ವೈಯಕ್ತಿಕ ಸ್ವಾರ್ಥ ಸಾಧನೆಗಾಗಿ ಕಾನೂನು ಕೈಗೆತ್ತಿಕೊಳ್ಳಬೇಡಿ: ಎಸಿ

ಕುಂದಾಪುರ: ತಮ್ಮ ವೈಯಕ್ತಿಕ ಸ್ವಾರ್ಥ ಸಾಧನೆಗಾಗಿ ಸಮುದಾಯವನ್ನು ಬಲಿ ಕೊಡುವವರ ವಿರುದ್ಧ ಪ್ರತಿಯೊಬ್ಬರೂ ಜಾಗ್ರತೆ ವಹಿಸಬೇಕಾಗಿದೆ. ಕಾನೂನು ಕೈಗೆತ್ತಿಕೊಳ್ಳುವುದು ಸಲ್ಲ. ಶಾಂತಿ ಕಾಪಾಡುವ ನಿಟ್ಟಿನಲ್ಲಿ ಪ್ರತಿಯೊಬ್ಬ ನಾಗರಿಕರು ಸಹಕರಿಸಬೇಕು. ಎಲ್ಲ ಸಮಸ್ಯೆಗಳಿಗೂ ಕಾನೂನಿನ ಚೌಕಟ್ಟಿನಲ್ಲಿ ಪರಿಹಾರ ಕಂಡುಕೊಳ್ಳಲು ಸಾಧ್ಯವಿದೆ ಎಂದು ಕುಂದಾಪುರ ಸಹಾಯಕ ಕಮಿಷನರ್ ಯೋಗೇಶ್ವರ ಹೇಳಿದರು.

     ಇಲ್ಲಿನ ತಾಪಂ ಸಭಾಂಗಣದಲ್ಲಿ ಕೋಡಿ, ಹಳೆಅಳಿವೆ, ಕೋಟೇಶ್ವರ ಭಾಗದಲ್ಲಿ ಕಳೆದ ಮೂರ್ನಾಲ್ಕು ದಿನಗಳಿಂದ ನಡೆಯುತ್ತಿರುವ ಅಹಿತಕರ ಘಟನೆ ಹಿನ್ನೆಲೆಯಲ್ಲಿ ಮಂಗಳವಾರ ಏರ್ಪಡಿಸಲಾಗಿದ್ದ ಶಾಂತಿ ಸಮಿತಿ ಸಭೆಯಲ್ಲಿ ಮಾತನಾಡಿದರು. 

    ಪ್ರತ್ಯೇಕತಾ ಭಾವನೆ ಮೂಡಿಸುವ ಹೇಳಿಕೆಗಳಿಗೆ ಕಡಿವಾಣ ಹಾಕಬೇಕು. ಕೋಡಿ ಅತ್ಯಂತ ಸುಂದರ ಪ್ರದೇಶ. ಜನರು ಶಾಂತಿ ಬಯಸುವವರು. ಇಲ್ಲಿ ಅಶಾಂತಿಗೆ ಯಾರೂ ಎಡೆಮಾಡಿಕೊಡಬಾರದು ಎಂದು ಅವರು ಮನವಿ ಮಾಡಿಕೊಂಡರು. 

     ಹಿರಿಯರಾದ ಕೆ.ಎಸ್. ಹಮೀದ್ ಸಲಹೆ ನೀಡಿ ಅಪರಾಧ ಕೃತ್ಯ ಎಸಗುವವರ ವಿರುದ್ಧ ಇಲಾಖೆ ಕಠಿಣ ಕ್ರಮ ಜರುಗಿಸಬೇಕು. ಸಮುದಾಯ, ಮುಖಂಡರನ್ನು ಕಾಯುವ ಮೊದಲು ಅವರು ಯಾವ ಸಮುದಾಯದವರೇ ಆಗಿರಲಿ, ಬೇರು ಮಟ್ಟದಲ್ಲಿಯೇ ಅಪರಾಧ ಚಟುವಟಿಕೆಗೆ ಕಡಿವಾಣ ಹಾಕುವ ಕೆಲಸ ಆಗಬೇಕು ಎಂದರು. 

     ಪುರಸಭೆ ಸದಸ್ಯ ರಾಜೇಶ್ ಕಾವೇರಿ, ಹಿಂದೂ ಜಾಗರಣ ವೇದಿಕೆಯ ಸಂಚಾಲಕ ಶಂಕರ ಅಂಕದಕಟ್ಟೆ, ಆಸೀಫ್ ಕೋಟೇಶ್ವರ, ಆರೀಫ್ ಕೋಡಿ, ಅಬ್ಬು ಸಾಹೇಬ್ ಕುಂದಾಪುರ, ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಪ್ರಮುಖ ಸುಬ್ರಹ್ಮಣ್ಯ ಹೊಳ್ಳ, ಕೋಡಿ ಅಬ್ದುಲ್ಲ, ರಿಯಾಜ್ ಕೋಡಿ, ಅಲ್ತಾಫ್ ಸಲಹೆ ಸೂಚನೆ ನೀಡಿದರು. 

    ಸಮಸ್ಯೆ ಉದ್ಭವಿಸಿದಾಗ ಶಾಂತಿ ಸಭೆ ಆಯೋಜನೆ ಮಾಡುವುದಕ್ಕಿಂತ ಶಾಂತಿಗಾಗಿ ಏನು ಮಾಡಬಹುದು ಎಂಬ ಬಗ್ಗೆ ಯೋಚಿಸಬೇಕು. ಅದೇ ರೀತಿ ತೊಂದರೆಯಾದ ಪ್ರದೇಶಗಳಲ್ಲಿ ಶಾಂತಿ ಸಭೆ ನಡೆಸಿ ಜನರಲ್ಲಿ ಧೈರ್ಯ ತುಂಬಿಸುವ ಕೆಲಸ ನಡೆಸಬೇಕು ಎಂದು ಮುಖಂಡರು ಸಲಹೆ ನೀಡಿದರು. ಕುಂದಾಪುರ ಡಿವೈಎಸ್ಪಿ ಸಿ.ಬಿ. ಪಾಟೀಲ್, ಕುಂದಾಪುರ ಪೊಲೀಸ್ ವೃತ್ತ ನಿರೀಕ್ಷಕ ದಿವಾಕರ್, ಪಿಎಸ್‌ಐ ಪ್ರಸಾದ್ ಕವರಿ ಉಪಸ್ಥಿತರಿದ್ದರು.

Kundapura News, Live Updates, Breaking News, News Live, Kundapura Police
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com