ವಾರಾಹಿ ಔಷಧ ವನ ಮೂಲೆಗುಂಪು

 ಕುಂದಾಪುರ: ಪರಿಸರ ಸಂರಕ್ಷಣೆ, ಸಸ್ಯ ಬೆಳವಣಿಗೆ ಉದ್ದೇಶ ದಿಂದ ಆರಂಭಗೊಂಡಿದ್ದ ತಾಲೂಕಿನ ಶಂಕರ ನಾರಾಯಣ ಗ್ರಾಮದ ಸೌಡ(ವಾರಾಹಿ) ಹೊಳೆ ದಡದಲ್ಲಿರುವ ವಾರಾಹಿ ಔಷಧ ವನ ಮೂಲೆಗುಂಪಾಗಿದೆ. ಔಷಧ ಸಸ್ಯ ಬಿಡಿ, ಕೊನೆಪಕ್ಷ ಕೈಕಾಲುಗಳಿಗೆ ಭಂಗ ಉಂಟುಪಡಿಸುವ ಪೊದೆಗಿಡಗಳು ಅಲ್ಲಿ ಚಿಗುರಿಲ್ಲ. ವಾರಾಹಿ ಹೊಳೆ ದಂಡೆಗೆ ತಾಗಿಕೊಂಡು ಬ್ರಿಟಿಷ್ ಕಾಲದಿಂದಲೂ ಇದ್ದ ಅರಣ್ಯ ಇಲಾಖೆ ಡಿಪೊ ಜಾಗ ಉಳಿಸುವ ಸಲುವಾಗಿ ಇಲ್ಲೊಂದು ಔಷಧ ವನ ರಚಿಸುವ ಚಿಂತನೆ ಹೊರಹೊಮ್ಮಿತ್ತು. 2007ರಲ್ಲಿ ಇದಕ್ಕೊಂದು ಸಮಿತಿ ರಚಿಸಿ ಅರಣ್ಯ ಇಲಾಖೆಯಿಂದ ಆರಂಭಿಕ ಆರ್ಥಿಕ ನೆರವು ನೀಡಲಾಗಿತ್ತು. 

ಸರಕಾರಿ ಜಾಗದ ಸಂರಕ್ಷಣೆ ಜತೆಗೆ ಪ್ರವಾಸಿಗರ, ಊರ ನಾಗರಿಕರ ಸಂಜೆಯ ಹೊತ್ತು ಸುಂದರವಾಗುವುದು ಎಂಬ ಬಯಕೆ ಯಿಂದ ಗ್ರಾಪಂ ಶಂಕರನಾರಾಯಣ, ರೋಟರಿ ಕ್ಲಬ್ ಶಂಕರನಾರಾಯಣ, ವಿಎಸ್‌ಎಸ್ ಬ್ಯಾಂಕ್ ಶಂಕರನಾರಾಯಣ, ಹಾಲು ಉತ್ಪಾದಕರ ಸಹಕಾರಿ ಸಂಘ ಶಂಕರನಾ ರಾಯಣ ಸಹಯೋಗದೊಂದಿಗೆ ವಾರಾಹಿ ಔಷಧ ವನ ನಿರ್ಮಾಣ ಯೋಜನೆಗೆ ಚಾಲನೆ ನೀಡಲಾಗಿತ್ತು. ನಾಮಫಲಕ ಕೂಡ ಅಳವಡಿಸಲಾಗಿತ್ತು. ಆದರೆ ಔಷಧ ವನದ ಇಂದಿನ ಸ್ಥಿತಿ ಬೇರೆಯೇ ಆಗಿದೆ. 

ಔಷಧ ವನಕೋಸ್ಕರ ಕಾದಿರಿಸಿದ ಜಾಗದಲ್ಲಿ ಒಂದೇ ಒಂದು ಔಷಧ ಗಿಡಗಳಿಲ್ಲ. ಅಳವಡಿ ಸಿದ ನಾಮಫಲಕ ಕಳಚಿ ಬಿದ್ದಿದೆ. ಔಷಧ ವನದ ಬೇಲಿ ನಾಪತ್ತೆಯಾಗಿದೆ. ಗೋವುಗಳು ಮೇವು ಅರಸುವ ತಾಣವಾಗಿದೆ. ಔಷಧ ವನದ ಪಕ್ಕದಲ್ಲಿಯೇ ನಿರ್ಮಿಸಲಾಗಿರುವ ಬಾವಿ ಮಾಲಿನ್ಯದಿಂದ ಕಂಗೆಟ್ಟಿದೆ. ತೆರೆದ ಬಾವಿಗೆ ಭದ್ರತೆಯೇ ಇಲ್ಲ. ಹೊಳೆಗೆ ದಂಡೆಗೆ ತಾಗಿಕೊಂಡಿರುವ ಈ ಬಾವಿಯ ನೀರು ಕುಡಿಯಲು ಸಹ ಬಳಸಲಾಗುತ್ತಿದೆ. ಆದರೆ ಸೂಕ್ತ ನಿರ್ವಹಣೆಯಿಲ್ಲದ ಕಾರಣ ಬಾವಿ ವನಕ್ಕೂ ಸಿಕ್ಕಿಲ್ಲ. ನಾಗರಿಕರಿಗೂ ಒದಗಿಲ್ಲ ಎಂಬುದು ಸ್ಥಳೀಯರ ದೂರು. 

