ಹಾಲಾಡಿ ಬೆಂಬಲಿಗರು ಬಿಜೆಪಿ ಸೇರ್ಪಡೆ

ಕುಂದಾಪುರ: ಕಳೆದ ವಿಧಾನಸಭೆಯಲ್ಲಿ ಬಿಜೆಪಿಯಿಂದ ಬಂಡೆದ್ದು ಸ್ವತಂತ್ರ ಅಭ್ಯರ್ಥಿಯಾಗಿ ಗೆದ್ದು ಬಂದ ಕುಂದಾಪುರ ಶಾಸಕ ಹಾಲಾಡಿ ಶ್ರೀನಿವಾಸ ಶೆಟ್ಟಿಯವರ ಪ್ರಮುಖ ಬೆಂಬಲಿಗರು ಭಾನುವಾರ ಬಿಜೆಪಿ ಸೇರಿದ್ದಾರೆ. ಹಾಲಾಡಿ ಬೆಂಬಲಿತ ಆರು ಜಿಲ್ಲಾ ಪಂಚಾಯಿತಿ, ಎಂಟು ತಾಲೂಕು ಪಂಚಾಯಿತಿ ಪ್ರತಿನಿಧಿಗಳು ಹಾಗೂ ಪುರಸಭೆ ಸದಸ್ಯರು ಹಿರಿಯ ಮುಖಂಡ ಕಿರಣ್‌ಕೊಡ್ಗಿಯವರ ನೇತೃತ್ವದಲ್ಲಿ ಇಲ್ಲಿನ ಹೊಟೇಲ್ ಶರೋನ್ ಸಭಾಂಗಣದಲ್ಲಿ ಜರುಗಿದ ಉಡುಪಿ-ಚಿಕ್ಕಮಗಳೂರು ಲೋಕಸಭೆ ಕ್ಷೇತ್ರ ಶೋಭಾ ಕರಂದ್ಲಾಜೆ ಸುದ್ದಿಗೋಷ್ಠಿ ಸಂದರ್ಭ ಬಿಜೆಪಿಯಲ್ಲಿ ಗುರುತಿಸಿಕೊಂಡರು. 

ಹಾಲಾಡಿ ಶ್ರೀನಿವಾಸ ಶೆಟ್ಟಿಯವರೊಂದಿಗೆ ಗುರುತಿಸಿಕೊಂಡಿದ್ದ ಜಿಲ್ಲಾ ಪಂಚಾಯಿತಿ ಸದಸ್ಯರಾದ ಮಮತಾ ಆರ್.ಶೆಟ್ಟಿ, ಪ್ರಕಾಶ್ ಟಿ.ಮೆಂಡನ್,ರಶ್ವತ್ ಕುಮಾರ್ ಶೆಟ್ಟಿ ಗಣಪತಿ ಟಿ.ಶ್ರೇಯಾನ್, ಸುನೀತಾರಾಜಾರಾಮ್, ಜ್ಯೋತಿ ಶೆಟ್ಟಿ, ಕುಂದಾಪುರ ತಾಲೂಕು ಪಂಚಾಯಿತಿ ಅಧ್ಯಕ್ಷೆ ದೀಪಿಕಾ ಶೆಟ್ಟಿ, ಉಡುಪಿ ತಾ.ಪಂ.ಉಪಾಧ್ಯಕ್ಷೆ ಗೌರಿ ಪೂಜಾರ‌್ತಿ, ತಾಲೂಕು ಪಂಚಾಯಿತಿ ಸದಸ್ಯರಾದ ರಾಘವೇಂದ್ರ ಕಾಂಚನ್, ಭರತ್ ಶೆಟ್ಟಿ, ಭಾಸ್ಕರ ಬಿಲ್ಲವ, ರಮಣಿ ಶೆಡ್ತಿ, ಪರಿಮಳ ಶೆಡ್ತಿ, ಬೇಬಿ ಪೂಜಾರ‌್ತಿ, ಸಾಲಿಗ್ರಾಮ ಪಟ್ಟಣ ಪಂಚಾಯಿತಿ ಅಧ್ಯಕ್ಷೆ ಸಾಧು, ಉಪಾಧ್ಯಕ್ಷೆ ಸುಲತಾ ಹೆಗ್ಡೆ, ಕುಂದಾಪುರ ಪುರಸಭೆ ಉಪಾಧ್ಯಕ್ಷ ನಾಗರಾಜ ಕಾಮಧೇನು ಬಿಜೆಪಿಗೆ ಮರಳಿದರು. 

