ಉಡುಪಿ-ಚಿಕ್ಕಮಗಳೂರು ಲೋಕಸಭೆ: 35,270 ಹೊಸ ಮತದಾರರ ಸೇರ್ಪಡೆ

ಉಡುಪಿ: ಉಡುಪಿ-ಚಿಕ್ಕಮಗಳೂರು ಲೋಕಸಭೆ ಕ್ಷೇತ್ರದಲ್ಲಿ ನಿರಂತರ ಪರಿಷ್ಕರಣೆ ಮೂಲಕ 35,270 ಹೊಸ ಮತದಾರರ ಸೇರ್ಪಡೆಯಾಗಿದ್ದು, ಒಟ್ಟು ಮತದಾರರ ಸಂಖ್ಯೆ 13,86,515ಕ್ಕೇರಿದೆ ಎಂದು ಚುನಾವಣಾಧಿಕಾರಿ ಡಾ. ಮುದ್ದು ಮೋಹನ್ ತಿಳಿಸಿದ್ದಾರೆ. 

ಸುದ್ದಿಗೋಷ್ಠಿಯಲ್ಲಿ ಗುರುವಾರ ಮಾತನಾಡಿ, ಉಡುಪಿ ಜಿಲ್ಲೆಯಲ್ಲಿ(ಬೈಂದೂರು ವಿಧಾನಸಭೆ ಕ್ಷೇತ್ರ ಸಹಿತ) ನಿರಂತರ ಪರಿಷ್ಕರಣೆ ಮೂಲಕ 19,791 ಮತದಾರರ ಸೇರ್ಪಡೆಯಾಗಿದ್ದು ಒಟ್ಟು 9,16,852 ಮತದಾರರಿದ್ದಾರೆ. ಹೊಸದಾಗಿ ಸೇರ್ಪಡೆಯಾದವರಲ್ಲಿ ಶೇ. 20 ಮಂದಿ ಮೊದಲ ಬಾರಿಗೆ ಮತ ಚಲಾಯಿಸುವವರಾಗಿದ್ದಾರೆ. ಉಡುಪಿ ಜಿಲ್ಲೆಯ 2,53,000 ಕುಟುಂಬಗಳು ಏ. 17ರಂದು ಹೆಚ್ಚಿನ ಪ್ರಮಾಣದಲ್ಲಿ ಮತದಾನ ಮಾಡುವಂತೆ ಮನವಿ ಪತ್ರಗಳ ಜತೆಗೆ ಮತಗಟ್ಟೆ ಅಧಿಕಾರಿಗಳು ಸಹಿ ಮಾಡಿದ ವೋಟರ್ಸ್‌ ಸ್ಲಿಪ್ ಹಂಚಿ, ಸಹಿ ಪಡೆಯಲಿದ್ದಾರೆ. 

ಉಡುಪಿ-ಚಿಕ್ಕಮಗಳೂರು ಕ್ಷೇತ್ರದಲ್ಲಿ ಒಟ್ಟು 818 ನಕ್ಸಲ್ ಸಕ್ರಿಯ ಹಾಗೂ ಅತಿ ಸೂಕ್ಷ್ಮ ಮತಗಟ್ಟೆಗಳಿದ್ದು ಸೂಕ್ತ ಭದ್ರತೆ ಕಲ್ಪಿಸಲಾಗುವುದು. ಖರ್ಚು-ವೆಚ್ಚ ಸೂಕ್ಷ್ಮ ಮತಗಟ್ಟೆಗಳ ವ್ಯಾಪ್ತಿಯಲ್ಲಿ ಪರಿಶೀಲನೆಗೆ ಅಧಿಕಾರಿಗಳ ತಂಡ ರಚಿಸಲಾಗಿದೆ. ಪಾದಯಾತ್ರೆ, ಮನೆ ಮನೆಗೆ ತೆರಳಿ ಹಣ ವಿತರಣೆ ತಡೆಗೂ ನಿಗಾ ವಹಿಸಲಾಗುವುದು. 

