ಉಡುಪಿಯಲ್ಲಿ ಜಿಲ್ಲಾ ಮಟ್ಟದ ಮುಖ್ಯ ಶಿಕ್ಷಕರ ಸಮಾವೇಶ

ಉಡುಪಿ: ಸರಕಾರಿ ಶಾಲೆಗಳಲ್ಲಿ ದಿನದಿಂದ ದಿನಕ್ಕೆ ಮಕ್ಕಳ ಸಂಖ್ಯೆ ಕುಸಿಯುತ್ತಿರುವುದು ಕೇವಲ ಸರಕಾರಕ್ಕೆ ಮಾತ್ರವಲ್ಲ, ಪಾಠ ಮಾಡುವ ಮೇಸ್ಟ್ರು, ಎಚ್‌ಎಂ, ಬಿಇಓ, ಡಿಡಿಪಿಐ..ಹೀಗೆ ಇಲಾಖೆಯ ಅಸ್ತಿತ್ವಕ್ಕೆ ಸಂಚಕಾರ ತಂದೊಡ್ಡಲಿದೆ. 

ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ 4-5 ವರ್ಷಗಳಲ್ಲಿ ಸರಕಾರಿ ಶಾಲೆಗಳಿಗೆ ಬೀಗ ಬೀಳುವ ಸಾಧ್ಯತೆ ದೂರವಿಲ್ಲ ಎಂಬ ಗಂಭೀರ ಆತಂಕ ಭಾನುವಾರ ಉಡುಪಿಯಲ್ಲಿ ನಡೆದ ಜಿಲ್ಲಾ ಮಟ್ಟದ ಮುಖ್ಯ ಶಿಕ್ಷಕರ ಸಮಾವೇಶದಲ್ಲಿ ವ್ಯಕ್ತವಾಯಿತು. 

ಉಡುಪಿಯ ದುರ್ಗಾ ಹೋಟೆಲ್ ಸಭಾಂಗಣದಲ್ಲಿ ರಾಜ್ಯ ಸರಕಾರಿ ಹಿರಿಯ ಹಾಗೂ ಪದವೀಧರೇತರ ಮುಖ್ಯ ಶಿಕ್ಷಕರ ಸಂಘದ ಜಿಲ್ಲಾ ಸಮಿತಿ ಆಶ್ರಯದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಪ್ರಾಥಮಿಕ ಶಾಲಾ ಮುಖ್ಯ ಶಿಕ್ಷಕರ ಹಲವಾರು ಸಮಸ್ಯೆಗಳ ಜತೆಗೆ ಕುಸಿಯುತ್ತಿರುವ ಮಕ್ಕಳ ಸಂಖ್ಯೆ ಶಿಕ್ಷಕರನ್ನು ಅಧೀರರನ್ನಾಗಿಸಿತು. 

ಸನ್ಮಾನ ಸ್ವೀಕರಿಸಿ ಮಾತನಾಡಿದ ಜಿಲ್ಲಾ ವಿದ್ಯಾಂಗ ಉಪನಿರ್ದೇಶಕ ನಾಗೇಂದ್ರ ಮಧ್ಯಸ್ಥ, ಪ್ರಾಥಮಿಕ ಶಾಲೆಯ ಎಚ್‌ಎಂಗಳ ಬೇಡಿಕೆಗೆ ಸರಕಾರದ ಸಕರಾತ್ಮಕ ಸ್ಪಂದನೆ ಹೆಚ್ಚು ಕಾಲ ಬಾಳಲು ಸರಕಾರಿ ಶಾಲೆಗಳಲ್ಲಿ ಮಕ್ಕಳ ಸಂಖ್ಯೆಯನ್ನು ಹೆಚ್ಚಿಸಬೇಕಾದ ಅನಿವಾರ್ಯತೆ ಇದೆ. ಶಾಲೆಗೆ ಒಬ್ಬ ಮುಖ್ಯ ಶಿಕ್ಷಕ, ನಾಲ್ವರು ಶಿಕ್ಷಕರಿರಬೇಕು ಎನ್ನುವುದಕ್ಕೆ ವಿರೋಧವಿಲ್ಲದಿದ್ದರೂ ಕುಸಿಯುತ್ತಿರುವ ಮಕ್ಕಳ ಸಂಖ್ಯೆ ಆತಂಕ ತಂದಿದೆ. ಜಿಲ್ಲೆಯಲ್ಲಿಯೇ ಸುಮಾರು 200 ಶಾಲೆಗಳಲ್ಲಿ 30ಕ್ಕೂ ಕಡಿಮೆ ಮಕ್ಕಳಿದ್ದಾರೆ. ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ಸರಕಾರಿ ಶಾಲೆಗಳಿಗೆ ಬೀಗ ಜಡಿಯಬೇಕಾದೀತು ಎಂದು ಆತಂಕ ವ್ಯಕ್ತಪಡಿಸಿದರು. 