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಬಿಜೆಪಿ ಅಭ್ಯರ್ಥಿ ಶೋಭಾ ಕರಂದ್ಲಾಜೆ 'ನಾನಾ ಕಾರಣಗಳಿಂದ ನನ್ನನ್ನು ಸೇರಿದಂತೆ ಅನೇಕರು ಪಕ್ಷದಿಂದ ದೂರವಿದ್ದೆವು. ಇದೀಗ ಹಾಲಾಡಿ ಬೆಂಬಲಿಗರು ಬಿಜೆಪಿ ಸೇರಿದ್ದು ಕೆಜೆಪಿ-ಬಿಜೆಪಿ ವಿಲೀನಗೊಂಡಿರುವಷ್ಟೇ ಸಂತಸ ಈಗ ಮತ್ತೆ ಆಗಿದೆ' ಎಂದರು. ಹಾಲಾಡಿ ಬೆಂಬಲಿಗರಂತೆ ಇನ್ನೂ ಹಲವರು ಪಕ್ಷಕ್ಕೆ ಬರಲಿದ್ದು ಇದು ಉಡುಪಿ-ಚಿಕ್ಕಮಗಳೂರು ಕ್ಷೇತ್ರದಲ್ಲಿ ಬಿಜೆಪಿಯ ಬಲವದ್ಧಿಗೆ ಕಾರಣವಾಗಿದೆ ಎಂದು ಶೋಭಾ ತಿಳಿಸಿದರು. ಕೆಲವೊಂದು ಕಾರಣಗಳಿಂದಾಗಿ ಹಾಲಾಡಿ ಶ್ರೀನಿವಾಸ ಶೆಟ್ಟಿಯವರು ಪಕ್ಷದಿಂದ ದೂರ ಉಳಿದಿದ್ದರು ಅವರು ನಮ್ಮದೆ ಮನೆ ಮಗ ಎಂದು ಶೋಭಾ ವ್ಯಾಖ್ಯಾನಿಸಿದರು. 

ಒಕ್ಕಲ್ಲೆಬ್ಬಿಸುವ ಆತಂಕ: ಚಿಕ್ಕಮಗಳೂರಿನಲ್ಲಿ ಕುಮ್ಕಿ ಜಮೀನಿನಲ್ಲಿ ನೆಲೆಸಿರುವ ಜನರನ್ನು ಒಕ್ಕಲ್ಲೆಬ್ಬಿಸುವ ಪ್ರಯತ್ನ ಅಪಾಯದ ಮನ್ಸೂಚನೆ ನೀಡಿದೆ. 7ಲಕ್ಷ ಹೆಕ್ಟೇರ್ ಕುಮ್ಕಿ ಜಮೀನಿನಲ್ಲಿ ಜನವಸತಿಯಿದೆ ಎಂಬ ಬಗ್ಗೆ ರಾಜ್ಯ ಎಡ್ವೋಕೇಟ್ ಜನರಲ್ ರವಿಕುಮಾರ್ ಹೈಕೋರ್ಟ್‌ಗೆ ಅಫಿಡಾವಿಟ್ ಸಲ್ಲಿಸಿದ್ದಾರೆ. ರಾಜ್ಯ ಸರಕಾರ ಕುಮ್ಕಿ ಜಮೀನು ಒತ್ತುವರಿಗೆ ಮುಂದಾಗಿರುವುದು ಖಂಡನೀಯ. ಒಂದೊಮ್ಮೆ ಒತ್ತುವರಿ ಪ್ರಯತ್ನಕ್ಕೆ ರಾಜ್ಯ ಸರಕಾರ ಕೈಹಾಕಿದ್ದಲ್ಲಿ ದೊಡ್ಡ ಮಟ್ಟದ ಗಂಡಾಂತರ ಎದುರಾಗಲಿದೆ. ಈ ಹಿಂದೆ ಸಂಸದರಾಗಿದ್ದವರು ಅಡಕೆ ನಿಷೇಧ ವಿಷಯದಲ್ಲಿ, ಮೀನುಗಾರರ ಸಮಸ್ಯೆ, ಕಡಲ್ಕೊರೆತ, ಬೆಳೆಹಾನಿ ಮೊದಲಾದ ವಿಷಯಗಳಲ್ಲಿ ಪರಿಣಾಮಕಾರಿ ಕೆಲಸ ಮಾಡಿಲ್ಲ. ಅಡಕೆ ನಿಷೇಧಿಸುವ ಪ್ರಸ್ತಾಪ ಬಹಳ ಅಪಾಯಕಾರಿ. ಅಡಕೆ ಎಂದಿಗೂ ವಿಷಕಾರಿ ಅಲ್ಲ. ಇದರಿಂದ ಅಡಕೆ ಬೆಳೆಗಾರರ ಬದುಕು ಮೂರಾಬಟ್ಟೆಯಾಗಿದೆ. ಹಳದಿ ರೋಗದಿಂದ ಈ ಮೊದಲೆ ಕಂಗೆಟ್ಟುಹೋಗಿದ್ದ ಅಡಕೆ ಬೆಳೆಗಾರರಿಗೆ ನಿಷೇಧ ಪ್ರಸ್ತಾಪ ಗಾಯದ ಮೇಲೆ ಬರೆ ಏಳೆದಂತಾಗಿದೆ. ಅಡಕೆ ಬೆಳೆಗಾರರು ಸೇರಿದಂತೆ ಕ್ಷೇತ್ರದಲ್ಲಿ ರೈತರ ಹಿತಕಾಯುವ ಕೆಲಸ ಆಗಿಲ್ಲ ಎಂದು ಅವರು ದೂರಿದರು. 