ಲೆಕ್ಕ ಪರಿಶೀಲನೆ: ಚುನಾವಣೆ ವೆಚ್ಚ ವೀಕ್ಷಕರಾದ ರಂಜನಾ ಝಾ ಏ. 5, 10 ಹಾಗೂ 15ರಂದು ಬೆಳಗ್ಗೆ 11 ಗಂಟೆಗೆ ಮಣಿಪಾಲದ ರಜತಾದ್ರಿಯಲ್ಲಿರುವ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಚುನಾವಣೆ ಅಭ್ಯರ್ಥಿಗಳ ಲೆಕ್ಕ ಪರಿಶೀಲನೆ ಮಾಡಲಿದ್ದಾರೆ. ಉಡುಪಿ ಜಿಲ್ಲೆಯ ಮತಗಟ್ಟೆ ಸಿಬ್ಬಂದಿಗೆ ಏ. 10ರಂದು ಎರಡನೇ ಹಂತದ ಚುನಾವಣೆ ತರಬೇತಿ ಆಯಾ ತಾಲೂಕು ಕೇಂದ್ರ ಸ್ಥಾನಗಳಲ್ಲಿ ನಡೆಯಲಿದೆ. ಮಹಿಳಾ ಸಿಬ್ಬಂದಿಯನ್ನು ಅವರು ಕಾರ್ಯನಿರ್ವಹಿಸುತ್ತಿರುವ ವಿಧಾನಸಭೆ ಕ್ಷೇತ್ರಗಳಲ್ಲಿಯೇ ನಿಯೋಜಿಸಲಾಗುವುದು. 

ಉಡುಪಿ ಜಿಲ್ಲೆಯಲ್ಲಿ 2,296 ಹಾಗೂ ಚಿಕ್ಕಮಗಳೂರು ಜಿಲ್ಲೆಯಲ್ಲಿ 1,344 ಮಹಿಳಾ ಸಿಬ್ಬಂದಿಯನ್ನು ಚುನಾವಣೆ ಕರ್ತವ್ಯಕ್ಕೆ ನಿಯೋಜಿಸಲಾಗಿದೆ. ಉಡುಪಿ ಜಿಲ್ಲೆಯಲ್ಲಿ 5,084 ಹಾಗೂ ಚಿಕ್ಕಮಗಳೂರು ಜಿಲ್ಲೆಯಲ್ಲಿ 4,506 ಸೇರಿದಂತೆ ಒಟ್ಟು 9,590 ಮತಗಟ್ಟೆ ಸಿಬ್ಬಂದಿಗಳನ್ನು ನಿಯೋಜಿಸಲಾಗಿದೆ. ಮತಗಟ್ಟೆ ಸಿಬ್ಬಂದಿಗಳಿಗೆ ಎರಡನೇ ರ‌್ಯಾಂಡಮೈಸೇಶನ್ ಬಳಿಕ ನೇಮಕಾತಿ ಆದೇಶ ತಲುಪುವ ಮೊದಲೇ ಮೊಬೈಲಿಗೆ ಎಸ್‌ಎಂಎಸ್ ಮೂಲಕ ತರಬೇತಿ ದಿನ, ಸಮಯ ಮತ್ತು ಸ್ಥಳದ ಮಾಹಿತಿಯನ್ನು ನೀಡಲಾಗುವುದು. 

ಚುನಾವಣಾ ಸಿಬ್ಬಂದಿಗಳನ್ನು ಮತಗಟ್ಟೆಗೆ ಕರೆದೊಯ್ಯಲು 442 ವಾಹನಗಳನ್ನು ನಿಯೋಜಿಸಲಾಗಿದೆ. ಮತಗಟ್ಟೆಗಳಲ್ಲಿ ಹೆಲ್ಪ್ ಡೆಸ್ಕ್, ದಿಕ್ಸೂಚಿ(ಸೈನೇಜ್), ಸಾಲಾಗಿ ನಿಲ್ಲುವ ವ್ಯವಸ್ಥೆ, ಹೆಲ್ತ್ ಕೇರ್, ರ‌್ಯಾಂಪ್, ನೆರಳು, ಶೌಚಾಲಯ, ಕುಡಿಯುವ ನೀರು, ವೋಟರ್ ಫೆಸಿಲಿಟೇಷನ್ ಸೆಂಟರ್ ಒದಗಿಸಲು ಕ್ರಮ ಕೈಗೊಳ್ಳಲಾಗಿದೆ. 

ಲ್ಯಾಪ್‌ಟಾಪ್/ವೆಬ್ ಕಾಮ್ ಹೊಂದಿದ ವಿದ್ಯಾರ್ಥಿಗಳ ಮೂಲಕ ಇಂಟರ್‌ನೆಟ್ ಲಭ್ಯವುಳ್ಳ ಉಡುಪಿ(105), ಚಿಕ್ಕಮಗಳೂರಿನ(92) ಸಹಿತ ಒಟ್ಟು 197 ಮತಗಟ್ಟೆಗಳಲ್ಲಿ ವೆಬ್ ಕಾಸ್ಟಿಂಗ್ ನಡೆಯಲಿದೆ. ಮತದಾನ ಪ್ರಕ್ರಿಯೆ ಸುವ್ಯವಸ್ಥಿತವಾಗಿ ನಡೆಸಲು ಕೇಂದ್ರ ಸರಕಾರಿ ನೌಕರರನ್ನು ಬಳಸಿ ಅಗತ್ಯವುಳ್ಳ ಮತಗಟ್ಟೆಗಳಿಗೆ ಉಡುಪಿ: 233, ಚಿಕ್ಕಮಗಳೂರು: 510 ಸಹಿತ ಒಟ್ಟು 743 ಸೂಕ್ಷ್ಮ ವೀಕ್ಷಕರನ್ನು ನಿಯೋಜಿಸಲಾಗುವುದು. 

