ಪಡಿತರ ವಿತರಣಾ ವ್ಯವಸ್ಥೆ ಸುಧಾರಣೆಗೆ ಕ್ರಮ

ಉಡುಪಿ: ಸಾರ್ವಜನಿಕ ಪಡಿತರ ವಿತರಣಾ ವ್ಯವಸ್ಥೆಯನ್ನು ಮತ್ತಷ್ಟು ಸುಧಾರಿಸುವ ಮತ್ತು ದುರುಪಯೋಗ ತಡೆಯುವ ದೃಷ್ಟಿಯಿಂದ ಪಡಿತರ ಚೀಟಿದಾರರ ಮೊಬೈಲ್ ಸಂಖ್ಯೆ, ಎಪಿಕ್(ಮತದಾರರ ಭಾವಚಿತ್ರ ಸಹಿತ ಗುರುತಿನ ಚೀಟಿ) ಹಾಗೂ ಯುಐಡಿ(ಆಧಾರ್) ಸಂಖ್ಯೆ ಪಡೆಯಲಾಗುತ್ತಿದೆ. 

ಪಡಿತರ ಚೀಟಿದಾರರು ತಮ್ಮ ಮೊಬೈಲಿನಿಂದ ಆರ್‌ಸಿಎಂಒಬಿ ಎಂದು ಟೈಪ್ ಮಾಡಿ ಒಂದು ಸ್ಪೇಸ್ ಬಿಟ್ಟು ತಮ್ಮ ರೇಶನ್ ಕಾರ್ಡು ಸಂಖ್ಯೆಯನ್ನು ನಮೂದಿಸಿ 921237123 ಸಂಖ್ಯೆಗೆ ಎಸ್‌ಎಂಎಸ್ ಕಳುಹಿಸಬೇಕು. ಬಳಿಕ ಇದೇ ಮೊಬೈಲ್‌ನಿಂದ ಆರ್‌ಸಿಇಪಿಐಸಿ ಎಂದು ಟೈಪ್ ಮಾಡಿ ಒಂದು ಸ್ಪೇಸ್ ಬಿಟ್ಟು ತಮ್ಮ ಎಪಿಕ್ ಸಂಖ್ಯೆಯನ್ನು ನಮೂಸಿದಿ 9212357123 ಸಂಖ್ಯೆಗೆ ಎಸ್‌ಎಂಎಸ್ ಕಳುಹಿಸಬೇಕು. 

ಇದೇ ಪ್ರಕಾರ ಕುಟುಂಬದ ಇತರ ಸದಸ್ಯರ ಎಪಿಕ್ ಸಂಖ್ಯೆಯನ್ನು ನಮೂದಿಸಿ ಎಸ್‌ಎಂಎಸ್ ಕಳುಹಿಸಬೇಕು. ಪಡಿತರ ಚೀಟಿದಾರರು ಯುಐಡಿ ಸಂಖ್ಯೆ ಹೊಂದಿದ್ದಲ್ಲಿ ಇದೇ ಮೊಬೈಲ್‌ನಿಂದ ಆರ್‌ಸಿಯುಐಡಿ ಎಂದು ಟೈಪ್ ಮಾಡಿ ಒಂದು ಸ್ಪೇಸ್ ಬಿಟ್ಟು ಯುಐಡಿ ಸಂಖ್ಯೆ ನಮೂದಿಸಿ 9212357123 ಸಂಖ್ಯೆಗೆ ಕುಟುಂಬದ ಮುಖ್ಯಸ್ಥರ ಹಾಗೂ ಇತರ ಸದಸ್ಯರ ಯುಐಡಿ ಸಂಖ್ಯೆಯನ್ನು ಇದೇ ಕ್ರಮದಲ್ಲಿ ಎಸ್‌ಎಂಎಸ್ ಮೂಲಕ ಕಳುಹಿಸಬೇಕು. 

