ಕುಂದಾಪುರ ರಸ್ತೆ ಅಗಲೀಕರಣಕ್ಕೆ 55 ಕೋಟಿ ರೂ. ಪ್ರಸ್ತಾವನೆ

ಕುಂದಾಪುರ: ಪುರಸಭೆ ವ್ಯಾಪ್ತಿಯ ಚರ್ಚ್ ರಸ್ತೆ, ಚಿಕ್ಕನ್‌ಸಾಲ್ ರಸ್ತೆ ಅಗಲೀಕರಣ, ರಿಂಗ್ ರೋಡ್ ಮತ್ತು ಮಳೆ ನೀರು ಹರಿಯುವ ತೋಡು ಅಭಿವೃದ್ಧಿ ಕಾರ್ಯಕ್ಕಾಗಿ ರಾಜ್ಯ ಸರಕಾರ ಸಮ್ಮತಿ ಸೂಚಿಸಿದ್ದು, ಕೇಂದ್ರಕ್ಕೆ 55 ಕೋಟಿ ರೂ. ಪ್ರಸ್ತಾವನೆ ಸಲ್ಲಿಸಿದೆ ಎಂದು ಪುರಸಭೆ ಎಂಜಿನಿಯರ್ ಸಾವಿತ್ರಿ ತಿಳಿಸಿದರು. ಕುಂದಾಪುರ ಪುರಸಭೆ ಸಾಮಾನ್ಯ ಸಭೆಯಲ್ಲಿ ಶನಿವಾರ ಮಾತನಾಡಿದರು. 

ಶಾಸ್ತ್ರೀ ವೃತ್ತದಲ್ಲಿ ಫ್ಲೈಓವರ್ ನಿರ್ಮಾಣ ಆಗಲಿರುವುದರಿಂದ ನಗರ ಪ್ರವೇಶಕ್ಕೆ ಚಿಕ್ಕನ್‌ಸಾಲ್ ರಸ್ತೆ ಪ್ರಮುಖ ಹಾದಿ. ಪ್ರಸ್ತಾವನೆಯಲ್ಲಿ 14 ಮೀ. ಅಗಲಕ್ಕೆ ತೀರ್ಮಾನ ತೆಗೆದುಕೊಳ್ಳಲಾಗಿದೆ. ಚರ್ಚ್ ರಸ್ತೆ ಅಗಲೀಕರಣದಿಂದ ಕೋಡಿ ಸಂಪರ್ಕ ಸುಗುಮ ಆಗಲಿದೆ ಎಂದು ಅವರು ವಿವರಿಸಿದರು. 

ಕೋಡಿ ರಸ್ತೆ ಪಿಡಬ್ಲ್ಯೂಡಿಗೆ: ಕೋಡಿ ಚಕ್ರಮ್ಮ ದೇವಸ್ಥಾನದಿಂದ ಅಚಲಾ ಸಭಾಭವನ ವರೆಗಿನ ರಸ್ತೆಯನ್ನು ಪಿಡಬ್ಲ್ಯೂಡಿಗೆ ಹಸ್ತಾಂತರಿಸುವಂತೆ ಮನವಿ ಬಂದಿರುವುದಾಗಿ ಪುರಸಭೆ ಅಧಿಕಾರಿಗಳು ಸಭೆಗೆ ತಿಳಿಸಿದರು. 

ಈ ವಿಷಯದಲ್ಲಿ ಸದಸ್ಯರ ನಡುವೆ ಗಂಭೀರ ಚರ್ಚೆ ನಡೆಯಿತು. ಹಿರಿಯ ಸದಸ್ಯೆ ಗುಣರತ್ನ ಮಾತನಾಡಿ, ಪಿಡಬ್ಲ್ಯೂಡಿ ಹಸ್ತಾಂತರಿಸುವುದರಿಂದ ಅಭಿವೃದ್ಧಿ ಆಗುತ್ತದೆ. ಆದರೆ ಅಲ್ಲಿನ ಮೀನುಗಾರರ ಬಗ್ಗೆ ಮೊದಲು ಆಲೋಚಿಸಬೇಕು. ಈಗಾಗಲೆ ಜನರು ರಸ್ತೆ ಪಕ್ಕದಲ್ಲಿಯೇ ನೆಲೆಸಿರುವುದರಿಂದ ರಸ್ತೆ ಅಗಲೀಕರಣದ ಸಂದರ್ಭ ತೊಂದರೆ ಎದುರಾಗಬಹುದು. ಸ್ಥಳೀಯ ಜನರ ಅಭಿಪ್ರಾಯ ಪಡೆದು ಪುರಸಭೆ ತೀರ್ಮಾನ ತೆಗೆದುಕೊಳ್ಳುವುದು ಸೂಕ್ತ ಎಂದು ಅಭಿಪ್ರಾಯಪಟ್ಟರು. 

