ಭೂ ಕಂಪನ ಜಲವಿಸ್ಮಯಕ್ಕೆ ಕಾರಣ: ಭೂ ವಿಜ್ಞಾನಿಗಳ ಸ್ಪಷ್ಟನೆ

ಪರ್ಕಳ ಒಂದಿಡೀ ಪ್ರದೇಶದ ಬಾವಿ, ಕೆರೆಗಳಲ್ಲಿ ಏಕಾಏಕಿಯಾಗಿ ನೀರಿನ ಮಟ್ಟ ಹೆಚ್ಚಲು ಭೂಮಿಯಡಿಯಲ್ಲಿ ಸಣ್ಣ ಭೂಕಂಪನ ಉಂಟಾಗಿರುವುದೇ ಕಾರಣ ಎಂದು ಭೂ ವಿಜ್ಞಾನಿಗಳು ತೀರ್ಮಾನಕ್ಕೆ ಬಂದಿದ್ದು, ಇನ್ನಷ್ಟು ಸಂಶೋಧನೆ ನಡೆಸಲು ನಿರ್ಧರಿಸಿದ್ದಾರೆ. 

ಮಂಗಳೂರಿನ ನಿವೃತ್ತ ಗಣಿ ಮತ್ತು ಭೂ ವಿಜ್ಞಾನಿ ಡಾ. ಬಿ.ಎಂ. ರವೀಂದ್ರ, ಉಡುಪಿಯ ಹಿರಿಯ ಭೂವಿಜ್ಞಾನಿ ಎ.ಎಂ. ನಿರಂಜನ್, ಭೂವಿಜ್ಞಾನಿ ಲತಾ ಕುಲಕರ್ಣಿ, ಎಂಜಿನಿಯರ್ ನಂದಾ ಮೂರ್ತಿ ಪರ್ಕಳದ ಜಲವಿಸ್ಮಯ ಪ್ರದೇಶಗಳಿಗೆ ಭೇಟಿ ನೀಡಿ ಪರಿಶೀಲಿಸಿದ ಬಳಿಕ ವಿಜಯ ಕರ್ನಾಟಕಕ್ಕೆ ತಿಳಿಸಿದ್ದಾರೆ. 

ಕರಾವಳಿಯು ಸೂಕ್ಷ್ಮ ಪ್ರದೇಶವಾಗಿದ್ದು, ಮಲ್ಪೆಯಿಂದ ಆಗುಂಬೆ ಕಡೆಗೆ ಒಂದು ದುರ್ಬಲ ವಲಯ ಇದೆ. ಇಲ್ಲಿ ಆಗಾಗ ಸಣ್ಣ ಕಂಪನ ಆಗುತ್ತಿರುತ್ತದೆ. ಎರಡು ವರ್ಷಗಳ ಹಿಂದೆ ತೊಟ್ಟಂನಲ್ಲಿ, ಅದಕ್ಕೂ ಮೊದಲು ಮಣಿಪಾಲದಲ್ಲಿ ಕಂಪನದ ಅನುಭವ ಆಗಿತ್ತು. ಪರ್ಕಳ ಸುತ್ತಮುತ್ತ ಜನರ ಅರಿವಿಗೆ ಬಾರದಷ್ಟು ಸಣ್ಣ ಕಂಪನ ಆಗಿರಬಹುದು. ಈ ರೀತಿ ಕಂಪನ ಉಂಟಾದಾಗ ಅಂತರ್ಜಲದ ಪದರ ವ್ಯತ್ಯಯಗೊಂಡು ಈ ರೀತಿ ಒಂದು ಕಡೆ ನೀರು ಹೆಚ್ಚಾಗುವುದು, ಇನ್ನೊಂದು ಕಡೆ ಕಡಿಮೆಯಾಗುವುದು ಸಂಭವಿಸುತ್ತದೆ. ಅಲ್ಲದೆ ಕಂಪನವಾದಾಗ ಭೂಮಿಯ ಮೇಲ್ಪದರದಲ್ಲಿ ಬಿರುಕು ಸೃಷ್ಟಿಯಾಗಿ ಎತ್ತರದ ಪ್ರದೇಶದ ನೀರು ತಗ್ಗು ಪ್ರದೇಶಕ್ಕೆ ಹರಿದು ಬರುತ್ತದೆ. ಆಗ ಎತ್ತರ ಪ್ರದೇಶದ ನೀರಿನ ಸೆಳೆ ಖಾಲಿಯಾಗುವವರೆಗೆ ನೀರು ಉಕ್ಕೇರಿ ಆನಂತರ ನಿಲ್ಲುತ್ತದೆ ಎನ್ನುತ್ತಾರೆ ವಿಜ್ಞಾನಿಗಳು. 

