14 ಅಭ್ಯರ್ಥಿಗಳ 23 ನಾಮಪತ್ರ ಕ್ರಮಬದ್ಧ: ಡಾ.ಮುದ್ದು ಮೋಹನ್

ಉಡುಪಿ: ಉಡುಪಿ- ಚಿಕ್ಕಮಗಳೂರು ಲೋಕಸಭೆ ಚುನಾವಣೆಗೆ ಸ್ವೀಕೃತ 23 ನಾಮಪತ್ರಗಳ ಪರಿಶೀಲನೆ ಗುರುವಾರ ನಡೆದಿದ್ದು, 14 ಅಭ್ಯರ್ಥಿಗಳ ನಾಮಪತ್ರ ಕ್ರಮಬದ್ಧವಾಗಿವೆ ಎಂದು ಚುನಾವಣಾಧಿಕಾರಿ ಹಾಗೂ ಜಿಲ್ಲಾಧಿಕಾರಿ ಡಾ. ಮುದ್ದು ಮೋಹನ್ ತಿಳಿಸಿದ್ದಾರೆ. 

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸುವ್ಯವಸ್ಥಿತ ಮತ್ತು ಶಾಂತಿಯುತ ಚುನಾವಣೆಗೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ. ಉಡುಪಿ ಚಿಕ್ಕಮಗಳೂರು ಕ್ಷೇತ್ರದ 13,52,009 ಮತದಾರರಿಗೆ ಹೆಚ್ಚುವರಿಯಾಗಿ 45,882 ಮತದಾರರ ಸೇರ್ಪಡೆಯಾಗಿದೆ. ಅಬಕಾರಿ ಇಲಾಖೆ 160 ದಾಳಿ ನಡೆಸಿದ್ದು 64 ಪ್ರಕರಣಗಳಲ್ಲಿ 45 ಆರೋಪಿಗಳನ್ನು ಬಂಧಿಸಿ ಪ್ರಕರಣ ದಾಖಲಿಸಲಾಗಿದೆ. 22.500 ಲೀ. ಗೋವಾ ಮದ್ಯ, 227.940 ಲೀ. ಅಕ್ರಮ ಮದ್ಯ ಸಹಿತವಾಗಿ 1ಲಕ್ಷ ರೂ. ಮೌಲ್ಯದ ಒಟ್ಟು 250.390ಲೀ. ಮದ್ಯ ವಶಪಡಿಸಲಾಗಿದೆ. 

ಉಡುಪಿ ಜಿಲ್ಲೆಯಾದ್ಯಂತ ಸಿಆರ್‌ಪಿಸಿ ಕಲಂ 107, 109, 110 ರಡಿ ಒಟ್ಟು 980 ಮುಚ್ಚಳಿಕೆ ಸ್ವೀಕರಿಸಿದ್ದು, 342 ಭದ್ರತಾ ಮುಚ್ಚಳಿಕೆ ಪಡೆಯಲಾಗಿದೆ. 638 ಬಾಕಿಯಿದೆ. 509 ವಾರಂಟ್ ಹೊರಡಿಸಲಾಗಿದೆ. ಜಿಲ್ಲೆಯಲ್ಲಿ ಪರವಾನಗಿ ಪಡೆದ 4,112 ಶಸ್ತ್ರಾಸ್ತ್ರಗಳಿದ್ದು 4,031 ಶಸ್ತ್ರಾಸ್ತ್ರಗಳ ಠೇವಣಿ ಇಡುವ ಮೂಲಕ ಶೇ. 98.03 ಸಾಧನೆಯಾಗಿದೆ. 240 ಸೇವಾ ಮತದಾರರಿಗೆ ಅಂಚೆ ಮತಪತ್ರ ಕಳುಹಿಸಿಕೊಡಲಾಗುವುದು. 

ಉಡುಪಿ ಜಿಲ್ಲೆಗೆ ಸಂಬಂಧಿಸಿ ಒಟ್ಟು 1,540 ಬ್ಯಾಲೆಟ್ ಯುನಿಟ್, 1,210 ಕಂಟ್ರೋಲ್ ಯುನಿಟ್ ಹಂಚಿಕೆಯಾಗಿದೆ. ಎರಡು ಹಂತಗಳ ರ‌್ಯಾಂಡಮೈಸೇಷನ್ ನಡೆದಿದೆ. ಶೇ. 10(107) ಇವಿಎಂ ತುರ್ತು ಸಂದರ್ಭಕ್ಕ್ಕೆ ಮೀಸಲಿಡಲಾಗಿದೆ. ಬೈಂದೂರಿನ 240 ಮತಗಟ್ಟೆಗಳಿಗೆ 274 ಇವಿಎಂ ನೀಡಲಾಗಿದೆ. ಕುಂದಾಪುರದ 215 ಮತಗಟ್ಟೆಗಳಿಗೆ 247 ಇವಿಎಂ, ಉಡುಪಿಯ 209 ಮತಗಟ್ಟೆಗಳಿಗೆ 238 ಇವಿಎಂ, ಕಾಪು ಕ್ಷೇತ್ರದ 193 ಮತಗಟ್ಟೆಗಳಿಗೆ 221 ಇವಿಎಂ, ಕಾರ್ಕಳದ 202 ಮತಗಟ್ಟೆಗಳಿಗೆ 203 ಮತಯಂತ್ರ ಹಂಚಿಕೆ ಮಾಡಲಾಗಿದೆ ಎಂದರು. 

