ಪರ್ಕಳದಲ್ಲಿ ಜಲ ವಿಸ್ಮಯ

ಕಳೆದ ಏ.15ರಿಂದ ಕೆಳಪರ್ಕಳ, ದೇವಿನಗರ, ಬೈದಬೆಟ್ಟು ಪ್ರದೇಶದಲ್ಲಿ ಇದ್ದಕ್ಕಿದ್ದಂತೆ ನೀರು ಜಾಸ್ತಿಯಾಗ ತೊಡಗಿದ್ದಲ್ಲದೆ, ಪಕ್ಕದ ತೋಡುಗಳಲ್ಲೂ ನೀರು ತುಂಬತೊಡಗಿದೆ. ಆದರೆ ಪಕ್ಕದ ಈಶ್ವರನಗರದ ಜನ ಹೇಳುವ ಪ್ರಕಾರ ಏ.15ಕ್ಕಿಂತಲೂ ಮೊದಲೇ ನೀರು ಜಾಸ್ತಿಯಾಗತೊಡಗಿದೆ. ಜನ ಅದನ್ನು ಗಂಭೀರವಾಗಿ ತೆಗೆದುಕೊಂಡಿರಲಿಲ್ಲ. ಆದರೆ ಬಾವಿಗಳು ತುಂಬಿದಾಗ ಸಹಜವಾಗಿ ಎಲ್ಲರ ಗಮನ ಅತ್ತ ಹೋಗಿದೆ.

ಉಡುಪಿ ನಗರಸಭೆಯ ವ್ಯಾಪ್ತಿಯೂ ಸೇರಿದಂತೆ ಉಡುಪಿ ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ ನೀರಿನ ಸಮಸ್ಯೆ ಎದುರಾಗಿದೆ. ಅಲ್ಲೆಲ್ಲೂ ಈ ರೀತಿ ನೀರು ಉಕ್ಕಿ ಬಂದು ಸಮಸ್ಯೆ ಇತ್ಯರ್ಥವಾಗಿಲ್ಲ. ಪರ್ಕಳದ ಸುತ್ತಮುತ್ತಲ ಪ್ರದೇಶಗಳಲ್ಲಿ ಮಾತ್ರ ಈ ಜಲಪವಾಡ ನಡೆದಿದೆ. ನಗರಸಭೆಯ ನೀರಿನ ಪೈಪ್ ಒಡೆದು ಹೋಗಿ ಈ ರೀತಿಯ ಸಮಸ್ಯೆ ಉಂಟಾಗಿರಬೇಕು. ಕೂಡಲೇ ನಗರಸಭೆ ಎಚ್ಚೆತ್ತುಕೊಂಡು ಸರಿಪಡಿಸಬೇಕು ಎಂದು ಕೆಲವರು ಈ ನಡುವೆ ನಗರಸಭೆಗೆ ದೂರು ಸಲ್ಲಿಸಿದ್ದಾರೆ.

ಪೌರಾಯುಕ್ತ ಶ್ರೀಕಾಂತ್ ರಾವ್, ಎಂಜಿನಿಯರ್ ಶಶಿಧರ ಹೆಗ್ಡೆ ಮತ್ತು ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ ತಪಾಸಣೆ ನಡೆಸಿ, ನಗರಸಭೆಯ ನೀರಿನ ಪೈಪ್ ಒಡೆದಿಲ್ಲ ಎಂದು ಸ್ಪಷ್ಟಪಡಿಸಬೇಕಾಯಿತು.