ಸೂಕ್ಷ್ಮ ಪ್ರದೇಶದಲ್ಲಿ ಎಚ್ಚರ: ನೀರು ಏರಿರುವ ಮತ್ತು ಸುತ್ತಲಿನ ಪ್ರದೇಶಗಳನ್ನು ಸೂಕ್ಷ್ಮ ಪ್ರದೇಶ ಎಂದೇ ಗುರುತಿಸಬೇಕು. ಮತ್ತು ಬೃಹತ್ ಕಟ್ಟಡಗಳನ್ನು ನಿರ್ಮಿಸುವ ಮೊದಲು ಎಚ್ಚರಿಕೆ ವಹಿಸಬೇಕು ಎಂದು ಹೇಳಿದ್ದಾರೆ. 

ಶುದ್ಧ ಅಂತರ್ಜಲ: ಉಕ್ಕೇರಿದ ನೀರು ಶುದ್ಧ ಅಂತರ್ಜಲ ಎಂದು ವಿಜ್ಞಾನಿಗಳ ತಂಡ ಖಾತರಿಪಡಿಸಿದೆ. ಎರಡು ಬಾಟಲಿ ನೀರನ್ನು ಬೆಂಗಳೂರಿನ ಪ್ರಯೋಗಾಲಯಕ್ಕೆ ಕಳುಹಿಸಿದೆ. ಕೆಳಪರ್ಕಳ, ದೇವಿನಗರ, ಬೈದಬೆಟ್ಟು, ಈಶ್ವರನಗರದಲ್ಲಿ ಬಾವಿ, ಕೆರೆಗಳನ್ನು ವೀಕ್ಷಿಸಿದರಲ್ಲದೆ, ಸ್ಥಳೀಯರ ಜತೆ ಮಾತನಾಡಿ, ಅನುಭವಗಳನ್ನು ಕೇಳಿಸಿಕೊಂಡರು. ಆನಂತರ ನಗರಸಭೆಯ ನೀರಿನ ರೇಚಕಕ್ಕೆ ಭೇಟಿ ನೀಡಿ ಸೋರಿಕೆ ಇದೆಯೇ ಎಂದು ಪರಿಶೀಲಿಸಿದರು. 

ರಿಕ್ಟರ್ ಮಾಪಕ ಬೇಕು: ಗೌರಿಬಿದನೂರು ಕೇಂದ್ರದಲ್ಲಿರುವ ರಿಕ್ಟರ್ ಮಾಪಕದಲ್ಲಿ ರಾಜ್ಯದ ಯಾವುದೇ ಭಾಗದಲ್ಲಿ ನಡೆಯುವ ಭೂ ಕಂಪನವೂ ದಾಖಲಾಗುತ್ತದೆ. ಆದರೆ, ಅತಿ ಸಣ್ಣ ಕಂಪನಗಳು ಹತ್ತಿರದ ಜಿಲ್ಲೆಗಳಲ್ಲಿ ಮಾತ್ರ ದಾಖಲಾಗುತ್ತದೆ. ದೂರದ ಪ್ರದೇಶದ್ದು ದಾಖಲಾಗುವುದು ಕಷ್ಟ. ಕರಾವಳಿ ಪ್ರದೇಶದಲ್ಲೂ ಭೂಕಂಪನ ದುರ್ಬಲ ವಲಯ ಇರುವುದರಿಂದ ಇದನ್ನು ಸೂಕ್ಷ್ಮ ಪ್ರದೇಶ ಎಂದು ಪರಿಗಣಿಸಿ ರಿಕ್ಟರ್ ಮಾಪಕ ಅಳವಡಿಸಬೇಕು. ಆಗ ಅತಿ ಸಣ್ಣ ಕಂಪನಗಳೂ ಅದರಲ್ಲಿ ದಾಖಲಾಗುತ್ತದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. 