ಸ್ವೀಪ್ ಅಧ್ಯಕ್ಷೆ , ಜಿಪಂ ಸಿಇಒ ಎಂ. ಕನಗವಲ್ಲಿ ಮಾತನಾಡಿ, 1.10ಲಕ್ಷ ಮಕ್ಕಳ ಮೂಲಕ ಮತದಾರ ಹೆತ್ತವರು ಕುಟುಂಬ ಸಹಿತ ಮತದಾನ ಕೇಂದ್ರಕ್ಕೆ ತೆರಳಿ ನಿರ್ಭೀತಿಯಿಂದ ಯಾವುದೇ ಪ್ರಭಾವಕ್ಕೆ ಒಳಗಾಗದೆ ಮತ ಚಲಾಯಿಸುವ ಪ್ರತಿಜ್ಞೆ ಘೋಷಣೆ ಸ್ವೀಕರಿಸಲಾಗಿದೆ. ಆಶಾ ಕಾರ್ಯಕರ್ತೆಯರು, ಎಎನ್‌ಎಂ ಮೂಲಕ ಮತದಾನದ ನಿಟ್ಟಿನಲ್ಲಿ ಜನಜಾಗೃತಿ ಮಾಡಲಾಗಿದೆ ಎಂದರು. 

ಉಡುಪಿ ಜಿಲ್ಲೆಗೆ ಡಾ.ಎಂ.ರವಿ ಪೊಲೀಸ್ ವೀಕ್ಷಕರಾಗಿದ್ದಾರೆ(0820: 2530081), ಸಾರ್ವಜನಿಕರು ಚುನಾವಣೆ ಸಂಬಂಧಿಸಿದ ದೂರುಗಳಿಗೆ ಸಾಮಾನ್ಯ ವೀಕ್ಷಕ ಅಮರನಾಥ್ ಮಲ್ಲಿಕ್(0820: 2530082, 9481764925) ಹಾಗೂ ಚುನಾವಣೆ ವೆಚ್ಚ ವೀಕ್ಷಕ ರಂಜನ್ ಝಾ(0820: 2530080, 9481754925) ಸಂಪರ್ಕಿಸಬಹುದು. ಸುದ್ದಿಗೋಷ್ಠಿಯಲ್ಲಿ ಅಪರ ಜಿಲ್ಲಾಧಿಕಾರಿ ಕುಮಾರ್, ಜಿಪಂ ಸಿಇಒ ಎಂ.ಕನಗವಲ್ಲಿ, ಜಿಪಂ ಉಪ ಕಾರ್ಯದರ್ಶಿ ಡಿ. ಪ್ರಾಣೇಶ್ ರಾವ್ ಉಪಸ್ಥಿತರಿದ್ದರು. 

ಶೇ. 99.98 ಮತದಾರರಿಗೆ ಗುರುತು ಚೀಟಿ: ಉಡುಪಿ ಜಿಲ್ಲೆಯಲ್ಲಿ 8,96,683 ಮತದಾರರಿದ್ದು ಶೇ. 99.98 ಮಂದಿಗೆ ಭಾವಚಿತ್ರ ಸಹಿತ ಗುರುತಿನ ಚೀಟಿ(ಎಪಿಕ್)ನೀಡಲಾಗಿದೆ. ಬೈಂದೂರು ವಿಧಾನಸಭಾ ಕ್ಷೇತ್ರದಲ್ಲಿ 2,01,092 ಮತದಾರರಿದ್ದು 2,01,064(ಶೇ. 99.98) ಮಂದಿ ಎಪಿಕ್ ಪಡೆದಿದ್ದಾರೆ. ಕುಂದಾಪುರ ವಿಧಾನಸಭಾ ಕ್ಷೇತ್ರದ 1,84,721 ಮತದಾರರಿಗೂ ಭಾವಚಿತ್ರ ಸಹಿತ ಗುರುತಿನ ಚೀಟಿ ನೀಡಲಾಗಿದೆ. ಉಡುಪಿ ವಿಧಾನಸಭಾ ಕ್ಷೇತ್ರದಲ್ಲಿ 1,85,892 ಮತದಾರರಿದ್ದು 1,85,749 ಮಂದಿಗೆ(99.88) ಎಪಿಕ್ ದೊರೆತಿದೆ. ಕಾಪು ವಿಧಾನಸಭಾ ಕ್ಷೇತ್ರದಲ್ಲಿ 1,60,838 ಮತದಾರರಿದ್ದು 1,60,812 ಮಂದಿಗೆ(99.94) ಎಪಿಕ್ ನೀಡಲಾಗಿದೆ. ಕಾರ್ಕಳ ವಿಧಾನಸಭಾ ಕ್ಷೇತ್ರದಲ್ಲಿ 1,64,518 ಮತದಾರರಿದ್ದು 1,64,501 ಮಂದಿಗೆ(99.99) ಎಪಿಕ್ ದೊರೆತಿದೆ ಎಂದು ಜಿಲ್ಲಾಧಿಕಾರಿ ಡಾ. ಮುದ್ದು ಮೋಹನ್ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com