ಅಮೆರಿಕ ಮಕ್ಕಳ ರೋಗಕ್ಕೆ ಉಡುಪಿ ವೈದ್ಯೆಯಿಂದ ಯಶಸ್ವಿ ಚಿಕಿತ್ಸೆ

ಉಡುಪಿ: ಅಮೆರಿಕದ ಖ್ಯಾತ ಸೈಂಟ್ ಲೂಯಿ ಮಕ್ಕಳ ಆಸ್ಪತ್ರೆ ಸೇರಿದಂತೆ ಇತರ ಎರಡು ಆಸ್ಪತ್ರೆಗಳಲ್ಲಿ ಸಿಕ್ಲ್‌ಸೆಲ್ ರೋಗದಿಂದ ನರಳುತ್ತಿರುವ ಶಿಶುಗಳ ರಕ್ತಕಣಗಳನ್ನು ಪೂರ್ತಿಯಾಗಿ ತೆಗೆದು ದಾನಿಶಿಶುಗಳ ಹೊಕ್ಕುಳು ಬಳ್ಳಿಯ ರಕ್ತಕಣಗಳನ್ನು ಮರುಪೂರಣ ಮಾಡುವ ಮೂಲಕ ಭಾರತೀಯ ಶಿಶುರೋಗ ತಜ್ಞೆ ಡಾ. ಶಾಲಿನೀ ಶೆಣೈ ರೋಗವನ್ನು ಗುಣಪಡಿಸುವ ವಿಧಾನವನ್ನು ಕಂಡು ಹಿಡಿದಿದ್ದಾರೆ. ಯಶಸ್ವಿ ಸಾಧನೆಯನ್ನು ವಾಷಿಂಗ್‌ಟನ್ ಯೂನಿವರ್ಸಿಟಿಯ 'ಔಟ್‌ಲುಕ್' ವೈದ್ಯಕೀಯ ಪತ್ರಿಕೆ ವರದಿ ಮಾಡಿದೆ. 

ಡಾ. ಶಾಲಿನೀ ಶೆಣೈ ಮಣಿಪಾಲದ ಅಕಾಡೆಮಿ ಆಫ್ ಜನರಲ್ ಎಜ್ಯುಕೇಶನಿನ ಆಡಳಿತಾಧಿಕಾರಿ ಡಾ. ಎಚ್. ಶಾಂತಾರಾಮ್ ಅವರ ಪುತ್ರಿ ಹಾಗೂ ಉಡುಪಿ ಎಂ.ಜಿ.ಎಂ ಕಾಲೇಜಿನ ಹಾಗೂ ಮಣಿಪಾಲ ಕೆ.ಎಂ.ಸಿಯ ಹಳೆ ವಿದ್ಯಾರ್ಥಿನಿ. 

ಸುಮಾರು 100,000 ಅಮೆರಿಕರನ್ನು ಕಾಡುವ ಮಾರಕ ರೋಗ ಇದಾಗಿದ್ದು, ಸಿಕ್ಲ್‌ಸೆಲ್ ಹುಟ್ಟಿನಲ್ಲೇ ಬರುವ ರಕ್ತ ಸಂಬಂಧಿ ರೋಗ. ತಂದೆ-ತಾಯಿ ಇಬ್ಬರಲ್ಲೂ ಸಿಕ್ಲ್ ಹಿಮೋಗ್ಲೋಬಿನ್ ವಂಶವಾಹಿಗಳು ಇದ್ದಾಗ ಮಗುವಿನ ರಕ್ತದಲ್ಲಿ ಈ ರೋಗ ಕಾಣಿಸಿಕೊಂಡು ರಕ್ತದಲ್ಲಿ ಕೆಂಪುಕಣಗಳು ವಿಚಿತ್ರ ಕುಡುಗೋಲಿನ ಆಕಾರ ಪಡೆಯುವುದರಿಂದ ಈ ರೋಗಕ್ಕೆ ಸಿಕ್ಲ್‌ಸೆಲ್ ರೋಗ ಎಂಬ ಹೆಸರು ಬಂದಿದೆ. ಈ ರೋಗಗ್ರಸ್ತ ಕಣಗಳು ಒಂದಕ್ಕೊಂದು ಅಂಟಿಕೊಂಡು ರಕ್ತನಾಳಗಳಲ್ಲಿ ರಕ್ತ ಸಂಚಾರಕ್ಕೆ ಅಡ್ಡಿ ಪಡಿಸುವುದರಿಂದ ವಿಪರೀತ ನೋವು ಹಾಗೂ ತೀವ್ರ ರಕ್ತಹೀನತೆಯುಂಟಾಗುತ್ತದೆ. 

