ಜೆಡಿಎಸ್ ಜಿಲ್ಲಾಧ್ಯಕ್ಷರ ಕಾರ್ಯವೈಖರಿಗೆ ಬೇಸತ್ತು ನಾಲ್ವರು ರಾಜೀನಾಮೆ

ಉಡುಪಿ: ಜೆಡಿಎಸ್ ಜಿಲ್ಲಾಧ್ಯಕ್ಷರ ಕಾರ್ಯವೈಖರಿಗೆ ಬೇಸರಗೊಂಡು ನಾಲ್ವರು ಜೆಡಿಎಸ್ ಮುಖಂಡರು ರಾಜೀನಾಮೆ ನೀಡಿರುವುದಾಗಿ ಶನಿವಾರ ಪತ್ರಿಕಾಗೋಷ್ಠಿಯಲ್ಲಿ ಘೋಷಣೆ ಮಾಡಿದ್ದಾರೆ. ಕುಂದಾಪುರ ಬ್ಲಾಕ್ ಜೆಡಿಎಸ್ ಅಧ್ಯಕ್ಷ ಬಾರ್ಕೂರು ಸತೀಶ್ ಪೂಜಾರಿ, ಜೆಡಿಎಸ್ ಅಲ್ಪಸಂಖ್ಯಾತ ಘಟಕ ರಾಜ್ಯ ಕಾರ್ಯದರ್ಶಿ ಲೂಯಿಸ್ ಲೋಬೋ, ನೇಕಾರರ ಘಟಕ ಜಿಲ್ಲಾಧ್ಯಕ್ಷ ದಿವಾಕರ ಸಾಲ್ಯಾನ್, ನಗರ ಘಟಕ ಕಾರ್ಯದರ್ಶಿ ಲ್ಯಾನ್ಸಿ ಫರ್ನಾಂಡಿಸ್ ರಾಜೀನಾಮೆ ಘೋಷಿಸಿದವರು. 

ಈ ನಾಲ್ವರು ಪ್ರಮುಖರು ರಾಜ್ಯಾಧ್ಯಕ್ಷ ಕೃಷ್ಣಪ್ಪರಿಗೆ ಪತ್ರ ಬರೆದಿದ್ದು, ಅದರಲ್ಲಿ ರಾಜೀನಾಮೆಗೆ ಕಾರಣ ತಿಳಿಸಿದ್ದಾರೆ. ಈ ಬಾರಿಯ ಚುನಾವಣೆಯಲ್ಲಿ ಎಸ್‌ಡಿಪಿಐಯೊಂದಿಗೆ ಮಾಡಿಕೊಂಡ ಮೈತ್ರಿ ಜೆಡಿಎಸ್ ಪಕ್ಷ ಎತ್ತ ಸಾಗುತ್ತಿದೆ ಎಂಬುದು ತಿಳಿಯಬಹುದು. ಇದು ಸಿದ್ಧಾಂತ ರಹಿತ, ಸಂಘಟನೆ ರಹಿತ, ಅಧಿಕಾರದ ದಾಹದ ಕೃತ್ಯವಾಗಿದೆ. ಉಡುಪಿ-ಚಿಕ್ಕಮಗಳೂರಿಗೆ ಆಯ್ಕೆ ಮಾಡಿರುವ ಅಭ್ಯರ್ಥಿ ಹಿಂದೆ ಕರಾವಳಿಯ ಕುಡಿ, ಮುಂಬಯಿಯಲ್ಲಿರುವ ಪ್ರಸಿದ್ಧ ನಟಿಯೊಂದಿಗೆ ಅನುಚಿತವಾಗಿ ನಡೆದುಕೊಂಡು ತಮ್ಮ ಸ್ಥಾನ ಕಳೆದುಕೊಂಡವರು. ಮಹಿಳೆಯರ ಬಗ್ಗೆ ಗೌರವ ಇಲ್ಲದ ಇಂಥ ವ್ಯಕ್ತಿಯನ್ನು ಪಕ್ಷದ ಅಭ್ಯರ್ಥಿಯನ್ನಾಗಿ ಮಾಡಿರುವುದು ಪಕ್ಷಕ್ಕೆ ಕಳಂಕವಾಗಿದೆ ಎಂದು ರಾಜೀನಾಮೆ ನೀಡಿದವರು ದೂರಿದ್ದಾರೆ. 

ಜಿಲ್ಲಾಧ್ಯಕ್ಷರಿಗೆ ಪಕ್ಷ ಬೆಳೆಯುವುದು ಬೇಕಾಗಿಲ್ಲ. ಅವರೊಬ್ಬರೇ ಬೆಳೆದರೆ ಸಾಕು ಎಂಬ ಭಾವನೆಯಿಂದಾಗಿ ಜಿಲ್ಲೆಯಲ್ಲಿ ಜೆಡಿಎಸ್ ಕಟ್ಟಲು ಸಾಧ್ಯವಿಲ್ಲದ ವಾತಾವರಣ ಸೃಷ್ಟಿಯಾಗಿದೆ. ಎಸ್‌ಡಿಪಿಐ ಮುಸ್ಲಿಮರ ಬಜರಂಗ ದಳವಾಗಿದೆ. ಅದರ ಜತೆಗೆ ಕೈಜೋಡಿಸಿರುವುದು ಸರಿಯಲ್ಲ ಎಂದು ತಿಳಿಸಿದ್ದಾರೆ. 

ರಾಜೀನಾಮೆ ನೀಡಿರುವವರಲ್ಲಿ ಲೂಯಿಸ್ ಲೋಬೋ ಕಾಂಗ್ರೆಸ್ ಕಡೆ ಒಲವಿರುವುದಾಗಿ ತಿಳಿಸಿದ್ದು, ಉಳಿದವರು ಸದ್ಯ ಯಾವುದೇ ಪಕ್ಷಕ್ಕೆ ಹೋಗದೆ ಸ್ವತಂತ್ರರಾಗಿ ಉಳಿಯುವುದಾಗಿ ಘೋಷಿಸಿದ್ದಾರೆ. ತಮ್ಮ ಜತೆಗೆ ಸುಮಾರು 110 ಮಂದಿ ಕಾರ್ಯಕರ್ತರೂ ರಾಜೀನಾಮೆ ನೀಡಿದ್ದಾರೆ ಎಂದು ತಿಳಿಸಿದ್ದಾರೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com