ಭಗವಂತನನ್ನು ಭಜನೆ ಮೂಲಕ ಒಲಿಸಿಕೊಳ್ಳಲು ಸಾಧ್ಯ: ಷ್ಣಪ್ರಸಾದ ಅಡ್ಯಂತಾಯ

ಬೈಂದೂರು: ಇಂದಿನ ವೈಜ್ಞಾನಿಕ ಯುಗದಲ್ಲಿಯೂ ಧಾರ್ಮಿಕ ಆಚರಣೆಗಳು ಪ್ರತಿ ಹಳ್ಳಿಗಳಲ್ಲಿ ವಿಜೃಂಬಿಸುತ್ತಿದೆ. ಹಣದ ಶ್ರೀಮಂತಿಕೆ ಇದ್ದರೆ ಸಾಲದು, ಹೃದಯ ಶ್ರೀಮಂತಿಕೆಯೂ ಬೇಕು. ಭಜನೆಯಿಂದ ವಿಭಜನೆಯಲ್ಲ. ಪೂಜೆ, ಮಂತ್ರೋಚ್ಚರಣೆ ಇಲ್ಲದೇ ದೇವರನ್ನು ಭಜನೆಯ ಮೂಲಕ ತನ್ನತ್ತ ಒಲಿಸಿಕೊಳ್ಳಲು ಸಾಧ್ಯ. ಹರಿನಾಮ ಸ್ಮರಣೆಯಿಂದ ಒಂದು ಕ್ಷಣವಾದರೂ ದೇವರ ಸಾಕ್ಷಾತ್ಕಾರ ಪಡೆಯಬಹುದು ಎಂದು ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಳದ ಆಡಳಿತ ಧರ್ಮದರ್ಶಿ ಕೃಷ್ಣಪ್ರಸಾದ ಅಡ್ಯಂತಾಯ ಹೇಳಿದರು. 

ಬಿಜೂರು ಮೂರ್ಗೋಳಿಹಿತ್ಲು ಶ್ರೀ ನಂದಿಕೇಶ್ವರ ದೇವಾಲಯದ ಪುನರ್ ಪ್ರತಿಷ್ಠಾ ಮಹೋತ್ಸವ ಹಾಗೂ ಅಖಂಡ ಭಜನಾ ಸಪ್ತಾಹದ ಧಾರ್ಮಿಕ ಸಭಾ ಕಾರ್ಯಕ್ರಮದಲ್ಲಿ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. 

ಜಾತಿ-ಮತ ಭೇದವಿಲ್ಲದೆ ಧಾರ್ಮಿಕ ಕಾರ್ಯದಲ್ಲಿ ಎಲ್ಲ ವರ್ಗದ ಜನರು ಸಂಘಟನಾತ್ಮಕವಾಗಿ ತಮ್ಮನ್ನು ತೊಡಗಿಸಿಕೊಂಡರೆ ಜೀವನ ಸಾಕ್ಷಾತ್ಕಾರವಾಗುತ್ತದೆ. ಧಾರ್ಮಿಕ ಕೇಂದ್ರಗಳಿಗೆ ಆಧುನಿಕ ಯುಗದ ಯಾವುದೇ ಲೇಪನ ಹಚ್ಚಬಾರದು ಎಂದ ಅವರು, ಉತ್ತಮ ಯೋಚನೆಯಿಂದ ಯೋಜನೆ ರೂಪಿಸಿ ಅದರಿಂದ ಸಾಧನೆ ಮಾಡಿದಾಗ ಸಂತೃಪ್ತಿಯ ಮನೋಭಾವನೆ ಸಿಗುತ್ತದೆ ಎಂದರು. 

ಅನಿವಾಸಿ ಭಾರತೀಯ ಬಿ.ಜಿ. ಮೋಹನದಾಸ, ಉದ್ಯಮಿಗಳಾದ ಗೋವಿಂದ ಪೂಜಾರಿ ಬಿಜೂರು, ಸದಾಶಿವ ಗಾಣಿಗ, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಯೋಜನಾ ನಿರ್ದೇಶಕ ದುಗ್ಗೇಗೌಡ, ಕರ್ನಾಟಕ ಖಾರ್ವಿ ಯಾನೆ ಹರಿಕಾಂತ ಮಹಾಜನ ಸಂಘದ ಅಧ್ಯಕ್ಷ ಎಂ.ಎಸ್. ಖಾರ್ವಿ, ಡಾ. ವಿಷ್ಣು ಪ್ರಭು, ನಿವೃತ್ತ ಮುಖ್ಯಶಿಕ್ಷಕ ವೈ. ಮುತ್ತ, ಉಪ್ರಳ್ಳಿ ಶ್ರೀಕಾಳಿಕಾಂಬ ದೇವಳದ ಆಡಳಿತ ಮೊಕ್ತೇಸರ ಸುಧಾಕರ ಆಚಾರ್ಯ, ಉಪ್ಪುಂದ ಶ್ರೀ ದುರ್ಗಾಪರಮೇಶ್ವರಿ ದೇವಳದ ಆಡಳಿತ ಧರ್ಮದರ್ಶಿ ಜಯರಾಮ ಶೆಟ್ಟಿ ಉಪಸ್ಥಿತರಿದ್ದರು. 

ಭಜನಾ ಕಾರ್ಯದಲ್ಲಿ ಈವರೆಗೆ ತೊಡಗಿಸಿಕೊಂಡ 30 ಹಿರಿಯ ಮಹನೀಯರನ್ನು ಗೌರವಿಸಲಾಯಿತು. ಮಂಡಳಿ ಅಧ್ಯಕ್ಷ ಕೃಷ್ಣಮೂರ್ತಿ ಪ್ರಾಸ್ತಾವಿಕ ಮಾತನಾಡಿದರು. ನಾರಾಯಣ ದೇವಾಡಿಗ ಸ್ವಾಗತಿಸಿದರು. ನಾಗರಾಜ ವಂದಿಸಿದರು. ನಿಕಟ ಪೂರ್ವಾಧ್ಯಕ್ಷ ಜನಾರ್ದನ್ ಟೀಚರ್ ಕಾರ್ಯಕ್ರಮ ನಿರೂಪಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com