ಇದುವರೆಗೆ ಈ ರೋಗಕ್ಕೆ ನಡೆಯುತ್ತಿದ್ದ ಚಿಕಿತ್ಸೆ ಎಂದರೆ ರೋಗಗ್ರಸ್ತ ಮಗುವಿನ ಬೆನ್ನು ಹುರಿಯ ರಕ್ತ ಕಣಗಳನ್ನು ತೆಗೆದು ಅದಕ್ಕೆ ಸಂಪೂರ್ಣವಾಗಿ ಹೊಂದಿಕೆಯಾಗುವ ದಾನಿಗಳ ಬೆನ್ನು ಹುರಿಯ ರಕ್ತಕಣಗಳನ್ನು ಸೇರಿಸುವುದು. ಹೊಂದಿಕೆಯಾಗುವ ರಕ್ತ ಕಣಗಳುಳ್ಳ ದಾನಿಗಳು ಬಹಳ ವಿರಳರಾಗಿರುವುದರಿಂದ ಈ ವಿಧಾನ ತುಂಬಕಷ್ಟಸಾಧ್ಯ. ಇನ್ನೊಂದು ವಿಧಾನ ರೋಗಿಯ ಒಡಹುಟ್ಟಿದವರು ರೋಗ ರಹಿತರಾಗಿದ್ದರೆ ಅವರ ಹೊಕ್ಕುಳ ಬಳ್ಳಿಯ ರಕ್ತ ಕಣಗಳನ್ನು ರೋಗಿ ಮಗುವಿನ ರಕ್ತಕಣಗಳ ಬದಲಾಗಿ ಮರು ಪೂರೈಕೆ ಮಾಡುವುದು. ಆದರೆ ಪೂರ್ತಿ ಹೊಂದಿಕೆಯಾಗುವ ಒಡಹುಟ್ಟಿದ ಶಿಶುವಿನ ಹೊಕ್ಕಳ ಬಳ್ಳಿಯ ರಕ್ತವನ್ನು ಚಿಕಿತ್ಸೆಗಾಗಿ ಪಡೆಯುವುದು ಸುಲಭ ಸಾಧ್ಯವಾಗಿರಲಿಲ್ಲ. 

ನವಜಾತ ಶಿಶುವಿನ ಹೊಕ್ಕುಳ ಬಳ್ಳಿಯ ರಕ್ತವು ಅಸ್ತಿ ಮಜ್ಜೆಗಿಂತ ಹೆಚ್ಚು ಪರಿಣಾಮಕಾರಿಯೆಂಬುದು ಗೊತ್ತಿದ್ದ ಸಂಗತಿ. ಆದರೂ ಸಿಕ್ಲ್‌ಸೆಲ್ ರೋಗದಲ್ಲಿ ಇದುವರೆಗೆ ಈ ವಿಧಾನವು ಯಶಸ್ವಿಯಾ ಗಿರಲಿಲ್ಲ. ಆದರೂ ಚಿಕಿತ್ಸಾ ವಿಧಾನವನ್ನು ಸುಧಾರಿಸುವುದರಲ್ಲಿ ಅದನ್ನು ಹೆಚ್ಚು ಪರಿಣಾಮಕಾರಿಯಾಗಿ ಮಾಡಬಹುದು ಎಂದು ತರ್ಕಿಸಿದ ಡಾ. ಶೆಣೈ ಈ ನಿಟ್ಟಿನಲ್ಲಿ ತಮ್ಮ ಸಂಶೋಧನೆಗಳನ್ನು ಮುಂದುವರಿಸಿ ಇದೀಗ ಮೂರು ರೋಗಗ್ರಸ್ತ ಮಕ್ಕಳನ್ನು ಗುಣಮಾಡಿರುವ ಕಾರಣ ಈ ಚಿಕಿತ್ಸೆಯನ್ನು ಹೆಚ್ಚು ವ್ಯಾಪಕ ಪ್ರಯೋಗಕ್ಕೆ ಒಳಪಡಿಸಲು ಅನುಮತಿ ಪಡೆದ ನಿರ್ಣಾಯಕ ಹಂತವನ್ನು ತಲುಪಿದ್ದಾರೆ. 

