ಮಕ್ಕಳ ಮೇಲಿನ ದಾಳಿ ಅಮಾನವೀಯ: ದಾಮೋದರ ಆಚಾರ್ಯ

ಕುಂದಾಪುರ: ಬಾಲ ಕಾರ್ಮಿಕ ಕಾಯಿದೆ, ದಾಳಿ ಮತ್ತು ರಕ್ಷಣೆಯ ಹೆಸರಿನಲ್ಲಿ ಕಾರ್ಮಿಕ ಇಲಾಖೆ ತೆಗೆದುಕೊಳ್ಳುತ್ತಿರುವ ಕ್ರಮಗಳು ಅಮಾನವೀಯ ಎಂದು ದಿ ಕನ್ಸರ್ನ್ಡ್ ಫಾರ್ ವರ್ಕಿಂಗ್ ಚಿಲ್ಡ್ರನ್ ಕಾರ್ಯಕಾರಿ ನಿರ್ದೇಶಕ ಬಿ. ದಾಮೋದರ ಆಚಾರ್ಯ ತಿಳಿಸಿದ್ದಾರೆ. 

ಇಲ್ಲಿನ ಪ್ರೆಸ್‌ಕ್ಲಬ್‌ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಅಪರಾಧ ಎಸಗದ ಮಗುವನ್ನು ಅಪರಾಧಿ ಸ್ಥಾನದಲ್ಲಿ ನಿಲ್ಲಿಸುವುದು, ಅವರ ಪೋಷಕರನ್ನು ಕ್ರಿಮಿನಲ್‌ಗಳಂತೆ ಕಾಣಿಸುವುದು, ಪೋಷಕರ ಒಪ್ಪಿಗೆ ಪಡೆಯದೆ ನೇರವಾಗಿ ಪುನರ್ವಸತಿ ಕೇಂದ್ರಕ್ಕೆ ರವಾನಿಸುವ ಮೂಲಕ ಮಕ್ಕಳ ಹಕ್ಕುಗಳ ಮೇಲೆ ಚೆಲ್ಲಾಟ ಆಡಲಾಗುತ್ತಿದೆ. ಇದರ ವಿರುದ್ಧ ಸಿಡಬ್ಲ್ಯೂಸಿ ಕಾನೂನು ಸಮರ ನಡೆಸುವುದಲ್ಲದೆ ನಾಗರಿಕ ಸಮಾಜ ಜಾಗೃತಿ ಕಾಣುವ ನಿಟ್ಟಿನಲ್ಲಿ ಹೋರಾಟ ನಡೆಸಲಿದೆ ಎಂದು ಸ್ಪಷ್ಟಪಡಿಸಿದರು. 

ವಿದೇಶಗಳಲ್ಲಿ ಬೇಸಿಗೆಯಲ್ಲಿ ಸಮ್ಮರ್ ವರ್ಕಿಂಗ್ ಕಲ್ಚರ್ ಕುರಿತು ಮಾಹಿತಿ ನೀಡಲಾಗುತ್ತದೆ. ಶಾಲಾ ರಜಾ ದಿನಗಳಲ್ಲಿ ದುಡಿಮೆ ಮಾಡಿ ಶಿಕ್ಷಣ ಪಡೆದು ಉನ್ನತ ಸ್ಥಾನ ಕಂಡುಕೊಂಡಿದ್ದಾರೆ. ಮಕ್ಕಳ ಸ್ವಾಭಿಮಾನಕ್ಕೆ ಧಕ್ಕೆ ತರುವ, ದಾಳಿ ಹೆಸರಿನಲ್ಲಿ ಪೋಷಕರನ್ನು ಹಿಂಸಿಸುವ ಪ್ರವೃತ್ತಿ ಸಮಾಜದಲ್ಲಿ ಮುಜುಗರ ಸೃಷ್ಟಿಸಿದೆ. ಕುಂದಾಪುರದ ಐಸ್‌ಕ್ರೀಂ ಪಾರ್ಲರ್‌ವೊಂದರಲ್ಲಿ ನಡೆದ ದಾಳಿ ಬಾಲಕನ ಮೇಲಾದ ಮಾನಸಿಕ ಕಿರುಕುಳ, ಪೋಷಕರಿಗೆ ನಡೆಸಲಾದ ಅವಮಾನ ಅವಲೋಕಿಸಿದಾಗ ಕಾರ್ಮಿಕ ಇಲಾಖಾ ಅಧಿಕಾರಿಗಳು ಬಾಲನ್ಯಾಯ ಕಾಯಿದೆಯ ಪ್ರಮುಖ ಅಂಶಗಳನ್ನೇ ಗಾಳಿಗೆ ತೂರಿರುವುದು ಸ್ಪಷ್ಟವಾಗಿ ಗೋಚರವಾಗುತ್ತಿದೆ. 

