ಬಿಜೂರು ಅರೆಕಲ್ಲು ಶ್ರೀ ದುರ್ಗಾಪರಮೇಶ್ವರಿ ದೇವಳದ ಶಿಲಾಮಯ ಗರ್ಭಗುಡಿಯ ಸಮರ್ಪಣೆ

ಬೈಂದೂರು: ಶಿಲಾಮಯ ದೇವಳ ನಿರ‌್ಮಾಣ ಜತೆ ಶೀಲಮಯ ಸಮಾಜ ನಿರ‌್ಮಾಣವಾಗಬೇಕು ಎಂದು ಶಿರಸಿ ಸೋಂದ ಸ್ವರ್ಣವಲ್ಲಿ ಮಠದ ಶ್ರೀ ಗಂಗಾಧರೇಂದ್ರ ಸರಸ್ವತಿ ಸ್ವಾಮೀಜಿ ನುಡಿದರು. 

  ಬಿಜೂರು ಅರೆಕಲ್ಲು ಶ್ರೀ ದುರ್ಗಾಪರಮೇಶ್ವರಿ ದೇವಳದ ಶಿಲಾಮಯ ಗರ್ಭಗುಡಿಯ ಸಮರ್ಪಣೆ, ನೂತನ ಬಿಂಬ ಪ್ರತಿಷ್ಠೆ ಹಾಗೂ ಸಪರಿವಾರ ದೇವರುಗಳ ಪ್ರತಿಷ್ಠೆ ಕಾರ‌್ಯಕ್ರಮದ ಧಾರ್ಮಿಕ ಸಭೆಯಲ್ಲಿ ಆಶೀರ್ವಚನ ನೀಡಿದರು. 

       ಮನುಷ್ಯನಿಗೆ ಭಗವಂತನ ಮೇಲಿನ ಭಕ್ತಿ ಅವನ ನಡತೆಯನ್ನು ಉತ್ತಮಗೊಳಿಸುತ್ತದೆ ಎಂದ ಸ್ವಾಮೀಜಿಗಳು, ಭಕ್ತಿಗೂ ನಡತೆಗೂ ಅವಿನಾಭಾವ ಸಂಬಂಧವಿದೆ.ಇವೆರಡು ಒಂದೇ ನಾಣ್ಯದ ಎರಡು ಮುಖಗಳಿದ್ದ ಹಾಗೆ ಎಂದರು. ಇತ್ತೀಚಿನ ದಿನಗಳಲ್ಲಿ ಕರಾವಳಿಯಲ್ಲಿ ನೂರಾರು ದೇವಳಗಳು ಶಿಲಾಮಯವಾಗಿ ರೂಪುಗೊಳ್ಳುತ್ತಿರುವುದು ಉತ್ತಮ ಬೆಳವಣೆಗೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ ಅವರು, ದೇವಳಗಳು ಮಾತ್ರ ಶಿಲಾಮಯವಾದರೆ ಸಾಲದು, ಇದರೊಂದಿಗೆ ಆ ಭಾಗದ ಜನರಲ್ಲಿ ಸನ್ನಡತೆ ಬೆಳೆಯಬೇಕಾಗಿದೆ ಎಂದರು. 

    ಮುಖ್ಯ ಅತಿಥಿಯಾಗಿದ್ದ ಶೃಂಗೇರಿ ಶಾರದಾ ಪೀಠದ ಪ್ರಾಂತೀಯ ಧರ್ಮಾಧಿಕಾರಿ ಎಚ್.ವಿ. ನರಸಿಂಹ ಮೂರ್ತಿ ಮಾತನಾಡಿ, ನೂತನ ದೇವಳ ನಿರ‌್ಮಾಣಕ್ಕಿಂತ, ಪ್ರಾಚೀನ ದೇವಳಗಳನ್ನು ಜೀರ್ಣೋದ್ಧಾರಗೊಳಿಸುವುದು ಪುಣ್ಯದ ಕಾರ‌್ಯವಾಗಿದೆ. ದೇವಳ ಜೀರ್ಣೋದ್ಧಾರಗೊಳಿಸಿದ ಮಾತ್ರಕ್ಕೆ ಸಾರ್ಥಕತೆ ಕಂಡುಕೊಳ್ಳಲು ಸಾಧ್ಯವಿಲ್ಲ, ಅಲ್ಲಿ ಪ್ರತಿದಿನ ಪೂಜಾ ಕೈಂಕರ್ಯ, ಅನ್ನದಾನ ಮೊದಲಾದವುಗಳು ನಡೆಯುವಂತೆ ನೋಡಿಕೊಳ್ಳಬೇಕು. ಆಗ ಮಾತ್ರ ದೇವಳ ನಿರ್ಮಾಣಕ್ಕೆ ನಿಜವಾದ ಅರ್ಥಬರುತ್ತದೆ ಎಂದರು. ಜೀರ್ಣೋದ್ಧಾರ ಸಮಿತಿಯ ಅಧ್ಯಕ್ಷ ರಾಮಕೃಷ್ಣ ಶೇರುಗಾರ ಅಧ್ಯಕ್ಷತೆ ವಹಿಸಿದ್ದರು.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :

0 comments:

Post a Comment

 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com