್ಯ ಬಿತ್ತಲು ಬರುತ್ತಿದ್ದಾರೆ. ಅದಕ್ಕೆ ಸರಕಾರ ಅವಕಾಶ ನೀಡದೆ ನಿರ್ಬಂಧ ಹೇರಬೇಕು. ರಾಜ್ಯ ಸರಕಾರ ಮೌಢ್ಯ ವಿರೋಧಿ ಕಾಯ್ದೆ ತರಲು ಹೊರಟಿದೆ. ಈಗ ಬೆನ್‌ಹಿನ್‌ಗೆ ಅನುಮತಿ ನೀಡುವುದರಲ್ಲಿ ಅರ್ಥವಿಲ್ಲ ಎಂದು ಜತೆಗಿದ್ದ ಪೇಜಾವರ ಮಠಾಧೀಶ ವಿಶ್ವೇಶತೀರ್ಥ ಶ್ರೀಪಾದರು ಹೇಳಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com