ದೇವಿಬೆಟ್ಟು ಶಕ್ತಿ ಬಾಯಿ ಅವರ ಮನೆಯ ಬಾವಿಯಲ್ಲಿ ಏಪ್ರಿಲ್‌ನಲ್ಲಿ ಮೂರಡಿ ನೀರಿಗಿಂತ ಜಾಸ್ತಿ ಇರುತ್ತಿರಲಿಲ್ಲ. ಈಗ ಏಪ್ರಿಲ್‌ನ ಸಾಮಾನ್ಯ ಮಟ್ಟಕ್ಕಿಂತ 10 ಅಡಿ ಹೆಚ್ಚು ನೀರಿದೆ. ಅನಸೂಯ ಶೇರಿಗಾರ್, ಸುರೇಶ್ ಪೂಜಾರಿ, ಕೆಳಪರ್ಕಳದ ಮುಕುಂದ ನಾಯ್ಕ್, ಅಪ್ಪು ನಾಯ್ಕ, ಅಣ್ಣಯ್ಯ ನಾಯ್ಕ, ಪಾರ್ವತಿ ಮತ್ತಿತರ ಮನೆಗಳ ಬಾವಿಗಳೂ ತುಂಬಿವೆ. ಬೈದಬೆಟ್ಟು ವಾಮನನಾಯ್ಕರು ತಮ್ಮ ಗದ್ದೆ ಬದಿಯ ತೋಡಿನಲ್ಲಿ ನೀರುತುಂಬಿದ್ದನ್ನು ನೇರವಾಗಿ ಬೆಂಡೆಗಿಡಗಳಿಗೆ ಹಾಯಿಸಿದ್ದಾರೆ.

ಭಯಮಿಶ್ರಿತ ಚೋದ್ಯ: ಕೃಷಿ ಮಾಡಿಕೊಂಡು, ಕೆಲಸ ಮಾಡಿಕೊಂಡು ಇರುವವರೇ ಜಾಸ್ತಿ ಇರುವ ಕೆಳಪರ್ಕಳ, ದೇವಿನಗರ, ಬೈದಬೆಟ್ಟಿನ ಜನ ಈ ಜಲವಿಸ್ಮಯಕ್ಕೆ ಚೋದ್ಯಗೊಂಡಿದ್ದರೂ, ಕಲಿಗಾಲದ ಮಹಿಮೆ ಎಂದು ಹೇಳಿದರೂ ಎಲ್ಲ ಭಾರವನ್ನು ದೇವರ ಮೇಲೆ ಹಾಕಿ ನಿಶ್ಚಿಂತೆಯಿಂದಿದ್ದಾರೆ. ನೀರು ಉಕ್ಕೇರುತ್ತಿರುವ ವಿಚಾರ ತಿಳಿದು ಬರುತ್ತಿರುವವರಿಗೆ ತಮ್ಮ ತಮ್ಮ ಬಾವಿಗಳಿಗೆ ಕರೆದುಕೊಂಡು ಹೋಗಿ ಹಿಂದೆ ಎಷ್ಟು ಇರುತ್ತಿತ್ತು. ಈಗ ಎಷ್ಟಿದೆ ಎಂದು ವಿವರಿಸುತ್ತಿದ್ದಾರೆ. ಆದರೆ ಅದಕ್ಕೆ ತಾಗಿಕೊಂಡೇ ಇರುವ ಈಶ್ವರನಗರದಲ್ಲಿ ಇರುವವರಲ್ಲಿ ಉನ್ನತ ವಿದ್ಯಾಭ್ಯಾಸ ಮಾಡಿದವರೇ ಹೆಚ್ಚು. ಮಣಿಪಾಲದಲ್ಲಿ ಅಥವಾ ಹೊರಗಡೆ ನಾನಾ ಹುದ್ದೆಗಳಲ್ಲಿ ಇರುವ ಈ ಜನರಿಗೆ ಈ ಬೆರಗನ್ನು ದೇವರ ಮೇಲೆ ಹಾಕಿ ಸುಮ್ಮನಿರಲು ಸಾಧ್ಯವಾಗುತ್ತಿಲ್ಲ. ಅವರಿಗೆ ಈ ವಿಸ್ಮಯದ ಜತೆಗೆ ಸಣ್ಣಪ್ರಮಾಣದ ಭಯವೂ ಕಾಡುತ್ತಿದೆ.