ಸೂಕ್ಷ್ಮ, ಅತಿ ಸೂಕ್ಷ್ಮ ಮತ್ತು ನಕ್ಸಲ್ ಸಕ್ರಿಯ ಪ್ರದೇಶಗಳ ಮತಗಟ್ಟೆಗಳಲ್ಲಿ ವೀಡಿಯೋಗ್ರಫಿ ಮಾಡಲಾಗುವುದು. ಸರಕಾರಿ ಇಲಾಖೆಗಳಲ್ಲಿರುವ ವೀಡಿಯೋ ಕ್ಯಾಮೆರಾ ಹಾಗೂ ಸರಕಾರಿ ನೌಕರರ ಬಳಿ ಇರುವ ವೀಡಿಯೋ ಕ್ಯಾಮೆರಾ(179) ಬಳಸಿಕೊಳ್ಳಲಾಗುವುದು. 

ಪಿಯುಸಿ ಪರೀಕ್ಷೆಯ ಮೌಲ್ಯಮಾಪನಕ್ಕೆ ಆಯ್ಕೆಯಾದ ಮತಗಟ್ಟೆ ಸಿಬ್ಬಂದಿಗೆ ಏ. 9ರಿಂದ 17ರ ತನಕ ಪಿಯುಸಿ ಪರೀಕ್ಷೆಯ ಉತ್ತರ ಪತ್ರಿಕೆಗಳ ಮೌಲ್ಯಮಾಪನವಿಲ್ಲ. ಉಡುಪಿಗೆ ಕೆಎಸ್‌ಆರ್‌ಪಿ: 1, ಚಿಕ್ಕಮಗಳೂರಿನಲ್ಲಿ ಬಿಎಸ್‌ಎಫ್: 2, ಸಿಐಎಸ್‌ಎಫ್: 1 ಹಾಗೂ ಕೆಎಸ್‌ಆರ್‌ಪಿ 1 ತುಕಡಿ ನಿಯೋಜಿಸಲಾಗಿದೆ ಎಂದರು. 

ಸುದ್ದಿಗೋಷ್ಠಿಯಲ್ಲಿ ಕುಮಾರ್, ಕುಂದಾಪುರ ಉಪ ವಿಭಾಗದ ಸಹಾಯಕ ಆಯುಕ್ತ ಯೋಗೀಶ್ವರ್ ಉಪಸ್ಥಿತರಿದ್ದರು. ಚುನಾವಣಾ ದೂರುಗಳಿಗೆ ಸಂಬಂಧಿಸಿ ಚುನಾವಣಾ ಸಾಮಾನ್ಯ ವೀಕ್ಷಕರಾದ ಅಮರನಾಥ ಮಲ್ಲಿಕ್(9481764925), ಚುನಾವಣಾ ವೆಚ್ಚ ವೀಕ್ಷಕರಾದ ರಂಜನಾ ಝಾ(9481754925), ಪೊಲೀಸ್ ವೀಕ್ಷಕರಾದ ಎಂ. ರವಿ(9483535038) ಸಂಪರ್ಕಿಸಬಹುದು. 

ವಿಧಾನಸಭೆ ಕ್ಷೇತ್ರ ಪುರುಷರು ಮಹಿಳೆಯರು ಒಟ್ಟು ಕುಂದಾಪುರ 89,832 98,691 1,88,529 ಉಡುಪಿ 92,441 98,327 1,90,785 ಕಾಪು 77,228 87,338 1,64,569 ಕಾರ್ಕಳ 79,060 88,589 1,67,650 ಶೃಂಗೇರಿ 76,572 77,393 1,53,969 ಮೂಡಿಗೆರೆ 78,094 78,833 1,56,935 ಚಿಕ್ಕಮಗಳೂರು 99,670 97,867 1,97,554 ತರೀಕೆರೆ 85,813 80,704 1,66524 ಒಟ್ಟು 6,78,710 7,07,742 13,86,515
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com