ಮಕ್ಕಳಿದ್ದರೆ ಶಾಲೆ. ಶಾಲೆಯಿದ್ದರೆ ಶಿಕ್ಷಕ, ಎಚ್‌ಎಂ. ಇವರೆಲ್ಲ ಇದ್ದರೆ ಬಿಇಓ, ಡಿಡಿಪಿಐ...ಹೀಗೆ ಒಂದಕ್ಕೊಂದು ಅವಲಂಬನೆಯಿದೆ. ಖಾಸಗಿ ಆಂಗ್ಲ ಮಾಧ್ಯಮ ಶಾಲೆಗಳ ಪೈಪೋಟಿ ನೋಡಿದರೆ ಇನ್ನೆರಡು ವರ್ಷದಲ್ಲಿ ಆಂಗ್ಲ ಮಾಧ್ಯಮ ಸರಕಾರಿ ಶಾಲೆಗಳನ್ನು ಆರಂಭಿಸದೆ ಸರಕಾರಕ್ಕೆ ದಾರಿಯಿಲ್ಲ ಎಂಬಂತಾಗಬಹುದು. ಜಿಲ್ಲೆಯಲ್ಲಿ 1.60 ಲಕ್ಷ ಶಾಲಾ ಮಕ್ಕಳಲ್ಲಿ 60 ಸಾವಿರ ಮಕ್ಕಳು ಅನುದಾನ ರಹಿತ ಶಾಲೆಗಳಲ್ಲಿ ಓದುತ್ತಿದ್ದಾರೆ. ಆದ್ದರಿಂದ ಸರಕಾರಿ ಶಾಲೆಗಳಲ್ಲಿ ಗುಣಮಟ್ಟದ ಶಿಕ್ಷಣ ದೊರಕುವಂತಾಗಲು ಶಿಕ್ಷಕರು ಸಮಾಜದ ನಿರೀಕ್ಷೆಗೆ ಸ್ಪಂದಿಸಬೇಕು. ತಮ್ಮ ಜ್ಞಾನ ಕೌಶಲವನ್ನು ವೃದ್ಧಿಸಿಕೊಂಡು ಸಮಸ್ಯೆ ಬಗೆಹರಿಸಲು ಪ್ರಯತ್ನಿಸಬೇಕು ಎಂದರು. 