ಹಾಗಾಗಿ ಅವರು ಈ ಹಿಂದೆ ಎಲ್ಲೆಲ್ಲಿ ಈ ರೀತಿ ನೀರು ಕಾಣಿಸಿಕೊಂಡಿದೆ. ಆನಂತರ ಪರಿಣಾಮ ಏನಾಯಿತು ಎಂದು ಹುಡುಕುತ್ತಿದ್ದಾರೆ. ಎಂಐಟಿಯಲ್ಲಿ ಸಂಶೋಧಕನಾಗಿರುವ ಸುಂದರ್ ಕುಮಾರ್ ನೀರು ಜಾಸ್ತಿಯಾಗಿರುವುದನ್ನು ಎನ್‌ಐಟಿಕೆಯ ಭೂಗರ್ಭ ಶಾಸ್ತ್ರಜ್ಞರಿಗೆ ಇಮೇಲ್ ಮಾಡಿ ತಿಳಿಸಿದ್ದಾರೆ.

2011ರಲ್ಲಿ ಸೂರತ್‌ನಲ್ಲಿ ಹೀಗೆ ನೀರು ಹೆಚ್ಚಳವಾಗಿದ್ದು, ಮೂರು ತಿಂಗಳ ಬಳಿಕ ಗುಜರಾತ್‌ನಲ್ಲಿ ಸಣ್ಣ ಪ್ರಮಾಣದ ಭೂಕಂಪವಾಗಿರುವುದನ್ನು ತಿಳಿದುಕೊಂಡಿದ್ದಾರೆ. ಇದು ಮತ್ತಷ್ಟು ಗಾಬರಿಗೆ ಕಾರಣವಾಗಿದೆ. ಆದರೆ ಎಲ್ಲಿ ನೀರು ಹೆಚ್ಚಾಯಿತೋ ಅಲ್ಲಿ ಭೂಕಂಪವಾಗಿರಲಿಲ್ಲ. ಬೇರೆಲ್ಲೋ ಆಗಿತ್ತು ಅನ್ನುವುದು ಅವರಿಗೆ ಸಣ್ಣ ಸಮಾಧಾನ ನೀಡಿದೆ.

ಭಯ ಬೇಡ: ಜನ ಭಯಪಡಬೇಕಾಗಿಲ್ಲ. ಇದು ಭೂಮಿಯಡಿಯ ಜಲಪದರದಲ್ಲಿ ಉಂಟಾಗುವ ಒತ್ತಡದಿಂದಾಗ ಸ್ತರಭಂಗ ಉಂಟಾಗಿ ಅಂತರ್ಜಲ ಪಥ ಬದಲಾಯಿಸಿದಾಗ ಉಂಟಾಗುವ ವ್ಯತ್ಯಯದ ಪರಿಣಾಮವೇ ಇದು. ಒಂದು ಕಡೆ ನೀರು ಜಾಸ್ತಿಯಾಗುತ್ತದೆ. ಇನ್ನೆಲ್ಲೋ ಬತ್ತುತ್ತದೆ. ಇದಕ್ಕೆ ಜನ ಗಾಬರಿಪಡಬೇಕಾಗಿಲ್ಲ ಎಂದು ಮಣಿಪಾಲದ ಭೂಗರ್ಭ ಶಾಸ್ತ್ರಜ್ಞ ಡಾ. ಉದಯಶಂಕರ್ ಪದೇ ಪದೆ ಹೇಳುತ್ತಾ ಬಂದಿದ್ದಾರೆ. ಕೊಳವೆ ಬಾವಿ ತೋಡಿದಾಗಲೂ ಈ ರೀತಿ ಪಥ ಬದಲಾವಣೆಯಾಗಿ ನೀರು ತುಂಬುವುದೂ ಇದೆ. ಜನ ಭಯಪಡಬಾರದು ಎಂದು ಅವರ ಸಮರ್ಥನೆಯಾಗಿದೆ. ಕೊಳಚೆ ನೀರಿನಲ್ಲಿರುವ ಟಿಡಿಎಸ್ ಸೇರಿದಂತೆ ಯಾವುದೇ ರಾಸಾಯನಿಕ ಕಶ್ಮಲಗಳು ಇದರಲ್ಲಿ ಕಂಡು ಬಂದಿಲ್ಲ. ಇದು ಶುದ್ಧ ಅಂತರ್ಜಲವೇ ಆಗಿದೆ ಎಂದು ಅವರು ತಿಳಿಸಿದ್ದಾರೆ.

