ಬಜೆಟ್‌ನಲ್ಲಿ ಕಡೆಗಣನೆ: ಅಳ್ವೆಗದ್ದೆ ಮೀನುಗಾರರ ಅಸಮಾಧಾನ

ಕುಂದಾಪುರ ತಾಲೂಕಿನ ಗಡಿಭಾಗ ಶಿರೂರು ಗ್ರಾಮದ ಅಳ್ವೆಗದ್ದೆ ಬಂದರು ಅಭಿವೃದ್ಧಿಯನ್ನು ಸರಕಾರ ಕಡೆಗಣಿಸಿದೆ ಎಂಬ ಅಸಮಾಧಾನ ಈಗ ಭುಗಿಲೆದ್ದಿದೆ. ಗಂಗೊಳ್ಳಿ ಹೊರತುಪಡಿಸಿದರೆ 3 ದಶಕ ಹಿಂದೆ ಅಳ್ವೆಗದ್ದೆ ಬಂದರು ಪ್ರದೇಶ ಬಹಳಷ್ಟು ಮಹತ್ತಿಕೆ ಹೊಂದಿತ್ತು. ನೈಸರ್ಗಿಕ ಕಾರಣದಿಂದ ಬಂದರು ವರ್ಷ ವರ್ಷ ಅಸ್ತಿತ್ವ ಕಳೆದುಕೊಂಡಿತ್ತು. ಕಳೆದ 2 ದಶಕಗಳಿಂದ ಬಂದರು ಅಭಿವೃದ್ಧಿ, ಜೆಟ್ಟಿ ನಿರ್ಮಾಣ ಬೇಡಿಕೆ ಮುಂದಿಟ್ಟುಕೊಂಡು ಹೋರಾಟ ನಡೆಸುತ್ತಾ ಬಂದಿರುವ ಇಲ್ಲಿನ ಮೀನುಗಾರರಿಗೆ ಬಜೆಟ್‌ನಲ್ಲಿ ಅಳ್ವೆಗದ್ದೆ ಬಂದರು ಪ್ರದೇಶ ನಿರ್ಲಕ್ಷಿಸಿರುವುದು ಬೇಸರ ಮೂಡಿಸಿದೆ. 

ಹೂಳು, ಪ್ರತಿ ವರ್ಷ ಉಂಟಾಗುತ್ತಿರುವ ಕಡಲ್ಕೊರೆತದಿಂದಾಗಿ ಬಂದರು ಪ್ರದೇಶ ನೆಲಕಚ್ಚಿದೆ. ಕಡಲ್ಕೊರೆತದಿಂದಾಗಿ ತೀರದ ತಡೆಗೋಡೆ ಕಲ್ಲುಗಳು ತೇಲಿ ಹೋಗಿವೆ. ದೋಣಿ ನಿಲುಗಡೆ ಅಸಾಧ್ಯ ಎಂಬ ಪರಿಸ್ಥಿತಿ ಎದುರಾಗಿದೆ. ಅಳ್ವೆಗದ್ದೆ, ಕಳಿಹಿತ್ಲು, ಶಿರೂರು, ಹಡವಿನಕೋಣೆ ಭಾಗದ ಸರಿಸುಮಾರು 20 ಸಾವಿರಕ್ಕೂ ಅಧಿಕ ಮೀನುಗಾರರು ಇಲ್ಲಿ ಬದುಕಿಗಾಗಿ ಶ್ರಮಿಸುತ್ತಿದ್ದಾರೆ. 300ಕ್ಕೂ ಅಧಿಕ ನಾಡದೋಣಿಗಳು ಇಲ್ಲಿ ಕಾರ್ಯಾಚರಿಸುತ್ತಿವೆ. 

