ಕಾಣೆಯಾದ ಮಗು ಸಿನಿಮೀಯ ರೀತಿಯಲ್ಲಿ ಪತ್ತೆ

ಬೈಂದೂರು: ಇಲ್ಲಿನ ಉಪ್ಪುಂದ ಅಂಬಾಗಿಲಿನ ಮಾರ್ಕೆಟ್ ವಠಾರದಲ್ಲಿ ಶುಕ್ರವಾರ ರಾತ್ರಿ ತಾಯಿಯ ಮಗ್ಗುಲಲ್ಲಿ ಮಲಗಿದ್ದ ಮಗುವೊಂದು ಕಾಣೆಯಾಗಿದ್ದು, ಶನಿವಾರ ಸಂಜೆ ಹೊತ್ತಿಗೆ ಸಿನಿಮೀಯ ರೀತಿಯಲ್ಲಿ ಪತ್ತೆಯಾಗಿದೆ. ಮಗು ಸಿಕ್ಕದವರು ಬೈಂದೂರು ಠಾಣೆಗೆ ತಂದೊಪ್ಪಿಸಿದ್ದು, ಕಳೆದುಕೊಂಡ ದಂಪತಿ ಠಾಣೆಗೆ ನೀಡಿದ ದೂರು ಹಾಗೂ ತಂದೊಪ್ಪಿಸಿದವರು ಹೇಳುವ ವಿವರ ಒಂದಿಷ್ಟು ಭಿನ್ನವಾಗಿದ್ದರೂ, ಮಗುವು ಒಂದೇ ಆಗಿದೆ. ಕಾಣೆಯಾದ ಮಗು ಸಿಕ್ಕಿರುವ ಸುದ್ದಿ ಖಚಿತ ಪಡಿಸಿದ ಬೈಂದೂರು ಪೊಲೀಸರು ಸತ್ಯ ಸಂಗತಿಯ ತನಿಖೆ ನಡೆಯುತ್ತಿದೆ ಎಂದು ಹೇಳಿದ್ದಾರೆ. 

ಘಟನೆಯ ವಿವರ: ರಾಷ್ಟ್ರೀಯ ಹೆದ್ದಾರಿ ಪಕ್ಕದ ಉಪ್ಪುಂದ ಅಂಬಾಗಿಲಿನ ಮಾರ್ಕೆಟ್ ವಠಾರದಲ್ಲಿ ಶುಕ್ರವಾರ ತಡ ರಾತ್ರಿ ಆಂಧ್ರ ಮೂಲದ ಗೋಪಿ ಮತ್ತು ಸುಭಾಷಿತ ದಂಪತಿಯ ಎರಡು ವರ್ಷದ ಮಗು ಹರ್ಷಿತಾ ನಾಪತ್ತೆಯಾಗಿತ್ತು. ಆಂಧ್ರ ಪ್ರದೇಶದ ನೆಲ್ಲೂರು ಮೂಲದ ದಂಪತಿ ಬೀದಿ ಬದಿಗಳಲ್ಲಿ ಉಯ್ಯಾಲೆ ಹಾಗೂ ಸೋಫಾಸೆಟ್ ಮಾರಾಟ ಮಾಡುವ ವ್ಯಾಪಾರಿಗಳು. ಭಟ್ಕಳ ಹಾಗೂ ಬೈಂದೂರಿನಲ್ಲಿ ವ್ಯಾಪಾರ ಮಾಡಿದ ಅವರು ಶುಕ್ರವಾರ ಸಂಜೆ 4 ಗಂಟೆ ಸುಮಾರಿಗೆ ಉಪ್ಪುಂದ ಅಂಬಾಗಿಲಿಗೆ ಬಂದು ರಾಷ್ಟ್ರೀಯ ಹೆದ್ದಾರಿ ಪಕ್ಕದಲ್ಲಿಯೇ ತಮ್ಮ ಸಾಮಾನು ಸರಂಜಾಮುಗಳನ್ನು ಹಾಕಿ ವ್ಯಾಪಾರ ಆರಂಭಿಸಿದ್ದರು. ರಾತ್ರಿ ಉಪ್ಪುಂದ ಜ್ಯೂನಿಯರ್ ಕಾಲೇಜಿನಲ್ಲಿ ನಡೆದ ಜೇಸಿ ಕಾರ್ಯಕ್ರಮ ವೀಕ್ಷಿಸಿ, ತಡ ರಾತ್ರಿ 12 ಗಂಟೆಗೆ ಮಲಗಿದ್ದಾಗ ಈ ಘಟನೆ ನಡೆದಿದೆ ಎಂದು ದಂಪತಿ ಠಾಣೆಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ. ''ರಾತ್ರಿ 2 ಗಂಟೆ ಸುಮಾರಿಗೆ ಎಚ್ಚರವಾದಾಗ ಮಗು ಮಗ್ಗುಲ್ಲಲೇ ಇತ್ತು. ಒಂದು ತಾಸು ಬಳಿಕ ಎಚ್ಚರವಾದಾಗ ಮಗು ಅಲ್ಲಿ ಇರಲಿಲ್ಲ ಆತಂಕಗೊಂಡ ದಂಪತಿ ಸುತ್ತಲೂ ಹುಡುಕಾಡಿದರು ಏನೂ ಪ್ರಯೋಜನವಾಗಿಲ್ಲ. ಎರಡು ವರ್ಷದ ಮಗುವಾಗಿದ್ದರಿಂದ ರಾತ್ರಿ ದೂರದ ತನಕ ನಡೆದು ಹೋಗಲು ಸಾಧ್ಯವಿರಲಿಲ್ಲ. ಮಗುವನ್ನು ಅಪಹರಣ ಮಾಡಿದ ಶಂಕೆ ಇದೆ'' ಎಂದು ದಂಪತಿ ದೂರಿ ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು. 