ಕುತೂಹಲಿಗರು: ಪ್ರತಿದಿನ ಬೆಳಗ್ಗೆ ಮತ್ತು ಸಂಜೆ ಕೆಳಪರ್ಕಳ ಸುತ್ತಮುತ್ತಲ ಪ್ರದೇಶಕ್ಕೆ ಕುತೂಹಲಿಗರ ಹಿಂಡು ಆಗಮಿಸಿ, ಜಲ ಕೌತುಕವನ್ನು ಕಣ್ಣಾರೆ ಕಂಡು ಹೋಗುತ್ತಿದ್ದಾರೆ. ಮೊದಮೊದಲು ಮಣಿಪಾಲದ ಸುತ್ತಮುತ್ತಲಿನವರಷ್ಟೆ ಬರುತ್ತಿದ್ದರೆ, ಈಗ ಜಿಲ್ಲೆಯ ಬೇರೆ ಬೇರೆ ಕಡೆಗಳಿಂದ ಜನ ಬರುತ್ತಿದ್ದಾರೆ. ಆದರೆ ಜಿಲ್ಲಾಡಳಿತ, ಜಿಲ್ಲಾಪಂಚಾಯಿತಿಯ ಅಧಿಕಾರಿಗಳಾಗಲಿ, ಸಿಬ್ಬಂದಿಗಳಾಗಲಿ ಇಲ್ಲಿಗೆ ಭೇಟಿ ನೀಡಿಲ್ಲ. ಜನಪ್ರತಿನಿಧಿಗಳೂ ಇದನ್ನು ಗಂಭೀರವಾಗಿ ಪರಿಗಣಿಸಿಲ್ಲ.

* ಜಿಲ್ಲಾಡಳಿತ, ರಾಜ್ಯಸರಕಾರ ಇದನ್ನು ಗಂಭೀರವಾಗಿ ಪರಿಗಣಿಸಬೇಕು. ನೀರುಕ್ಕಲು ನಿಜವಾದ ಕಾರಣ ಏನು ಎಂಬುದನ್ನು ಭೂವಿಜ್ಞಾನಿಗಳ ಮೂಲಕ ಕಂಡು ಹಿಡಿಯಲು ಪ್ರಯತ್ನಿಸಬೇಕು. ಜನರಿಗೆ ನಿಜವಾದ ಕಾರಣವನ್ನು ಹೇಳಬೇಕು.
-ಗಣೇಶ್‌ರಾಜ್ ಸರಳೇಬೆಟ್ಟು, ಪರ್ಕಳ

* ಬೇಸಿಗೆಯಲ್ಲಿ ನೀರಿನ ಉಜೆ (ಒರತೆ, ಒಸರು) ಕಾಣಿಸಿಕೊಂಡು ಬಾವಿಯಲ್ಲಿ ನೀರು ಹೆಚ್ಚಾಗಿರುವುದು, ಬಾವಿ ಪಕ್ಕದಲ್ಲಿರುವ ತೋಡುಗಳಲ್ಲಷ್ಟೆ ನೀರು ಹರಿಯುತ್ತಿರುವುದು ಅಚ್ಚರಿಯಾಗಿದೆ. ಇದಕ್ಕೆ ಕಾರಣ ಏನು ಎಂಬುದು ಗೊತ್ತಿಲ್ಲ. ತಿಳಿದವರು ತಿಳಿಸಿದರೆ ನಮ್ಮ ಭಯ ದೂರವಾಗಬಹುದು.
-ಅನಸೂಯ ದೇವಿನಗರ


-ಬಾಲಕೃಷ್ಣ ಶಿಬಾರ್ಲ ಉಡುಪಿ, ವಿಜಯ ಕರ್ನಾಟಕ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com