ದೇವಾಲಯ ಸನ್ಮಾರ್ಗ ತೋರುವ ದೀಪಸ್ತಂಭ: ಪೇಜಾವರ ಶ್ರೀ

ಬೈಂದೂರು: ಸಮುದ್ರದಲ್ಲಿ ಚಲಿಸುವ ನಾವೆಗಳಿಗೆ ದಡದಲ್ಲಿರುವ ದೀಪಸ್ತಂಭಗಳು ದಾರಿ ತೋರುತ್ತವೆ. ಮನುಷ್ಯನೂ ಸಂಸಾರ ಸಾಗರದಲ್ಲಿ ಸನ್ಮಾರ್ಗವೆಂಬ ದಡ ತಲಪಲು ದಾರಿ ಹುಡುತ್ತಾನೆ. ಇಲ್ಲಿ ದೇವಸ್ಥಾನಗಳು ಅವನಿಗೆ ದಾರಿ ತೋರುವ ಕೆಲಸ ಮಾಡುತ್ತವೆ. ಅವು ತೋರಿದ ದಾರಿಯಲ್ಲಿ ಸಾಗುವುದು ಎಲ್ಲರ ಕರ್ತವ್ಯ. ಅದರಿಂದ ಮಾತ್ರ ಹಿಂದೂ ಧರ್ಮ, ಸಂಸ್ಕೃತಿ ಉಳಿಯುತ್ತದೆ ಎಂದು ಪೇಜಾವರ ಶ್ರೀ ವಿಶ್ವೇಶ ತೀರ್ಥ ಸ್ವಾಮೀಜಿ ಹೇಳಿದರು. 
     ಕಿರಿಮಂಜೇಶ್ವರ ಗ್ರಾಮದ ನಾಗೂರು ಒಡೆಯರ ಮಠ ಶ್ರೀ ಗೋಪಾಲಕೃಷ್ಣ ದೇವಸ್ಥಾನದ ನೂತನ ಕಟ್ಟಡದ ಲೋಕಾರ್ಪಣೆ, ಅಷ್ಟಬಂಧ ಪ್ರತಿಷ್ಠಾಪನಾ ವಿಧಿಗಳ ಅಂಗವಾಗಿ ನಡೆದ ಧಾರ್ಮಿಕ ಸಭೆಯಲ್ಲಿ ಆಶೀರ್ವಚನ ನೀಡಿದರು. 
        ಗೋಪಾಲಕೃಷ್ಣ ಶೀಘ್ರ ಒಲಿಯುವ ದೇವರು. ಭಕ್ತಿಯಿುಂದ ಏನನ್ನು ಕೊಟ್ಟರೂ ಸ್ವೀಕರಿಸುವವ. ಅವನಲ್ಲಿ ಅಂತರ ರಹಿತವಾಗಿ ಎಲ್ಲರನ್ನು ಆಕರ್ಷಿಸುವ ಶಕ್ತಿ ಇದೆ. ಅದು ಕೆಳಗಿರುವವರನ್ನು ಮೇಲಕ್ಕೆತ್ತುವ ಆಕರ್ಷಣಾ ಶಕ್ತಿ. ಅವನ ಆರಾಧನೆಯಿಂದ ಆಧ್ಯಾತ್ಮಿಕ ಜಾಗೃತಿ, ಭೌತಿಕ ಉನ್ನತಿ ಸಾಧಿಸಲಾಗುತ್ತದೆ ಎಂದರು. 
    ಪೇಜಾವರ ಕಿರಿಯ ಸ್ವಾಮೀಜಿ ವಿಶ್ವಪ್ರಸನ್ನ ತೀರ್ಥರು ಬದುಕಿನಲ್ಲಿ ಸುಖ ಕಷ್ಟಗಳು ತಪ್ಪಿದ್ದಲ್ಲ. ಕಷ್ಟ ಕೋಟಲೆಗಳನ್ನು ದೂರ ಮಾಡಲು ಮನುಷ್ಯ ಪ್ರಯತ್ನದೊಂದಿಗೆ ದೈವ ಕೃಪೆಯೂ ಬೇಕು. ಅದಕ್ಕಾಗಿ ದೇವರ ಆರಾಧನೆ ಮಾಡಬೇಕು ಎಂದರು. 
       ಧಾರ್ಮಿಕ ಮುಂದಾಳು ಯು. ಚಂದ್ರಶೇಖರ ಹೊಳ್ಳ ಅಧ್ಯಕ್ಷತೆ ವಹಿಸಿದ್ದರು. ಕಿರಿಮಂಜೇಶ್ವರ ಅಗಸ್ತ್ಯೇಶ್ವರ ದೇವಸ್ಥಾನದ ಆಡಳಿತ ಧರ್ಮದರ್ಶಿ ಕೆ. ಉಮೇಶ ಶ್ಯಾನುಭಾಗ್, ಉಪ್ಪುಂದ ವಲಯ ದ್ರಾವಿಡ ಬ್ರಾಹ್ಮಣ ಪರಿಷತ್ ಅಧ್ಯಕ್ಷ ಯು. ರಾಜಾರಾಮ ಭಟ್, ಕೀರ್ತನಕಾರ ಹೇರೂರು ನಾರಾಯಣ ಬಿಡುವಾಳ, ತ್ರಾಸಿಯ ಶಾರದಾ ಡಿ. ಬಿಜೂರು, ನಿವೃತ್ತ ಪ್ರಾಧ್ಯಾಪಕ ಕೊಡೇರಿ ವಾಸುದೇವ ಕಾರಂತ, ಗ್ರಾಪಂ ಅಧ್ಯಕ್ಷ ಸುಬ್ಬಣ್ಣ ಶೆಟ್ಟಿ, ಉದ್ಯಮಿ ನಾರಾಯಣ ಪೂಜಾರಿ ಅಳ್ಳೊಳ್ಳಿ, ನಾನಾ ಭಜನಾ ಮಂಡಳಿಗಳ ಶಂಕರ ಎಂ. ಕುಂದರ್, ರತ್ನಾಕರ ತಗ್ಗಿನಮನೆ, ಕುಳ್ಳಿ ಗೋವಿಂದ ಖಾರ್ವಿ, ಅರ್ಚಕ ಕುಟುಂಬದ ಲಲಿತಾ ಕೃಷ್ಣ ಉಡುಪ, ಮಂಜುನಾಥ ಉಡುಪ, ಜಗನ್ನಾಥ ಉಡುಪ, ರತ್ನಾಕರ ಉಡುಪ ಉಪಸ್ಥಿತರಿದ್ದರು. 

ವಿಶ್ವನಾಥ ಉಡುಪ ಸ್ವಾಗತಿಸಿದರು, ಎಂ. ಗೋವಿಂದ ನಿರೂಪಿಸಿದರು. ದೇವಾಲಯದ ಶಿಲ್ಪಿ ಮತ್ತು ನೆರವು ನೀಡಿದವರನ್ನು ಗೌರವಿಸಲಾಯಿತು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com