ಮಕ್ಕಳೇ ಮಾಹಿತಿ ಹಕ್ಕಿನಲ್ಲಿ ಕೇಳಿಯಾರು: ಮಾಹಿತಿ ಹಕ್ಕು ಜಾರಿಗೆ ಬಂದ ನಂತರ ಪ್ರತಿಯೊಂದನ್ನು ಸಮರ್ಪಕ, ಪ್ರಮಾಣಬದ್ಧವಾಗಿ ದಾಖಲಿಸಿಕೊಳ್ಳುವುದು ಅಗತ್ಯ. ಕೇಂದ್ರ ಸರಕಾರ ಇದೀಗ ಇಲಾಖೆಯನ್ನು ಮಾನವ ಸಂಪನ್ಮೂಲ ಅಭಿವೃದ್ಧಿ ಇಲಾಖೆ ಎಂಬುದಾಗಿ ಗುರುತಿಸಿದೆ. ಇಂದು ಸರಕಾರಿ ಶಾಲೆಗಳಿಗೆ ಸಂಪನ್ಮೂಲದ ಕೊರತೆಯಿಲ್ಲ. ಹಾಗಾಗಿ ಶಾಲೆಗಳಲ್ಲಿ ವಿಕಲಮತಿ ವಿದ್ಯಾರ್ಥಿಗಳ ನಿರ್ಮಾಣವಾಗಬಾರದು. ಹೀಗಾದರೆ ಸಮಾಜದ ಅಸ್ತಿತ್ವ ಸಂಕಷ್ಟಕ್ಕೀಡಾಗಬಹುದು. ಸಮಾಜದ ನೆಮ್ಮದಿ ಶಿಕ್ಷಕರ ಮೇಲಿದೆ. ಹಂತಹಂತವಾಗಿ ಸರಕಾರಿ ಶಾಲೆಗಳಲ್ಲಿಯೇ ಕಲಿಯುವಂತಾಗಬೇಕು. ಏಕರೂಪದ ಗುಣಮಟ್ಟದ ಶಿಕ್ಷಣದ ಆಶಯ ಈಡೇರಬೇಕು. ಶಾಲಾ ಮುಖ್ಯ ಶಿಕ್ಷಕ ಅಸಡ್ಡೆಯಿಂದ ವರ್ತಿಸಿದರೆ, ಮಕ್ಕಳ ಶೈಕ್ಷಣಿಕ ಪ್ರಗತಿ ಕುಂಠಿತವಾದರೆ ಮಕ್ಕಳೇ ಮಾಹಿತಿ ಹಕ್ಕು ಕಾಯ್ದೆಯನ್ನು ಬಳಸಿಕೊಂಡು ತಮ್ಮನ್ನೇಕೆ ಅನುತ್ತೀರ್ಣ ಮಾಡಲಾಗಿದೆ ಎಂಬುದರ ಬಗ್ಗೆ ಪ್ರಶ್ನಿಸಬಹುದು. ಆದ್ದರಿಂದ ಎಚ್‌ಎಂಗಳು ಮೈಮರೆಯುವ ಹಾಗಿಲ್ಲ ಎಂದು ಎಚ್ಚರಿಸಿದರು. 

ಮಾನವ ಸಂಪನ್ಮೂಲ ಸೂಚ್ಯಂಕ ಸರ್ವೆ: ಮಾನವ ಅಭಿವೃದ್ಧಿ ಸಂಪನ್ಮೂಲ ಸೂಚ್ಯಂಕವನ್ನು ಉತ್ತಮ ಪಡಿಸುವುದು ಅಗತ್ಯ. ಶಾಲಾ ಅನುದಾನವನ್ನು ಸಮರ್ಪಕವಾಗಿ ಬಳಸಿಕೊಳ್ಳಬೇಕಿದೆ. ಮಕ್ಕಳ ಒಟ್ಟಾರೆ ಶೈಕ್ಷಣಿಕ ಪ್ರಗತಿಗಾಗಿ ಮಾನವ ಸಂಪನ್ಮೂಲ ಅಭಿವೃದ್ಧಿ ಸೂಚ್ಯಂಕದ ಸರ್ವೆಗಾಗಿ ಇಲಾಖೆ ಮುಂದಾಗಲಿದೆ. ಶಿಕ್ಷಕರು ಸಮರ್ಪಣಾ ಮನೋಭಾವದಿಂದ ತೊಡಗಿಸಿಕೊಳ್ಳಬೇಕು ಎಂದು ವಿದ್ಯಾಂಗ ನಿರ್ದೇಶಕ ನಾಗೇಂದ್ರ ಮಧ್ಯಸ್ಥ ತಿಳಿಸಿದರು. 