ತಂತ್ರಗಾರಿಕೆ ಅವರಿಗೆ ಬಿಟ್ಟಿದ್ದು: ಜೆಡಿಎಸ್‌ನ ಅಭ್ಯರ್ಥಿಯಾಗಿ ಕಣಕ್ಕಿಳಿದಿರುವ ಧನಂಜಯ್‌ಕುಮಾರ್ ಅವರನ್ನು ಪಕ್ಷಕ್ಕೆ ಕರೆತರುವ ಪ್ರಯತ್ನ ನಡೆಸಿದ್ದೆವು. ಅವರ ತಂತ್ರಗಾರಿಕೆ ಏನು ಎಂಬುವುದು ನಮಗೆ ಗೊತ್ತಿಲ್ಲ. ತಂತ್ರ ಅವರಿಗೆ ಬಿಟ್ಟಿದ್ದು. ಈ ಬಗ್ಗೆ ನಾನು ಹೇಳಲು ಬಯಸೋದಿಲ್ಲ ಎಂದು ಶೋಭಾ ಪ್ರತಿಕ್ರಿಯಿಸಿದರು. 

ಹಾಲಾಡಿ ನಿರ್ಧಾರ ಬದಲಾಗಿಲ್ಲ 

ಬೆಂಬಲಿಗರ ದೊಡ್ಡ ಗುಂಪು ಬಿಜೆಪಿ ಸೇರಿದರೂ ಹಾಲಾಡಿ ಶ್ರೀನಿವಾಸ ಶೆಟ್ಟಿ ಅವರ ನಿಲುವು ಬದಲಾಗಿಲ್ಲ. ಪ್ರಸಕ್ತ ಚುನಾವಣೆಯಲ್ಲಿ ಯಾವ ಪಕ್ಷವನ್ನು ಬೆಂಬಲಿಸದಿರಲು ಹಾಲಾಡಿ ತೀರ್ಮಾನಿಸಿದ್ದು, ಬೆಂಬಲಿಗರಿಗೆ ಆಯ್ಕೆ ಸ್ವಾತಂತ್ರ್ಯ ನೀಡಿದ್ದರಿಂದ ತಾವು ಬಿಜೆಪಿ ಸೇರಿದ್ದಾಗಿ ಕಿರಣ್ ಕೊಡ್ಗಿ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು. ತಮ್ಮೊಂದಿಗೆ ಬಹುತೇಕ ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ, ಪಟ್ಟಣ ಪಂಚಾಯಿತಿ ಪ್ರತಿನಿಧಿಗಳು ಮರಳಿ ಬಿಜೆಪಿಗೆ ಆಗಮಿಸಿದ್ದಾರೆ ಎಂದು ಕೊಡ್ಗಿ ಸ್ಪಷ್ಟಪಡಿಸಿದರು. 

ಸುದ್ದಿಗೋಷ್ಠಿಯಲ್ಲಿ ಮಾಜಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ, ಜಿಲ್ಲಾ ಬಿಜೆಪಿ ಅಧ್ಯಕ್ಷ ತಿಂಗಳೆ ವಿಕ್ರಮಾರ್ಜುನ ಹೆಗ್ಡೆ, ಮುಖಂಡರಾದ ಕಿರಣ್ ಕೊಡ್ಗಿ, ರಾಜೇಶ ಕಾವೇರಿ, ಕಿಶೋರ್ ಹಾಗೂ ಮರಳಿ ಮಾತಪಕ್ಷಕ್ಕೆ ಸೇರ್ಪಡೆಗೊಂಡ ಹಾಲಾಡಿ ಬೆಂಬಲಿಗರು ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com