ಸದಸ್ಯ ರಾಜೇಶ್ ಕಾವೇರಿ ಮತ್ತು ವಿಜಯ್ ಎಸ್. ಪೂಜಾರಿ ಮಾತನಾಡಿ, ಪಿಡಬ್ಲ್ಯೂಡಿಗೆ ಹಸ್ತಾಂತರಿಸುವುದು ಸ್ವಾಗತಾರ್ಹ. ಪಿಡಬ್ಲ್ಯೂಡಿಗೆ ಹಸ್ತಾಂತರಿಸುವುದರಿಂದ ರಸ್ತೆ ಅಗಲೀಕರಣ ಆಗುವುದಲ್ಲದೆ ಕೋಡಿ-ಕುಂದಾಪುರ ಸಂಪರ್ಕ ಸುಗಮ ಆಗುತ್ತದೆ ಎಂದರು. ಆದರೆ ಸದಸ್ಯ ಸಂದೀಪ್ ಕೋಡಿ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರು. ಅಭಿವೃದ್ಧಿಗೆ ಅಭ್ಯಂತರವಿಲ್ಲ. ಸ್ಥಳೀಯರ ಒಪ್ಪಿಗೆ ಪಡೆದು ಮುಂದಿನ ತೀರ್ಮಾನ ತೆಗೆದುಕೊಳ್ಳಿ ಎಂದು ಒತ್ತಾಯಿಸಿದರು. ಬಳಿಕ ಸಭಾಧ್ಯಕ್ಷರು ಮಾತನಾಡಿ, ಸ್ಥಳೀಯರೊಂದಿಗೆ ಚರ್ಚಿಸಿ ಮುಂದಿನ ಕ್ರಮ ತೆಗೆದುಕೊಳ್ಳುವುದಾಗಿ ಭರವಸೆ ನೀಡಿದರು. 

ಮುಂಬರುವ ಸಭೆಗೆ ಬಹಿಷ್ಕಾರ ಎಚ್ಚರಿಕೆ: ಕುಡಿಯುವ ನೀರಿನ ದರ ಏರಿಕೆಯಿಂದ ನಾಗರಿಕರು ತೀವ್ರ ತೊಂದರೆ ಅನುಭವಿಸುವಂತಾಗಿದೆ. ತಕ್ಷಣದಿಂದ ಈ ಹಿಂದೆ ತೆಗೆದುಕೊಂಡ ನಿರ್ಣಯದಂತೆ ದರ ಇಳಿಕೆ ಮಾಡಬೇಕು. ಇಲ್ಲವಾದಲ್ಲಿ ಮುಂದಿನ ಸಭೆ ಬಹಿಷ್ಕರಿಸುವುದಾಗಿ ಪುರಸಭೆ ಸದಸ್ಯರು ಎಚ್ಚರಿಕೆ ನೀಡಿದರು. 