ಪ್ರಾಥಮಿಕ ಶಾಲೆ ಮುಖ್ಯ ಶಿಕ್ಷಕರ ಸಂಘದ ಜಿಲ್ಲಾಧ್ಯಕ್ಷ ಮಂಜುನಾಥ ನಾಯ್ಕ್, ರಾಜ್ಯ ಸಂಘದ ಪ್ರಧಾನ ಕಾ.ರ‌್ಯದರ್ಶಿ ಎಲ್. ಅಶ್ವಥಯ್ಯ, ವಲಯ ಪದಾಧಿಕಾರಿಗಳಾದ ವಂಕ ಉಪ್ಪಾರ್, ಎಂ.ಕೆ. ವಾಸುದೇವ, ಶಂಭು ಸುವರ್ಣ, ಶಕುಂತಳಾ ಉಪಸ್ಥಿತರಿದ್ದರು. 

ಜಿಲ್ಲಾ ಸಮಿತಿಯ ಗೌರವಾಧ್ಯಕ್ಷ ಸುಂದರ್ ಎ. ಪ್ರಾಸ್ತಾವಿಕ ಮಾತನಾಡಿದರು. ಪ್ರಧಾನ ಕಾರ‌್ಯದರ್ಶಿ ಪ್ರಕಾಶ್ ಬಿ.ಬಿ. ಸ್ವಾಗತಿಸಿದರು. ಪ್ರಶಾಂತ್ ಶೆಟ್ಟಿ ಹಾರಂಜೆ ಹಾಗೂ ವೆಂಕಟ್ ನೆಲ್ಮಂಕಿ ಕಾರ್ಯಕ್ರಮ ನಿರೂಪಿಸಿದರು. 

ಬಡ್ತಿಗೆ ಮೀನಮೇಷ: ಪ್ರಾಥಮಿಕ ಶಾಲಾ ಎಚ್‌ಎಂಗಳಿಗೆ ಇನ್‌ಕ್ರಿಮೆಂಟ್ ನೀಡಲು ಮೀನಮೇಷ ಯಾಕೆ? ಸಮಾವೇಶವನ್ನು ಉದ್ಘಾಟಿಸಿ ಮಾತನಾಡಿದ ರಾಜ್ಯ ಪ್ರಾಥಮಿಕ ಶಾಲೆ ಮುಖ್ಯ ಶಿಕ್ಷಕರ ಸಂಘದ ಅಧ್ಯಕ್ಷ ಕೆ. ಕೃಷ್ಣಪ್ಪ ಅವರು ಸರಕಾರಿ ಪ್ರಾಥಮಿಕ ಶಾಲೆಗಳ ಮುಖ್ಯ ಶಿಕ್ಷಕರು ಅನುಭವಿಸುತ್ತಿರುವ ಸಂಕಷ್ಟಗಳ ಬಗ್ಗೆ ಸಿಎಂ ಸಿದ್ದರಾಮಯ್ಯಸೇರಿದಂತೆ ಇಲಾಖೆ ಸಚಿವರ ಗಮನಕ್ಕೆ ತರಲಾಗಿದೆ. ಇದೀಗ ಚುನಾವಣಾ ನೀತಿ ಸಂಹಿತೆ ಜಾರಿಯಲ್ಲಿರುವ ಕಾರಣ ಕೆಲವೊಂದು ಬೇಡಿಕೆಗಳು ಈಡೇರುವ ಹಂತದಲ್ಲಿದ್ದು ಅವುಗಳನ್ನು ಚುನಾವಣೆ ನಂತರ ಘೋಷಣೆ ಮಾಡಲಾಗುವುದು ಎಂದರು. 