ಆರ್ಥಿಕ ಸಮಸ್ಯೆ ಇರುವ ಮಕ್ಕಳು ರಜಾ ದಿನಗಳಲ್ಲಿ ಮುಂದಿನ ಶಿಕ್ಷಣಕ್ಕೆ ಪೂರಕವಾಗಿ ಅಗತ್ಯವಿರುವ ಹಣಕಾಸು ಸಂಗ್ರಹಿಸಲು ಅಪಾಯವಿಲ್ಲದ ಸ್ಥಳಗಳಲ್ಲಿ ಸ್ವ ಇಚ್ಛೆಯಿಂದ ಕೆಲಸ ಮಾಡುತ್ತಿರುವಾಗ ದಾಳಿ ನಡೆಯುತ್ತಿದೆ. ಕುಂದಾಪುರದ ನಗರದಲ್ಲಿ ಕೆಲವು ದಿನಗಳ ಹಿಂದೆ ಇದೇ ರೀತಿಯ ಘಟನೆ ನಡೆದಿದ್ದು ಬಾಲಕ ಮತ್ತು ಆತನ ಪೋಷಕರು ಮಾನಸಿಕ ಕ್ಷೋಭೆಗೆ ತುತ್ತಾಗಿದ್ದಾರೆ. ಈ ದಾಳಿ ಏಪ್ರಿಲ್, ಮೇ ತಿಂಗಳಲ್ಲಿ ಹೆಚ್ಚಾಗಿ ನಡೆಯುತ್ತಿದೆ. ಜೂನ್ ನಂತರ ನಡೆಯುತ್ತಿಲ್ಲ. ಅಪಾಯಕಾರಿ ಸ್ಥಳಗಳಲ್ಲಿ ಕೆಲಸ ಮಾಡುವ ಮಕ್ಕಳ ಸಂರಕ್ಷಣೆ ಮಾಡುವ ಕೆಲಸ ಆಗುತ್ತಿಲ್ಲ. ದಾಳಿಯ ಉದ್ದೇಶವೇ ಕಾನೂನು ಬಾಹಿರವಾಗಿದೆ. ಮಕ್ಕಳ ಹಕ್ಕುಗಳ ಮೇಲೆ ಪ್ರಹಾರ ನಡೆಸಲಾಗುತ್ತಿದೆ. ಈ ದಾಳಿಯ ಹಿಂದೆ ಯಾರ‌್ಯಾರು ಇದ್ದಾರೆ ಅನ್ನುವುದಕ್ಕಿಂತ ಮುಖ್ಯವಾಗಿ ಇಂತಹ ಅಮಾನವೀಯ ದಾಳಿ ತಕ್ಷಣ ನಿಲ್ಲಬೇಕು ಎಂದರು. 


ಕಾಳಜಿ ಮತ್ತು ರಕ್ಷಣೆಯ ಅವಶ್ಯಕತೆ ಇರುವ ಮಕ್ಕಳನ್ನು ಅಪಾಯದಿಂದ ರಕ್ಷಿಸಿದ ನಂತರ ಮೊದಲು ಅವರನ್ನು ಪಾಲಕರೊಂದಿಗೆ ಸೇರಿಸುವ ಪ್ರಯತ್ನ ಆಗಬೇಕು. ಆದರೆ ಪಾಲಕರೇ ದಾಖಲೆ ಸಹಿತ ಬಂದು ಕೇಳಿದರೂ ಮಗುವನ್ನು ಅವರೊಂದಿಗೆ ಕಳುಹಿಸಲಾಗುತ್ತಿಲ್ಲ. ದಾಳಿ ಮತ್ತು ರಕ್ಷಣೆಯ ಹೆಸರಿನಲ್ಲಿ ಮಕ್ಕಳನ್ನು ವಶಪಡಿಸಿಕೊಳ್ಳುವುದು ಒಂದು ಪರಿಹಾರವೇ ಅಲ್ಲ. ಮಕ್ಕಳಿಗೆ ಯಾವುದೇ ದೈಹಿಕ, ಮಾನಸಿಕ ಹಿಂಸೆಯಾಗದಂತೆ ಅವರನ್ನು ರಕ್ಷಿಸಲು ಮಕ್ಕಳ ಸ್ನೇಹಿಯಾಗಿರುವ ಪರ್ಯಾಯ ಬೇರೆ ವಿಧಾನಗಳನ್ನು ಆಲೋಚಿಸಬೇಕು ಮತ್ತು ಅನುಸರಿಸಬೇಕು. ಈ ಕುರಿತು ಜಿಲ್ಲಾಡಳಿತ ಮಕ್ಕಳ ಸ್ನೇಹಿ ನಿರ್ಧಾರ ತೆಗೆದುಕೊಳ್ಳಬೇಕು. ಅದರೊಂದಿಗೆ ಸಂಸ್ಥೆಯು ಕಾರ್ಮಿಕ ಇಲಾಖೆ ವಿರುದ್ಧ ದಾಳಿ ಮತ್ತು ರಕ್ಷಣೆ ಹೆಸರಿನಲ್ಲಿ ನಡೆಯುವ ಘಟನೆಗಳನ್ನು ಖಂಡಿಸಿ ಸಾರ್ವಜನಿಕ ಹಿತಾಸಕ್ತಿ ದಾವೆ ಹೂಡಲಿದೆ. ಸಮಾಜದಲ್ಲಿ ಈ ಕುರಿತು ದೊಡ್ಡ ಮಟ್ಟದ ಜಾಗೃತಿಯಾಗಬೇಕು. ಈ ವಿಷಯ ಸಾರ್ವಜನಿಕ ಚರ್ಚೆಯಾಗಬೇಕೆಂಬುದೇ ಉದ್ದೇಶ ಎಂದು ಸ್ಪಷ್ಟಪಡಿಸಿದರು. 
ಸುದ್ದಿಗೋಷ್ಠಿಯಲ್ಲಿ ಸಿಡಬ್ಲೂಸಿ ಸಂಸ್ಥೆಯ ಪ್ರಮುಖ ವೆಂಕಟೇಶ್ ಉಪಸ್ಥಿತರಿದ್ದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com