ಹಿರಿಯ ಸದಸ್ಯ ಮೋಹನದಾಸ ಶೆಣೈ ಮಾತನಾಡಿ, ಅಂಗಡಿ ಪರವಾನಗಿ, ಮನೆ ತೆರಿಗೆ ಎಲ್ಲವೂ ಏರಿಕೆಯಾಗಿದೆ. ಈ ನಡುವೆ ಕುಡಿಯುವ ನೀರಿನ ದರ ಏರಿಕೆ ಆಗಿರುವುದರಿಂದ ನಾಗರಿಕರು ತೊಂದರೆಗೊಳಗಾಗಿದ್ದಾರೆ. ಡಿಸಿ ಆದೇಶ ಪಾಲಿಸುವುದಾಗಿ ಹೇಳುವ ಅಧಿಕಾರಿಗಳು ಸ್ಥಳೀಯಾಡಳಿತದ ಆಗ್ರಹದ ಬಗ್ಗೆಯೂ ಯೋಚಿಸಬೇಕು. ಸ್ಥಳೀಯಾಡಳಿತ ಜನ ಹಿತದೃಷ್ಟಿಯಿಂದ ಆಗ್ರಹ ಅಧಿಕಾರಿಗಳ ಮುಂದಿಡುತ್ತಿದೆ. ಇದು ಕೂಡ ಒಂದು ಸರಕಾರ ಎಂದು ತಿಳಿಸಿದರು. 

ಸದಸ್ಯೆ ಗುಣರತ್ನ ಆಕ್ರೋಶ ವ್ಯಕ್ತಪಡಿಸಿ, ನೀರಿನ ವಿಚಾರದಲ್ಲಿ ಜನರಿಂದ ಮಹಿಳಾ ಸದಸ್ಯರು ಹೆಚ್ಚು ಆರೋಪ ಕೇಳುವಂತಾಗುತ್ತಿದೆ. ನಮ್ಮ ಪ್ರತಿಕೃತಿ ದಹಿಸುವ ಮೊದಲು ಅಧಿಕಾರಿಗಳು ಕ್ರಮ ತೆಗೆದುಕೊಳ್ಳಿ. ಯಾವುದೇ ಕಾರಣಕ್ಕೂ ನೀರಿನ ದರ ಏರಿಕೆ ಸಲ್ಲ ಎಂದರು. 

ಸದಸ್ಯರಾದ ಸತೀಶ್ ಶೆಟ್ಟಿ, ರಾಜೇಶ್ ಕಾವೇರಿ, ಕೋಡಿ ಪ್ರಭಾಕರ್, ಶ್ರೀಧರ ಶೇರೆಗಾರ್, ಚಂದ್ರಶೇಖರ ಖಾರ್ವಿ, ವಿಜಯ ಪೂಜಾರಿ, ವಸಂತಿ ಸಾರಂಗ, ರವಿರಾಜ ಖಾರ್ವಿ, ಶಕುಂತಳಾ ಗುಲ್ವಾಡಿ ಧ್ವನಿಗೂಡಿಸಿದರು. ಪರವಾನಗಿ ಮತ್ತು ಕುಡಿಯುವ ನೀರಿನ ದರ ಏರಿಕೆಯ ಬಗ್ಗೆ ಸಭೆಯಲ್ಲಿ ಸುದೀರ್ಘ ಚರ್ಚೆ ನಡೆಯಿತು. ಸಭಾಧ್ಯಕ್ಷೆ ಯು.ಎಸ್.ಕಲಾವತಿ ಮಾತನಾಡಿ, ಶೀಘ್ರದಲ್ಲಿಯೇ ವಿಶೇಷ ಸಭೆ ಕರೆದು ದರ ಇಳಿಕೆ ಬಗ್ಗೆ ಕ್ರಮ ತೆಗೆದುಕೊಳ್ಳುವುದಾಗಿ ಭರವಸೆ ನೀಡಿದರು. 

ಸದಸ್ಯರ ಕಡೆಗಣನೆ: ತಾಲೂಕಿನಲ್ಲಿ ಇತರೆ ಇಲಾಖೆಗಳಿಂದ ನಡೆಯುತ್ತಿರುವ ಕಾರ್ಯಕ್ರಮಗಳಲ್ಲಿ ಪುರಸಭೆ ಸದಸ್ಯರನ್ನು ಕಡೆಗಣಿಸಲಾಗುತ್ತಿದೆ. ಸರಕಾರಿ ಕಾರ್ಯಕ್ರಮದ ಖರ್ಚು ವೆಚ್ಚಗಳಿಗೆ ಪುರಸಭೆ ಪಾಲು ಬೇಕೆನ್ನುವ ಇತರೆ ಇಲಾಖೆಗಳು ಪುರಸಭೆ ಸದಸ್ಯರಿಗೆ ಕನಿಷ್ಠ ಕಾರ್ಯಕ್ರಮದ ಆಹ್ವಾನ ನೀಡುತ್ತಿಲ್ಲ. ಇದು ಖಂಡನೀಯ. ಈ ಚಾಳಿ ಮುಂದುವರಿಯದಂತೆ ಪುರಸಭೆ ಅಧಿಕಾರಿಗಳು ಸೂಕ್ತ ಕ್ರಮ ತೆಗೆದುಕೊಳ್ಳಬೇಕು ಎಂದು ಸದಸ್ಯೆ ಗುಣರತ್ನ ಆಗ್ರಹಿಸಿದರು. 