ಸರಕಾರಿ ಪ್ರಾಥಮಿಕ ಶಾಲೆಗಳ ಎಚ್‌ಎಂಗಳ ಕರ್ತವ್ಯ, ಜವಾಬ್ದಾರಿಗಳ ಬಗ್ಗೆ ಮಾರ್ಗದರ್ಶಿ ಸೂತ್ರವಿಲ್ಲ. ಎಲ್ಲ ಅನಾಹುತ, ಅಚಾತುರ್ಯಗಳಿಗೂ ಎಚ್‌ಎಂಗಳನ್ನೇ ಹೊಣೆಗಾರರ ನ್ನಾಗಿಸಲಾಗುತ್ತಿದೆ. ಸರಕಾರದ ಯೋಜನೆಗಳ ಅನುಷ್ಠಾನದ ಜವಾಬ್ದಾರಿ, ತರಬೇತಿಯ ಒತ್ತಡದಲ್ಲಿ ಬಿಪಿ, ಶುಗರ್‌ನ್ನು ಹೆಚ್ಚಿಸಿಕೊಂಡಿರುವುದೇ ಎಚ್‌ಎಂಗಳ ಸಾಧನೆ ಎಂಬಂತಾಗಿದೆ. ಕಾಲಕಾಲಕ್ಕೆ ನೀಡಬೇಕಾದ ಇನ್‌ಕ್ರಿಮೆಂಟ್‌ಗಳ್ನನು ನೀಡಲು ಮೀನಮೇಷ ಎಣಿಸಲಾಗುತ್ತಿದೆ. ವಿಶೇಷ ಭತ್ಯೆಯಲ್ಲೂ ತಾರತಮ್ಯ ನಡೆದಿದೆ. 

ಪ್ರಾಥಮಿಕ ಶಾಲಾ ಮುಖ್ಯ ಶಿಕ್ಷಕರು ಬಿಇಓ ಹುದ್ದೆಯನ್ನು ನಿಭಾಯಿಸಲು ಸಮರ್ಥರಿದ್ದಾರೆ. ಅವರೆಂದಿಗೂ ತಮ್ಮ ಜವಾಬ್ದಾರಿಯಿಂದ ನುಣುಚಿಕೊಂಡಿಲ್ಲ. ಪರಿಸ್ಥಿತಿ ಹೀಗಿದ್ದರೂ ಸಿಗಬೇಕಾದ ಸ್ಥಾನಮಾನ, ಗೌರವಗಳನ್ನು ನೀಡಲು ಹಿಂದೇಟು ಹಾಕುವುದೇಕೆ ಎಂದು ಪ್ರಶ್ನಿಸಿದರು. 

ಮುಂದಿನ 8 ತಿಂಗಳಲ್ಲಿ ರಾಜ್ಯದಲ್ಲಿ 8 ಸಾವಿರ ಮಂದಿ ಎಚ್‌ಎಂಗಳು ಹೆಚ್ಚುವರಿಯಾಗಲಿದ್ದಾರೆ. ಸರಕಾರಿ ದುಡ್ಡು ತಿಂದು ಹಾಕುವ ಎಚ್‌ಎಂಗಳಿಲ್ಲ. ಆದರೆ ನಿರ್ವಹಣೆ ಮಾಡುವಲ್ಲಿ ಎಡವಟ್ಟು ಮಾಡಿಕೊಂಡಿರಬಹುದು. 30 ದಿನಗಳ ಗಳಿಕೆ ರಜೆ, 60 ಮಕ್ಕಳಿರುವ ಶಾಲೆಗೆ ಎಚ್‌ಎಂ ಹುದ್ದೆ, 8ನೇ ತರಗತಿಯಿರುವಲ್ಲಿ ಪದವಿಧರೇತರ ಎಚ್‌ಎಂ ನೇಮಕ ಮೊದಲಾದ 9 ಬೇಡಿಕೆಗಳನ್ನು ಸರಕಾರದ ಮುಂದಿಡಲಾಗಿದ್ದು, ಅದನ್ನು ಬಗೆ ಹರಿಸುವ ಭರವಸೆ ಸಚಿವರಿಂದ ದೊರೆತಿದೆ ಎಂದರು.
ಕೃಪೆ: ವಿಜಯ ಕರ್ನಾಟಕ
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com