ಪಡಿತರ ಚೀಟಿಯಲ್ಲಿರುವ ಎಲ್ಲಾ ಸದಸ್ಯರ ಎಪಿಕ್/ಯುಐಡಿ ಇಲ್ಲದಿದ್ದಲ್ಲಿ ಎಷ್ಟು ಸದಸ್ಯರ ಬಳಿ ಎಪಿಕ್/ಯುಐಡಿ ಸಂಖ್ಯೆ ಇದೆಯೋ ಅಷ್ಟನ್ನು ನೀಡಿ ಉಳಿದ ಸದಸ್ಯರ ಮಾಹಿತಿಯನ್ನು ಎಪಿಕ್/ಯುಐಡಿ ಪಡೆದ ನಂತರ ನೀಡಬಹುದು. ಪಡಿತರ ಚೀಟಿದಾರರು ಮೊಬೈಲ್ ಹೊಂದಿರದಿದ್ದರೆ ಪರಿಚಯದವರ ಮೊಬೈಲ್ ಬಳಸಬಹುದು. ಆದರೆ ಒಂದು ಮೊಬೈಲ್ ಸಂಖ್ಯೆಯನ್ನು ಮೂರಕ್ಕಿಂತ ಹೆಚ್ಚಿನ ಪಡಿತರ ಚೀಟಿಗಳಿಗೆ ನೀಡುವಂತಿಲ್ಲ. 

ಹೊಸ ಪಡಿತರ ಚೀಟಿಗಾಗಿ ಅರ್ಜಿ ಸಲ್ಲಿಸಿ, ದೊರೆಯದೇ ಇದ್ದವರು ಅವರ ಮೊಬೈಲಿನಿಂದ ಆರ್‌ಸಿಎಂಒಡಿ ಎಂದು ಟೈಪ್ ಮಾಡಿ ಒಂದು ಸ್ಪೇಸ್ ಬಿಟ್ಟು ತಮ್ಮ ಸರಿಯಾದ ಅರ್ಜಿ ಸಂಖ್ಯೆಯನ್ನು ನಮೂದಿಸಿ 9212357123 ಸಂಖ್ಯೆಗೆ ಎಸ್‌ಎಂಎಸ್ ಕಳುಹಿಸಿ ನಂತರ ಎಪಿಕ್, ಯುಐಸಿ ಸಂಖ್ಯೆಯನ್ನು ಎಸ್‌ಎಂಎಸ್ ಮೂಲಕ ಕಳುಹಿಸಬೇಕು. ಎಪಿಕ್ ಸಂಖ್ಯೆ ಮತ್ತು ಯುಐಡಿ ಸಂಖ್ಯೆ ಎಸ್‌ಎಂಎಸ್ ಮಾಡಿದವರ ಅರ್ಜಿಯನ್ನು ಆದ್ಯತೆಯಲ್ಲಿ ಇತ್ಯರ್ಥಪಡಿಸಲಾಗುವುದು. 

ಸಾರ್ವಜನಿಕ ಹಿತದೃಷ್ಟಿಯಿಂದ ಆದ್ಯತೆ ಮೇರೆಗೆ ಮಾಹಿತಿಯನ್ನು ಎಸ್‌ಎಂಎಸ್ ಮೂಲಕ ಕಳುಹಿಸಬೇಕು. ಹೆಚ್ಚಿನ ವಿವರಗಳಿಗೆ ಸಂಬಂಧಿತ ತಾಲೂಕು ಕಚೇರಿ, ಆಹಾರ ಶಾಖೆ ಮುಖ್ಯಸ್ಥರನ್ನು ಅಥವಾ ಉಡುಪಿ ಜಿಲ್ಲಾ ಆಹಾರ ಮತ್ತು ನಾಗರಿಕ ಪೂರೈಕೆ ಇಲಾಖೆಯನ್ನು ಸಂಪರ್ಕಿಸಬಹುದು.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com