ಕಳೆದ ವರ್ಷದ ಕಡಲ ಆರ್ಭಟಕ್ಕೆ ಅಳ್ವೆಗದ್ದೆ ಬಂದರು ಪ್ರದೇಶ ಸಂಪೂರ್ಣ ನೆಲ ಕಚ್ಚಿತ್ತು. ಕಡಲು ದೊಡ್ಡ ಪ್ರಮಾಣದಲ್ಲಿ ಒಳನುಗ್ಗಿದ್ದರಿಂದ ಹಳೆಯ ಬಂದರು ಪ್ರದೇಶದ ಬಹುಭಾಗ ಕೊಚ್ಚಿ ಹೋಗಿತ್ತು. ಮೀನುಗಾರರ ಮನೆಗಳು ಅಪಾಯಕ್ಕೆ ತುತ್ತಾಗಿದ್ದವು. ತೆಂಗಿನಮರಗಳು ಕಡಲ ಪಾಲಾಗಿದ್ದವು. 

ಅಳ್ವೆಗದ್ದೆ ಬಂದರು 3 ದಶಕದ ಹಿಂದೆ ಸುರಕ್ಷಿತ ಬಂದರಾಗಿತ್ತು. ಇಲ್ಲಿ 5ಕ್ಕೂ ಮಿಕ್ಕಿ ಬೋಟ್ ನಿರ್ಮಾಣ ಕೇಂದ್ರಗಳು ಈಗಲೂ ಕಾರ್ಯಾಚರಿಸುತ್ತಿವೆ. ಪರ್ಸಿನ್, ಟ್ರಾಲ್ ಸೇರಿದಂತೆ ದೊಡ್ಡ ದೋಣಿಗಳು ಬಂದರು ಪ್ರವೇಶಿಸುತ್ತಿದ್ದವು. ಪ್ರಸ್ತುತ ದೊಡ್ಡ ದೋಣಿಗಳು ಅಳ್ವೆಗದ್ದೆ ಬಂದರು ಪ್ರವೇಶಿಸಲಾಗುತ್ತಿಲ್ಲ. ಅಳಿವೆಯಲ್ಲಿ ತುಂಬಿದ ಹೂಳಿನಿಂದಾಗಿ ಅಳ್ವೆಗದ್ದೆ ಬಂದರು ಮೂಲೆಗುಂಪಾಗುತ್ತಲೆ ಇದೆ. ನಾಡದೋಣಿಗಳು ಮಾತ್ರ ಲಂಗರು ಹೂಡುತ್ತಿವೆ. ಈಗ ದೋಣಿ ನಿಲ್ಲುವ ಸ್ಥಳದಲ್ಲಿ ವ್ಯಾಪಕ ಹೂಳು ತುಂಬಿರುವುದರಿಂದ ಸಾಂಪ್ರದಾಯಿಕ ಮೀನುಗಾರರು ಆಪತ್ತಿಗೆ ತುತ್ತಾಗಿದ್ದಾರೆ. 

ಭಟ್ಕಳ ಹಾಗೂ ಗಂಗೊಳ್ಳಿ ನಡುವಿನ ಅಸಂಖ್ಯ ಮೀನುಗಾರರ ಆಧಾರಸ್ತಂಭದಂತಿದ್ದ ಬಂದರು ಪ್ರದೇಶ ನಿರ್ಲಕ್ಷ್ಯಕ್ಕೀಡಾಗುತ್ತಿರುವುದನ್ನು ಸಹಿಸದ ಮೀನುಗಾರರು ಕಳೆದ 10 ವರ್ಷಗಳಿಂದ ಬಂದರು ಅಭಿವೃದ್ಧಿಗಾಗಿ ಹೋರಾಟ ನಡೆಸುತ್ತಲೇ ಇದ್ದಾರೆ. ಆದರೆ ಸರಕಾರದ ಸ್ಪಂದನ ಶೂನ್ಯವಾಗಿರುವುದು ಮೀನುಗಾರರ ಬೇಗುದಿಗೆ ಕಾರಣವಾಗಿದೆ. 