ಪ್ರಾಧಿಕಾರ ಬೇಡ: ನಗರ ವ್ಯಾಪ್ತಿಯ 10 ಸೆಂಟ್ಸ್ ಜಾಗದಲ್ಲಿ ಮನೆ, ಕಟ್ಟಡ ನಿರ್ಮಾಣಕ್ಕೆ ಪ್ರಾಧಿಕಾರದ ಅನುಮತಿ ಬೇಕಾಗಿಲ್ಲ ಎಂಬುದು ವಿಜಯ ಕರ್ನಾಟಕದಲ್ಲಿ ವರದಿಯಾಗಿದೆ. ಈ ಬಗ್ಗೆ ಆದೇಶವೂ ಇದೆ. ಆದರೆ ಎಲ್ಲೆಡೆ ಪ್ರಾಧಿಕಾರದ ಹೆಸರಿನಲ್ಲಿ ತೊಂದರೆ ನೀಡುವುದು ನಡೆಯುತ್ತಿದೆ. ಪುರಸಭೆ ಮುಖ್ಯಾಧಿಕಾರಿಯ ಅನುಮತಿ ಸಾಕು ಎಂಬುದು ಸ್ಪಷ್ಟವಾಗಿದ್ದರೂ ಜನರಿಗೆ ಆಗುತ್ತಿರುವ ತೊಂದರೆ ಪರಿಹಾರ ಆಗುತ್ತಿಲ್ಲ ಎಂದು ಸದಸ್ಯ ಮೋಹನದಾಸ ಶೆಣೈ ಮತ್ತು ಚಂದ್ರಶೇಖರ ಖಾರ್ವಿ ಅಸಮಾಧಾನ ವ್ಯಕ್ತಪಡಿಸಿದರು. ಕುಂದಾಪುರಕ್ಕೆ ನಗರ ಪ್ರಾಧಿಕಾರದ ಅಗತ್ಯತೆಯಿಲ್ಲ. ಇದರಿಂದ ತೊಂದರೆಯೇ ಹೆಚ್ಚು ಎಂದು ಇತರೆ ಸದಸ್ಯರು ಅಭಿಪ್ರಾಯಪಟ್ಟರು. 

ಆಯವ್ಯಯ ಮಂಡನೆ: ಪುರಸಭೆ ಮುಖ್ಯಾಧಿಕಾರಿ ಸದಾನಂದ 2014-15ನೇ ಸಾಲಿನ ಪುರಸಭೆ ಬಜೆಟ್ ಮಂಡಿಸಿ ಒಟ್ಟು 6.75 ಕೋಟಿ ರೂ. ಅನುದಾನ ನಿರೀಕ್ಷಿಸಲಾಗಿದ್ದು 43 ಲಕ್ಷ ಉಳಿತಾಯ ಆಗಲಿದೆ ಎಂದು ತಿಳಿಸಿದರು. ಪುರಸಭೆ ಅಧ್ಯಕ್ಷೆ ಯು.ಎಸ್. ಕಲಾವತಿ ಅಧ್ಯಕ್ಷತೆ ವಹಿಸಿದ್ದರು. ಉಪಾಧ್ಯಕ್ಷ ನಾಗರಾಜ ಕಾಮಧೇನು, ಸ್ಥಾಯಿ ಸಮಿತಿ ಅಧ್ಯಕ್ಷ ಉದಯ ಮೆಂಡನ್ ಉಪಸ್ಥಿತರಿದ್ದರು.

ವರದಿ ಕೃಪೆ: ವಿಜಯ ಕರ್ನಾಟಕ
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com