ಇದುವರೆಗೆ ಆದ ಸಂಶೋಧನೆಗಳ ಆಶಾದಾಯಕ ಅಂಶಗಳೆಂದರೆ ಹೊಕ್ಕುಳಬಳ್ಳಿಯ ರಕ್ತ ರೋಗಗ್ರಸ್ತ ಶಿಶುವಿನ ಒಡಹುಟ್ಟಿದವರದ್ದೇ ಆಗಬೇಕೆಂದಿಲ್ಲ. ಇತರ ದಾನಿಗಳ ಹೊಕ್ಕುಳ ಬಳ್ಳಿಯ ರಕ್ತವೂ ಆದೀತು. ಜೊತೆಗೆ ಸುಧಾರಿತ ಚಿಕಿತ್ಸಾ ವಿಧಾನವೂ ಈ ಹಿಂದಿನ ವಿಧಾನಗಳಷ್ಟು ಕ್ಲಿಷ್ಟವಾಗಿಲ್ಲ. ಚಿಕಿತ್ಸೆ ಪಡೆಯುವ ಮಗುವಿಗೆ ಚಿಕಿತ್ಸಾ ವಿಧಾನವು ತೀವ್ರ ನೋವಿನದಾಗಿಲ್ಲ. 

ಡಾ. ಶಾಲಿನೀ ಶೆಣೈ ಅವರು ಕಂಡು ಹಿಡಿದ ಸುಧಾರಿತ ತಯಾರಿಯ ವಿಧಾನದಲ್ಲಿ ರೋಗಿಯ ಅಂಗಾಂಗಗಳಿಗೆ ಮೊದಲಿನ ವಿಧಾನಗಳಲ್ಲಿ ಆಗುತ್ತಿದ್ದಷ್ಟು ಹಾನಿಯಾಗುವುದಿಲ್ಲ. ಈ ಹೊಕ್ಕುಳ ಬಳ್ಳಿಯ ರಕ್ತ ಕಣಗಳು ಸಂಪೂರ್ಣ ಹೊಂದಿಕೆಯಾಗಬೇಕಾದರೂ, ಅವುಗಳು ಒಡಹುಟ್ಟಿದವರದ್ದೇ ಆಗಬೇಕೆಂದಿಲ್ಲ ಅನ್ಯರದ್ದೂ ಆದೀತು. ಕ್ಯಾನ್ಸರಿನಷ್ಟೇ ಪ್ರಾಣಾಂತಿಕವಾಗಿರುವ ಸಿಕ್ಲ್‌ಸೆಲ್ಸ್ ಕಾಯಿಲೆಗೆ ಸುಧಾರಿತ ಚಿಕಿತ್ಸಾ ವಿಧಾನ ಕಂಡುಹಿಡಿದ ಡಾ. ಶಾಲಿನೀ ಶೆಣೈಅಭಿನಂದನೆಗೆ ಅರ್ಹರು ಎಂದು ವೈದ್ಯಕೀಯ ಪತ್ರಿಕೆ 'ಔಟ್‌ಲುಕ್' ತಿಳಿಸಿದೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com