ಇಲ್ಲಿನ ಮೀನುಗಾರರ ಹೋರಾಟದ ಫಲವಾಗಿ ಶಾಸಕ ಕೆ. ಗೋಪಾಲ ಪೂಜಾರಿ ಅವರ ಪ್ರಯತ್ನದಿಂದಾಗಿ ಮೀನುಗಾರಿಕೆ ಇಲಾಖೆ, ಬಂದರು ಮತ್ತು ಒಳನಾಡು ಜಲಸಾರಿಗೆ ಇಲಾಖೆ ಸಹಯೋಗದೊಂದಿಗೆ ಗೈಡ್‌ವಾಲ್ ರಚನೆಗೆ ಚಾಲನೆ ನೀಡಲಾಗಿದೆ. 9 ಕೋಟಿ ರೂ. ವೆಚ್ಚದ ಗೈಡ್‌ವಾಲ್ ನಿರ್ಮಾಣ ಕಾರ್ಯ ಬಂದರು ಪ್ರದೇಶದಲ್ಲಿ ಭರದಿಂದ ಸಾಗುತ್ತಿದೆ. 

*ಈ ಬಾರಿಯ ಬಜೆಟ್‌ನಲ್ಲಿ ಕರಾವಳಿಯ ಎಲ್ಲ ಬಂದರಿಗೆ ಆದ್ಯತೆ ನೀಡಲಾಗಿದೆ. ಆದರೆ ಸಾಕಷ್ಟು ಇತಿಹಾಸ ಹೊಂದಿರುವ ಅಳ್ವೆಗದ್ದೆ ಬಂದರಿನ ಅಭಿವೃದ್ಧಿಗೆ ಯಾವುದೇ ಅನುದಾನ ನೀಡಲಾಗಿಲ್ಲ. ಸ್ಥಳೀಯ ಶಾಸಕರ ಪ್ರಯತ್ನದಿಂದಾಗಿ ಅಳ್ವೆಗದ್ದೆಯಲ್ಲಿ ಬ್ರೇಕ್‌ವಾಟರ್ ಮಾದರಿಯಲ್ಲಿ 9.80 ಕೋಟಿ ರೂ. ವೆಚ್ಚದಲ್ಲಿ ಗೈಡ್‌ವಾಲ್ ನಿರ್ಮಾಣ ಆಗುತ್ತಿದೆ. ಕೇವಲ ಗೈಡ್‌ವಾಲ್ ರಚನೆಯಿಂದ ಮೀನುಗಾರರಿಗೆ ಪ್ರಯೋಜನ ಆಗದು. ಪ್ರಮುಖ ಬೇಡಿಕೆಯಾಗಿರುವ ನಾಡಾದೋಣಿ ಹೊರಬಂದರು ರಚನೆ(ಔಟ್‌ಡೋರ್ ಬಂದರು), ಜೆಟ್ಟಿ ನಿರ್ಮಾಣ ಮತ್ತು ಡ್ರೆಜ್ಜಿಂಗ್‌ಗೆ ಸರಕಾರ ಗಮನಹರಿಸಬೇಕು. ತುರ್ತಾಗಿ ಪ್ರಮುಖ ಬೇಡಿಕೆ ಜೆಟ್ಟಿ ನಿರ್ಮಾಣಕ್ಕೆ ಸರಕಾರ ಆದ್ಯತೆ ನೀಡಬೇಕು. ಇದು ಕೈಗೂಡದಿದ್ದಲ್ಲಿ ಅಳ್ವೆಗದ್ದೆ ವ್ಯಾಪ್ತಿಯ ಸಾವಿರಾರು ಮೀನುಗಾರರು ಬದುಕು ಕಳೆದುಕೊಳ್ಳಲಿದ್ದಾರೆ. ಸರಕಾರ ಗಮನಹರಿಸಬೇಕು. -ನಾಗೇಶ್ ಅಳ್ವೆಗದ್ದೆ, ಸ್ಥಳೀಯ ಮೀನುಗಾರ ಮುಖಂಡ
ಕೃಪೆ: ಜಾನ್ ಡಿಸೋಜ, ವಿಕ
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com