ಇದು ಬ್ರಿಟಿಷ್ ಕಾಲದಿಂದಲೂ ಬಳಕೆಯಲ್ಲಿದ್ದ ಜಾಗ. ಅರಣ್ಯ ಇಲಾಖೆಯ ಡಿಪೊ ಕಾರ್ಯಾಚರಿಸುತ್ತಿತ್ತು. ಸರ್ವೆ ನಂಬ್ರ 136/32ಎ ಮತ್ತು 136/27ರಲ್ಲಿ 1 ಎಕರೆ ಜಾಗವಿದೆ. ಜಾಗ ಅತಿಕ್ರಮಣಕ್ಕೆ ತುತ್ತಾ ಗುತ್ತಿದೆ ಎಂಬ ನೆಲೆಯಲ್ಲಿ ಸಂಬಂಧಿತ ಇಲಾ ಖೆಗೆ ಮನವಿ ಸಲ್ಲಿಸಿದ್ದೆವು. ಸ್ಪಂದಿಸಿದ ಇಲಾಖೆ ಜಾಗ ಸಂರಕ್ಷಣೆಗೆ ಕ್ರಮ ತೆಗೆದುಕೊಂಡಿತ್ತು. ಸಂರಕ್ಷಿತ ಜಾಗದಲ್ಲಿ 6 ವರ್ಷದ ಹಿಂದೆ ಔಷಧ ವನ ನಿರ್ಮಾಣ ಯೋಜನೆ ಕೈಗೊಳ್ಳಲಾಯಿತು. ಆದರೆ ಉದ್ದೇಶಿತ ಯೋಜನೆ ಈಗ ಮೂಲೆಗುಂಪಾಗಿದೆ. 

ವನ ರಚನೆಯ ಪ್ರದೇಶಕ್ಕೆ ಸೂಕ್ತ ತಡೆಬೇಲಿ ಇಲ್ಲ. ಅಲ್ಲಿ ಒಂದೆ ಒಂದು ಗಿಡವನ್ನು ಬೆಳೆಸ ಲಾಗಿಲ್ಲ. ಸೌಡ-ಸಿದ್ಧಾಪುರ ರಸ್ತೆಯ ಅಂಚಿನ ಲ್ಲಿರುವ ಈ ಜಾಗ ವಾರಾಹಿ ನದಿ ದಡದಲ್ಲಿಯೇ ಇದೆ. ಸಾಂಬ ಸದಾಶಿವ ದೇವಸ್ಥಾನದ ಶಿವಗಂಗೆ ಪುಣ್ಯಸ್ನಾನ ಸ್ಥಳ ಹತ್ತಿರದಲ್ಲಿಯೇ ಇದೆ. ಇಲ್ಲಿಯೇ ಪ್ರವಾಸಿ ಮಂದಿರವಿದ್ದು ಜನರ ಅನು ಕೂಲದ ಉದ್ದೇಶದಿಂದ ಮೂಲೆ ಗುಂಪಾ ಗಿರುವ ವಾರಾಹಿ ಔಷಧಿ ವನ ಪುನರುಜ್ಜೀವನ ಮಾಡಬೇಕು ಎಂದು ಸ್ಥಳೀಯ ಸಾಮಾಜಿಕ ಕಾರ್ಯಕರ್ತ ಬಿ. ಶ್ರೀೀನಿವಾಸ ಸೌಡ ಆಗ್ರಹಿಸಿದ್ದಾರೆ. 

*ವಾರಾಹಿ ನದಿ ತಟದ ವಾರಾಹಿ ಔಷಧ ವನದ ಪ್ರಸಕ್ತ ಸ್ಥಿತಿಯ ಬಗ್ಗೆ ಮಾಹಿತಿ ಲಭಿಸಿದೆ. ಹೊಸದಾಗಿ ಇಲ್ಲಿ ಅಧಿಕಾರ ಸ್ವೀಕರಿಸಿದ್ದೇನೆ. 2007ರಲ್ಲಿ ವಾರಾಹಿ ಔಷಧ ವನ ನಿರ್ಮಾಣಕ್ಕೆ ಇಲಾಖೆಯಿಂದ ಆರಂಭಿಕ 5 ಸಾವಿರ ರೂ. ಅನುದಾನ ನೀಡಲಾಗಿದೆ. ಸಾರ್ವಜನಿಕ ಸಹಭಾಗಿತ್ವದ ಯೋಜನೆ ಇದಾಗಿದ್ದು ಮುಂದೇನೂ ಮಾಡಬೇಕು ಎಂಬುದನ್ನು ಸ್ಥಳ ಪರಿಶೀಲನೆ ನಡೆಸಿ ಕ್ರಮ ತೆಗೆದುಕೊಳ್ಳಲಾಗುವುದು. -ಬ್ರಿಜೇಶ್ ವಿನಯ್ ಕುಮಾರ್, ಶಂಕರನಾರಾಯಣ ವಲಯ ಅರಣ್ಯಾಧಿಕಾರಿ 

ವರದಿ ಕೃಪೆ: ಜಾನ್ ಡಿಸೋಜ, ವಿಕ
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com