ಊರು ತಿರುಗಿ ವ್ಯಾಪಾರ ಮಾಡುವ ಗೋಪಿ ಮತ್ತು ಸುಭಾಷಿತ ದಂಪತಿಗೆ ಮೂವರು ಹೆಣ್ಣು ಮಕ್ಕಳು. ತನ್ನ ಕೊನೆಯ ಮಗುವನ್ನು ಕಳೆದುಕೊಂಡು ಹತಾಶರಾಗಿದ್ದ ದಂಪತಿ ಮಗು ಹುಡುಕಿಕೊಟ್ಟವರಿಗೆ 10 ಸಾವಿರ ರೂ. ಬಹುಮಾನ ನೀಡುವುದಾಗಿಯೂ ಘೋಷಿಸಿದ್ದರು. 

ಶನಿವಾರ ಸಂಜೆ ಪತ್ತೆ : ಹೇರೂರು ಗ್ರಾಮದ ಕೇರಿ ಸಿದ್ದುಮನೆ ವಾಸು ನಾಯ್ಕ್ ರಿಗೆ ಇದೇ ಮಗು ದೊರಕಿದ್ದು ಮಗುವನ್ನು ಶನಿವಾರ ಸಂಜೆ ಪೊಲೀಸರಿಗೆ ಹಸ್ತಾಂತರಿಸಿದ್ದಾರೆ. 

ಉಪ್ಪುಂದ ಶಾಲೆ ಬಾಗಿಲು ಸಮೀಪ ಶುಕ್ರವಾರ ತಡರಾತ್ರಿ ಅನಾಥವಾಗಿ ಇದ್ದ ಮಗುವನ್ನು ಕಂಡು ತಾನು ಮನೆಗೆ ಕರೆ ತಂದು ಆರೈಕೆ ಮಾಡಿದ್ದಾಗಿ ವಾಸು ನಾಯ್ಕ್ ಹೇಳಿದ್ದಾರೆ. ಬಳಿಕ ಸ್ಥಳೀಯ ಗ್ರಾಮ ಪಂಚಾಯಿತಿ ಸದಸ್ಯ ನಾವುಂದ ಅಶೋಕಕುಮಾರ ಶೆಟ್ಟಿಯವರಿಗೆ ವಿಷಯ ತಿಳಿಸಿದ್ದು, ಅವರು ಠಾಣೆಯನ್ನು ಸಂಪರ್ಕಿಸಿ ಮಗುವನ್ನು ಪೊಲೀಸರಿಗೆ ಒಪ್ಪಿಸಿದ್ದಾರೆ. ಇದೀಗ ಮಗು ಉಪ್ಪುಂದ ಠಾಣೆಯಲ್ಲಿದ್ದು ಪೊಲೀಸರು ತನಿಖೆ ನಡೆದುತ್ತಿದ್ದಾರೆ.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com