* ನಮ್ಮ ಈವರೆಗಿನ ಅಧ್ಯಯನ ಪ್ರಕಾರ ಸಣ್ಣ ಭೂಕಂಪನ ಉಂಟಾಗಿ ನೀರಿನ ಒರತೆ ಕಾಣಿಸಿಕೊಂಡಿದೆ. ಬೈದಬೆಟ್ಟಿನಂತ ಸ್ವಲ್ಪ ಎತ್ತರ ಪ್ರದೇಶದಲ್ಲಿ ನೀರಿನ ಒರತೆ ಈಗ ಸ್ವಲ್ಪ ಕಡಿಮೆಯಾಗಿದೆ. ಆದರೆ ಕೆಳಪರ್ಕಳದಲ್ಲಿ ಇನ್ನೂ ಹಾಗೆ ಇದೆ. ಮಲ್ಪೆ ಆಗುಂಬೆ ನಡುವೆ ಒಂದು ದುರ್ಬಲ ವಲಯ ಇರುವುದನ್ನು ಹಿಂದೆಯೇ ಗುರುತಿಸಲಾಗಿದೆ. ಹಾಗಾಗಿ ಜನರ ಗಮನಕ್ಕೆ ಬಾರದೆ ಇದ್ದರೂ ಇಲ್ಲಿ ಕಂಪನ ಆಗಿದೆ. ಜನ ಹೆದರಿಕೊಳ್ಳಬೇಕಾಗಿಲ್ಲ. ಇದರ ಸ್ಪಷ್ಟ ಕಾರಣಗಳು ಮುಂದೆ ಇನ್ನಷ್ಟು ಅಧ್ಯಯನದ ಬಳಿಕ ತಿಳಿಯಲಿದೆ. - ಡಾ.ಬಿ.ಎಂ.ರವೀಂದ್ರ, ನಿವೃತ್ತ ಗಣಿ ಮತ್ತು ಭೂ ವಿಜ್ಞಾನಿ ಮಂಗಳೂರು ... * ಮೇಲ್ನೋಟಕ್ಕೆ ಕಂಡು ಬಂದಂತೆ, ಜನರು ನೀಡಿದ ಮಾಹಿತಿಯ ಆಧಾರವನ್ನೂ ಗಮನಿಸಿದಾಗ 20 ದಿನಗಳ ಹಿಂದೆ ಸಣ್ಣ ಕಂಪನ ಉಂಟಾಗಿದೆ. ಇದರಿಂದ ನೀರಿನ ಸೆಲೆಯ ಪಥ ಬದಲಾವಣೆಯಾಗಿದೆ. ಬೇರೆ ಪರಿಣಾಮಗಳ ಅಧ್ಯಯನ ಇನ್ನು ನಡೆಯಲಿದೆ. - ಎ.ಎಂ. ನಿರಂಜನ್, ಹಿರಿಯ ಭೂ ವಿಜ್ಞಾನಿ, ಉಡುಪಿ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ

- ಬಾಲಕೃಷ್ಣ ಶಿಬಾರ್ಲ ಉಡುಪಿ, ವಿಜಯ ಕರ್ನಾಟಕ ಕೃಪೆ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com