ದುಃಖ ಮನುಷ್ಯನನ್ನು ಪರಿಪಕ್ವಗೊಳಿಸುತ್ತದೆ: ರಾಘವೇಶ್ವರ ಶ್ರೀ

ಶಿರೂರು : ಮುನುಷ್ಯನಿಗೆ ಅಕ್ಕಿ ತಿಂದು ಬದುಕಲು ಸಾಧ್ಯವಿಲ್ಲ. ಅದನ್ನು ಬೆಂಕಿಯಿಂದ ಬೇಯಿಸಿದಾಗ ಅದು ಪಕ್ವಗೊಂಡು ಅನ್ನವಾಗುತ್ತದೆ. ಆಗ ಅದನ್ನು ತಿಂದು ಬದುಕುಬಹುದು. ಹಾಗೆಯೇ ಮನುಷ್ಯ ತನ್ನ ಜೀವಿತಾವಧಿಯಲ್ಲಿ ಬರುವ ದುಃಖಗಳಿಂದ ಬೆಂದ ಹಾಗೆಯೇ ಆತನ ಮನಸ್ಸು ಪರಿಪಕ್ವಗೊಳ್ಳುತ್ತದೆ ಎಂದು ಹೊಸನಗರ ರಾಮಚಂದ್ರಾಪುರ ಮಠದ ಶ್ರೀ ರಾಘವೇಶ್ವರ ಭಾರತಿ ಸ್ವಾಮೀಜಿ ಹೇಳಿದರು. 

ಶಿರೂರು ಗೋಳಿಗುಂಡಿ ಅಮೃತಧಾರಾ ಗೋಶಾಲೆ ಆವರಣದಲ್ಲಿ ನೂತನವಾಗಿ ನಿರ್ಮಾಣ ಗೊಂಡ ಶ್ರೀ ಶನೀಶ್ಚರ ದೇವಸ್ಥಾನದ ಪ್ರತಿಷ್ಠಾ ಮಹೋತ್ಸವದಲ್ಲಿ ನಡೆದ ಧಾರ್ಮಿಕ ಸಭೆಯಲ್ಲಿ ಆಶೀರ್ವಚನ ನೀಡಿದರು. 

ಶನಿಯು ಮನುಷ್ಯನ ಜೀವನದಲ್ಲಿ ದುಃಖ ಕೊಡುವ ಗೃಹವಾದರೂ ಅವನಿಲ್ಲದೆ ಮೋಕ್ಷವಿಲ್ಲ, ಅವನ ಕೃಪೆಯಿದ್ದರೆ ನೀರಿನೊಳಗಿರುವ ಕಮಲದಂತೆ ಜೀವನ ನಡೆಸಬಹುದಾಗಿದೆ. ಸ್ವರ್ಗ, ನರಕಗಳ ಬಗ್ಗೆ ವ್ಯಾಖ್ಯಾನಿಸಿದ ಅವರು ಮನುಷ್ಯನಿಗೆ ಸ್ವರ್ಗ ಸುಖಕ್ಕಿಂತ ನರಕವೇ ವಾಸಿ, ಸ್ವರ್ಗದಲ್ಲಿ ನಾವು ಮಾಡಿದ ಪುಣ್ಯ ಖರ್ಚಾದರೆ, ನರಕ ಎನ್ನುವುದು ಆಸ್ಪತ್ರೆ ಇದ್ದ ಹಾಗೆ. ಅಲ್ಲಿ ನಮ್ಮ ಪಾಪ ಕರ್ಮಗಳಿಗೆ ಚಿಕಿತ್ಸೆ ನೀಡುವುದರ ಮೂಲಕ ನಮ್ಮ ಪಾಪ ಕಾರ್ಯಗಳು ಕಡಿಮೆಯಾಗುತ್ತದೆ. ಜೀವನದಲ್ಲಿ ದುಃಖ ಕೊಡುವವನು ಶನಿಯಾದರೂ ಅವನ ಆರಾಧನೆಯಿಂದ ಕಷ್ಟಗಳು ಪರಿಹಾರ ಕಾಣುತ್ತದೆ. ಈ ಭೂಮಿಯಲ್ಲಿ ಜನಿಸಿದ ಮನುಷ್ಯ ತಮ್ಮ ಕರ್ತವ್ಯ ಮರೆತು ಬೇರೇನೊ ಚಿಂತಿಸುತ್ತಿದ್ದರೆ, ಅವನಿಗೆ ಸಾಯುವಾಗ ಭಯವಾಗುತ್ತದೆ. ಆದ್ದರಿಂದ ಈ ಮನುಷ್ಯ ಜನ್ಮದಲ್ಲಿ ಸತ್ಯ ಮತ್ತು ಪ್ರಾಮಾಣಿಕವಾಗಿ ನಮ್ಮ ಕರ್ತವ್ಯಗಳನ್ನು ಪೂರ್ಣಗೊಳಿಸಿದರೆ ಯಾವ ಭಯವೂ ಇರಲಾರದು ಎಂದರು. 

ದೇವಳದ ನಿರ್ಮಾಣ ಕಾರ್ಯಕ್ಕೆ ಸಹಕರಿಸಿದ ದಾನಿಗಳನ್ನು ಸ್ವಾಮೀಜಿ ಗೌರವಿಸಿದರು. ಟ್ರಸ್ಟಿನ ಕಾರ್ಯದರ್ಶಿ ಸುರೇಶ ಅವಭೃತ ಪ್ರಾಸ್ತಾವಿಕ ಮಾತನಾಡಿದರು. ಯು. ಚಂದ್ರಶೇಖರ ಹೊಳ್ಳ ಸ್ವಾಗತಿಸಿದರು. ಶ್ರೀಧರ ಅವಭೃತ ವಂದಿಸಿದರು. ಬೆಳಗ್ಗೆ ಶ್ರೀ ಶನೀಶ್ಚರನ ಸನ್ನಿಧಾನದಲ್ಲಿ ಲೋಕ ಕಲ್ಯಾಣಾರ್ಥ ಹೋಮ, ಹವನಾದಿಗಳು ನಡೆದವು. ಈ ಸಂದರ್ಭ ದೇವಳದಲ್ಲಿ ಸ್ವಾಮೀಜಿಯವರು ತುಲಾಭಾರ ಸೇವೆ ನೆರವೇರಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com